Humbulani nga hovhu vhuimo: Heather o no fhedza miṅwedzi mivhili fhedzi a tshi khou funana na Mike, fhedzi khae zwi tou nga ndi kale a tshi mu ḓivha. Vha dzulela u rumelana milaedza, vha amba tshifhinga tshilapfu kha founu nahone vho ḓowelana lune vha a ḓivha zwe muṅwe a vha a tshi ṱoḓa u zwi amba a sa athu fhedza na u amba! Fhedzi zwino Mike u vho ṱoḓa zwo engedzeaho.

Miṅwedzini mivhili yo fhiraho, Mike na Heather vho vha vha tshi sokou farana nga zwanḓa na u khisana zwiṱuku. Heather ha ṱoḓi uri vha ite zwi fhiraho zwenezwo. Fhedzi ha ṱoḓi u xelelwa nga Mike. Ndi Mike fhedzi ane a mu ita uri a ḓipfe e musidzana wa lunako, a funwaho vhukuma. U ḓivhudza uri, ‘Nṋe na Mike ri a funana . . . ’

Arali no vha ni vhuimo ha Heather nahone no no aluwa lune na nga funana na muṅwe muthu, no vha ni tshi ḓo ita mini?

Arali na thamuwa nṱha ha muri na lingedza u fhufha sa tshiṋoni ni ḓo huvhala vhukuma. Zwo tou ralo na musi na lingedza u pfuka mulayo wa matshilele, u ngaho sa une wa ri: “Ni fanela u iledza vhupombwe.”​—1 Vhathesalonika 4:3.

Ndi afhio masiandoitwa a u pfuka yeneyo ndaela? Bivhili i ri: “Ane a dzulela u ita vhupombwe u ita tshivhi tshine tsha kwama muvhili wawe.” (1 Vhakorinta 6:18) Naa zwenezwo ndi ngoho?

 Vhaṱoḓisisi vho wana uri vhaswa vhanzhi vhane vha ita zwa vhudzekani vha sa athu vha mbinganoni vha tshenzhela maṅwe a masiandoitwa a tevhelaho.

• MUTSIKO. Vhunzhi ha vhaswa vhe vha ita zwa vhudzekani vha sa athu vha mbinganoni vha amba uri vha a ḓisola.

• U SA FULUFHELANA. Nga murahu ha u ita zwa vhudzekani, muṅwe na muṅwe wavho u a ḓivhudzisa uri, ‘Ndi nnyi muṅwe we a ita zwa vhudzekani nae?’

• U ḒAḒA. Ngoho ndi uri vhasidzana vhanzhi vha takalela muthu ane a ḓo vha tsireledza, hu si ane a ḓo tamba ngavho. Kha ḽiṅwe sia, vhatukana vhanzhi a vha tsha takalela musidzana we vha lala nae.

• Mbuno ya ndeme: Arali na ita zwa vhudzekani ni sa athu vha mbinganoni, ni ḓitsitsa tshirunzi ngauri zwenezwo zwi ita uri ni xelelwe nga tshithu tsho khetheaho. (Vharoma 1:24) Muvhili waṋu ndi wa ndeme vhukuma lune a no ngo tea u u tshinya!

Sumbedzani uri ni a kona u ḓifara nga “u iledza vhupombwe.” (1 Vhathesalonika 4:3) Nga zwenezwo, musi no no vha mbinganoni, ni nga kona-ha u ita zwa vhudzekani. Ni ḓo ḓiphina ngazwo nga vhuḓalo, ni si na mbilaelo, u ḓisola na u ḓipfa no tshuwa, zwine kanzhi zwa vha masiandoitwa a vhathu vhane vha ita zwa vhudzekani vha sa athu vha mbinganoni.​—Mirero 7:22, 23; 1 Vhakorinta 7:3.

• Naa muthu ane a ni funa ngangoho a nga ni pfisa vhuṱungu muvhilini na kha maḓipfele?

• Naa muthu ane a ni funa ngangoho a nga ni linga uri ni tshinye vhushaka haṋu na Mudzimu?​—Vhaheberu 13:4.