Humbulani nga hovhu vhuimo: Hu sa athu fhela mimunithi ya fumi Karen a tshi kha ḓi tou bva u swika kha iṅwe phathi, u pfa ipfi ḽa muthu ane a mu ḓivha nga murahu hawe.

Musi Karen a tshi rembuluwa, u vhona khonani yawe Jessica o fara maboḓelo mavhili ane a kha ḓi tou bva u vulwa. A mbo ḓi zwi vhona uri ndi a halwa. Jessica ndi u mbo ḓi ṋea Karen ḽiṅwe ḽa hone a ri: “Na miṅwaha i a ni tendela uri ni ḓiphine, a si zwone kani?”

Karen u ṱoḓa u hana, fhedzi Jessica ndi khonani yawe. Nahone Karen ha ṱoḓi uri khonani yawe a humbule uri u a bora. Hafhu Jessica ndi ṅwana-ṅwana. Arali a tshi nwa, zwi amba uri u nwa a zwo ngo tou khakhea nga u tou ralo-vho lini. Karen u ḓivhudza uri ‘Ndi u sokou dzimula ḓora. A zwi fani na u shumisa zwidzidzivhadzi.’

No vha ni tshi ḓo ita mini arali no vha ni vhuimoni vhu fanaho na ha Karen?

Uri ni dzhie tsheo ya vhuṱali kha vhuimo vhu fanaho na honovhu, ni tea u ḓiḓivha. U ḓiḓivha zwi amba u ḓivha zwine na vha zwone na zwine na zwi ṱoḓa. Arali ni tshi ḓivha zwenezwo ni ḓo kona u langa vhutshilo haṋu nṱhani ha u tenda uri vhu langwe nga vhaṅwe vhathu.​—1 Vhakorinta 9:26, 27.

Ni nga kona hani u vha na nungo dza u ita zwenezwo? Ni nga zwi kona nga u thoma u fhindula mbudziso dzi tevhelaho.

U ḓivha vhukoni haṋu na pfaneleo dzaṋu dzavhuḓi zwi ḓo ni ita uri ni vhe na tshivhindi.

TSUMBO YA BIVHILINI: Muapostola Paulo o ṅwala uri: “Naho ndi si na vhukoni ha u amba, a tho ngo ralo kha nḓivho.” (2 Vhakorinta 11:6) Paulo o kona u ima o khwaṱha musi vhaṅwe vhathu vha tshi mu hanedza nga ṅwambo wa uri o vha e na nḓivho khulwane ya Maṅwalo. Ho ngo tenda u kulwa nungo nga maipfi avho a ṱhavhaho.​—2 Vhakorinta 10:10; 11:5.

ḒIṰOLISISENI: Ṅwalani vhukoni kana vhutsila vhune na vha naho afho fhasi.

Zwino ṅwalani zwithu zwavhuḓi zwine zwa ni ṱalusa. (Sa tsumbo, ni a ṱhogomela vhaṅwe? ni na mafunda? ni a fulufhedzea? ni a vhulunga tshifhinga?)

Bvumo ḽaṋu ḽi nga shanduka nga u ṱavhanya arali na tenda u langiwa nga vhushayanungo haṋu.

TSUMBO YA BIVHILINI: Paulo o vha a tshi ḓivha vhushayanungo hawe. O ṅwala: “Ndi a takalela vhukuma mulayo wa Mudzimu u ya nga zwine nda vha zwone nga ngomu hanga, fhedzi ndi dovha nda vhona muṅwe mulayo miraḓoni yanga une wa lwisana na mulayo u re muhumbuloni wanga nahone wa nnyisa vhuthubwani ha tshivhi tsha mulayo wa tshivhi.”​—Vharoma 7:22, 23.

ḒIṰOLISISENI: Ndi vhushayanungo vhufhio vhune na tea u guda u vhu langa?

Naa ni nga namela thekhisi na vhudza mureili uri a sokou mona-mona fhethu huthihi u swika petirolo i tshi fhela? Zwenezwo zwi ḓo vha vhutsilu na u tamba nga petirolo!

Ni guda mini kha tshenetshi tshifanyiso? Zwipikwa zwi ita uri vhutshilo haṋu vhu vhe na ndivho nṱhani ha u sokou ṱinga-ṱinga fhethu huthihi. Zwipikwa zwi ita uri ni ḓivhe hune na ṱoḓa u ya hone na u dzudzanya nḓila ine na nga swika ngayo henefho.

TSUMBO YA BIVHILINI: Paulo o ṅwala uri: “A thi gidimi sa muthu ane a si ḓivhe hune a khou ya hone.” (1 Vhakorinta 9:26) Paulo o ḓivhetshela zwipikwa nahone a lwela u zwi swikelela nṱhani ha u sokou litshelela zwithu uri zwi sokou itea.​—Vhafilipi 3:12-14.

ḒIṰOLISISENI: Afho fhasi ṅwalani zwipikwa zwiraru zwine na ṱoḓa u zwi swikelela ṅwaha u ḓaho u sa athu fhela.

Arali hu si na zwithu zwine na zwi tenda, ni ḓo konḓelwa u ita tsheo. Ni ḓo shandu-shanduka u fana na luaviavi, na ita zwithu zwine zwa itwa nga thangana yaṋu ya murole​—zwine zwa ḓo sumbedza uri a ni ḓiḓivhi.

Arali na ita zwithu u tendelana na zwine na zwi tenda, ni nga si shandule vhumuthu haṋu​—hu sa londwi zwine vhaṅwe vha zwi ita.

TSUMBO YA BIVHILINI: Zwi vhonala uri musi a tshee muswa, muporofita Daniele o ‘vha o khwaṱhisa mbiluni yawe’ uri u ḓo thetshelesa milayo ya Mudzimu, naho o vha e kule na vha muṱani wa hawe. (Daniele 1:8) Zwenezwo zwo ita uri a ite zwe a vha o ḓiimisela u zwi ita. Daniele o tshila u tendelana na zwine a zwi tenda.

ḒIṰOLISISENI: Ndi zwifhio zwine na zwi tenda? Sa tsumbo: Ni a tenda uri Mudzimu u hone? Arali zwo ralo, ndi ngani ni tshi tenda? Ndi vhufhio vhuṱanzi vhune ha ni ita uri ni tende uri u hone?

Ni a tenda uri milayo ya Mudzimu ya matshilele yo itelwa u ni vhuyedza? Arali zwo ralo, ndi ngani ni tshi tenda?