Yehova u ḓo khakhulula zwithu zwoṱhe zwivhi zwe Sathane a zwi ita. Yehova o vhea Yesu sa Khosi kha ḽifhasi ḽoṱhe. Nga fhasi ha vhuvhusahoṱhe hawe, ḽifhasi ḽi ḓo itwa paradiso.​—Daniele 7:13, 14; Luka 23:43.

Yehova u fulufhedzisa hezwi zwithu:

• ZWIḼIWA ZWINZHI: “Shango ḽo bveledza zwi melaho, ḽo shudufhadzwa nga Mudzimu, Mudzimu washu.” “Shangoni hu ḓo vha na muḓalo wa mavhele; dziṱhohoni dza dzithavha hu ḓo guma maḓaka.”​—Psalme ya 67:6; 72:16.

• A HU TSHA ḒO VHA NA NNDWA: “Nḓariyeni ní vhone mishumo ya Yehova; o ita zwi ofhisaho mashangoni. U dzivhisa dzinndwa migumoni ya ḽifhasi.”​—Psalme ya 46:8, 9.

• A HU TSHA ḒO VHA NA VHAVHI: “Vhadzia-u-tshinya vha ḓo lovha; . . . muvhi ha lalami; U ḓo ṱuwa U tshi vhona muḓi wawe ú shubi.”​—Psalme ya 37:9, 10.

• A HU TSHA ḒO VHA NA MALWADZE, VHUṰUNGU, KANA LUFU: “Ndi hone hu tshi ḓo bonyolowa maṱo a mabofu; ndi hone hu tshi ḓo thivhululwa  dzinḓevhe dza madzinganḓevhe. Ndi hone wa tshihole a tshi ḓo fhufha vhunga phala; lulimi lwa tshimuma lu ḓo fhululedza.”​—Yesaya 35:5, 6.

  “Huno ene nga eṱhé, Mudzimu, u ḓo vha kha vhone, Mudzimu wavho. U ḓo fhuluṱa maṱoḓzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela.”​—Ndzumbululo 21:3, 4.

U fhambana na Sathane na madimoni, Yehova ha vhuyi a zwifha. Zwoṱhe zwine a fulufhedzisa zwi a itea. (Luka 1:36, 37) Yehova u a ni funa nahone u ṱoḓa ni tshi tshila Paradisoni ine a ḓo i ita. Ngauralo ambani na Ṱhanzi dza Yehova u itela u guda zwo engedzeaho nga ha mafhungo-ngoho a mangadzaho a wanalaho Ipfini ḽa Mudzimu. Arali ni tshi shumisa mafhungo-ngoho vhutshiloni haṋu, ni ḓo vhofhololwa kha mbofho dza mazwifhi, u tenda zwi si zwone, na u sa londa. Nga u ya ha tshifhinga, ni ḓo ita na u vhofhololwa kha mbofho dza tshivhi na lufu. Samusi Yesu o amba: “Ndi hone ni tshi ḓo ḓivha mafhungo-ngoho, huno mafhungo-ngoho a ḓo ni vhofholola.”​—Yohane 8:32.