Dauda wa Sierra Leone u a anetshela: “Ndo alutshela muvhunduni u re vunḓuni ḽa devhula. Musi ndi tshee mutukana, ho vhuya ha vuwa khakhathi ya muḓi vhukati ha muṱa wahashu na muṅwe muṱa. Vhuvhili hayo yo vha i tshi khou lwela ḽeneḽo shango ḽithihi. U itela u piringulula vhuleme, ha vhidzwa ṅanga. Ya ṋea muṅwe munna tshivhoni, ya mu fukedza nga labi ḽitshena. Nga u ṱavhanya onoyo munna we a vha o fukedzwa nga labi a thoma u tetemela na u bva biko. Musi a tshi sedza kha tshivhoni, a huwelela a ri: ‘Ndi khou vhona hu tshi ḓa mukalaha! O ambara zwiambaro zwitshena. Ndi mulapfu nahone o kalaha, u na mmvi, u tshimbila nga u tou ṱhobila.’

“O vha a tshi khou ṱalusa Makhulutshinna! Zwenezwo a dzhenwa nga havhiya a huwelela a ri: ‘Arali ni sa tendi zwine nda khou amba, iḓani ni ḓivhonele!’ Vhukuma, a huna na muthihi washu we a vha e na tshivhindi tsha u ita zwenezwo! Ṅanga yo mu dzikisa nga u mu handulula nga mushonga, we a vha e nawo tshikumbuni.

“A tshi amba na munna we a vha o fara tshivhoni, ‘Makhulutshinna’ o ri shango ḽo vha ḽi ḽa muṱani wahashu. O vhudza makhulu wanga uri vha fanela u lima ḽeneḽo shango vha sa vhilaeli. Muṅwe muṱa wa ṱanganedza yeneyo khaṱulo. Khani ya mbo dzudzanywa.”

 Tshenzhelo dzo raloho dzo ḓowelea kha ḽa Afurika Vhukovhela. Henefha, u fana na kha zwiṅwe zwipiḓa zwa shango, vha dzimilioni vha si na tshivhalo vha tenda uri vhafu vha fhirela shangoni ḽa muya, hune vha kona u vhona na u ṱuṱuwedza vhutshilo ha vhathu kha ḽifhasi. Naa uhu u tenda ndi ngoho? Naa vhafu vha khou tshila zwa vhukuma? Arali zwi songo ralo, ndi vhonnyi vhane vha ḓiita mimuya ya vho faho? U ḓivha phindulo dzo teaho dza hedzi mbudziso ndi zwa ndeme vhukuma. Ndi mafhungo a vhutshilo na lufu.