Mbingano ya u thoma yo itwa nga Yehova * Mudzimu. Bivhili i ri vhudza uri o sika mufumakadzi wa u thoma nahone “a mu ḓisa [kha munna, NW].” Adamu o takala lwe a ri: “Ngoyu-ha a re shambo ḽa shambo ḽanga, na ṋama ya ṋama yanga.” (Genesi 2:22, 23) Yehova u kha ḓi ṱoḓa uri vhavhingani vha takale.

Musi ni tshi dzhenela mbingano, ni nga kha ḓi humbula uri zwithu zwi ḓo tshimbila zwavhuḓi. Naho zwo ralo, ngoho ndi ya uri na munna na mufumakadzi vhane vha funana ngangoho vha ḓo vha na thaidzo. (1 Vhakorinta 7:28) Kha ino bugwana ni ḓo wana maitele a Bivhili ane arali na a shumisa, a nga ita uri ni vhe na dakalo mbinganoni na muṱani waṋu.—Psalme ya 19:8-11.

ZWINE BIVHILI YA ZWI AMBA: Munna ndi ṱhoho ya muṱa.—Vhaefesa 5:23.

Arali ni munna, Yehova u lavhelela uri ni ṱhogomele mufumakadzi waṋu nga lufuno. (1 Petro 3:7) O mu ita uri a vhe muthusi waṋu, u ṱoḓa uri ni mu sumbedze tshirunzi nahone ni mu fune. (Genesi 2:18) Ni tea u funa mufumakadzi waṋu lune na nga ḓiimisela u rangisa madzangalelo awe u fhira aṋu.—Vhaefesa 5:25-29.

Arali ni mufumakadzi, Yehova u lavhelela uri ni ṱhonifhe munna waṋu nga ho dzikaho na u mu thusa uri a ite mushumo wawe. (1 Vhakorinta 11:3; Vhaefesa 5:33) Tikedzani phetho dzawe nahone ni shumisane nae nga mbilu yoṱhe. (Vhakolosa 3:18) Musi ni tshi ita zwenezwo, ni ḓo vha wavhuḓi maṱoni a munna waṋu na a Yehova.—1 Petro 3:1-6.

ZWINE NA NGA ZWI ITA:

• Vhudzisani mufarisi waṋu zwine na nga zwi ita uri ni vhe munna kana mufumakadzi wa khwine. Thetshelesani nga vhuronwane nahone ni ite zwi re maanḓani aṋu u itela u khwinisa

• Ni songo fhela mbilu. Zwi ḓo dzhia tshifhinga uri ni gude nḓila ine na nga takadza ngayo mufarisi waṋu

ZWINE BIVHILI YA ZWI AMBA: Ni fanela u fhaṱutshela zwithu zwine mufarisi waṋu a zwi takalela. (Vhafilipi 2:3, 4) Farani mufarisi waṋu nga nḓila yo khetheaho, ni songo hangwa uri Yehova u ṱoḓa vhashumeli vhawe vha tshi vha na “vhulenda kha vhoṱhe.” (2 Timotheo 2:24) “Hu na vha-amba-ma-ṱhavha-sa-pfumo; lulimi lwa vha vhuṱali lu na dzilafho.” Nga zwenezwo, khethani maipfi aṋu nga vhuronwane. (Mirero 12:18) Muya wa Yehova u ḓo ni thusa uri ni ambe nga vhuthu na lufuno.—Vhagalata 5:22, 23; Vhakolosa 4:6.

ZWINE NA NGA ZWI ITA:

• Rabelani uri ni dzule no dzika nahone ni ḓiimisele u pfa masia oṱhe musi ni tshi khou haseledza mafhungo o dzikaho na mufarisi waṋu

• Humbulani nga vhuronwane nga zwine na ḓo zwi amba na nḓila ine na ḓo zwi amba ngayo

ZWINE BIVHILI YA ZWI AMBA: Musi ni tshi dzhenela mbingano, ni vha “ṋama nthihi” na mufarisi waṋu. (Mateo 19:5) Fhedzi ni kha ḓi vha vhathu vhavhili nahone ni nga kha ḓi sa vha na mavhonele a fanaho. Nga zwenezwo, ni tea u guda u vha na mahumbulele na maḓipfele a fanaho. (Vhafilipi 2:2) Ndi zwa ndeme uri ni vhe na vhuthihi musi ni tshi ita phetho. Bivhili i ri: “Maano a konadzea nga u [eletshedzana].” (Mirero 20:18) Tendelani maitele a Bivhili a tshi ni livhisa musi ni tshi ita phetho dza ndeme.—Mirero 8:32, 33.

ZWINE NA NGA ZWI ITA:

• Ni songo vhudza mufarisi waṋu mafhungo kana mavhonele aṋu fhedzi, fhedzi mu vhudzeni na maḓipfele aṋu

• Ambani na mufarisi waṋu ni sa athu ḓivhofha nga zwiṅwe zwithu