Musi Yehova a tshi ita ndugiselelo ya muṱa, o vhea vhabebi uri vha lange vhana vhavho. (Vhakolosa 3:20) Ndi vhuḓifhinduleli haṋu sa mubebi u gudisa ṅwana waṋu u funa Yehova na u vha mualuwa a re na vhuḓifhinduleli. (2 Timotheo 1:5; 3:15) Ni fanela u dovha na ḓivha zwi re mbiluni ya murwa kana ṅwananyana waṋu. Vhukuma, tsumbo yaṋu ndi ya ndeme nga maanḓa. Ni nga kona u funza ṅwana waṋu zwavhuḓi Ipfi ḽa Yehova arali no ḽi vhea mbiluni yaṋu u thoma.—Psalme ya 40:8.

ZWINE BIVHILI YA ZWI AMBA: ‘Ni ṱavhanye u thetshelesa, ni lenge u amba.’ (Yakobo 1:19) Ni ṱoḓa vhana vhaṋu vha tshi ḓipfa vho vhofholowa u amba na inwi. Vha fanela u zwi ḓivha uri ni dzula no lindela u vha thetshelesa musi hu na zwine vha ṱoḓa u zwi amba. Itani uri hayani hu vhe na mulalo u itela uri zwi vha lelutshele u bula maḓipfele avho. (Yakobo 3:18) Arali vha tshi humbula uri ni ḓo halifha kana na sedza vhukhakhi, vha nga kha ḓi sa ni vhudza zwoṱhe zwi re mbiluni dzavho. Ni songo fhelela vhana vhaṋu mbilu, nahone ni vha khwaṱhisedze uri ni a vha funa.—Mateo 3:17; 1 Vhakorinta 8:1.

ZWINE NA NGA ZWI ITA:

• Ivhani na tshifhinga tsha u thetshelesa musi vhana vhaṋu vha tshi ṱoḓa u amba

• Dzulani ni tshi haseledza na vhana vhaṋu, hu si musi hu na thaidzo fhedzi

ZWINE BIVHILI YA ZWI AMBA: “Mu-tenda-u-vhudzwa u wana lupfumo.” (Mirero 16:20) Nga zwiṅwe zwifhinga zwi nga ṱoḓea uri ni humbulisise nga ha maipfi a vhana vhaṋu u itela u pfesesa maḓipfele avho a vhukuma. Zwo ḓowelea uri vhaswa vha ṋaṋisedze kana vha ambe zwithu zwe vha sa ḓiimisele u zwi amba. “Mu-ṱavhanyedza-u-fhindula á songó pfa u ita zwa vhutsilu.” (Mirero 18:13) Ni songo ṱavhanya u sinyuwa.—Mirero 19:11.

ZWINE NA NGA ZWI ITA:

• Ḓiimiseleni u sa dzhena vhana vhaṋu haṋwani kana u sinyuwa, hu sa londwi zwine vha zwi amba

• Lingedzani u elelwa nḓila ye na vha ni tshi ḓipfa ngayo musi ni tshi kha ḓi vha miṅwahani yavho, na zwe zwa vha zwi tshi vhonala zwi zwa ndeme kha inwi

ZWINE BIVHILI YA ZWI AMBA: “Ṅwana’nga, thetshelesa U tshi laiwa nga vho-khotsi-au; U songo nyadza mulayo wa mme-au.” (Mirero 1:8) Yehova o ṋea khotsi na mme maanḓa a u langa vhana. Ni fanela u funza vhana vhaṋu u ni ṱhonifha na u ni thetshelesa. (Vhaefesa 6:1-3) Vhana vha a kona u zwi vhona arali vhabebi vha si “vhathihi nga ho fhelelaho.” (1 Vhakorinta 1:10) Arali ni sa khou tendelana, lingedzani u sa zwi ita phanḓa ha vhana ngauri zwi nga fhungudza ṱhonifho ine vha vha nayo kha vhoiwe sa vhabebi.

ZWINE NA NGA ZWI ITA:

• Haseledzani nahone ni tendelane nga ha nḓila ine na ḓo kaidza ngayo vhana vha vhoiwe

• Arali inwi na mufarisi waṋu ni na mavhonele o fhambanaho nga ha nḓila ya u gudisa vhana vha vhoiwe, lingedzani u pfesesa mavhonele a mufarisi waṋu

ZWINE BIVHILI YA ZWI AMBA: “Ṅwana mu dededzele nḓila yawe.” (Mirero 22:6) U funza vhana vha vhoiwe nga nḓila i bvelelaho a zwi nga ḓo sokou itea. Hu ṱoḓea uri ni vhe na nzudzanyo ya u vha gudisa, ine ya katela u laya vhana vha vhoiwe. (Psalme ya 127:4; Mirero 29:17) U laya a zwi sokou amba u ṱarafa, fhedzi zwi katela na u thusa vhana vha vhoiwe u pfesesa uri ndi ngani hu na milayo. (Mirero 28:7) Zwiṅwe hafhu, vha funzeni u funa Ipfi ḽa Yehova na u pfesesa maitele aḽo. (Psalme ya 1:2) Zwenezwi zwi ḓo vha thusa uri vha vhe na luvalo lwo gudiswaho.—Vhaheberu 5:14.

ZWINE NA NGA ZWI ITA:

• Itani vhungoho ha uri vhana vhaṋu vha dzhie Mudzimu sa muthu wa vhukuma ane vha nga mu fulufhela

• Vha thuseni uri vha kone u vhona na u iledza vhuḓifari vhu re na khombo, vhu ngaho vhune ha wanala kha Inthanethe na kha Web site dza u vhumba vhukonani na vhaṅwe vhathu. Vha funzeni u iledza vhathu vhane vha fara vhana luvhi nga zwa vhudzekani