YAKOBO na Yuda vho vha vhe vharathu vha Yesu. Petro na Yohane vho vha vhe vhaṅwe vha vhaapostola vha 12 vha Yesu. Vhenevho vhanna vhaṋa vho ṅwala marifhi a sumbe ane a wanala Maṅwaloni a Lugerika a Tshikriste. Vhurifhi vhuṅwe na vhuṅwe vhu vhidzwa nga dzina ḽa muṅwali waho. Nyeletshedzo yo hevhedzwaho ine ya wanala kha enea marifhi yo vha yo itelwa u thusa Vhakriste uri vha dzule vha tshi fulufhedzea kha Yehova na uri vha dzule vho lavhelela Muvhuso wa Mudzimu.

Vhakriste vha fanela u sumbedza lutendo. U sokou amba uri ndi na lutendo a zwo ngo eḓana. Lutendo lwa vhukuma lu fanela u vhonala nga zwiito. Yakobo o ṅwala uri: “Lutendo lu sí na mishumo lwo fa-vho.” (Yakobo 2:26) U sumbedza lutendo musi muthu o sedzana na milingo zwi ita uri a konḓelele. Mukriste u fanela u humbela vhuṱali vhu bvaho ha Mudzimu u itela uri a bvelele, nahone a vhe na lutendo lwa uri Mudzimu u ḓo mu ṋea hone. U konḓelela zwi ita uri ni takalelwe nga Mudzimu. (Yakobo 1:2-6, 12) Arali mugwadameli a dzula a tshi fulufhedzea a tshi itiswa nga lutendo, Yehova Mudzimu u ḓo mu thusa. Yakobo o ri: “Sendelani tsini ha Mudzimu, na ene a sendele tsini haṋu.”—Yakobo 4:8.

Lutendo lwa Mukriste lu fanela u vha lwo khwaṱhaho u itela uri lu kone u mu thusa u lwisana na milingo na ṱhuṱhuwedzo ya u ḓifara luvhi. Vhuḓifari vhu si havhuḓi he ha vha hu tshi khou engedzea ho ita uri Yuda a ṱuṱuwedze vhatendi ngae uri vha “lwele lutendo lwe lwa kumedzwa.”—Yuda 3.

Vhakriste vha fanela u vha na vhuḓifari ho kunaho. Yehova u lavhelela uri vhagwadameli vhawe vha vhe vhakhethwa, zwine zwa amba uri vha fanela u kuna kha masia oṱhe. Petro o ṅwala uri: “Inwi ivhani vhakhethwa kha kutshimbilele kwaṋu kwoṱhe. Ngauri ho ṅwaliwa ha pfi: Ivhani vhakhethwa, ngauri nṋe [Yehova] ndi mukhethwa!” (1 Petro 1:15, 16) Vhakriste vha na tsumbo dzavhuḓi dzine vha nga dzi edzisa. Petro o ri: “Kristo o shengedzelwa inwi. O sia ó ni edzisela, uri ni ḓo tevhela ṋayo dzawe.” (1 Petro 2:21) Naho Vhakriste vha tshi nga shengela nga ṅwambo wa uri vha tshila nga zwilinganyo zwa Mudzimu, vha vha na “luvalo . . . lwavhuḓi.” (1 Petro 3:16, 17) Petro o ṱuṱuwedza Vhakriste uri vha ḓifare nga nḓila yo kunaho nahone vha ite zwithu zwine zwa sumbedza u ofha Mudzimu musi vho lindela ḓuvha ḽa khaṱulo ya Mudzimu na shango ḽiswa ḽo fulufhedziswaho ḽine “u luga ha fhaṱa khazwo.”—2 Petro 3:11-13.

Vhakriste vha fanela u funa vhaṅwe khathihi na Yehova. Yohane o ṅwala uri: “Mudzimu ndi Ene lufuno.” Muapostola o bula uri Mudzimu o sumbedza lufuno lwawe luhulwane nga u rumela Yesu sa “tshipfumelo tsha zwivhi zwashu.” Vhakriste vha fanela u ita mini? Yohane u a ṱalutshedza: “Vhafunwa, huufha Mudzimu ó ri funa zwingafho, na riṋe ri na mulandu wa u pfi ri funane.” (1 Yohane 4:8-11) Iṅwe nḓila ya u sumbedza lufuno lwo raloho ndi nga u vha na mafunda kha vhatendi nga riṋe.—3 Yohane 5-8.

Vhagwadameli vha Yehova vha nga sumbedza hani uri vha a mu funa? Yohane u a fhindula: “Ngauri u funa Mudzimu ndi u ita zwe a ri laya nahone milayo yawe a i konḓi.” (1 Yohane 5:3; 2 Yohane 6) Vhane vha thetshelesa Mudzimu vha khwaṱhisedzwa uri Mudzimu u ḓo bvela phanḓa a tshi vha funa e na “mavhonele a vhutshilo vhu sa fheli.”—Yuda 21, NW.

—Enea mafhungo a wanala kha Yakobo; 1 na 2 Petro; 1, 2, na 3 Yohane; Yuda.