NGA murahu ha u shandukiswa, Paulo o huwelela mafhungo maḓifha a Muvhuso wa Mudzimu nga u fhisea—nahone zwenezwi zwo ita uri ene sa we a vha a tshi tovhola vhaṅwe a tovholwe lu vhavhaho. Onoyu muapostola wa mafulufulu o ṱanga nyendo nnzhi dza u huwelela, a tshi ya kule u itela u phaḓaladza mafhungo maḓifha nga ha Muvhuso une wa ḓo ḓadzisa ndivho ya Mudzimu ya u thoma nga ha vhathu.

Kha lwendo lwawe lwa u thoma lwa u huwelela ngei Lisitara, Paulo o fhodza munna we a bebwa o holefhala a sa koni u tshimbila. Vhathu vha thoma u huwelela vha ri Paulo na khonani yawe Baranaba ndi vhadzimu. Vhenevha vhanna zwo vha konḓela u dzivhisa vhathu uri vha songo vha ṱhavhela zwidzimu. Naho zwo ralo, vha tshi ṱuṱuwedzwa nga maswina a Paulo, nga murahu vhenevho vhathu vho kanḓa Paulo nga matombo vha mu sia a tshi nga o fa. Paulo o ponyoka honoho u vutshelwa nahone nga u ya ha tshifhinga a humela kha wonoyo muḓi u itela u khwaṱhisa vhafunziwa nga u vha khuthadza.

Vhaṅwe Vhakriste vha Vhayuda vho amba uri vhatendi vhane vha si vhe Vhayuda vha fanela u farelela kha miṅwe ya Milayo ya Mushe. Paulo o ya Yerusalema kha vhaapostola na vhahulwane u itela u vha vhudza nga ha honovhu vhuleme. Nga murahu ha u ṱolisisa zwavhuḓi Maṅwalo na nga vhulivhisi ha muya mukhethwa wa Mudzimu, vhenevho vhanna vho ṅwalela zwivhidzo na u vha ṱuṱuwedza uri vha iledze midzimu i sili, u ḽa malofha na u ḽa ṋama i songo bviswaho malofha, na vhupombwe. Yeneyo milayo yo vha i “zwithu zwa ndeme,” fhedzi u thetshelesa zwenezwi zwo vha zwi sa ṱoḓi uri vha tevhele Mulayo wa Mushe.—Mishumo 15:28, 29, NW.

Kha lwendo lwawe lwa vhuvhili lwa u huwelela, Paulo o ya Berea, hune ṋamusi ha vhidzwa Greece. Vhayuda vhe vha vha vha tshi dzula henefho vho ṱanganedza wonoyo mulaedza nga u fhisea, vha tshi ṱolisisa Maṅwalo ḓuvha ḽiṅwe na ḽiṅwe u itela u vhona arali pfunzo dzawe dzi tshi tshimbidzana na Maṅwalo. U pikiswa ho dovha ha ita uri a pfulutshele Athene. Musi a tshi khou amba na vhathu vho funzeaho vha ngei Athene, Paulo o amba nga nḓila ya vhuṱali, na i ṱuṱuwedzaho.

Nga murahu ha lwendo lwa vhuraru lwa u huwelela, Paulo o ya Yerusalema. Musi a tshi ya thembeleni henefho, vhaṅwe Vhayuda vho vusa mufhirifhiri vha tshi ṱoḓa u mu vhulaha. Maswole a Roma o mbo ḓi dzhenelela nahone a sengisa Paulo. Samusi o vha e mudzulapo wa Roma, nga murahu o ḓiambelela kha Filikisi Muvhusi wa Roma. Vhayuda vho vha vhe si na vhuṱanzi kha milandu ye vha vha vha tshi khou i hwelela Paulo. A tshi itela uri Festo ane a vha Muvhusi wa Roma, a songo mu ṋekedzela kha Vhayuda, Paulo o ri: “Nṋe ndi sengiswa nga Kesare.” Festo a fhindula a ri: “Na zwino U ḓo ya ha Kesare.”—Mishumo 25:11, 12.

Nga zwenezwo Paulo o iswa Italia nga gungwa u itela u sengiswa. Musi vhe lwendoni lwonolwo vho mbo ḓi pwashetshelwa nga gungwa nahone a fanela uri a dzule tshiṱangadzimeni tsha Melite vhuriha. Musi a tshi swika Roma, o dzula miṅwaha mivhili nḓuni yo hiriswaho. Naho zwo ralo, o vha o lindwa nga maswole, onoyo muapostola a fhiseaho o bvela phanḓa na u huwelela nga ha Muvhuso wa Mudzimu kha vhe vha mu dalela.

—Enea mafhungo a wanala kha Mishumo 11:22–28:31.