NGA murahu ha miṅwaha miraru na hafu ya u huwelela na u funza, Yesu o vha a tshi zwi ḓivha uri u tsini na u fa. Vharangaphanḓa vha vhurereli vha Vhayuda vho vha vha tshi khou vhamba maano a uri vha mu vhulahe, fhedzi vho vha vha tshi ofha vhathu, vhe vha vha vha tshi tenda uri o vha e muporofita. Nga tshenetsho tshifhinga, Sathane o ṱuṱuwedza muṅwe wa vhaapostola vha 12 vha Yesu—Yudasi Isikariote—uri a fheṱe Yesu. Vharangaphanḓa vha vhurereli vha ṋea Yudasi maseṱha a 30 u itela u mu fheṱa.

Vhusikuni hawe ha u fhedza, Yesu o kuvhangana na vhaapostola vhawe u itela vhuṱambo ha Paseka. Nga murahu ha u pandela Yudasi, o mbo ḓi thoma vhuṱambo vhuswa, vhune ha vhidzwa Tshilalelo tsha Murena. A dzhia tshinnkwa, a rabela nahone a ṋekedza vhaapostola vhawe vho salaho vha 11. A ri: “Ndi muvhili wanga u ṋekedzwaho lufuni nga mulandu waṋu. Ni ite ngauralo, uri hu vhe u ṋyelelwa.” A amba zwi fanaho na nga veini, a ri: “Ndi tshone tshinwelo tsha mulanga muswa wa malofha anga.”—Luka 22:19, 20.

Yesu o vhudza vhaapostola vhawe mafhungo manzhi nga honoho vhusiku. O vha ṋea ndaela ntswa—uri vha funane zwi tshi bva mbiluni. O ri: “Ndi zwiné vhathu vhoṱhe vha ḓo ḓivha ngazwo’ zwauri ni vhafunziwa vhanga arali u funana hu hone kha inwi.” (Yohane 13:34, 35) O vha ṱuṱuwedza uri vha songo vhilaedziswa nga ha zwiitea zwi ofhisaho zwe zwa vha zwi tshi ḓo itea. Yesu o vha rabelela zwi tshi bva mbiluni. Vho imbela Yehova thendo nahone vha bva vha ya tsimuni ya Getsemane nga honoho vhusiku.

Musi e tsimuni ya Getsemane, Yesu o mbo ḓi gwadama nahone a rabela Mudzimu zwi tshi bva mbiluni. Nga u ṱavhanya tshigwada tsha maswole o ḓiṱamaho, vhotshifhe, na vhaṅwe vho ḓa u itela u mu fara. Yudasi o mbo ḓi sendela nahone a vha sumbedza Yesu nga u mu kuvhatedza. Musi maswole a tshi fara Yesu, vhaapostola vho mbo ḓi shavha.

Musi o ima phanḓa ha khothe khulwane ya Vhayuda, Yesu o amba uri u Murwa wa Mudzimu. Henefho khothe vho mbo ḓi mu vhona mulandu wa u semana nahone o tewa nga lufu. Nga zwenezwo, Yesu o mbo ḓi iswa ha Muvhusi wa Roma ane a pfi Pontio Pilato. Naho o wana Yesu a si na mulandu wa vhutshinyi, o mbo ḓi isa Yesu kha tshigwada tshe tsha vha tshi tshi khou huwelela uri a vhulahwe.

Yesu o iswa Golgota, he maswole a Roma a mu ombela kha danda. Nga lwa vhuṱolo ho mbo ḓi vha na swiswi nga masiari. Yesu o fa nga tshikovhelelo, nahone ha vha na mudzinginyo muhulu. Tshitumbu tshawe tsha vhulungwa bakoni. Nga ḓuvha ḽi tevhelaho, vhotshifhe vho mbo ḓi vala ḽeneḽo bako nga tombo nahone vha vhea mulindi henefho. Naa Yesu o vha a tshi ḓo dzula henefho bakoni u swikela? Hai. Ho vha hu tshi ḓo itea vhuṅwe vhuṱolo vhuhulwane.

—Enea mafhungo a wanala kha Mateo dzindima 26 na 27; Marko dzindima 14 na 15; Luka dzindima 22 na 23; Yohane dzindima 12 u ya kha 19.