NAA muthu a nga dzula a tshi fulufhedzea kha Mudzimu arali a nga lingwa nga maanḓa nahone arali u thetshelesa zwi tshi vhonala zwi sa ḓo mu vhuyedza kha zwithu zwi vhonalaho? Yeneyo mbudziso yo vhudziswa—nahone ya fhindulwa—malugana na muṅwe munna ane a pfi Yobo.

Musi Vhaisiraele vha tshi kha ḓi vha ngei Egipita, Yobo, shaka ḽa Abrahamu, o vha a tshi dzula hune zwino ha vhidzwa Arabia. Nga tshenetsho tshifhinga, vharuṅwa vha ṱaḓulu vho kuvhangana phanḓa ha Mudzimu, na Sathane wa ḽishandukwa o vha e henefho. Nga phanḓa ha muṱangano wa ngei ṱaḓulu, Yehova o amba uri u a fulufhela mulanda wawe Yobo a fulufhedzeaho. Zwi re zwone ndi uri Yehova o amba uri a hu na muthu na muthihi ane a fulufhedzea u fana na Yobo. Fhedzi Sathane o amba uri Yobo u khou shumela Mudzimu nga ṅwambo wa uri Mudzimu o mu fhaṱutshedza na u mu tsireledza. Sathane o amba uri arali Yobo a dzhielwa zwoṱhe zwine a vha nazwo, u ḓo sema Mudzimu.

Mudzimu a tendela Sathane a tshi ṱangula Yobo lupfumo lwawe na vhana nahone nga murahu na mutakalo wawe. A sa khou ḓivha uri zwi khou itiswa nga Sathane, Yobo o vha a sa pfesesi uri ndi ngani Mudzimu a tshi khou mu tendela a tshi sedzana na yeneyi milingo. Naho zwo ralo, Yobo ha ngo vhuya a sema Mudzimu.

Khonani tharu dza Yobo dzo ḓa khae. Kha mutevhe wa mafhungo o ṅwalwaho kha bugu ya Yobo, vhenevho vhanna vho lingedza u ita uri Yobo a tende uri Mudzimu u khou mu ṱarafela zwivhi zwe a zwi ita tshiphirini. Vho dovha vha amba uri Mudzimu ha takaleli vhalanda vhawe na uri ha vha fulufheli. Yobo ha ngo thetshelesa eneo mahumbulele o khakheaho. Nga fulufhelo Yobo o amba uri u ḓo dzula a tshi fulufhedzea u swikela a tshi fa!

Fhedzi Yobo o khakha nge a vhilaelesa nga ha u ḓivhona e si na mulandu. Muṅwe muṱhannga ane a pfi Elihu, we a vha o thetshelesa enea mafhungo, o amba u itela u khakhulula Yobo na khonani dzawe dza mazwifhi. Elihu o kaidza Yobo nge a kundwa u vhona uri vhuvhusahoṱhe ha Mudzimu ndi hone ha ndeme u fhira ha vhathu. Na Elihu o kaidza khonani dza Yobo dza mazwifhi.

Nga zwenezwo Yehova Mudzimu o amba na Yobo u itela u khakhulula mahumbulele awe. A tshi mu sumbedza tsiko yavhuḓi, Yehova o ita uri Yobo a vhone uri muthu ha tshithu musi a tshi vhambedzwa na vhuhulwane ha Mudzimu. Nga u ḓiṱukufhadza Yobo o tenda musi Mudzimu a tshi mu khakhulula. Samusi Yehova e na “vhunzhi ha khathutshelo na mbilu tshilidzi,” o mbo ḓi fhodza Yobo, a mu ṋea lupfumo lu fhiraho lwe a vha e nalwo, nahone a mu fhaṱutshedza nga vhana vha fumi. (Yakobo 5:11) Nge a dzula a tshi fulufhedzea kha Yehova musi o sedzana na mulingo u vhavhaho, Yobo o fhindula mazwifhi a uri vhathu a vha nga ḓo dzula vha tshi fulufhedzea kha Mudzimu arali vha lingiwa.

—Enea mafhungo a wanala kha bugu ya Yobo.