1, 2. Ndi ngani khotsi a re na lufuno a tshi takalela u vhona murwa wawe a tshi mu thetshelesa, nahone enea maḓipfele a sumbedza hani nḓila ine Yehova a ḓipfa ngayo?

KHOTSI vho sedza nga fasiṱere, vha khou vhona murwa wavho muṱuku a tshi khou tamba na khonani dzawe. Bola yavho ya fhufha ya bvela nnḓa ha dzharaṱa ya wela tshiṱaraṱani. Mutukana a lavhelesa yeneyo bola i tshi khou fhufha. Iṅwe khonani yawe ya mu vhudza uri a gidime a ye u i dzhia tshiṱaraṱani, fhedzi onoyo mutukana a dzungudza ṱhoho. A ri: “A tho ngo tendelwa u ya tshiṱaraṱani.” Khotsi awe vha mbo ḓi ṅwethuwa.

² Ndi ngani khotsi awe vho takala nga u rali? Ngauri vho gudisa murwa wavho uri a si ye tshiṱaraṱani e eṱhe. Musi onoyo mutukana a tshi thetshelesa—naho o vha a sa zwi vhoni uri khotsi awe vho mu sedza—khotsi awe vho zwi vhona uri murwa wavho u a thetshelesa nahone u ḓo tsireledzea. Zwe vhenevho khotsi vha ḓipfisa zwone ndi zwine Khotsi ashu wa ṱaḓulu, Yehova, a ḓipfisa zwone. Mudzimu u a zwi ḓivha uri arali ri tshi ṱoḓa u dzula ri tshi fulufhedzea nahone ra tshila u itela u vhona vhumatshelo havhuḓi he a ri vhetshela hone, ri fanela u guda u mu fulufhela khathihi na u mu thetshelesa. (Mirero 3:5, 6) U itela u swikelela tshenetsho tshipikwa, o ri rumela mufunzi wa khwine u fhira muthu naho e ufhio.

3, 4. Yesu o ‘guda u thetshelesa’ na u ‘itwa o fhelelaho’ nga nḓila-ḓe? Fanyisani.

³ Bivhili i amba zwiṅwe zwithu zwi mangadzaho nga ha Yesu: “We, naho e Murwa wa Mudzimu, a tshi shengela a guda u thetshelesa Mudzimu. A ri ó itwa o fhelelaho a vha ene ané vha mu thetshelesaho a vha isa kha u tshidzwa tshoṱhe.” (Vha-Heberu 5:8, 9, vhambedzani NW.) Onoyu Murwa o tshila miṅwaha minzhi-minzhi ngei ṱaḓulu. O vhona Sathane na vharuṅwa vhawe vha mashandukwa vha sa thetshelesi Mudzimu, fhedzi Murwa wa tanzhe ho ngo vhuya a ṱanganela navho. Vhuporofita ho hevhedzwaho vhu amba mafhungo a tevhelaho nga hae: “A . . . tho ngo  vha ḽishandukwa.” (Yesaya 50:5, NW) Ngauralo, maipfi ane a ri ‘o guda u thetshelesa’ a shuma hani kha onoyu Murwa o fhelelaho ane a thetshelesa? Tshivhumbiwa tsho raloho tsho fhelelaho tshi nga ‘itwa tsho fhelelaho’ nga nḓila-ḓe?

⁴ Ṱhogomelani hetshi tshifanyiso. Ḽiswole ḽi na banga ḽa tsimbi. Naho ḽi sa athu shumiswa nndwani, ḽo tea mushumo waḽo nahone ḽo itwa zwavhuḓi. Naho zwo ralo, ḽeneḽo ḽiswole ḽa mbo ḓi rengisa ḽeneḽo banga ḽa renga ḽiṅwe ḽo itwaho nga tsimbi yo khwaṱhaho. Ḽeneḽo banga ḽiswa ḽo vha ḽo no ḓi shumiswa nndwani. Naa honoho a si u bindulisa havhuḓi? Nga hu fanaho, u thetshelesa he Yesu a hu sumbedza a sa athu ḓa kha ḽifhasi ho vha ho fhelela. Fhedzi musi o no ḓa fhano kha ḽifhasi, u thetshelesa hawe ho vha hu pfaneleo yo fhambanaho vhukuma na ye a vha e nayo u thomani. Nga lwa pfanyisedzo, u thetshelesa hawe ho lingiwa, ha dovha ha khwaṱhiswa, nahone ha sumbedzwa nga milingo ye Yesu a si vhuye a ṱangana nayo ngei ṱaḓulu.

5. Ndi mini zwo itaho uri u thetshelesa ha Yesu hu vhe ha ndeme, nahone ri ḓo haseledza mini kha yeneyi ndima?

⁵ U thetshelesa ho vha hu ha ndeme kha mushumo we Yesu a ḓela wone kha ḽifhasi. Samusi e “Adamu wa u khunyeledza,” Yesu o ḓa u ita zwe mubebi washu wa u thoma a kundelwa u zwi ita—u dzula a tshi thetshelesa Yehova Mudzimu, na musi a tshi lingiwa. (1 Vha-Korinta 15:45) Naho zwo ralo, u thetshelesa ha Yesu ho vha hu si ha u sokou ḓadzisa mulayo. Yesu o thetshelesa nga muhumbulo, mbilu, na muya-tshivhili wawe woṱhe. Nahone o zwi ita o takala. U ita zwine Khotsi awe a zwi funa zwo vha zwi zwa ndeme vhukuma khae u fhira u ḽa! (Yohane 4:34) Ndi mini zwine zwa ḓo ri thusa u edzisa u thetshelesa ha Yesu? Kha ri thome nga u ṱhogomela zwiṱuṱuwedzi zwawe. U ṱahulela zwiṱuṱuwedzi zwine zwa fana na zwine a zwi funa zwi ḓo ri thusa roṱhe uri ri kunde milingo na u bvela phanḓa ri tshi ita zwine Mudzimu a zwi funa. Nga murahu ha zwenezwo, ri ḓo vusulusa maṅwe malamba a u sumbedza u thetshelesa hu ngaho ha Kristo.

6, 7. Ndi zwifhio zwiṅwe zwithu zwe zwa ṱuṱuwedza Yesu uri a thetshelese?

⁶ U thetshelesa ha Yesu ho bva kha pfaneleo dzawe dzavhuḓi.  Samusi ro zwi vhona kha Ndima ya 3, Kristo o vha a tshi ḓiṱukufhadza mbiluni. U ḓikukumusa huvhi hu ita uri vhathu vha si thetshelese, ngeno u ḓiṱukufhadza hu tshi ri thusa uri ri thetshelese Yehova nga u ḓifunela. (Ekisodo 5:1, 2; 1 Petro 5:5, 6) Zwiṅwe hafhu, u thetshelesa ha Yesu ho ṱuṱuwedzwa nga zwine a zwi funa na zwine a zwi vhenga.

⁷ Zwa ndeme vhukuma ndi uri Yesu o vha a tshi funa Khotsi awe wa ṱaḓulu, Yehova. Lwonolwo lufuno lu ḓo haseledzwa nga vhuḓalo kha Ndima ya 13. Lufuno lwo raloho lwo ita uri Yesu a ofhe Mudzimu. O vha a tshi funa Khotsi awe Yehova na u mu ṱhonifha nga nḓila yo dzikaho, lwe a ofha u mu sinyusa. U ofha hawe Mudzimu tsho vha tshi tshiṅwe tshiitisi tsha uri thabelo dza Yesu dzi pfiwe. (Vha-Heberu 5:7) U ofha Yehova ndi tshiṅwe tshiga tshi swayeaho tsha vhuvhusi ha Yesu sa Khosi ya Vhumessia.—Yesaya 11:3.

8, 9. Samusi zwo porofitiwa, Yesu o ḓipfa hani nga zwivhuya na zwivhi, nahone o sumbedza hani eneo maḓipfele?

⁸ U funa Yehova zwi dovha zwa katela u vhenga zwithu zwine  Yehova a zwi vhenga. Sa tsumbo, ṱhogomelani hovhu vhuporofita ho livhiswaho kha Khosi ya Vhumessia: “Ngauri zwiné wa zwi funa ndi u luga; U vhenga zwi songo lugaho. Ndi zwone zwe Yehova Mudzimu wau a U ḓolisela zwone mapfura a dakalo, wa fhira vhashumisani vhaṅwe.” (Psalme ya 45:7, vhambedzani NW.) “Vhashumisani” vha Yesu ho vha hu maṅwe mahosi a muṱa wa mutevhe wa Khosi Davida. Yesu o vha e na tshiitisi tsha u takala u vha fhira vhoṱhe musi a tshi ḓodzwa. Ndi ngani? Ngauri malamba awe a fhira avho nga nḓila khulwane, na vhuhosi hawe vhu a vhuyedza vhukuma. O lambedzwa ngauri u funa hawe zwivhuya na u vhenga hawe zwivhi zwo mu ita uri a thetshelese Mudzimu kha zwithu zwoṱhe.

⁹ Yesu o ita uri maḓipfele awe malugana na zwivhuya na zwivhi a vhonale nga nḓila-ḓe? Sa tsumbo, musi vhatevheli vhawe vha tshi thetshelesa vhulivhisi hawe mushumoni wa u huwelela nahone ha vha na mvelelo dzavhuḓi, Yesu o aravha hani? O vha o takala vhukuma. (Luka 10:1, 17, 21) Nahone musi vhathu vha Yerusalema vha tshi sumbedza lunzhi-lunzhi muya wa u sa thetshelesa, vha tshi hana ndingedzo yawe ya u ṱoḓa u vha thusa, Yesu o ḓipfa hani? O lila ngauri wonoyo muḓi wo vha wo ḓala mashandukwa. (Luka 19:41, 42) Yesu o kwamea nga maanḓa nga ha vhuḓifari havhuḓi na vhu si havhuḓi.

10. Ndi maḓipfele afhio ane ra fanela u a ṱahulela musi zwi tshi ḓa kha mishumo mivhuya na mivhi, nahone ndi mini tshine tsha ḓo ri thusa u ita nga u ralo?

¹⁰ U elekanya nga ha maḓipfele a Yesu zwi ri thusa uri ri ṱolisise zwiṱuṱuwedzi zwashu zwa u thetshelesa Yehova. Hu sa londwi uri a ro ngo fhelela, ri nga ṱahulela lufuno lu bvaho mbiluni lwa mishumo mivhuya na u vhenga vhuḓifari vhuvhi zwi tshi bva mbiluni. Ri fanela uri ri rabele Yehova, ri mu humbele uri a ri thuse u ṱahulela maḓipfele ane a fana na awe na a Murwa wawe. (Psalme ya 51:10) Nga hu fanaho, ri fanela u iledza ṱhuṱhuwedzo ine ya ḓo fhelisa eneo maḓipfele. U khetha nga vhuronwane zwine ra ḓimvumvusa ngazwo na vhukonani ndi zwa ndeme. (Mirero 13:20; Vha-Filipi 4:8) Arali ri tshi ṱahulela zwiṱuṱuwedzi zwi ngaho zwa Kristo, u mu thetshelesa hashu a hu nga ḓo sokou vha mukhuvha. Ri ḓo ita zwivhuya ngauri ri ṱoḓa u ita nga u ralo. Ri  ḓo iledza mishumo mivhi, hu si ngauri ri khou shavha uri ri ḓo wanedzwa, fhedzi ngauri ri vhenga vhuḓifari ho raloho.

11, 12. (a) Ho itea mini mathomoni a vhuḓinḓa ha Yesu? (b) Sathane o linga hani Yesu lwa u thoma, nahone o shumisa maano afhio a vhukwila?

¹¹ Malugana na u vhenga hawe tshivhi, Yesu o lingiwa mathomoni a vhuḓinḓa hawe. Musi o no lovhedzwa, o fhedza maḓuvha na vhusiku zwa 40 sogani, a si na zwiḽiwa. Musi tshenetsho tshifhinga tshi tshi fhela, Sathane o ḓa a mu linga. Edzani u ṱhogomela vhumbulu ha Diabolo.—Mateo 4:1-11.

¹² Sathane o thoma nga u ri: “Arali U murwa wa Mudzimu, ambai, matombo aya a shanduke a vhe vhuswa.” (Mateo 4:3) Yesu o ḓipfa hani nga murahu ha u ḓidzima tshifhinga tshilapfu? Bivhili yo zwi ṱalusa zwavhuḓi ya ri: “A vhuya a pfa nḓala.” (Mateo 4:2) Ngauralo Sathane o shumisa tshibuli tsho ḓoweleaho tsha u tama zwiḽiwa, nahone a zwi timatimisi uri o ita nga khole musi a tshi lindela u swika musi Yesu a si tsheena nungo. Dovhani ni ṱhogomele maipfi a lunyadzo a Sathane: “Arali U murwa wa Mudzimu.” (Maḽeḓeretsendama ndi ashu.) Sathane o vha a tshi zwi ḓivha uri Yesu ndi “tanzhe ḽa zwivhumbwa zwoṱhe.” (Vha-Kolosa 1:15) Naho zwo ralo, Yesu ho ngo tendela Sathane a tshi mu sinyusa lune a sa tsha thetshelesa. Yesu o vha a tshi zwi ḓivha uri a si zwi funwaho nga Mudzimu uri a shumise maanḓa awe u itela ndivho ya tseḓa. O hana u ita nga u ralo, a sumbedza uri nga u ḓiṱukufhadza u fulufhela Yehova uri a mu fushe na u mu livhisa.—Mateo 4:4.

13-15. (a) Ndi ufhio mulingo wa vhuvhili na wa vhuraru we Sathane a linga ngawo Yesu, nahone Yesu o aravha hani? (b) Ri zwi ḓivha hani uri Yesu o dzula o fhaṱutshela Sathane tshifhinga tshoṱhe?

¹³ Kha mulingo wawe wa vhuvhili, Sathane o isa Yesu nṱha ha luvhondo lwa thembele. Sathane o shanda Ipfi ḽa Mudzimu nga vhukwila, a linga Yesu uri a ḓipose fhasi u itela uri vharuṅwa vha ḓe vha mu thuse. Arali magogo e a vha e thembeleni a vhe o vhona honoho vhuṱolo, naa vhathu vho vha vha tshi ḓo timatima uri Yesu ndi Messia o fulufhedziswaho? Nahone arali magogo a ṱanganedze Yesu sa Messia nge a ita wonoyo musumbedzo, naa Yesu o vha a sa ḓo vha o iledza vhunzhi ha maṱhupho na vhuṱungu? Khamusi  o vha a tshi ḓo vha o zwi iledza. Fhedzi Yesu o vha a tshi zwi ḓivha uri ho vha hu lufuno lwa Yehova uri Messia a ḓadzise mushumo wawe nga u ḓiṱukufhadza, hu si u ṱuṱuwedza vhathu uri vha mu tende nga ṅwambo wa misumbedzo ye a i ita. (Yesaya 42:1, 2) Hafhu Yesu o hana u sa thetshelesa Yehova. Bvumo a ḽo ngo mu kunga uri a ite nga u ralo.

¹⁴ Ngauralo hu pfi mini nga mulingo wa u vha muvhusi? Kha mulingo wawe wa vhuraru, Sathane o fulufhedzisa u ṋea Yesu mivhuso yoṱhe ya shango arali Yesu a nga mu gwadamela. Naa o vhuya a dzhiela nṱha khumbelo ya Sathane? A tshi fhindula o ri: “Ṱuwa, Sathane!” A dovha a ri: “Ngauri zwo ṅwaliwa u pfi: Gwadamela Murena Mudzimu wau, U shumele Ene fhedzi.” (Mateo 4:10) Ho vha hu si na tshiṅwe tshithu tshe tsha vha tshi tshi nga ita uri Yesu a gwadamele muṅwe mudzimu. A huna maanḓa kana ṱhuṱhuwedzo ya ḽino shango ine ya nga mu ṱuṱuwedza uri a ite zwiṅwe zwithu zwi sumbedzaho u sa thetshelesa.

¹⁵ Naa Sathane o mbo ḓi ṅala a ṱuwa? O ṱuwa nge Yesu a mu vhudza uri a ite nga u ralo. Naho zwo ralo, Evangeli ya Luka i amba uri Diabolo ‘o mu litsha tshifhinganyana.’ (Luka 4:13) Vhukuma, Sathane o vha a tshi ḓo wana tshiṅwe tshifhinga tsha u linga Yesu, u swika vhufheloni. Bivhili i ri vhudza uri Yesu “o lingwa kha zwoṱhe.” (Vha-Heberu 4:15) Ngauralo Yesu ho ngo vhuya a litsha u dzula o fhaṱuwa; na riṋe ri fanela u ita nga hu fanaho.

16. Sathane u linga hani vhashumeli vha Mudzimu ṋamusi, nahone ri nga iledza hani vhuḓidini hawe?

¹⁶ Sathane u kha ḓi bvela phanḓa a tshi linga vhashumeli vha Mudzimu ṋamusi. Zwi ṱungufhadzaho ndi uri kanzhi u sa fhelela hashu hu ita uri ri lingiwe nga hu leluwaho. Sathane u ri kunga nga vhukwila uri ri vhe na tseḓa, u ḓikukumusa, na vhupangwa ha u ṱoḓa u vhusa. A tshi shumisa tshikwekwe tsha zwithu zwi vhonalaho, Sathane a nga ita uri zwenezwi zwithu zwoṱhe zwi kunge. Ndi zwa ndeme uri nga tshiṅwe tshifhinga ri imenyana, ri ḓiṱolisise nga u fulufhedzea. Zwi ḓo vha zwavhuḓi u elekanya nga ha maipfi a re kha 1 Yohane 2:15-17. Musi ri tshi khou ita nga u ralo, ri nga kha ḓi ḓivhudzisa arali nyemulo dza ṋama dza ano maitele a zwithu, u tama thundu dzi vhonalaho, na lutamo lwa u takadza vhaṅwe zwo no fhelisa nḓila ine ra funa ngayo Khotsi ashu wa ṱaḓulu. Ri fanela u humbula uri heḽi shango ḽi ḓo fheliswa, u  fana na muvhusi waḽo, Sathane. Kha ri hane vhukwila hawe ha u ri kungela tshivhini! Kha ri ṱuṱuwedzwe nga Muṋe washu, “we a si ite zwivhi.”—1 Petro 2:22.

17. Yesu o ḓipfa hani nga ha u thetshelesa Khotsi awe, fhedzi vhaṅwe vha nga kha ḓi ri mini?

¹⁷ U thetshelesa zwi katela zwi fhiraho u iledza tshivhi; Kristo o tevhedza ndaela dza Khotsi awe dzoṱhe. O ri: “Ndi dzula ndi tshi ita zwi mu takadzaho.” (Yohane 8:29) U thetshelesa ha Yesu zwo mu ḓisela dakalo ḽihulwane. Vhukuma, vhaṅwe vha nga hanedza vha amba uri zwo vha zwi tshi leluwa uri Yesu a thetshelese. Vha nga kha ḓi humbula uri o vha a tshi fanela u thetshelesa Yehova fhedzi, o fhelelaho, ngeno riṋe ri tshi fanela u thetshelesa vhathu vha songo fhelelaho vhane vha vha vha na maanḓa. Naho zwo ralo, ngoho ndi ya uri Yesu o thetshelesa na vhathu vha songo fhelelaho vha re na maanḓa.

18. Musi a tshi kha ḓi vha muswa, Yesu o vhea tsumbo ifhio malugana na u thetshelesa?

¹⁸ Musi a tshi khou aluwa, Yesu o vha e nga fhasi ha vhulanguli ha vhabebi vhawe vha songo fhelelaho, Yosefa na Maria. Khamusi o vha a tshi fhira vhana vhanzhi nge a vha a tshi kona u vhona vhushayanungo ha vhabebi vhawe. Naa o vha shandukela, a si ite mushumo we a ṋewa nga Mudzimu sa ṅwana muṱani nahone a vha vhudza uri muṱa u fanela u farwa hani? Ṱhogomelani zwine Luka 2:51 ya zwi amba nga ha Yesu wa miṅwaha ya 12: “A dzula a tshi vha [thetshelesa].” (Luka 2:51) Nga u thetshelesa hawe, o vhetshela vhaswa vha Vhakriste tsumbo yavhuḓi, vhane vha khou lwela u thetshelesa vhabebi vhavho khathihi na u vha ṱhonifha.—Vha-Efesa 6:1, 2.

19, 20. (a) Yesu o sedzana na khaedu dzifhio dzi songo ḓoweleaho musi zwi tshi ḓa kha u thetshelesa vhathu vha songo fhelelaho? (b) Ndi ngani Vhakriste vha ngoho ṋamusi vha tshi fanela u thetshelesa vhane vha khou vha ranga phanḓa?

¹⁹ Musi zwi tshi ḓa kha u thetshelesa vhathu vha songo fhelelaho, Yesu o sedzana na vhuleme vhu konḓaho vhune Vhakriste vha ngoho ṋamusi vha sa ḓo vhuya vha sedzana naho. Ṱhogomelani zwifhinga zwi songo ḓoweleaho zwe a vha a tshi khou tshila  khazwo. Ndi kale Yehova o thoma maitele a zwithu a vhurereli ha Tshiyuda, khathihi na thembele yavho i re ngei Yerusalema na vhotshifhe vhavho, fhedzi zwenezwo zwithu zwo vha zwi tsini na u bviswa nahone zwa dzhielwa vhudzulo nga ndugiselelo ya tshivhidzo tsha Vhukriste. (Mateo 23:33-38) Nga tshenetsho tshifhinga, vhunzhi ha vharangaphanḓa vha vhurereli vho vha vha tshi khou funza mazwifhi ane a bva kha pfunzo dza maṱali dza Tshigerika. Thembeleni ho vha ho no ḓala vhutshinyi lwe Yesu a i vhidza “bako ḽa vha mavemu.” (Marko 11:17) Naa Yesu o iledza u ya thembeleni na zwikoloni? Hai! Yehova o vha a tshi kha ḓi shumisa dzenedzo ndugiselelo. U swikela Mudzimu a tshi dzhia vhukando na u ita tshanduko, Yesu nga u ḓiṱukufhadza o ya vhuṱamboni ha thembeleni na zwikoloni.—Luka 4:16; Yohane 5:1.

²⁰ Arali Yesu o thetshelesa nga fhasi ha zwenezwo zwiimo, na Vhakriste vha ngoho ṋamusi vha fanela u dzula vha tshi thetshelesa! Naho zwo ralo, ri khou tshila zwifhingani zwo fhambanaho vhukuma na zwenezwo, ḽifhingani ḽo dzulaho ḽo ambiwa hu tshee nga phanḓa ḽa u vusuluswa ha vhurabeli ho kunaho. Mudzimu u ri khwaṱhisedza uri ha nga ḓo vhuya a tendela Sathane a tshi tshinya vhathu vhawe vho vusuluswaho. (Yesaya 2:1, 2; 54:17) Vhukuma, ri sedzana na zwivhi na u sa fhelela tshivhidzoni tsha Vhukriste. Fhedzi naa ri fanela u shumisa vhushayanungo ha vhaṅwe sa tshiitisi tsha u sa thetshelesa Yehova, khamusi  ra litsha u ya miṱanganoni ya Vhukriste kana ra thoma u sasaladza vhahulwane? Na khathihi! Nṱhani hazwo, ri tikedza nga u fhisea vhane vha khou ranga phanḓa tshivhidzoni. Nga u ḓiṱukufhadza, ri a ya miṱanganoni ya Vhukriste na maguvhanganoni nahone ra shumisa nyeletshedzo dza Maṅwalo dzine ra dzi wana henefho.—Vha-Heberu 10:24, 25; 13:17.

21. Yesu o aravha hani mutsiko wa vhathu wa uri a songo thetshelesa Mudzimu, nahone o ri vhetshela tsumbo ifhio?

²¹ Yesu ho ngo vhuya a tendela vhathu, naho hu khonani dzi re na ṱhuṱhuwedzo yavhuḓi, vha tshi mu ita uri a litshe u thetshelesa Yehova. Sa tsumbo, muapostola Petro o lingedza u luvhelela Muṋe wawe uri zwo vha zwi songo tea uri a shengele nahone a fe. Yesu o hana o khwaṱha nyeletshedzo ya Petro yo khakheaho, fhedzi ye ya vha i tshi sumbedza u humbulela, ya uri Yesu a ḓivhavhalele. (Mateo 16:21-23) Ṋamusi, vhatevheli vha Yesu kanzhi vha sedzana na mashaka a humbulelaho ane a nga lingedza u vha kula nungo uri vha litshe u thetshelesa milayo na maitele zwa Mudzimu. U fana na vhatevheli vha Yesu vha ḓanani ḽa u thoma ḽa miṅwaha, ri ima ro khwaṱha ra amba uri “kha vhathu na Mudzimu, a pfeswaho nga a vhe Mudzimu.”—Mishumo 5:29.

22. Yesu o fhindula mbudziso ifhio, nahone nga nḓila-ḓe?

²² Musi Yesu a tshi sedzana na lufu, u thetshelesa hawe ho mbo ḓi lingwa vhukuma. Nga ḓuvha ḽi ṱungufhadzaho ‘o guda u thetshelesa’ nga ho fhelelaho. O ita zwi funwaho nga Khotsi awe, hu si zwine ene a zwi funa. (Luka 22:42) Nga u ya ha tshifhinga, o ṋea vhuṱanzi havhuḓi ha u fulufhedzea. (1 Timotheo 3:16) O mbo ḓi fhindula mbudziso ye ha vha hu kale yo vhudziswa. Naa muthu o fhelelaho a nga dzula a tshi thetshelesa Yehova, na musi a tshi lingwa? Adamu na Eva vho kundelwa. Zwenezwo Yesu o ḓa, a tshila, a fa, nahone a dzudzanya zwavhuḓi eneo mafhungo. Tshivhumbiwa tshihulwanesa tsha Yehova tsho fhindula yeneyo mbudziso nga nḓila khulwane. O thetshelesa naho u thetshelesa zwo mu ita uri a shengele na u fa.

23-25. (a) U thetshelesa hu tshimbidzana hani na u fulufhedzea? Fanyisani. (b) Tshiṱoho tsha ndima i tevhelaho tshi ri mini?

²³ U fulufhedzea, kana u ḓikumedza zwi tshi bva mbiluni kha  Yehova, zwi sumbedzwa nga u thetshelesa. Ngauri Yesu o thetshelesa, o dzula a tshi fulufhedzea nahone o vhuyedza vhathu vhoṱhe. (Vha-Roma 5:19) Yehova o lambedza Yesu vhukuma. Arali ra thetshelesa Kristo, Muṋe washu, na riṋe Yehova u ḓo ri lambedza. U thetshelesa Kristo zwi ḓo ita uri ri “tshidzw[e] tshoṱhe.”—Vha-Heberu 5:9.

²⁴ Zwiṅwe hafhu, u fulufhedzea ndi malamba nga hoṱhe. Mirero 10:9, (NW) i ri: “Ane a tshimbila nga u fulufhedzea u ḓo tshimbila o tsireledzea.” Arali u fulufhedzea hu tshi nga fanyiswa na nnḓu khulwane yo fhaṱiwaho nga zwidina zwavhuḓi, musumbedzo muṅwe na muṅwe wa u thetshelesa u nga fanyiswa na tshidina tshiṅwe na tshiṅwe. Tshidina tshi nga vhonala tshi si tsha ndeme, fhedzi tshiṅwe na tshiṅwe tshi na mushumo watsho wa ndeme. Nahone arali zwenezwo zwidina zwinzhi zwa ṱanganyiswa, hu mbo ḓi fhaṱiwa tshifhaṱo tshihulwane tsha ndeme. Musi misumbedzo ya u thetshelesa i tshi ṱanganyiswa, muṅwe wa dzheniswa kha muṅwe ḓuvha ḽiṅwe na ḽiṅwe ṅwaha muṅwe na muṅwe, ri fhaṱa nnḓu yashu yavhuḓi ya u fulufhedzea.

²⁵ U thetshelesa hune ha bvela phanḓa lwa tshifhinga tshilapfu hu ri humbudza iṅwe pfaneleo—u konḓelela. Ḽeneḽo sia ḽa tsumbo ya Yesu ḽi ḓo vha tshiṱoho tsha ndima i tevhelaho.