1-3. (a) Vhuṱungu he Yesu a vhu pfa ngei tsimuni ya Getsemane ho vha vhu vhuhulwane lungafhani, nahone ho vha ho bveledzwa nga mini? (b) Ndi mini zwine ra nga zwi amba nga ha tsumbo ya Yesu ya u konḓelela, nahone hu vha na mbudziso dzifhio?

MUTSIKO wo vha u muhulwane. Yesu o vha a sa athu vhuya a pfa honoho vhuṱungu muhumbuloni na maḓipfeleni. O vha e kha zwifhinga zwa u fhedza zwa vhutshilo hawe ha kha ḽifhasi. O ya na vhaapostola vhawe fhethu ho ḓoweleaho, tsimuni ya Getsemane. Tshifhinga tshoṱhe o vha a tshi ṱangana navho henefho. Naho zwo ralo, nga honoho vhusiku, o vha a tshi khou ṱoḓa tshifhinga tsha u vha e eṱhe. O mbo ḓi sia vhafunziwa vhawe, nahone a fhirela vhukati-kati ha tsimu, a gwadama, a thoma u rabela. O rabela nga u futelela nahone o pfa vhuṱungu lwe biko ḽawe “ḽa nga marotha a malofha a welaho mavuni.”—Luka 22:39-44.

² Ndi ngani Yesu o vha o tsikeledzea nga u ralo? Vhukuma, o vha a tshi zwi ḓivha uri hu si kale u ḓo pfa vhuṱungu vhuhulwane ṋamani, fhedzi zwenezwo zwo vha zwi si zwone zwe zwa vha zwi tshi khou mu tsikeledza. O vha a tshi khou humbula nga ha mafhungo a ndeme vhukuma. O vha a tshi khou vhilaela vhukuma nga ha dzina ḽa Khotsi awe nahone o ṱhogomela uri vhumatshelo ha muṱa wa vhathu ho vha vhu tshi ḓitika nga u dzula hawe a tshi fulufhedzea. Yesu o vha a tshi ḓivha nḓila ine u konḓelela hawe zwa ḓo vha zwa ndeme ngayo. Arali a vhe a songo konḓelela, o vha a tshi ḓo nyadzisa vhukuma dzina ḽa Yehova. Fhedzi Yesu o konḓelela. Nga murahu nga ḽeneḽo ḓuvha, nga zwifhinga zwa musi a sa athu fa, Yesu we a vhea tsumbo yavhuḓi vhukuma ya u konḓelela kha ḽifhasi, o huwelela nga dakalo a ri: “Zwo vulea!”—Yohane 19:30.

³ Bivhili i ri ṱuṱuwedza u “sedzesa onoyo [Yesu] we a konḓelela.” (Vha-Heberu 12:3, vhambedzani NW.) Nga zwenezwo, zwi vusa mbudziso dza ndeme: Ndi ifhio miṅwe milingo ye Yesu  a i konḓelela? Ndi mini zwe zwa mu thusa u konḓelela? Ri nga tevhela hani tsumbo yawe? Musi ri sa athu fhindula dzenedzi mbudziso, kha ri ṱolisise zwine zwa katelwa kha u konḓelela.

4, 5. (a) U “konḓelela” zwi amba mini? (b) Ri nga zwi sumbedza hani nga tshifanyiso uri u konḓelela zwi katela zwi fhiraho u sokou sedzana na vhuleme vhu sa iledzei?

⁴ Zwifhinga zwoṱhe, roṱhe ri a ‘ṱungufhadzwa nga milingo ya mivhala minzhi.’ (1 Petro 1:6) Naa mbuno ya uri ri a sedzana na mulingo zwi amba uri ri khou konḓelela? Hai. Dzina ḽa Lugerika ḽi ambaho u “konḓelela” ḽi amba “vhukoni ha u konḓelela wo sedzana na vhuleme.” Malugana na mufuda wa u konḓelela we vhaṅwali vha Bivhili vha amba nga hawo, muṅwe mugudi wa Bivhili o ṱalutshedza a ri: “Ndi u vha na mavhonele a u konḓelela zwithu, hu si u sokou ṱanganedza zwiimo nga uri a huna zwine wa nga ita, fhedzi nga u vha na fulufhelo ḽo khwaṱhaho . . . Ndi pfaneleo ine ya ita uri muthu a ime o khwaṱha musi a tshi khou bvela phanḓa u sedzana na vhuleme. Ndi pfaneleo ine ya ita uri mulingo u vhavhaho vhukuma u vhe vhuimo vhu takadzaho nga ṅwambo wa uri i ita uri muthu a si livhise ṱhogomelo kha vhuṱungu vhune a khou vhu pfa, fhedzi a i livhise kha malamba ane a ḓo a wana.”

⁵ Nga zwenezwo, u konḓelela a si mafhungo a u sokou sedzana na vhuleme vhu sa iledzei. U ya nga Bivhili, u konḓelela zwi katela u fulufhedzea, u dzula u na mavhonele avhuḓi a muhumbulo na u vha na fulufhelo musi wo sedzana na milingo. Ṱhogomelani tshifanyiso hetshi: Vhanna vhavhili vho valelwa dzhele kha zwiimo zwi fanaho, fhedzi nga zwiitisi zwo fhambanaho vhukuma. Muṅwe ndi mutshinyi ane a shuma tshigwevho tshawe nga ṅwambo wa uri a huna zwine a nga ita. Muṅwe ndi Mukriste o farwaho nga ṅwambo wa u fulufhedzea hawe, u dzula a tshi fulufhedzea na u vha na mavhonele avhuḓi ngauri u vhona vhuimo hawe sa tshibuli tsha u sumbedza lutendo lwawe. Mutshinyi a nga si dzhiiwe e tsumbo ya u konḓelela, ngeno Mukriste a fulufhedzeaho a tshi nga dzhiiwa e tsumbo ya yeneyi pfaneleo yavhuḓi ya u konḓelela.—Yakobo 1:2-4.

6. Ri ṱahulela u konḓelela nga nḓila-ḓe?

 ⁶ U konḓelela ndi ha ndeme vhukuma arali ri tshi ṱoḓa u tshidzwa. (Mateo 24:13) Naho zwo ralo, a ro ngo bebwa ri na yeneyo pfaneleo ya ndeme. U konḓelela hu fanela u ṱahulelwa. Nga nḓila-ḓe? Vha-Roma 5:3 i ri: “Maṱhupho a ḓisa u konḓelela.” Ee, arali ri tshi ṱoḓa zwa vhukuma u ṱahulela u konḓelela, ri nga si shavhe nga nyofho milingo yoṱhe ya lutendo. Nṱhani hazwo, ri fanela u sedzana nayo. U konḓelela hu bveledzwa nga u sedzana na u kunda milingo yo fhamba-fhambanaho ḓuvha ḽiṅwe na ḽiṅwe. Mulingo muṅwe na muṅwe une ra u kunda u a ri khwaṱhisa u itela u sedzana na u tevhelaho. Ndi ngoho uri a ri ṱahuleli u konḓelela nga riṋe vhaṋe. Ri ‘shuma nga nungo dze ra ṋewa nga Mudzimu.’ (1 Petro 4:11) U itela uri thusa uri ri dzule ri tshi fulufhedzea, Yehova o ri ṋea thuso yavhuḓi vhukuma—tsumbo ya Murwa wawe. Kha ri ṱhogomele nga vhuronwane mafhungo a Yesu we a konḓelela a sa khakhi.

7, 8. Yesu o konḓelela mini musi vhutshilo hawe ha kha ḽifhasi vhu tsini na u fhela?

⁷ Musi vhutshilo hawe ha kha ḽifhasi vhu tsini na u fhela, Yesu o konḓelela vhuṱungu vhunzhi. Nga nnḓa ha u tsikeledzea zwihulwane muhumbuloni he a sedzana naho vhusikuni hawe ha u fhedza, humbulani nga ha u kulea hawe nungo na vhuṱungu he a vhu pfa nga u nyadziwa. O ambululwa nga muthu ane a vha tsini-tsini nae, u laṱwa nga khonani dzawe dza tsini-tsini, na u vha tsengoni i siho mulayoni nahone miraḓo mihulwane ya khothe ya vhurereli yo mu goḓa, u mu pfela mare, na u mu rwa nga mavili. Naho zwo ralo, o konḓelela zwenezwo zwoṱhe nga tshirunzi nahone e na nungo.—Mateo 26:46-49, 56, 59-68.

⁸ Kha awara dzawe dza u fhedza, Yesu o konḓelela vhuṱungu vhuhulwane muvhilini. O rwiwa nga phamba, nga nḓila ine ha ambiwa uri i bvisa “dzimbanga na malofha manzhi.” O ombelwa kha danda, a vhulahwa nga nḓila ine ya ita uri “[muthu] a fe nga zwiṱuku nga zwiṱuku a tshi khou pfa vhuṱungu vhuhulwane.” Humbulani nga ha vhuṱungu he a vhu pfa musi hu tshi khou ombelwa zwibigiri zwihulwane zwanḓani na milenzheni  u itela u mu fhahea kha danda. (Yohane 19:1, 16-18) Humbulani nga ha vhuṱungu vhuhulwane he a vhu pfa musi danda ḽi tshi khou imiswa, muvhili wawe wo hwalwa nga zwibigiri zwo ombelwaho nahone mbanga dzawe dza muṱanani dzi tshi khou khanikhwa nga danda. Nahone o konḓelela honoho vhuṱungu vhuhulwane ha muvhilini na mutsiko wa muhumbulo samusi zwo ṱaluswa mathomoni a yeneyi ndima.

9. Ndi mini zwine zwa katelwa kha u hwala ‘danda ḽa tshengedzo’ na u tevhela Yesu?

⁹ Samusi ri vhatevheli vha Kristo, ndi mini zwine ra nga zwi konḓelela? Yesu o ri: “Zwenezwo Yesu a amba na vhafunziwa vhawe a ri: A funaho u ntsala murahu nga a . . . hwale [“danda ḽawe ḽa tshengedzo,” NW] a ntevhele.” (Mateo 16:24) Mubulo une wa ri ‘danda ḽa tshengedzo’ hafha u shumiswa nga lwa pfanyisedzo u itela u fanyisela tshengelo, u nyadziwa, kana lufu. U tevhela Kristo a zwi leluwi. Zwilinganyo zwashu zwa Vhukriste zwi ri ita uri ri sa fane na vhaṅwe vhathu. Heḽi shango ḽi a ri vhenga nga ṅwambo wa uri a ri tshipiḓa tshaḽo. (Yohane 15:18-20; 1 Petro 4:4) Naho zwo ralo, ro ḓiimisela u hwala danda ḽashu ḽa tshengedzo—ee, ro ḓilugisela u shengela naho hu u fa, nṱhani ha u litsha u tevhela ane a vha Tsumbo yashu.—2 Timotheo 3:12.

10-12. (a) Ndi ngani vhushayanungo ha vhe vha vha vhe tsini nae ho vha mulingo wa u konḓelela kha Yesu? (b) Ndi zwifhio zwiṅwe zwiimo zwe Yesu a zwi konḓelela?

¹⁰ Tshifhingani tsha vhuḓinḓa hawe, Yesu o sedzana na miṅwe milingo ye ya ḓiswa nga u sa fhelela ha vhathu vhe a vha a tshi tshila navho. Humbulani uri o vha e “muḓinḓa,” we Yehova a mu shumisa u sika ḽifhasi na zwithu zwoṱhe zwi tshilaho zwi re khaḽo. (Mirero 8:22-31) Ngauralo, Yesu o vha a tshi ḓivha zwe Yehova a zwi dzudzanyela vhathu; vho vha vha tshi fanela u sumbedza pfaneleo Dzawe na u ḓiphina nga vhutshilo vhe na mutakalo wo fhelelaho. (Genesi 1:26-28) Musi e kha ḽifhasi, Yesu o vhona tshengelo i bveledzwaho nga tshivhi nga nḓila dzo fhamba-fhambanaho—na ene o vha e muthu wa ṋama, nahone o kona u pfa maḓipfele e vhathu vha vha vhe nao. Zwi nga vha zwo mu vhaisa lungafhani u vhona nḓila ye vhathu vha vha vha songo fhelela ngayo musi zwi tshi vhambedzwa na nḓila ye  Adamu na Eva vha vha vho fhelela ngayo u thomani! Ngauralo Yesu o vha o sedzana na mulingo wa u konḓelela. Naa o vha a tshi ḓo kulea nungo na u litsha u konḓelela, nahone a dzhia vhuimo ha vhathu vhane vha vha na tshivhi sa vhu si na fulufhelo? Kha ri vhone.

¹¹ U sa vha na dzangalelo ha Vhayuda zwo ita uri Yesu a tsikeledzee lwe a lila phanḓa ha vhathu. Naa o tendela u sa vha havho na dzangalelo zwi tshi fhelisa u fhisea hawe kana u mu ita uri a litshe u huwelela? Na khathihi, nṱhani hazwo o ‘dzula a tshi funza nga maḓuvha nḓuni khethwa.’ (Luka 19:41-44, 47) O ‘pfa vhuṱungu’ nga ṅwambo wa u sa pfela vhuṱungu ha Vhafarisei vhe vha vha vho sedza nga vhuronwane u itela u vhona arali a tshi ḓo fhodza muṅwe munna nga Sabatha. Naa o tendela vhenevho vhapikisi vhane vha ḓiita vho lugaho vha tshi mu tshuwisa? Na khathihi! O ima o khwaṱha nahone a fhodza onoyo munna henefho vhukati ha tshikolo!—Marko 3:1-5.

¹² Tshiṅwe tshithu tshe tsha vha mulingo kha Yesu—ho vha hu  vhushayanungo ha vhafunziwa vhawe vha tsini-tsini. Samusi ro zwi guda kha Ndima ya 3, vho sumbedza lunzhi uri vha tama vhuimo. (Mateo 20:20-24; Luka 9:46) Yesu o vha ṋea nyeletshedzo lu fhiraho luthihi nga ha ṱhoḓea ya u ḓiṱukufhadza. (Mateo 18:1-6; 20:25-28) Naho zwo ralo, a vho ngo dzhia vhukando nga u ṱavhanya. Humbulani nga vhusiku hawe ha u fhedza e navho, ho ‘vuwa khani vhukati havho’ ya uri ndi nnyi khavho ane a vha muhulwane! (Luka 22:24) Naa Yesu o vha fhelela mbilu, nahone a humbula uri a vha thusei? Hai. Ho ngo vhuya a vha fhelela mbilu, o dzula e na mavhonele avhuḓi na fulufhelo, nahone o bvela phanḓa a tshi vhona pfaneleo dzavhuḓi khavho. O vha a tshi ḓivha uri mbiluni dzavho vho vha vha tshi funa Yehova na u ṱoḓa u ita zwine a Zwi funa zwa vhukuma.—Luka 22:25-27.

13. Ri nga sedzana na milingo ifhio i fanaho na ye Yesu a i konḓelela?

¹³ Ri nga sedzana na milingo i fanaho na ye Yesu a i konḓelela. Sa tsumbo, ri nga ṱangana na vhathu vhane vha si vhe na dzangalelo kana vhane vha pikisa mulaedza wa Muvhuso. Naa ri ḓo tendela honoho u sa aravha zwavhuḓi hu tshi ri kula nungo, kana naa ri ḓo bvela phanḓa ri tshi huwelela nga u fhisea? (Tito 2:14) Ri nga lingwa nga ṅwambo wa u sa fhelela ha vhahashu vha Vhakriste. Ri nga kha ḓi vhaiswa nga zwe muṅwe a zwi amba a songo thoma a humbula kana zwe a zwi ita nga u sa londa. (Mirero 12:18) Naa ri ḓo tendela vhushayanungo ha vhatendi nga riṋe vhu tshi ita uri ri vha fhelele mbilu, kana naa ri ḓo bvela phanḓa ri tshi konḓelela vhukhakhi havho na u sedza pfaneleo dzavhuḓi khavho.—Vha-Kolosa 3:13.

14. Ndi zwithu zwifhio zwivhili zwe zwa thusa Yesu u ima o khwaṱha?

¹⁴ Ndi mini zwe zwa thusa Yesu u ima o khwaṱha na u dzula a tshi fulufhedzea hu sa londwi u nyadziwa hoṱhe, u kulwa nungo, na tshengelo ye a sedzana nayo? Hu na zwithu zwivhili zwi swayeaho zwe zwa thusa Yesu. Tsha u thoma, o sedza ṱaḓulu, a humbela ‘Mudzimu ane a thusa u konḓelela.’ (Vha-Roma 15:5, vhambedzani NW.) Tsha vhuvhili, Yesu o sedza kha zwilavhelelwa zwa tshifhingani tshi ḓaho, na u livhisa ṱhogomelo  kha zwe zwa vha zwi tshi ḓo bveledzwa nga u konḓelela hawe. Kha ri ṱhogomele zwenezwi zwithu nga tshithihi nga tshithihi.

15, 16. (a) Ndi mini zwine zwa sumbedza uri Yesu ho ngo ḓitika nga nungo dzawe u itela u konḓelela? (b) Yesu o vha e na fulufhelo ḽifhio kha Khotsi awe, nahone ndi ngani?

¹⁵ Naho Yesu o vha e Murwa wa Mudzimu o fhelelaho, ho ngo ḓitika nga maanḓa awe u itela u konḓelela. Nṱhani hazwo, o rabelela thuso kha Khotsi awe wa ṱaḓulu. Muapostola Paulo o ṅwala a ri: “Kristo o ṋekedza dzikhumbelo: thabelo na zwililo zwa mukosi muhulu, na maṱodzi kha uyo we a vha a tshi kona u mu tshidza lufuni.” (Vha-Heberu 5:7, vhambedzani NW.) Ṱhogomelani uri Yesu ho ngo sokou “ṋekedza” thabelo fhedzi, fhedzi o dovha a ṋekedza dzikhumbelo. Ipfi ḽine ḽa ri “khumbelo” ḽi ambela zwihuluhulu kha u humbela hu bvaho mbiluni—ee, u humbela thuso. U shumiswa ha ipfi “dzikhumbelo” ḽi kha vhunzhi, zwi sumbedza uri Yesu o humbela Yehova lu fhiraho luthihi. Ndi ngoho uri tsimuni ya Getsemane Yesu o rabela lunzhi-lunzhi nahone zwi tshi bva mbiluni.—Mateo 26:36-44.

¹⁶ Yesu o vha a tshi fulufhela tshoṱhe uri Yehova u ḓo fhindula khumbelo dzawe, ngauri o vha a tshi zwi ḓivha uri Khotsi awe ndi “Mupfi wa dzithabelo.” (Psalme ya 65:2) Tshifhingani tsha musi a sa athu vha muthu wa ṋama kha ḽifhasi, Murwa wa tanzhe o vhona nḓila ine Khotsi awe a fhindula ngayo thabelo dza vhagwadameli vha fulufhedzeaho. Sa tsumbo, Murwa o vhona e ṱaḓulu musi Yehova a tshi ruma muruṅwa u itela u fhindula thabelo i bvaho mbiluni ya muporofita Daniele—naho Daniele o vha a sa athu fhedza u rabela. (Daniele 9:20, 21) Nga zwenezwo, Khotsi o vha a tshi nga litsha hani u fhindula musi Murwa wawe mubebwa e eṱhe a tshi khou mu vhudza zwa mbiluni yawe nga “zwililo zwa mukosi muhulu, na maṱodzi”? Yehova o fhindula khumbelo dzi bvaho mbiluni dza Murwa wawe nahone a ruma muruṅwa uri a mu khwaṱhise u itela u konḓelela musi o sedzana na milingo.—Luka 22:43.

17. U itela u konḓelela, ndi ngani ri tshi fanela u sedza ṱaḓulu, nahone ri nga zwi itisa hani?

¹⁷ U itela uri na riṋe ri konḓelele, ri fanela u sedza ṱaḓulu—kha Mudzimu “ane a ṋea maanḓa.” (Vha-Filipi 4:13, NW) Arali  Murwa wa Mudzimu o fhelelaho o vhona ṱhoḓea ya u humbela Mudzimu uri a mu thuse, riṋe ri fanela u ita zwi fhiraho zwenezwo. U fana na Yesu, ri nga humbela Yehova lunzhi-lunzhi. (Mateo 7:7) Naho ri sa lavheleli u dalelwa nga muruṅwa, ri nga vha na vhungoho ha u ri: Mudzimu washu wa lufuno u ḓo fhindula khumbelo dza Mukriste a fulufhedzeaho ane a “konḓelela dzithabeloni na kha u humbela vhusiku na masiari.” (1 Timotheo 5:5) Hu sa londwi milingo ine ra nga sedzana nayo—naho hu vhulwadze, lufu lwa ane ra mu funa, kana u tovholwa nga vhapikisi—Yehova u ḓo fhindula thabelo dzashu dzi bvaho mbiluni dza u humbela vhuṱali, tshivhindi, na maanḓa a u konḓela.—2 Vha-Korinta 4:7-11; Yakobo 1:5.

18. Yesu o sedza hani zwe zwa vha zwi tshi ḓo itea nga murahu ha tshengelo yawe?

¹⁸ Tshithu tsha vhuvhili tshe tsha thusa Yesu u konḓelela ndi u sedza zwilavhelelwa zwa tshifhingani tshi ḓaho, zwe zwa vha zwi tshi ḓo itea nga murahu ha tshengelo yawe. I tshi amba nga ha Yesu, Bivhili i ri: “Nga ṅwambo wa dakalo ḽe ḽa vha ḽo vhewa phanḓa hawe o konḓelela danda ḽa tshengedzo.” (Vha-Heberu 12:2, vhambedzani NW.) Tsumbo ya Yesu i sumbedza nḓila ine fulufhelo, dakalo, na u konḓelela zwa shumisana ngayo. Zwenezwi zwi nga nweledzwa nga nḓila i tevhelaho: Fulufhelo ḽi ḓisa dakalo, nahone dakalo ḽi ḓisa u konḓelela. (Vha-Roma 15:13; Vha-Kolosa 1:11) Yesu o vha e na zwilavhelelwa zwavhuḓi. O vha a tshi zwi ḓivha uri u fulufhedzea hawe zwo vha zwi tshi ḓo thusa  kha u lwelwa ha vhuvhusahoṱhe ha Khotsi awe na u mu thusa u rengulula vhathu kha tshivhi na lufu. Yesu o vha a tshi dovha a vha na fulufhelo ḽa u vhusa sa Khosi na u shuma sa Tshifhe Muhulu, u itela u ḓisa phaṱhutshedzo dzo engedzeaho kha vhathu vha thetshelesaho. (Mateo 20:28; Vha-Heberu 7:23-26) Nga u livhisa ṱhogomelo kha zwilavhelelwa na fulufhelo zwe zwa vha zwi phanḓa hawe, Yesu o wana dakalo ḽihulwane vhukuma, nahone ḽeneḽo dakalo ḽo dovha ḽa mu thusa u konḓelela.

19. Musi ro sedzana na milingo ya lutendo, ri nga tendela hani fulufhelo, dakalo, na u konḓelela zwi tshi shuma zwoṱhe kha riṋe?

¹⁹ U fana na Yesu, ri fanela u tendela fulufhelo, dakalo, na u konḓelela zwi tshi shuma zwoṱhe kha riṋe. Muapostola Paulo o ri: ‘Takalani kha fulufhelo.’ O dovha a engedza a ri: ‘Konḓelelani vhuṱunguni.’ (Vha-Roma 12:12) Naa ni khou sedzana na mulingo muhulwane wa lutendo lwaṋu zwa zwino? Nga zwenezwo itani zwoṱhe zwine na nga kona u itela u sedza zwilavhelelwa zwa tshifhingani tshi ḓaho. Ni songo hangwa mbuno ya uri u konḓelela haṋu hu ḓo ḓisa thendo kha dzina ḽa Yehova. Itani uri fulufhelo ḽaṋu ḽavhuḓi ḽa Muvhuso ḽi dzule ḽo khwaṱha. Ḓivhoneni ni shangoni ḽiswa ḽa Mudzimu, nahone ni humbule ni tshi khou ḓiphina nga phaṱhutshedzo dza Paradisoni. U lavhelela u ḓadzea ha zwithu zwavhuḓi zwe Yehova a zwi fulufhedzisa—u katela na u lwelwa ha vhuvhusahoṱhe hawe, u fheliswa ha vhuvhi kha ḽifhasi, na u fheliswa ha vhulwadze na lufu—zwi ḓo ḓadza mbilu yaṋu nga dakalo, nahone ḽeneḽo dakalo ḽi ḓo ni thusa u konḓelela hu sa londwi milingo naho i ifhio ine ya nga ni wela. Musi i tshi vhambedzwa na u ḓadzea ha fulufhelo ḽa Muvhuso, tshengelo naho i ifhio i re hone kha ano maitele a zwithu ndi ya “tshifhinganyana nahone i a leluwa.”—2 Vha-Korinta 4:17, vhambedzani NW.

20, 21. Malugana na u konḓelela, Yehova u lavhelela mini kha riṋe, nahone ri fanela u ḓiimisela u ita mini?

²⁰ Yesu o vha a tshi zwi ḓivha uri u vha mutevheli wawe zwo vha zwi tshi ḓo vha khaedu, ndi buḓo ḽi ṱoḓaho u konḓelela. (Yohane 15:20) O vha o ḓiimisela u vhea tsumbo nga u ḓivha uri yo  vha i tshi ḓo khwaṱhisa vhaṅwe. (Yohane 16:33) Ndi ngoho uri Yesu o vhea tsumbo yo fhelelaho ya u konḓelela, fhedzi riṋe a ro ngo fhelela na luthihi. Yehova u lavhelela mini kha riṋe? Petro u a ṱalutshedza: “Kristo o shengedzelwa inwi. O ni vhetshela tsumbo uri ni tevhele ṋayo dzawe tsini-tsini.” (1 Petro 2:21, vhambedzani NW.) Nga nḓila ye Yesu a sedzana ngayo na milingo, o sia “tsumbo,” maitele ane a fanela u edziswa. * Mafhungo a u konḓelela hawe a nga vhambedzwa na “ṋayo,” kana vhuṱala. Ri nga si tevhele dzenedzo ṋayo nga ho fhelelaho, fhedzi ri nga dzi tevhela “tsini-tsini.”

²¹ Nga zwenezwo-ha, kha ri ḓiimisele u tevhela tsumbo ya Yesu u ya nga hune ra nga kona ngaho. Ri songo vhuya ra hangwa uri arali ri tshi tevhela tsini-tsini ṋayo dza Yesu, ri ḓo shomedzelwa u konḓelela “u swika vhufheloni”—vhufhelo ha ano maitele a kale a zwithu kana vhufhelo ha vhuno vhutshilo hashu. A ri ḓivhi uri hu ḓo itea mini u thoma, fhedzi ri ḓivha hezwi: Yehova u ḓo ri ṋea malamba nga hu sa fheli nga ṅwambo wa u konḓelela hashu.—Mateo 24:13.