Ha Muvhali:

“Iḓani ni vhe mutevheli wanga.” (Marko 10:21, NW) Naho Yesu Kristo o vha a tshi khou ramba muthu muthihi, eneo maipfi awe a kha ḓi shuma na kha riṋe. Naa ni khou dzhia vhukando kha honoho u rambiwa? U ita nga u ralo zwi ḓo kwama vhukuma vhutshilo haṋu. Ndi ngani?

Yehova o ruma Murwa wawe mubebwa-eṱhe kha ḽifhasi uri a ṋekedze vhutshilo hawe sa tshirengululi. (Yohane 3:16) Nga nnḓa ha u ri fela, onoyo Murwa o ri sumbedza nḓila ine ra fanela u tshila ngayo. Kha zwoṱhe zwe a zwi ita, o dzula a tshi fulufhedzea nahone a takadza mbilu ya Khotsi awe. Yesu o dovha a ri sumbedza nḓila ine ra nga fana ngayo na Khotsi awe. Maitele na zwine Khotsi a zwi funa zwo sumbedzwa zwavhuḓi nga zwe Murwa a zwi amba na u zwi ita.—Yohane 14:9.

Bivhili i amba uri Yesu ndi “tsumbo kha [riṋe] ya uri ri tevhele ṋayo dzawe.” (1 Petro 2:21, vhambedzani NW.) Arali ri tshi ṱoḓa u sendela tsini-tsini na Yehova, ri tshi ṱoḓa u tshila vhutshilo vhu takadzaho zwino, na u ṱoḓa u bvela phanḓa ri nḓilani i isaho vhutshiloni vhu sa fheli, ri fanela u tevhela nga vhuronwane ṋayo dza Kristo.

U itela u swikelela zwenezwi, ri fanela u ḓivha vhutshilo ha Yesu musi e kha ḽifhasi. Ngauralo, ri fanela u guda nga vhuronwane ṱhaluso ya Yesu i re Bivhilini. U elekanya nga zwithu zwe Yesu a zwi amba na u zwi ita na u ṱhogomela nḓila ine ra nga mu edzisa ngayo nga zwine ra zwi amba na u zwi ita zwi ḓo ri thusa u vhona zwavhuḓi nḓila ine ra nga mu tevhela ngayo.

U nga ri heyi bugu i nga ni thusa uri lufuno lwaṋu lwa u funa Yesu na Yehova lu engedzee. Nahone u nga ri lwonolwo lufuno lu nga ni sudzulusela u tevhela nga vhuronwane ṋayo dza Yesu u itela uri ni takadze mbilu ya Yehova zwino na nga hu sa fheli.