1-3. (a) Yesu o sia vhaapostola vhawe nga nḓila-ḓe, nahone ndi ngani zwenezwo hu si u onesana hu vhavhaho? (b) Ndi ngani ri tshi fanela u guda nga ha vhutshilo ha Yesu u bva tshee a vhuyelela ṱaḓulu?

VHANNA vha 11 vho vha vho ima thavhani. Vho vha vho lavhelesa muṅwe muthu we a vha e vhukati havho, ane vha mu funesa na u mu ṱhonifha. Zwi re zwone ndi uri onoyo muthu o vha e Yesu o vuswaho, ane a dovha a vha na maanḓa mahulwane u fhira vharwa vhoṱhe vha Yehova vha muya. Yesu o vha o kuvhanganya vhaapostola vhawe u itela uri vha ṱangane nae lwa u fhedza henefho Thavhani ya Miṱwari.

² A zwi timatimisi uri yeneyo thavha, ine ya vha tshipiḓa tsha zwikwara zwa matombo matshena zwo rambalalaho na Govha ḽa Kidironi u bva Yerusalema, yo humbudza Yesu zwithu zwinzhi. Nga thungo ha zwenezwo zwikwara ho vha hu na muḓi wa Bethania, he Yesu a vusa hone Lazaro. Vhegeni dzo fhiraho, Yesu o dzhena Yerusalema nga nḓila ine zwa sumbedza uri o kunda, a tshi bva Betfage hune ha vha nga tsini. Zwi vhonala uri henefho Thavhani ya Miṱwari hu nga kha ḓi vha hu fhethu he ha vha huna tsimu ya Getsemane, he Yesu a fhedza tshifhinga tshilapfu o tsikeledzea musi a sa athu farwa. Ndi kha tshenetsho tshikwara he Yesu a vha o ḓiimisela u sia khonani dzawe dza tsini-tsini na vhatevheli vhawe. O vha onesa nga maipfi a vhulenda. Nga zwenezwo a mbo ḓi thoma u gonya ṱaḓulu! Vhaapostola vho vha vho ima henefho zwi tshi nga vho tou ṱokiwa fhasi, vho lavhelesa Muṋe wavho we vha vha vha tshi mu funa musi a tshi khou gonya ṱaḓulu. Mafheleloni gole ḽa mu tsira vha si tsha mu vhona.—Mishumo 1:6-12.

³ Naa ni dzhia tshenetsho tshiitea tshi u onesana hu vhavhaho, fhedzi havhuḓi? A zwo ngo ralo. Zwi re zwone ndi uri samusi vharuṅwa vhavhili vho humbudza vhaapostola, mafhungo a Yesu o vha a sa athu fhela. (Mishumo 1:10, 11) U gonya hawe ṱaḓulu  ho vha hu tshi sokou vha mathomo a zwithu zwinzhi zwe zwa vha zwi tshi ḓo itea. Ipfi ḽa Mudzimu ḽi bvisela khagala zwe zwa itea kha Yesu nga murahu. U guda nga ha vhutshilo ha Yesu u bva tshee a vhuyelela ṱaḓulu ndi zwa ndeme vhukuma. Ndi ngani? Humbulani maipfi a Yesu e a a vhudza Petro a ri: “Dzulani ni tshi ntevhela.” (Yohane 21:19, 22, NW) Roṱhe ri fanela u thetshelesa yeneyo ndaela, hu si lwa tshifhinganyana, fhedzi vhutshilo hashu hoṱhe. U itela uri ri kone u i thetshelesa, ri fanela u pfesesa zwine Muṋe washu a khou zwi ita zwino na mishumo ye a ṋewa yone ngei ṱaḓulu.

4. Bivhili yo bvisela hani khagala hu tshee nga phanḓa zwe zwa vha zwi tshi ḓo itea ṱaḓulu musi Yesu o no vhuyelela henefho?

⁴ Maṅwalo ha ri vhudzi tshithu malugana na u swika ha Yesu ṱaḓulu, nḓila ye a ṱanganedzwa ngayo, na nḓila ye a takala ngayo musi a tshi dovha a ṱangana na Khotsi awe. Naho zwo ralo, Bivhili yo zwi bvisela khagala hu tshee nga phanḓa zwe zwa vha zwi tshi ḓo itea ṱaḓulu nga u ṱavhanya musi Yesu o no vhuyelela henefho. Naho zwo ralo, maḓanani a fhiraho 15 a miṅwaha o fhiraho, Vhayuda vho vha vha tshi pembelela vhuṱambo vhukhethwa tshifhinga tshoṱhe. Luthihi nga ṅwaha, tshifhe muhulu o vha a tshi dzhena fhethu Hukhethwa Khethwa thembeleni u itela u shasha malofha a zwiṱhavhelo zwa Ḓuvha ḽa u Pfumelela nga phanḓa ha mbulungelo ya mulanga. Nga ḽeneḽo ḓuvha, tshifhe muhulu o vha a tshi fanyisela zwe zwa vha zwi tshi ḓo itea kha Messia. Yesu o ḓadzisa luthihi fhedzi nahone lwa vha lwa tshoṱhe zwine honoho vhuporofita ha amba zwone nga ha honoho vhuṱambo musi a tshi vhuyelela ṱaḓulu. O dzhena fhethu hu ṱhonifheaho vhukuma ha Yehova ngei ṱaḓulu—hukhethwa-khethwa kha fhethu hoṱhe—nahone a ṋekedza Khotsi awe ndeme ya tshiṱhavhelo tshawe tshi rengululaho. (Vha-Heberu 9:11, 12, 24) Naa Yehova o tshi ṱanganedza?

5, 6. (a) Ndi vhuṱanzi vhufhio he ha sumbedza uri Yehova o ṱanganedza tshiṱhavhelo tsha Kristo tshi rengululaho? (b) Ndi vhafhio vhane vha vhuyelwa nga tshirengululi, nahone nga nḓila-ḓe?

⁵ Ri wana phindulo nga u ṱolisisa zwe zwa itea maḓuvhani a si gathi musi Yesu o no gonya ṱaḓulu. Tshigwada tsha Vhakriste tshi ṱoḓaho u vha 120 tsho vha tsho kuvhangana ngei Yerusalema nḓuni  ya nṱha musi nga u ṱavhanya hu tshi pfala ḓumbu ḽa maanḓa ḽi tshi vhudzula ḽa ḓadza henefho fhethu. Ndimi dzi ngaho mulilo dzo vhonala nṱha ha ṱhoho dzavho, vha ḓadzwa nga muyamukhethwa, nahone vha thoma u amba nga ndimi dzo fhamba-fhambanaho. (Mishumo 2:1-4) Tshenetsho tshiitea tsho vha tshi tshi fanyisela u bebwa ha lushaka luswa, Isiraele wa muya, lwe lwa vha lu “lushaka lwo nangwaho” nga Mudzimu na lwa “vho-tshifhé vha vhuhosi” u itela u ḓadzisa zwine Mudzimu a zwi funa kha ḽifhasi. (1 Petro 2:9) Zwi khagala uri Yehova Mudzimu o ṱanganedza tshiṱhavhelo tsha Kristo tshi rengululaho. Honoho u shululwa ha muyamukhethwa ho vha hu dziṅwe dza phaṱhutshedzo dza u thoma dze dza vha hone nga ṅwambo wa tshirengululi.

⁶ U bva tsheetsho, tshirengululi tsha Kristo tsho vhuyedza vhatevheli vhawe shangoni ḽoṱhe. Hu sa londwi uri ri vhaṅwe vha vho ḓodzwaho vha “sambi ḽiṱuku,” vhane vha ḓo vhusa na Kristo ngei ṱaḓulu, kana ri vhaṅwe vha “dziṅwe nngu,” vhane vha ḓo tshila nga fhasi ha vhuvhusi hawe kha ḽifhasi, ri a vhuyelwa nga tshiṱhavhelo tshawe. (Luka 12:32; Yohane 10:16) Ndi mutheo wa fulufhelo ḽashu na wa u hangwelwa zwivhi zwashu. Nga u bvela phanḓa ri tshi vha na ‘lutendo’ kha tshenetsho tshirengululi, nga u tevhela Yesu ḓuvha ḽiṅwe na ḽiṅwe, ri nga vha na luvalo lwo kunaho na fulufhelo ḽavhuḓi ḽa vhumatshelo.—Yohane 3:16.

7. Yesu o ṋewa maanḓa afhio musi a tshi vhuyelela ṱaḓulu, nahone ni nga mu tikedza nga nḓila-ḓe?

⁷ Yesu o vha a tshi khou ita mini ṱaḓulu u bva tshee a vhuyelela henefho? U na maanḓa mahulwane. (Mateo 28:18) Vhukuma, Yehova o mu vhea uri a vhuse tshivhidzo tsha Vhukriste, mushumo we a u ita nga nḓila ya lufuno na yo lugaho. (Vha-Kolosa 1:13) Samusi zwo dzula zwo ambiwa, Yesu o vhea vhanna vhane vha vha na vhuḓifhinduleli uri vha ṱhogomele zwishaiwa zwa sambi. (Vha-Efesa 4:8) Sa tsumbo, o khetha Paulo uri a vhe “muapostola wa Vha-nnḓa,” na u mu ruma uri a ye u phaḓaladza mafhungo maḓifha mashangoni a kule. (Vha-Roma 11:13; 1 Timotheo 2:7) Musi ḓana ḽa u thoma ḽa miṅwaha ḽi tsini na u fhela, Yesu o ṋea milaedza ya u khoḓa, u laya, na ya u kaidza zwivhidzoni zwa sumbe zwi re vunḓuni ḽa Roma ḽa Asia. (Ndzumbululo, dzindima 2-3) Naa ni dzhia Yesu sa Ṱhoho ya tshivhidzo tsha Vhukriste? (Vha-Efesa 5:23) U itela  u dzula ni tshi mu tevhela, ni fanela u tikedza muya wa u thetshelesa na wa u shumisana tshivhidzoni tsha vhoiwe.

8, 9. Ndi maanḓa afhio e Yesu a ṋewa one nga 1914, nahone zwenezwo zwi fanela u amba mini kha riṋe malugana na phetho dzine ra dzi ita?

⁸ Yesu o dovha a ṋewa maṅwe maanḓa o engedzeaho nga 1914. Nga wonoyo ṅwaha o vhewa uri a vhe Khosi ya Muvhuso wa Yehova wa Vhumessia. Musi vhuvhusi ha Yesu vhu tshi thoma, ho “vuwa nndwa ngei ṱaḓulu.” Ha vha na mvelelo ifhio? Sathane na madimoni awe vho poswa kha ḽifhasi, nahone zwa ita uri hu thome tshifhinga tshi tsikeledzaho. U ḓala ha dzinndwa, vhutshinyi, zwithu zwi ofhisaho, malwadze, midzinginyo, na nḓala zwine zwa khou vhaisa vhathu musalauno zwi ri humbudza uri Yesu u khou vhusa zwino ngei ṱaḓulu. Sathane u kha ḓi vha “muvhusi wa shango ḽino” lwa “tshifhinga tshiṱuku.” (Ndzumbululo 12:7-12; Yohane 12:31; Mateo 24:3-7; Luka 21:11) Naho zwo ralo, Yesu u khou ṋea vhathu shangoni ḽoṱhe tshibuli tsha u ṱanganedza vhuvhusi Hawe.

⁹ Ndi zwa ndeme uri ri tikedze Khosi ya Vhumessia. Kha phetho dzashu dzoṱhe dzine ra dzi ita ḓuvha ḽiṅwe na ḽiṅwe, ri fanela u ṱoḓa thendelo yawe, hu si ya ḽino shango ḽo tshinyalaho. Musi yeneyi “Khosi ya mahosi, Ḽirena ḽa marena” i tshi lavhelesa vhathu, mbilu yayo i ya duga nga mbiti na u fhufhuma nga dakalo. (Ndzumbululo 19:16) Ndi ngani?

10. Yesu o vha e muthu-ḓe, nahone ndi mini zwo itaho uri zwi tee uri Muṋe washu a sinyuwe?

¹⁰ U fana na Khotsi awe, Muṋe washu na ene u dzula o takala. (1 Timotheo 1:11, vhambedzani NW.) Musi e kha ḽifhasi, Yesu o vha a sa sasaladzi nahone zwo vha zwi sa konḓi u mu takadza. Naho zwo ralo, hu na zwithu zwinzhi zwine zwa khou itea kha ḽifhasi ṋamusi zwine zwa ita uri zwi tee uri a sinyuwe. O sinyutshela madzangano oṱhe a vhurereli ane a zwifha a tshi amba uri a khou mu imelela. O dzula o amba zwithu zwi ngaho zwenezwo a ri: ‘A si uri muvhusoni wa ṱaḓulu hu ḓo dzhena vhoṱhe vhané vha tshi amba nṋe vha ri: Murena, Murena! Hu ḓo dzhena vhané vha ita zwiné khotsi-anga wa ṱaḓulu a funa zwi tshi itwa.  Ndi vhanzhi vhané vha ḓo amba na nṋe nga heḽo ḓuvha vha ri: Murena, Murena! A ro ngo ita mishumo ya maanḓa manzhi dzinani ḽau naa? Ndi hone ndi tshi ḓo vha vhudza nda vha fhedzela nda ri: Na ka-thihi a thi ni ḓivhi, nṱutsheleni inwi vhadzia-vhutshinyi.’—Mateo 7:21-23.

11-13. Ndi ngani vhaṅwe vhathu vha tshi nga kanganyiswa nga maipfi a re na maanḓa e Yesu a a vhudza vhane vha ita “mishumo ya maanḓa manzhi” dzinani ḽawe, nahone ndi ngani o vha o sinyuwa? Fanyisani.

¹¹ Vhathu vhanzhi ṋamusi vhane vha ḓivhidza Vhakriste vha nga wana eneo maipfi a tshi kanganyisa. Ndi ngani Yesu o livhisa eneo maipfi a re na maanḓa kha vhathu vhe vha vha vha tshi khou ita “mishumo ya maanḓa manzhi” dzinani ḽawe? Kereke dza ḽa Vhudzhagane dzo tikedza madzangano a vhuthu, u thusa vhashai, u fhaṱa vhuongelo na zwikolo, na u ita miṅwe mishumo minzhi. U itela u vhona uri ndi ngani vho fanelwa nga mbiti dza Yesu, ṱhogomelani tshifanyiso tshi tevhelaho.

¹² Kha ri ri khotsi na mme vha khou ṱoḓa u fara lwendo. Fhedzi vha nga si kone u ṱuwa na vhana vhavho, nga u ralo vha thola muthu ane a ḓo vha salela na vhana. Vha mu ṋea milayo i sa konḓi: “Ni ṱhogomele vhana vhashu. Ni vha ṋee zwiḽiwa, ni vhone uri vha dzula vho kuna, nahone ni vha ṱhogomele uri vha si huvhale.” Naho zwo ralo, musi vhabebi vha tshi vhuya, vha a sinyuwa nga u vhona uri vhana vhavho vha khou fa nga nḓala. Vho tou khakhaṱhela nga mashika, vha khou lwala nahone vho ṱungufhala. Vha khou lila u itela uri muthu we vha sala nae a vha ṱhogomele, fhedzi zwililo zwavho a zwi pfiwi. Ndi ngani? Onoyo muthu we a sala na vhana o gonya ḽeri, u khou ṱanzwa mafasiṱere. Vhabebi vho sinyuwa, vha a ṱoḓa u ḓivha uri ndi ngani vhuimo ho ralo. Onoyo muthu we a vha o sala na vhana a fhindula a ri: “Vhonani zwoṱhe zwe nda ita! Naa mafasiṱere ho ngo kuna? Ndo dovha nda lugisa na zwiṅwe zwithu nḓuni ndi tshi itela vhoiwe!” Naa vhenevho vhabebi vha ḓo takala? Na khathihi! A vho ngo vhuya vha mu laedza uri a ite yeneyo mishumo; zwe vha vha vha tshi khou ṱoḓa zwone ndi zwa uri vhana vhavho vha ṱhogomelwe fhedzi. U sa thetshelesa hawe milayo yavho zwo vha zwi tshi ḓo vha sinyusa.

 ¹³ Ḽa Vhudzhagane ḽo ita zwi fanaho na zwe zwa itwa nga muthu we a vha o sala na vhana. Yesu o sia o ṋea vhaimeleli vhawe milayo ya uri vha fushe vhathu muyani u vha funza mafhungo-ngoho a Ipfi ḽa Mudzimu na u vha thusa uri vha kune muyani. (Yohane 21:15-17) Naho zwo ralo, ḽa Vhudzhagane ḽo kundwa tshoṱhe u thetshelesa vhulivhisi hawe. Ḽo litsha vhathu vha tshi sika nga nḓala ya muya, vha tshi kanganyiswa nga mazwifhi na u sa dzhiela nṱha mafhungo-ngoho a Bivhili a mutheo. (Yesaya 65:13; Amosi 8:11) Na ndingedzo dzaḽo dza u khwinisa ḽino shango dzi nga si vhuyafhedze u sa thetshelesa haḽo nga khole. Zwi re zwone ndi uri enea maitele a shango a fana na nnḓu yo dzudzanyelwaho u pwashiwa! Ipfi ḽa Mudzimu ḽi zwi bvisela khagala uri maitele a shango ḽa Sathane a ḓo fheliswa hu si kale.—1 Yohane 2:15-17.

14. Ndi mushumo ufhio une wa khou ita uri Yesu a takale ṋamusi, nahone ndi ngani?

¹⁴ Kha ḽiṅwe sia, Yesu u fanela u vha a tshi takala musi a tshi sedza e ṱaḓulu nahone a vhona uri vhathu vha dzimilioni vha khou ḓadzisa mushumo wa u ita vhafunziwa we a u ṋea vhatevheli vhawe musi a sa athu ṱuwa kha ḽifhasi. (Mateo 28:19, 20) Ndi ndugelo yavhuḓi lungafhani u shela mulenzhe nga u ḓisa dakalo kha Khosi ya Vhumessia! Kha ri ḓiimisele uri ri sa vhuye ra neta u thusa “mukoma a fulufhedzeaho na wa vhuṱali.” (Mateo 24:45) Tshenetshi tshigwada tsha Vhakriste vho ḓodzwaho tsho fhambana na vhafunzi vha ḽa Vhudzhagane, ngauri tsho ranga phanḓa nga u ḓiṱukufhadza mushumo wa u huwelela nahone tsho ṋea zwiḽiwa nngu dza Kristo nga u fulufhedzea.

15, 16. (a) Yesu u ḓipfa hani nga u sa vha hone ha lufuno ho ḓalaho ṋamusi, nahone ri zwi ḓivha hani zwenezwo? (b) Ḽa Vhudzhagane ḽo sinyusa Yesu nga nḓila-ḓe?

¹⁵ Ri nga vha na vhungoho ha uri Khosi i a sinyuwa musi i tshi vhona u sa vha hone ha lufuno ho ḓalaho shangoni ṋamusi. Ri nga kha ḓi humbula nḓila ye Vhafarisei vha sasaladza ngayo Yesu nga ṅwambo wa u fhodza hawe nga Sabatha. Vho vha vhe na mbilu dzo omaho, nahone vha tshi ḓitika nga nḓila yavho yo khakheaho ya u ṱalutshedzela Mulayo wa Mushe na mulayo u bulwaho nga mulomo. Vhuṱolo ha Yesu ho vhuyedza vhathu vhanzhi! Fhedzi dakalo, mbofholowo na u khwaṱhiswa ha lutendo  zwe zwa bveledzwa nga honoho vhuṱolo zwo vha zwi si zwa ndeme kha vhenevho vhanna. Yesu o ḓipfa hani nga ha vhenevho vhathu? O vha lavhelesa “ó sinyuwa, a tshi vha pfela vhuṱungu nge vha vha na mbilu dzi konḓaho.”—Marko 3:5.

¹⁶ Ṋamusi, Yesu u vhona zwo kalulaho zwine zwa mu ita uri a ‘pfe vhuṱungu.’ Vharangaphanḓa vha ḽa Vhudzhagane vho swinga maṱo nga u ḓikumedza havho kha masialala na pfunzothendwa dzine dzi sa tendelane na Maṅwalo. Zwiṅwe hafhu, vha a sinyuswa nga u huwelelwa ha mafhungo maḓifha a Muvhuso wa Mudzimu. Zwipiḓani zwinzhi zwa shango, vhafunzi vho ṱuṱuwedza u tovholwa lwa tshiṱuhu ha Vhakriste vhane vha lingedza nga mbilu yoṱhe u huwelela mulaedza we Yesu a u huwelela. (Yohane 16:2; Ndzumbululo 18:4, 24) Nga tshifhinga tshi fanaho, vhenevho vhafunzi vha anzela u ṱuṱuwedza vhatevheli vhavho uri vha ye nndwani nahone vha vhulahe vhaṅwe—zwi tshi nga u ita nga u ralo zwi ḓo takadza Yesu Kristo!

17. Vhatevheli vha Yesu vha vhukuma vha takadza hani mbilu ya Yesu?

¹⁷ U fhambana na zwenezwo, vhatevheli vha Yesu vha vhukuma vha lingedza u funa vhathu ngavho. Vha huwelela mafhungo maḓifha kha “vhathu vhoṱhe,” u fana na zwe Yesu a zwi ita, hu sa londwi u hanedzwa. (1 Timotheo 2:4) Nahone vha funana nga nḓila khulwane; ndi luswayo lwavho luhulwane. (Yohane 13:34, 35) Musi vha tshi fara Vhakriste ngavho nga lufuno, ṱhonifho, na nga tshirunzi, vha vha vha tshi khou tevhela Yesu ngangoho—na u takadza mbilu ya Khosi ya Vhumessia!

18. Ndi zwifhio zwine zwa vhaisa Muṋe washu, fhedzi ri nga mu takadza hani?

¹⁸ Ri fanela u dovha ra humbula uri Muṋe washu u a vhaisala musi vhatevheli vhawe vha tshi kundelwa u konḓelela, vha tshi tendela u funa havho Yehova hu tshi fhela na u litsha u vha vhashumeli Vhawe. (Ndzumbululo 2:4, 5) Naho zwo ralo, Yesu u a takadzwa nga vhane vha konḓelela u swika vhufheloni. (Mateo 24:13) Nga zwenezwo, kha ri ḓiimisele u humbula tshifhinga tshoṱhe ndaela ya Kristo ine ya ri: “Dzulani ni tshi ntevhela.” (Yohane 21:19, NW) Kha ri ṱhogomele dziṅwe phaṱhutshedzo dzine Khosi ya Vhumessia ya ḓo dzi ḓisela vhane vha konḓelela u swika vhufheloni.

19, 20. (a) U tevhela Yesu zwi livhisa kha phaṱhutshedzo dzifhio zwino? (b) U tevhela Kristo zwi nga ri thusa hani u fusha u ṱoḓa hashu khotsi?

¹⁹ U tevhela Yesu ndi nḓila i vhuyedzaho vhukuma ya vhutshilo zwino. Arali ra ṱanganedza Kristo sa Muṋe washu, ra tevhela ndaela yawe na u shumisa tsumbo yawe sa vhulivhisi hashu, ri ḓo wana lupfumo lune vhathu shangoni ḽoṱhe vha lu ṱoḓa, fhedzi vha sa lu wani. Ri ḓo fhaṱutshedzwa nga mushumo une wa ḓo ita uri vhutshilo hashu vhu vhe na ndivho, nga muṱa wa vhatendi nga riṋe u re na vhuthihi nga ṅwambo wa mbofho ya vhukuma ya lufuno, luvalo lwo kunaho, na nga mulalo wa ngelelo. Nga u tou pfufhifhadza, ri ḓo wana vhutshilo vhu takadzaho na vhu fushaho. Nahone ri ḓo dovha ra ḓiphina nga dziṅwe mbuyelo nnzhi.

²⁰ Yehova o ita uri Yesu a vhe “Khotsi wa Lini na Lini” kha vhane vha vha na fulufhelo ḽa u tshila nga hu sa fheli kha ḽifhasi. Yesu o dzhiela vhudzulo khotsi a vhathu, ane a vha Adamu, we a vhea vhana vhawe vhoṱhe vhuimoni vhu si havhuḓi. (Yesaya 9:6, 7, NW) Nga u ṱanganedza Yesu sa ‘Khotsi ashu wa Lini na Lini,’ nga u vha na lutendo khae, ri ḓo vha na fulufhelo ḽo khwaṱhaho ḽa vhutshilo vhu sa fheli. Zwiṅwe hafhu, ri ḓo sendela tsini-tsini na Yehova Mudzimu. Samusi ro zwi guda, u ḓiimisela u tevhela tsumbo ya Yesu ḓuvha ḽiṅwe na ḽiṅwe ndi yone nḓila ya khwine ya u thetshelesa yeneyi ndaela ya Mudzimu ine ya ri: “Ivhani vha-edzisa-Mudzimu sa vhana vha funwaho.”—Vha-Efesa 5:1.

21. Vhatevheli vha Kristo vha vhonetshela tshedza shangoni ḽi re na swiswi nga nḓila-ḓe?

²¹ Musi ri tshi edzisa Yesu na Khotsi awe, Yehova, ri vha ri na ndugelo yavhuḓi vhukuma. Ri vhonetshela tshedza tshihulwane. Kha shango ḽo tibedzwaho nga swiswi, hune ha vha na vhathu vha zwigidi zwa milioni vho xedzwaho nga Sathane na vhane vha edzisa pfaneleo dzawe, riṋe vhane ra tevhela Kristo ri phaḓaladza hoṱhe tshedza tshi penyaho vhukuma—tshedza tsha mafhungo-ngoho a Maṅwalo, tshedza tsha pfaneleo dzavhuḓi dza Vhukriste, tshedza tsha dakalo ḽa vhukuma, mulalo wa ngoho, na lufuno  lwa vhukuma. Nga tshifhinga tshi fanaho, ri dovha ra sendela tsini-tsini na Yehova, nahone tshenetsho ndi tshipikwa tshihulwane vhukuma, ndivho khulwane ya muthu naho e ufhio.

22, 23. (a) Ndi phaṱhutshedzo dzifhio dza tshifhingani tshi ḓaho dzine dza ḓo waniwa nga vhane vha dzula vha tshi tevhela Yesu nga u fulufhedzea? (b) Ri fanela u ḓiimisela u ita mini?

²² Dovhani ni humbule nga ha zwine Yehova a ṱoḓa u ni itela zwone tshifhingani tshi ḓaho a tshi shumisa Khosi yawe ya Vhumessia. Hu si kale yeneyo Khosi i ḓo thoma nndwa yo lugaho ya u lwa na maitele mavhi a zwithu a Sathane. Yesu u ḓo kunda! (Ndzumbululo 19:11-15) Nga murahu, Kristo u ḓo thoma Vhuvhusi hawe ha Miṅwaha ya Tshigidi kha ḽifhasi. Muvhuso wawe  wa ṱaḓulu u ḓo phaḓaladza mbuyelo dza tshirengululi kha muthu muṅwe na muṅwe a fulufhedzeaho, na u ita uri vhenevho vhathu vha fhelele. Nga maṱo a muhumbulo, ḓivhoneni ni na mutakalo wavhuḓi vhukuma, ni muswa a re na maanḓa, ni tshi khou shuma no takala na vhathu vha re na vhuthihi u itela u shandula ḽino ḽifhasi uri ḽi vhe paradiso! Vhufheloni ha miṅwaha ya Tshigidi, Yesu u ḓo dovha a vhuyedzedza vhuvhusi kha Khotsi awe. (1 Vha-Korinta 15:24) Arali na bvela phanḓa ni tshi tevhela Kristo nga u fulufhedzea, ni ḓo wana phaṱhutshedzo dzavhuḓi vhukuma—‘vhugala ha mbofholowo ya vhana vha Mudzimu’! (Vha-Roma 8:21) Ee, ri ḓo wana phaṱhutshedzo dzoṱhe dze Adamu na Eva vha vha vhe nadzo nahone vha xelelwa ngadzo. Samusi ri vharwa na vhananyana vha Yehova vha kha ḽifhasi, ri ḓo vhofhololwa tshoṱhe kha dondo ḽa tshivhi tsha Adamu. Vhukuma, “lufu a lu tsha ḓo vha hone.”—Ndzumbululo 21:4.

²³ Humbulani nga ha muṱhannga wa muvhusi o pfumaho we ra haseledza nga hae kha Ndima ya 1. O hana Yesu a tshi mu ramba uri: “Iḓani ni vhe mutevheli wanga.” (Marko 10:17-22, vhambedzani NW.) Ni songo vhuya na ita honoho vhukhakhi! U nga ri ni nga aravha nga dakalo na nga mafulufulu musi ni tshi rambiwa nga Yesu. U nga ri ni nga ḓiimisela u konḓelela, u dzula ni tshi tevhela Mulisa wa Ndele ḓuvha ḽiṅwe na ḽiṅwe, ṅwaha muṅwe na muṅwe, nahone na tshila u itela u mu vhona a tshi ita uri ndivho dzoṱhe dza Yehova dzi fheleledze dzo ḓadzea!