NI FULA apula kha lutavhi lwa muri ḽine ḽa tou ṋuṅuṋuṅu. Na fembedza munukhelelo waḽo ni sa athu u ḽi posa kha maṅwe manngini. No fhedza tshifhinga tshilapfu ni tshi khou shuma, fhedzi ni ḓipfa ni tshee na maanḓa lune na nga kona u bvela phanḓa. Mme aṋu vha kha muri u re nga henefho tsini, vha khou shuma vho ḓitakalela nahone vha khou haseledza na miṅwe miraḓo ya muṱa na khonani dzine dza khou vha thusa u kaṋa. Vha vhonala vhe muswa vhukuma—nga nḓila ine na vha ḓivha ngayo musi ni tshee muṱuku yeneiḽa miṅwaha ya kale. Zwi a konḓa u tenda uri no vha vhona vha tshi kegula musi ni tshi kha ḓi tshila shangoni ḽa kale. No vha vhona vha tshi khou ṱhoṱhela nga vhulwadze, na fara tshanḓa tshavho musi vha tshi fema lwa u fhedza nahone na lila musi vha tshi vhulungwa. Fhedzi khevha zwino, u katela na vhaṅwe vhanzhi, vha khou tshila nahone vha na mutakalo wavhuḓi!

Ri a zwi ḓivha uri eneo maḓuvha a ḓo swika. Ri a zwi ḓivha nga nṱhani ha uri mafulufhedziso a Mudzimu a dzula a tshi ḓadzea. Kha yeneyi khethekanyo, ri ḓo ṱolisisa nḓila ine maṅwe mafulufhedziso a Muvhuso ane a ḓo ḓadzea hu si kale, musi nndwa ya Haramagedo i tshi khou ḓi sendela. Ri ḓo dovha ra vusulusa maṅwe mafulufhedziso a takadzaho a Muvhuso ane a ḓo ḓadzea nga murahu ha yeneyo nndwa. Ri ḓo takala lungafhani musi ri tshi vhona Muvhuso wa Mudzimu u tshi vhusa ḽifhasi ḽoṱhe na u ita uri zwithu zwoṱhe zwi vhe zwiswa!