1-3. Yesu o ṱanḓavhudza hani mushumo wa u huwelela, ri nga ḓivhudzisa mbudziso dzifhio?

 YESU o fhedza miṅwaha mivhili a tshi khou huwelela u mona na ḽoṱhe ḽa Galilea. (Vhalani Mateo 9:35-38.) O dalela miḓi na miḓana minzhi, a tshi funza dzisinagogoni na u huwelela mafhungo maḓifha a Muvhuso. O vha a tshi tevhelwa nga gogo ḽa vhathu huṅwe na huṅwe he a vha a tshi huwelela hone. Yesu o amba uri “khaṋo ndi khulu” nahone ho vha hu tshi khou ṱoḓea vhashumi vho engedzeaho.

² Yesu o ita ndugiselelo ya u ṱanḓavhudza mushumo wa u huwelela. Nga nḓila-ḓe? Nga u rumela vhaapostola vhawe vha 12 “uri vha ye u huwelela nga ha Muvhuso wa Mudzimu.” (Luka 9:1, 2) Vhaapostola vha nga vha vho ḓivhudzisa uri vha ḓo ita hani wonoyu mushumo. Musi Yesu a sa athu u vha ruma, o vha gudisa nga lufuno zwe a gudiswa nga Khotsi awe wa ṱaḓulu.

³ Ri nga ḓivhudzisa mbudziso dzo vhalaho dzi ngaho: Yesu o gudiswa hani nga Khotsi awe? Yesu o gudisa vhaapostola vhawe mini? Hu pfi mini nga ṋamusi—naa Khosi ya Vhumessia yo gudisa vhatevheli vhayo uri vha kone u khunyeledza vhuḓinḓa havho? Arali zwo ralo, yo zwi ita nga nḓila-ḓe?

4. Yesu o funzwa nga Khotsi awe lini nahone ngafhi?

⁴ Yesu o amba khagala uri o funzwa nga Khotsi awe. Tshifhingani tsha vhuḓinḓa hawe, Yesu o ri: “Ndi amba zwenezwi zwithu nga nḓila ye Khotsi a mpfunza ngayo.” (Yoh. 8:28) Yesu o funzwa lini nahone ngafhi? Zwi tou vha khagala uri samusi e Murwa wa tanzhe wa Mudzimu, o thoma u funzwa musi a tshi tou sikwa. (Vhakol. 1:15) Musi e na Khotsi awe ngei ṱaḓulu, Murwa o fhedza miṅwaha minzhi a tshi khou thetshelesa na u guda kha “Mulai” muhulwane. (Yes. 30:20) Nga zwenezwo, onoyo Murwa o wana pfunzo i sa vhambedzwi na tshithu nga ha pfaneleo, mishumo, na ndivho zwa Khotsi awe.

5. Ndi ndaela ifhio ye Khotsi a i ṋea Murwa malugana na vhuḓinḓa he a vha a tshi ḓo vhu ita kha ḽifhasi?

⁵ Nga u ya ha tshifhinga, Yehova o gudisa Murwa wawe mushumo we a vha a tshi ḓo u ita kha ḽifhasi. Ṱhogomelani vhuporofita vhune ha ṱalusa vhushaka vhukati ha Mulai Muhulwane na Murwa wawe wa tanzhe. (Vhalani Yesaya 50:4, 5.) Honoho vhuporofita  vhu amba uri Yehova o vusa Murwa wawe “misi yoṱhe ḽi tshi tsha.” Tshenetsho tshifanyiso tshi ita uri ri humbule nga ha mudededzi ane a vusa mugudiswa nga matsheloni uri a mu funze. Iṅwe bugu ine ya ṱalutshedzela Bivhili i ri: “Yehova . . . u mu gudisa u fana na mudededzi a tshi khou gudisa ṅwana tshikoloni, a mu gudisa zwine a fanela u zwi funza na nḓila ine a fanela u huwelela ngayo.” Kha tshenetsho “tshikolo” tsha ṱaḓulu, Yehova o gudisa Murwa wawe ‘zwine a fanela u zwi amba na u zwi funza.’ (Yoh. 12:49) Khotsi o dovha a ṋea Murwa wawe ndaela malugana na nḓila ya u funza. a Musi Yesu e kha ḽifhasi, o shumisa nga vhuḓalo zwe a zwi guda hu si nga u khunyeledza vhuḓinḓa hawe fhedzi, fhedzi na nga u gudisa vhatevheli vhawe uri vha khunyeledze vhuḓinḓa havho.

6, 7. (a) Yesu o gudisa mini vhaapostola vhawe, nahone zwo vha shomedzela u ita mini? (b) Yesu o ita vhungoho ha uri vhatevheli vhawe vha misini yashu vha wana vhugudisi ha mufuda-ḓe?

⁶ Samusi zwo bulwa mathomoni, Yesu o gudisa vhaapostola vhawe mini? U ya nga Mateo ndima ya 10, o vha ṋea ndaela dzo livhaho malugana na vhuḓinḓa, u katela na dzi tevhelaho: hune vha fanela u huwelela hone (dzindimana 5, 6), mulaedza une vha fanela u u huwelela (ndimana 7), ṱhoḓea ya u fulufhela Yehova (dzindimana 9, 10), nḓila ya u amba na vhoṋemuḓi (dzindimana 11-13), zwine vha fanela u ita musi vhathu vha sa ṱanganedzi mulaedza (dzindimana 14, 15), na zwine vha fanela u ita musi vha tshi tovholwa (dzindimana 16-23). b Nḓila i pfalaho ye Yesu a gudisa vhaapostola vhawe ngayo yo vha shomedzela u isa phanḓa na mushumo wa u huwelela mafhungo maḓifha ḓanani ḽa u thoma ḽa miṅwaha C.E.

⁷ Hu pfi mini nga misi yashu? Yesu, Khosi ya Muvhuso wa Mudzimu, o ṋea vhatevheli vhawe mushumo wa ndeme u fhira yoṱhe, une wa vha u huwelela “mafhungo maḓifha aya a Muvhuso . . . ḽifhasini ḽoṱhe uri zwi vhe vhuṱanzi kha tshaka dzoṱhe.” (Mat. 24:14) Naa Khosi yo ri gudisa u ita wonoyu mushumo wa ndeme nga u rali? I ngoho, yo ri gudisa! Musi i ngei ṱaḓulu, Khosi yo ita vhungoho ha uri vhatevheli vhayo vha gudiswa nḓila ine vha fanela u huwelela ngayo musi vhe tsimuni na nḓila ine vha nga khunyeledza ngayo vhuḓifhinduleli havho ho khetheaho tshivhidzoni.

8, 9. (a) Ndivho khulwane ya Tshikolo tsha Vhuḓinḓa ha lwa Ṱaḓulu yo vha i ifhio? (b) Muṱangano wa vhukati ha vhege wo ni thusa hani uri ni vhe na vhukoni vhuḓinḓani?

⁸ Ndi kale ndangulo ya Yehova i tshi shumisa maguvhangano, mabuthano na miṱangano ya tshivhidzo—i ngaho Muṱangano wa Tshumelo—u gudisela vhathu vha Mudzimu vhuḓinḓa. Naho zwo ralo, u thoma nga vho-1940, vhahashu vhane vha ranga phanḓa ofisini khulwane vho thoma u dzudzanya vhugudisi vha tshi shumisa zwikolo zwo fhamba-fhambanaho.

⁹ Tshikolo tsha Vhuḓinḓa ha lwa Ṱaḓulu. Samusi ro zwi vhona kha ndima yo fhiraho, tshenetshi tshikolo tsho thoma u farwa nga 1943. Naa ndivho ya tshenetshi tshikolo yo vha i u sokou gudisa vhagudiswa uri vha vhe na vhukoni ha u ṋekedza nyambo miṱanganoni ya tshivhidzo? Na kathihi. Ndivho khulwane ya tshenetsho tshikolo yo vha i u gudisa vhathu vha Mudzimu uri vha shumise  vhukoni havho ha u amba u itela u renda Yehova vhuḓinḓani. (Ps. 150:6) Tshenetsho tshikolo tsho shomedzela vhahashu vhoṱhe vha tshinnani na vha tshisadzini vho ḓiṅwalisaho uri vha vhe vhaḓinḓa vha Muvhuso vha re na vhukoni. Zwino vhugudisi ho raloho ri vhu wana kha muṱangano wa vhukati ha vhege.

10, 11. Ndi vhafhio vhane zwino vha nga ṅwalisela u ya Tshikoloni tsha Gilead nahone ndi tshifhio tshipikwa tsha tshenetsho tshikolo?

¹⁰ Tshikolo Tsha Bivhili Tsha Watchtower Tsha Gilead. Tshenetshi Tshikolo Tsha Bivhili Tsha Watchtower Tsha Gilead tsho thoma nga Musumbuluwo wa ḽa 1 February, 1943. U thomani tshenetshi tshikolo tsho vha tsho itelwa u gudisa vhavulanḓila na vhaṅwe vha re tshumeloni ya tshifhinga tsho ḓalaho uri vha ite tshumelo ya vhurumiwa kha maṅwe mashango. Fhedzi u thoma nga October 2011, hu vho gudiswa fhedzi vha re kha tshumelo yo khetheaho ya tshifhinga tsho ḓalaho—vhavulanḓila vho khetheaho, vhalavhelesi vha dalelaho na vhafumakadzi vhavho, miraḓo ya muṱa wa Bethele, na vharumiwa vha sa athu u ya kha tshenetshi tshikolo.

¹¹ Ndi tshifhio tshipikwa tsha zwine zwa funzwa Tshikoloni tsha Gilead? Muṅwe mugudisi we a fhedza miṅwaha minzhi a tshi khou funza u ri: “Ndi u khwaṱhisa lutendo lwa vhagudiswa nga u guda Ipfi ḽa Mudzimu nga vhuronwane na u vha thusa uri vha ṱahulele pfaneleo dza lwa muya dzi ṱoḓeaho uri vha kone u kunda khaedu dzine vha ṱangana nadzo mishumoni yavho. Hafhu, tshiṅwe tshipikwa tsha ndeme tsha zwithu zwine zwa funzwa tshikoloni ndi u ita uri vhagudiswa vha vhe na lutamo luhulwane lwa u ṱanganela kha mushumo wa vhuevangeli.”—Vhaef. 4:11.

12, 13. Tshikolo tsha Gilead tsho kwama hani mushumo wa u huwelela shangoni ḽoṱhe? Ṋeani tsumbo.

¹² Tshikolo tsha Gilead tsho kwama hani mushumo wa u huwelela shangoni ḽoṱhe? U bva nga 1943, tshenetshi tshikolo tsho gudisa vhathu vha fhiraho 8 500, c nahone vharumiwa vho gudiswaho tshikoloni tsha Gilead vho no shuma mashangoni a fhiraho 170 u mona na shango ḽoṱhe. Vharumiwa vha shumisa zwithu zwe vha zwi guda nga nḓila yavhuḓi, vha vhea tsumbo yavhuḓi vhuḓinḓani na u gudisa vhaṅwe uri vha ite nga u ralo. Mashangoni manzhi, vharumiwa vho ranga phanḓa mushumo wa u huwelela mashangoni e a vha e na vhahuweleli vha Muvhuso vha si gathi kana e a vha e si na muhuweleli na muthihi.

¹³ Ṱhogomelani zwe zwa itea ngei Dzhapani, he mushumo wa u huwelela khagala wa imiswa tshifhingani tsha Nndwa ya Shango ya Vhuvhili. Nga August 1949, ho vha hu na vhahuweleli vha sa swiki fumi ngei Dzhapani. Naho zwo ralo, musi wonoyo ṅwaha u tshi fhela vharumiwa vha 13 vhe vha gudiswa tshikoloni tsha Gilead vho vha vha tshi khou huwelela ngei Dzhapani. Ho mbo ḓi rumelwa vhaṅwe vharumiwa. Vharumiwa vho thoma nga u huwelela dziḓoroboni khulwane; nga murahu, vha ya kha dziṅwe ḓorobo. Vharumiwa vho ṱuṱuwedza vhagudiswa vhavho u katela na vhaṅwe zwi tshi bva mbiluni uri vha dzhenele tshumelo ya vhuvulanḓila. Vhuḓidini ha vharumiwa ho vha na mvelelo dzavhuḓi. Zwino hu na vhahuweleli vha Muvhuso vha fhiraho 216 000 ngei Dzhapani nahone vha ṱoḓaho u vha phesenthe dza 40 ndi vhavulanḓila! d

14. Zwikolo zwa lwa ṱaḓulu ndi vhuṱanzi ho khwaṱhaho ha mini? (Sedzani na bogisi “ Zwikolo Zwine Zwa Gudisa Vhaḓinḓa Vha Muvhuso,” kha siaṱari 188.)

 ¹⁴ Zwiṅwe zwikolo zwa lwa ṱaḓulu. Zwikolo zwi ngaho Tshikolo tsha Tshumelo ya Vhuvulanḓila, Tshikolo Tsha Bivhili Tsha Vhavhingani Vha Vhakriste na Tshikolo Tsha Bivhili Tsha Vhahashu Vha Tshinnani Vha Songo Vhingaho, zwo no thusa vhe vha ṅwalisa khazwo uri vha ite mvelaphanḓa ya lwa muya na uri vha range phanḓa nga u fhisea kha mushumo wa vhuevangeli. e Zwenezwi zwikolo zwoṱhe zwa lwa ṱaḓulu ndi vhuṱanzi ho khwaṱhaho ha uri Khosi yashu yo shomedzela tshoṱhe vhatevheli vhayo uri vha khunyeledze vhuḓinḓa havho.—2 Tim. 4:5.

15. Vhanna vha re na vhuḓifhinduleli vha tea u edzisa Yesu nga nḓila-ḓe?

¹⁵ Elekanyani nga ha vhuporofita ha Yesaya vhune ha amba nga ha u gudiswa ha Yesu nga Mudzimu. “Tshikoloni” tshenetsho tsha ṱaḓulu, Murwa o guda uri a “kone u tika muneti nga u amba nae.” (Yes. 50:4) Yesu o shumisa yeneyo ndaela; musi e kha ḽifhasi, o homolosa vho ‘netaho na vha lemelwaho.’ (Mat. 11:28-30) Vhanna vha re na vhuḓifhinduleli vha edzisa tsumbo ya Yesu nga u vha tshisima tshi homolosaho kha vhahavho vha tshinnani na vha tshisadzini.  Uri vha kone u ita zwenezwo, ho dzudzanywa zwikolo zwo fhamba-fhambanaho hu u itela u thusa vhahashu vha faneleaho uri vha vhe na vhukoni ha u shumela vhatendi ngavho.

16, 17. Ndi tshifhio tshipikwa tsha Tshikolo tsha Vhuḓinḓa ha Muvhuso? (Sedzani na ṱhaluso i re magumoni a siaṱari.)

¹⁶ Tshikolo tsha Vhuḓinḓa ha Muvhuso. Kilasi ya u thoma ya tshenetshi tshikolo yo thoma nga ḽa 9 March, 1959, ngei South Lansing, New York. Vhalavhelesi vha dalelaho khathihi na vhashumeli vha tshivhidzo vho rambiwa uri vha ye kha tshenetshi tshikolo tsha ṅwedzi muthihi. Nga u ya ha tshifhinga yeneyo pfunzo ya ṱalutshedzelwa u bva kha Luisimane ya iswa kha dziṅwe nyambo, nahone tshenetsho tshikolo tsha thoma u gudisa vhahashu mashangoni oṱhe nga zwiṱuku nga zwiṱuku. f

¹⁷ Malugana na tshipikwa tsha Tshikolo tsha Vhuḓinḓa ha Muvhuso, 1962 Yearbook of Jehovah’s Witnesses yo ri: “Kha heḽi shango ḽine ra dzula ro farakanea, mulavhelesi wa tshivhidzo u fanela u vha munna ane a kona u dzudzanya vhutshilo hawe uri a ṱhogomele vhoṱhe tshivhidzoni nga nḓila yo teaho na u vha ita uri vha takale. Naho zwo ralo, a songo vha munna ane a litshelela muṱa wawe a tshi itela tshivhidzo, fhedzi u fanela u vha na muhumbulo wo tshaho. Ndi tshibuli tshavhuḓi lungafhani tshe tsha ṋewa vhashumeli  vha tshivhidzo shangoni ḽoṱhe uri vha ye Tshikoloni tsha Vhuḓinḓa ha Muvhuso uri vha wane vhugudisi vhune ha ḓo vha thusa u ita zwine Bivhili ya amba uri mulavhelesi a zwi ite!”—1 Tim. 3:1-7; Tito 1:5-9.

18. Vhathu vhoṱhe vha Mudzimu vha vhuyelwa hani nga Tshikolo tsha Vhuḓinḓa ha Muvhuso?

¹⁸ Vhathu vhoṱhe vha Mudzimu vho vhuyelwa nga Tshikolo tsha Vhuḓinḓa ha Muvhuso. Nga nḓila-ḓe? Musi vhahulwane na vhashumeli vha tshi shumisa zwe vha zwi guda tshikoloni, vha vha tshisima tshi homolosaho vhatendi ngavho, u fana na Yesu. Naa a ni takali musi ni tshi dalelwa nga muhulwane kana mushumeli nahone a amba na inwi nga vhulenda, a ni thetshelesa kana u ni ṱuṱuwedza? (1 Vhathes. 5:11) Vhenevho vhanna vha faneleaho ndi phaṱhutshedzo vhukuma zwivhidzoni zwa havho!

19. Ndi zwifhio zwiṅwe zwikolo zwine zwa langiwa nga Komiti ya U Funza nahone zwenezwo zwikolo zwo itelwa mini?

¹⁹ Zwiṅwe zwikolo zwa lwa ṱaḓulu. Komiti ya u funza ya Tshigwada tshi Langaho i ṱhogomela zwiṅwe zwikolo zwine zwa gudisa vhanna vha re na vhuḓifhinduleli ndanguloni. Zwenezwo zwikolo zwo itelwa u thusa vhahashu vha tshinnani vha re na vhuḓifhinduleli—vhahulwane vha tshivhidzo, vhalavhelesi vha dalelaho na miraḓo ya Komiti ya Davhi—uri vha vhe na vhukoni ha u khunyeledza vhuḓifhinduleli havho vhunzhi. Pfunzo dzo thewaho Bivhilini dzi ṱuṱuwedza vhahashu vha tshinnani uri vha ṱahulele vhumuya havho na u shumisa maitele a Maṅwalo musi vha tshi khou shumisana na nngu dza ndeme dze Yehova a vha ṋea uri vha dzi ṱhogomele.—1 Pet. 5:1-3.

20. Ndi ngani Yesu a tshi nga amba uri roṱhe ri “gudiswa nga Yehova,” nahone no ḓiimisela u ita mini?

²⁰ Zwi tou vha khagala uri Khosi ya Vhumessia yo ita vhungoho ha uri vhatevheli vhayo vha gudiswa zwavhuḓi. Vhugudisi hoṱhe vhu bva ṱaḓulu: Yehova o gudisa Murwa wawe nahone onoyo Murwa a gudisa vhatevheli vhawe. Ndi ngazwo Yesu o vha a tshi nga amba uri roṱhe ro “gudiswa nga Yehova.” (Yoh. 6:45; Yes. 54:13) Kha ri ḓiimisele u shumisa nga vhuḓalo vhugudisi hoṱhe he ra ṋewa hone nga Khosi yashu. Ri songo hangwa u ri tshipikwa tsha ndeme tsha u gudiswa honohu ndi uri thusa uri ri dzule ro khwaṱha muyani uri ri kone u khunyeledza vhuḓinḓa hashu nga vhuḓalo.