1. Malugana na vhurabeli, ndi hufhio u ḓikhethela hune vhathu vha sedzana naho ṋamusi?

YESU o ri: “A sa imiho na nṋe u lwa na nṋe.” (Mateo 12:30) Muṅwe na muṅwe a sa imiho na Yehova u ima na Sathane. Vhunzhi ha vhathu vha humbula uri vha khou shumela Mudzimu nga nḓila ine a i ṱanganedza, fhedzi Bivhili i amba uri Sathane u khou “xedza shango ḽoṱhe.” (Ndzumbululo 12:9) Vhathu vhanzhi-vhanzhi vha humbula uri vha khou gwadamela Mudzimu, fhedzi ngoho ndi ya uri vha khou shumela Sathane Diabolo! Vhathu ṋamusi vha tea u ḓikhethela: Vha fanela u shumela Yehova, “Mudzimu wa ngoho” kana Sathane, “khotsi ya vhadzia-u-zwifha.”—Psalme ya 31:5; Yohane 8:44.

2. Ndi ifhio iṅwe nḓila ine Sathane a i shumisa u itela u thivhela vhathu uri vha si gwadamele Yehova?

² U khetha u shumela Yehova ndi zwa vhuṱali, ndi khetho ine ya ḓo ita uri ni ṱanganedzwe nga Mudzimu. Fhedzi Sathane ha takaleli vhane vha shumela Mudzimu; vhathu vho raloho u a vha tsikeledza. Iṅwe nḓila ine a zwi ita ngayo ndi u ita uri vha sasaladzwe kana vha pikiswe nga vhaṅwe, naho hu nga dzikhonani na miraḓo ya muṱa. Yesu o sevha: “Vha muṱani wa muthu vha ḓo vha maswina awe.”—Mateo 10:36.

3. Arali miraḓo ya muṱa kana khonani vha pikisa u gwadamela haṋu Mudzimu, ni ḓo ita mini?

³ Arali zwenezwo zwa bvelela kha inwi, ni ḓo ita mini? Vhathu vhanzhi vha a zwi ḓivha uri nḓila ine vha gwadamela ngayo yo khakhea, naho zwo ralo vha timatima u i ṱutshela. Vha  humbula uri u ita zwenezwo zwi ḓo vha u sa fulufhedzea kha muṱa wavho. Naa zwenezwo zwi a pfala? Arali na zwi ṱhogomela uri miraḓo ya muṱa waṋu i shumisa zwidzidzivhadzi zwi re na khombo, naa no vha ni sa nga si vha sevhe uri zwi ḓo vha vhaisa? Naa no vha ni tshi ḓo ṱanganela navho kha u shumisa zwenezwo zwidzidzivhadzi?

4. Ndi mini zwe Yoshua a zwi vhudza Vhaisiraele malugana na vhurabeli misini yawe?

⁴ Yoshua o ṱuṱuwedza Vhaisiraele uri vha litshe vhurereli na mvelele dzo khakheaho zwa vhomakhulukuku wavho. O ri: “Zwino ofhani-ha Yehova ni shumele Ene ngangoho na nga u fulufhedzea. Ṱusani midzimu ye vho-khotsi-aṋu vha i shumela hangei seli ha mulambo wa Furate na ngei Egipita, ni shumele Yehova.” (Yoshua 24:14) Yoshua o vha a tshi fulufhedzea kha Mudzimu, nahone Yehova o mu fhaṱutshedza. Arali ri tshi fulufhedzea kha Yehova, na riṋe-vho u ḓo ri fhaṱutshedza.—2 Samuele 22:26.

5. Ndi ngani ri tshi fanela u laṱa zwithu zwoṱhe zwa manditi?

⁵ U ḓivhofholola kha vhurereli ha mazwifhi zwi dovha zwa katela na laṱa zwithu zwoṱhe zwa manditi zwine ra nga vha ri nazwo, zwi ngaho zwitungulo, malungu, na mabengele na zwine zwa nga zwenezwo. Hezwi ndi zwa ndeme ngauri zwi sumbedza uri ri fulufhela tshoṱhe Yehova.

6. Ndi mini zwe Vhakriste vha u thoma vha zwi ita nga bugu dzavho dza manditi?

⁶ Ṱhogomelani zwe vhaṅwe Vhakriste vha u thoma vha zwi ita musi vha tshi ṱoḓa u vha kha vhurereli ha ngoho. Bivhili i ri: “Vhanzhi vhe vha vha vha tshi ita mishumo ya u laula, vha ḓisa bugu dzavho vha dzi fhisa vhathu vha tshi zwi vhona.”—Mishumo 19:19.

7. Ri nga ita mini arali ra tambudzwa nga madimoni?

⁷ Vhaṅwe vhe vha thoma u shumela Yehova nahone vhe u thomani vha vha vha tshi ṱanganela kha zwa vhuloi kana zwa manditi vha nga kha ḓi tambudzwa nga madimoni. Arali zwenezwo zwa itea kha inwi, vhidzelelani Yehova nga thabelo, ni tshi shumisa dzina ḽawe. U ḓo ni thusa.—Mirero 18:10; Yakobo 4:7.

8. Vhakriste vha dzhia hani midzimu i sili, na zwifanyiso zwine zwa shumiswa vhurabelini ha mazwifhi?

⁸ Vhane vha tama u shumela Yehova a vho ngo fanela u vha na zwishumiswa zwa midzimu i sili kana zwifanyiso zwa vhurereli ha mazwifhi. Vhakriste vha ngoho vha ‘tshimbila nga u tenda, hu si nga u vhona.’ (2 Vha-Korinta 5:7) Vha ṱhonifha mulayo wa Mudzimu une wa si tendele u shumiswa ha zwifanyiso vhurabelini.—Ekisodo 20:4, 5.

9. Ndi nyeletshedzo ifhio ine Bivhili ya i ṋea malugana na u vha vho ṱalifhaho?

⁹ Bivhili i ri: “Mu-endelana-na-vhaṱali u a ṱalifha-vho; mu-konana-na-tsilu u ḓo tambula-vho.” (Mirero 13:20) Arali ri tshi ṱoḓa u ṱalifha, ri fanela u tshimbila, kana u ḓikonanya na Ṱhanzi dza Yehova. Ndi vhathu vha tshimbilaho nḓilani i isaho vhutshiloni vhu sa fheli.—Mateo 7:14.

10. Ṱhanzi dza Yehova vha nga ni thusa hani uri ni shumele Mudzimu?

¹⁰ Vhukuma Ṱhanzi dzi a ṱhogomela vhaṅwe vhathu. Mushumo wavho ndi u thusa vhathu vha fulufhedzeaho uri vha pfesese mafhungo-ngoho a Bivhili ane a isa vhutshiloni vhu sa fheli. Vha nga ni thusa nga u guda Bivhili na inwi, mahala. Vha ḓo fhindula mbudziso dzaṋu na u ni sumbedza uri ni nga shumisa hani nḓivho ya Bivhili vhutshiloni haṋu.—Yohane 17:3.

11. Miṱangano ya Vhukriste i nga ni thusa hani?

¹¹ Miṱanganoni yavho, ine kanzhi ya farelwa Holoni ya Muvhuso, ni ḓo guda zwinzhi nga ha nḓila dza Yehova. Ni ḓo khwaṱhiswa uri ni ṱanganele kha vhurereli ha ngoho. Nahone ni ḓo dovha na gudiswa nḓila ine na nga thusa ngayo vhaṅwe uri vha gude mafhungo-ngoho nga ha Bivhili.—Vha-Heberu 10:24, 25.

12. Thabelo i nga ni thusa hani uri ni shumele Mudzimu?

¹² Samusi ni tshi khou ḓi guda zwo engedzeaho nga ha zwine Yehova a funa na ndivho yawe, ni ḓo takalela vhukuma nḓila dzawe dza lufuno. Ni fanela u engedza lutamo lwaṋu lwa  u ita zwine zwa mu takadza na u iledza zwine zwa mu sinyusa. Humbulani uri ni nga amba na Yehova nga thabelo na mu humbela uri a ni thuse u ita zwo lugaho na u iledza zwithu zwivhi.—1 Vha-Korinta 6:9, 10; Vha-Filipi 4:6.

13. Ni nga takadza mbilu ya Yehova nga nḓila-ḓe?

¹³ Nga u ya ha tshifhinga, musi ni tshi khou ḓi aluwa muyani, nga hu sa timatimisi ni ḓo vhona ṱhoḓea ya u vha Ṱhanzi ya Yehova yo ḓiṋekedzaho na yo lovhedzwaho. Nga u ḓiṱanganya na vhathu vha Mudzimu ni ḓo takadza mbilu ya Yehova. (Mirero 27:11) Ni ḓo vha muṅwe wa vhathu vho takalaho vhe Mudzimu a amba zwi tevhelaho nga havho: “Ndi ḓo dzula ngomu havho, nda tshimbila vhukati havho, ndi ḓo vha Mudzimu wavho, vhone vha vha vhathu vhanga.”—2 Vha-Korinta 6:16.