MUDZIMU RAMAANḒAOṰHE ndi Muvhusi wa fhethu hoṱhe. Vhutshilo hashu zwino na tshifhingani tshi ḓaho vhu ḓitika ngae. U na maanḓa a u lambedza na a u ṱarafa. U na maanḓa a u ṋea vhutshilo na a u vhu dzhia. Ri ḓo vha vha bvelelaho arali a ri ṱanganedza; arali a sa ri ṱanganedzi zwithu a zwi nga ri tshimbileli zwavhuḓi. Ndi zwa ndeme lungafhani uri vhurabeli hashu vhu vhe vhu ṱanganedzwaho ngae!

Vhathu vha gwadamela nga nḓila nnzhi. Arali vhurereli vhu tshi fana na nḓila, naa Mudzimu u ṱanganedza nḓila dzoṱhe dza vhurereli? Hai, ha dzi ṱanganedzi. Yesu, muporofita wa Mudzimu, o sumbedza uri hu na nḓila mbili fhedzi. O ri: “Khoro i yaho tshinyaloni yo aṱama, na nḓila i yaho hone ndi khulu; huno ndi vhanzhi vha tshimbilaho ngayo’. Hone, khoro i yaho vhutshiloni ndi ṱhukhu, na nḓila i yaho hone ndi tsekene; huno vha i wanaho a si vhanzhi.”—Mateo 7:13, 14.

Hu na mifuda mivhili fhedzi ya vhurereli: muṅwe u isa vhutshiloni nahone muṅwe u isa tshinyaloni. Ndivho ya heyi bugwana ndi u ni thusa u wana nḓila ine ya isa vhutshiloni vhu sa fheli.