Tshipiḓa 9
Vhurereli Ha Ngoho Vhu Nga Ni Vhuyedza U Ya Nga Hu Sa Fheli!
1. Hu ḓo itea mini arali ra ‘sendela tsini ha Mudzimu’?
YEHOVA u funa vhane vha mu shumela. Arali ni tshi gwadamela Yehova u ḓo ni fhaṱutshedza zwino na tshifhingani tshi ḓaho. Bivhili i ri: “Sendelani tsini ha Mudzimu, na ene a sendele tsini haṋu.”—Yakobo 4:8.
2. Ri nga sendela hani tsini ha Mudzimu, nahone zwenezwi zwi ḓo kwama hani thabelo dzashu?
2 U itela uri ni sendele tsini ha Mudzimu, ni fanela u guda Ipfi ḽawe nahone ni ḽi shumise. Musi ni tshi rabela u tendelana na zwine a zwi funa, Yehova u ḓo thetshelesa thabelo dzaṋu nahone u ḓo dzi fhindula. Muapostola Yohane wa Mukriste o ṅwala u ri: “Na fulufhelo asiḽi, ḽiné ra vha naḽo’ ró fulufhela Ene [Mudzimu], ri ri: Arali ri tshi humbela tshithu tshiné Ene a funa tshi tshi vha hone, u a ri pfa. Huno arali ri tshi zwi ḓivha zwauri u a ri pfa, na tshiné ra humbela tshone, ri a zwi ḓivha zwauri ndí tshiifa zwe ra mu humbela ró no vha nazwo’.”—1 Yohane 5:14, 15.
3-7. Ri nga wana hani vhuṱali ha Mudzimu, nahone vhu nga ri thusa hani?
3 Zwiṅwe-hafhu, musi ni tshi sendela tsini ha Mudzimu, u ḓo ni ṋea vhuṱali u itela uri ni vhe a bvelelaho vhutshiloni. Bivhili i ri: “Huno arali muṅwe waṋu ó ṱáhela vhuṱali, a humbele Mudzimu.”—Yakobo 1:5.
4 Vhuṱali ha Mudzimu vhu nga ni thusa hani? Vhu nga ni thusa u ḓivha zwine zwa sinyusa Yehova. Vhu nga dovha ha ni thusa u ḓivha uri ndi ngani zwiṅwe zwithu zwo khakhea na uri ni nga zwi iledza hani. Yeneyo nḓivho i nga ni tsireledza kha vhuleme vhunzhi vhune vhathu vhanzhi vha sedzana naho. Sa tsumbo, u thetshelesa nyeletshedzo ya Mudzimu ya u tshila nga nḓila yo kunaho zwi tsireledza vhathu vha Mudzimu uri vha sa vhifhe muvhilini vha songo vhingwa, zwi vha tsireledza kha malwadze a fhiriselwaho nga u ṱangana nga dzimbeu, kha vhuleme kana u pwashea ha mbingano.
5 Ndi zwifhio zwiṅwe zwine vhuṱali ha Mudzimu ha nga ni itela zwone? Vhu nga ita uri ni vhuyelwe vhukuma vhutshiloni haṋu. Vhu nga ni thusa u ita phetho dza vhuṱali, u fana na nḓila ine na nga shumisa ngayo zwavhuḓi tshelede yaṋu. Ni ḓo kona u tovhola zwipikwa zwi vhuyedzaho nahone na litsha zwine zwa si vhe zwa ndeme.
6 Vhuṱali ha Mudzimu vhu nga dovha ha ni thusa zwi tshi ḓa kha u tshilisana haṋu na vhaṅwe. Ni nga vha na vhutshilo ha muṱa vhu takadzaho. Ni nga fhaṱa vhukonani ho khwaṱhaho na ha tshoṱhe na vhaṅwe, nahone ni nga kha ḓi ṱhonifhiwa, na nga vhane vha si shumele Mudzimu.
7 Zwiṅwe-hafhu, u vha haṋu na vhuṱali ha Mudzimu zwi ḓo ni thusa u shandula nḓila ine na dzhia ngayo zwithu vhutshiloni. Zwi ḓo ni thusa u sedzana nga nḓila i bvelelaho na vhuleme ha vhutshilo na zwithu zwi kulaho nungo. Hafhu, ni ḓo vha na mavhonele avhuḓi nga ha vhumatshelo. U vha na mavhonele avhuḓi zwi ḓo ita uri ni vhe na dakalo ngeleloni na ṋamani.—Mirero 14:30; Yesaya 48:17.
8. Arali ni tshi shumela Mudzimu, ndi mini zwine na sa ḓo zwi ofha?
8 Arali ni tshi shumela Mudzimu wa ngoho, a ni nga ḓo ofha khakhathi dzine dza ḓela vhane Yohane 8:32.
vha si mu shumele. Ngauri ni a zwi ḓivha uri vhafu vha mavhiḓani, a ni nga ḓo vha ofha. Ngauri ni na fulufhelo kha Mudzimu nga ha fulufhedziso ḽa mvuwo ya vhafu, a ni nga ḓo ofha u fa. Nahone samusi ni tshi ḓivha uri Mudzimu u na maanḓa mahulwane, a ni nga ḓo ofha vhuloi.—Vho Lugaho Vha Ḓo Dzula Kha Ḽifhasi
9-11. Ndi vhafhio vhane vha ḓo tshila Paradisoni, nahone ndi vhafhio vhane vha ḓo fheliswa?
9 Arali na sendela tsini ha Mudzimu, a ni nga ofhi vhumatshelo. Samusi ro zwi vhona, Bivhili yo dzula yo amba nga ha vhuleme vhunzhi vhune ra khou vhu vhona kha ḽifhasi ṋamusi. Yehova u ri vhudza uri hezwi zwithu ndi zwa tshifhinganyana; hu si kale Muvhuso wa Mudzimu u ḓo ita uri heḽi ḽifhasi ḽi vhe paradiso.—Luka 21:10, 11, 31; 23:43.
10 Ndi vhane vha sendela tsini ha Yehova fhedzi na vhane vha mu shumela vhane vha ḓo tshila Paradisoni. Bivhili i ri: “Si fhele mbilu, muvhi ha lalami; U ḓo ṱuwa U tshi vhona muḓi wawe ú shubi. Shango ḽi ḓo vha ifa ḽa vho vuḓaho; ndi vhone vha u ḓo takalela muḓalo wa mulalo.”—Psalme ya 37:10, 11.
11 Vhane vha hana u thetshelesa mulayo wa Yehova nga khole vha ḓo xelelwa nga vhutshilo havho lwa tshoṱhe. (2 Vha-Thesalonika 1:8, 9) A vha tsha ḓo vha hone. Vha ḓo fheliswa tshoṱhe kathihi na Sathane na madimoni awe. (Ndzumbululo 20:10, 14) Fhedzi vhane vha guda nga ha Yehova na u mu shumela vha ḓo wana dakalo Paradisoni kha ḽifhasi.
Vhumatshelo Havhuḓi!
12. Bivhili i ri mini nga ha vhumatshelo?
12 Yehova u na zwithu zwinzhi zwavhuḓi zwe a zwi vhetshela vhane vha mu funa! Ṱhogomelani zwine Ipfi ḽawe ḽa zwi amba nga ha vhutshilo Paradisoni kha ḽifhasi:
-
Muḓalo wa zwiḽiwa: “Shangoni hu ḓo vha na muḓalo wa mavhele [kana zwiḽiwa]; dziṱhohoni dza dzithavha hu ḓo guma maḓaka.”—Psalme ya 72:16.
-
Vhudzulo havhuḓi: “Vha ḓo fhaṱa dzinnḓu vha dzula khadzo’.”—Yesaya 65:21.
-
Mushumo u takadzaho: “Zwe vhanangiwa vhanga vha zwi wana nga mishumo yavho zwi ḓo ḽiwa nga vhone vhaṋe. A vha nga ḓo sokou ḓi-netisa.”—Yesaya 65:22, 23.
-
A hu nga ḓo vha na malwadze: “A huna ane a ḓo ri: Ndi a lwala.”—Yesaya 33:24.
-
A hu nga ḓo vha na vhaholefhali: “Ndi hone hu tshi ḓo bonyolowa maṱo a mabofu; ndi hone hu tshi ḓo thivhululwa dzinḓevhe dza madzinga-nḓevhe. Ndi hone wa tshihole a tshi ḓo fhufha vhunga phala; lulimi lwa tshimuma lu ḓo fhululedza.”—Yesaya 35:5, 6.
-
A hu tsha ḓo vha na vhuṱungu, tshengelo, na lufu: “[Mudzimu] u ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela.”—Ndzumbululo 21:4.
-
A hu tsha ḓo vha na nndwa: “[Mudzimu] u dzivhisa dzinndwa migumoni ya ḽifhasi.”—Psalme ya 46:9.
-
Vhutshilo vhu sa fheli: “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo’ lini na lini.”—Psalme ya 37:29.
13. Ndi nnyi fhedzi ane a nga ita heḽi shango paradiso, nahone ndi ngani?
13 Vhathu vha nga si vhuye vha ḓisa zwenezwo zwithu, fhedzi Yehova u na maanḓa a u ita zwoṱhe zwine a amba uri u ḓo zwi ita. A hu na tshine tsha nga mu thivhela u ita zwine a zwi ṱoḓa. Bivhili i ri: “Ngauri Mudzimu a huna tshithu tshiné a sa tshi kone.”—Luka 1:37.
14. Ni nga vha hani kha nḓila ya vhutshilo vhu sa fheli?
14 A tshi shumisa Ṱhanzi dzawe, Yehova u khou ṋea vhathu fhethu hoṱhe tshibuli tsha u “dzhena nga khoro ṱhukhu” na u tshimbila nḓilani i isaho vhutshiloni vhu sa fheli. U nga ri ni nga vha muṅwe wa vho takalaho vhane vha ṱanganedza honoho u rambiwa. U nga ri ni nga vha kha vhurereli ha ngoho nahone na ḓiphina nga phaṱutshedzo dza Yehova nga hu sa fheli!—Mateo 7:13, 14.