Yohane o vha a tshi khou funza vhathu uri: ‘Hu khou ḓa ane a mphira nga maanḓa.’ Musi Yesu e na miṅwaha ya 30, o bva Galilea a ya Mulamboni wa Yorodane he Yohane a vha a tshi khou lovhedza vhathu. Yesu o vha a tshi khou ṱoḓa u lovhedzwa nga Yohane, fhedzi Yohane a ri: ‘A tho ngo tea u ni lovhedza. Ndi inwi ane a tea u lovhedza nṋe.’ Yesu a vhudza Yohane uri: ‘Yehova u ṱoḓa inwi ni tshi ndovhedza.’ Ngauralo, vha dzhena Mulamboni wa Yorodane, nahone Yohane a mbwandamedza Yesu ngomu maḓini.

Yesu o rabela musi a tshi tou bva maḓini. Nga tshenetsho tshifhinga, ḽiṱaḓulu ḽa vulea, muya wa Mudzimu wa ḓa khae u tshi nga ḽiivha. Yehova a amba e ṱaḓulu a ri: “Hoyu ndi Murwa wanga, ane nda mu funa, ane nda mu takalela.”

Musi muya wa Yehova wo no ḓa kha Yesu, o mbo ḓi vha Kristo, kana Messia. Zwino o vha tshi nga thoma mushumo we Yehova a mu ruma uri a u ite fhano ḽifhasini.

Nga u ṱavhanya musi a tshi kha ḓi tou bva u lovhedzwa, Yesu o ya sogani a fhedza maḓuvha a 40 e henengei. Musi a tshi vhuya o mbo ḓi ya kha Yohane. Musi Yesu a tshi swika tsini nae, Yohane a ri: ‘Vhonani Ngwana ya Mudzimu ine ya ḓo hwala zwivhi zwa shango.’ Nga u amba zwenezwo, Yohane o ḓivhadza vhathu uri Yesu ndi Messia. Naa ni a ḓivha zwe zwa itea kha Yesu musi e sogani? Kha ri vhone.