Vhaisiraele vho no fhedza miṅwaha i ṱoḓaho u vha 40 vhe sogani. Vho no kunda miḓi minzhi i re na maanḓa. Zwino, samusi vho gammba midavhini ya Moaba vhubvaḓuvha ha Mulambo wa Yorodane, tsho vha tshi tshifhinga tsha uri vha dzhene Shangoni ḽo Fulufhedziswaho. Balaka, khosi ya Vhamoaba, o vha o tshuwa uri vha ḓo mu dzhiela shango. Nga zwenezwo a vhidza munna we a vha a tshi pfi Biliamu uri a ḓe Moaba nahone a seme Vhaisiraele.

Fhedzi Yehova a vhudza Biliamu a ri: ‘Ni songo sema Vhaisiraele.’ Ngauralo Biliamu a hana u ya. Khosi Balaka ya mu vhidza lwa vhuvhili nahone ya mu fulufhedzisa uri i ḓo mu ṋea zwoṱhe zwine a zwi ṱoḓa. Biliamu a dovha a hana. Nga murahu Mudzimu a ri: ‘Ni nga ya, fhedzi ni fanela u amba zwine nda ḓo ni vhudza.’

Biliamu a ṋamela donngi yawe nahone a livha Moaba hu re thungo ya tshipembe. O vha o humbula u yo sema Vhaisiraele, naho Yehova o vha o mu vhudza uri a songa ita nga u ralo. Muruṅwa wa Yehova a bvelela luraru nḓilani. Biliamu ho ngo kona u vhona muruṅwa, fhedzi donngi yawe yo mu vhona. Lwa u thoma donngi yo bva nḓilani ya dzhena tsimuni a i rwa. Lu tevhelaho donngi ya bva nḓilani ya kuḓana na mutsheṱo, ya pwanyeledza mulenzhe wa Biliamu na luvhondo, a i rwa. Lwa u fhedzisela donngi ya gwadama fhasi vhukati ha nḓila nahone Biliamu a dovha a i rwa.

Nga lwa vhuraru, Yehova a ita uri donngi i ambe. Donngi ya vhudzisa Biliamu ya ri: ‘Ndi ngani ni tshi khou bvela phanḓa ni tshi khou nthwa?’ Biliamu a ri: ‘No nnyita tsilu. Arali ndo vha ndo fara banga ndo vha ndi tshi ḓo vha ndo ni vhulaha.’ Donngi ya ri: ‘No nṋamela miṅwaha minzhi. Naa ndo no vhuya nda ni fara nga yeneyi nḓila?’

Nga murahu Yehova a ita uri Biliamu a vhone muruṅwa. Muruṅwa a ri: ‘Yehova o ni sevha uri ni songo sema Isiraele.’ Biliamu a ri: ‘Ndo  khakha. Ndi ḓo vhuyelela hayani.’ Fhedzi muruṅwa a ri: ‘Ni nga ya Moaba, fhedzi ni fanela u amba zwine Yehova a ḓo ni vhudza zwone.’

Naa hu na zwe Biliamu a guda? Hai. Nga murahu ha zwenezwo, Biliamu o lingedza u sema Vhaisiraele luraru, fhedzi nṱhani hazwo Yehova a ita uri a vha fhaṱutshedze. Mafheleloni, Vhaisiraele vha kunda Vhamoaba nahone Biliamu a vhulahwa. Naa Biliamu o vha a sa ḓo vhuyelwa arali o vha o thetshelesa Yehova u bva mathomoni?