Nga murahu ha u ranga phanḓa vhathu vha Yehova miṅwaha minzhi, Yoshua o fa e na miṅwaha ya 110. Musi a kha ḓi tshila, Vhaisiraele vho gwadamela Yehova. Fhedzi musi Yoshua o no fa, vha thoma u gwadamela zwifanyiso, u fana na Vhakanana. Nga ṅwambo wa uri Vhaisiraele a vho ngo bvela phanḓa vha tshi mu thetshelesa, Yehova o tendela khosi ya Vhakanana ine ya pfi Yabini i tshi vha konḓisela vhutshilo. Vhathu vha humbela Yehova uri a vha thuse. Nga zwenezwo Yehova a vha ṋea murangaphanḓa muswa Baraka. O vha a tshi ḓo thusa vhathu uri vha vhuyelele kha Yehova.

Debora, muporofita wa mufumakadzi, a ruma vhathu u yo vhidza Baraka. O vha a tshi ṱoḓa u mu fha mulaedza u bvaho ha Yehova une wa ri: ‘Dzhiani vhanna vha 10 000 nahone ni yo ṱangana na mmbi ya Yabini mulamboni wa Kisoni. Henefho ni ḓo kunda Sisera, nduna ya mmbi ya Yabini. Baraka a vhudza Debora a ri: ‘Ndi ḓo ya fhedzi arali na ṱuwa na nṋe.’ Debora a ri: ‘Ndi ḓo ṱuwa na inwi. Fhedzi ni ḓivhe uri a si inwi ane na ḓo vhulaya Sisera. Yehova o amba uri u ḓo vhulaiwa nga mufumakadzi.’

 Debora a ṱuwa na Baraka na mmbi yawe vha gonya Thavha ya Thaboro u itela u ḓilugiselela nndwa. Nga u ṱavhanya musi Sisera a tshi zwi pfa, a kuvhanganya goloi dzawe dza nndwa na maswole vha tsela mulamboni. Debora a ri kha Baraka: ‘Ṋamusi Yehova u ḓo ni thusa uri ni kunde.’ Baraka na vhanna vhawe vha 10 000 vha tsa thavhani u yo ṱangana na mmbi ya maanḓa ya Sisera.

Yehova a ita uri mulambo wa Kisoni u ḓale. Goloi dza mmbi dza Sisera dza phirimela matopeni. Sisera a sia goloi yawe nahone a shavha. Baraka na maswole awe vha kunda mmbi ya Sisera, fhedzi Sisera ene a shavha! O mbo ḓi shavha nahone a dzumbama denndeni ḽa mufumakadzi ane a pfi Yaele. A mu fha mafhi nahone a dovha a mu fukedza nga nguvho. Mudzia-mmbi we a vha o neta a mbo ḓi farwa nga khofhe. Nga murahu Yaele a mu dodela nahone a mu ombela tsimbi ya u ṱoka dennde kha ṱhoho yawe. A mbo ḓi fa.

Baraka a swika a tshi khou ṱoḓa Sisera. Yaele a bva denndeni ḽawe nahone a ri: ‘Dzhenani. Ndi ḓo ni sumbedza munna ane na khou mu ṱoḓa.’ Baraka a dzhena nahone a vhona Sisera o lala fhasi nahone o fa. Baraka na Debora vha renda Yehova nga luimbo nge a ita uri Vhaisiraele vha kunde maswina avho. Isiraele ho vha na mulalo miṅwaha ya 40 ye ya tevhela.