Khosi ya Siria, Benihadada, o vha a tshi dzulela u lwa na Isiraele. Fhedzi tshifhinga tshoṱhe muporofita Elisa o vha a tshi vhudza khosi ya Isiraele nga ha khombo, zwa ita uri a kone u shavha. Benihadada a phetha u ya u fara Elisa. A wanulusa uri Elisa o vha e muḓini wa Dothani, nahone a rumela mmbi ya Vhasiria henefho uri i mu fare.

Vhasiria vha ḓa Dothani vhusiku. Nga matsheloni, mushumeli wa Elisa a bvela nnḓa nahone a vhona muḓi wo tangiwa nga mmbi khulwane. A dzhenwa nga nyofho nahone a vhidzelela Elisa a ri: ‘Elisa, ri ḓo ita mini?’ Elisa a mu vhudza a ri: ‘Vhane vha vha na riṋe ndi vhanzhi u fhira vhane vha vha navho.’ Nga tshenetsho tshifhinga, Yehova a ita uri mushumeli wa Elisa a vhone uri thavha dzo tangaho muḓi dzo vha dzo ḓala dzibere na gariki dza nndwa dza mulilo.

Musi maswole a Vhasiria a tshi lingedza u fara Elisa, a rabela a ri: ‘Yehova, ndi humbela uri vha si tsha vhona.’ Nga u ṱavhanya, naho vho vha vha kha ḓi kona u vhona, maswole o vha a si tsha ḓivha uri a ngafhi. Elisa a vhudza maswole a ri: ‘Ni muḓini u si wone. Ntevheleni,  ndi ḓo ni isa kha munna ane na khou mu ṱoḓa.’ Vha tevhela Elisa u vhuya u swika Samaria, hune khosi ya Isiraele ya dzula hone.

Zwo vha zwi si tsha thusa kha Vhasiria musi vha tshi thoma u vhona uri vha ngafhi. Khosi ya Isiraele ya vhudzisa Elisa ya ri: ‘Naa ndi vha vhulahe?’ Naa Elisa o shumisa tshenetshi tshibuli u itela u lifhedza vhathu vhe vha vha tshi khou ṱoḓa u mu vhulaha? Hai. Elisa o ri: ‘Ni songo vha vhulaha. Vha ṋeeni zwiḽiwa, nahone ni vha litshe vha ṱuwe.’ Nga zwenezwo khosi ya vha itela tshimima tshihulu nahone nga murahu ya vha litsha vha ya hayani.