1-3. (a) Ri nga guda mini nga ha vhathu musi ri tshi sedza vhushaka vhukati ha vhabebi na ṅwana wavho? (b) Ndi mini zwine nga lwa nzulele zwa itea musi muthu a tshi ri sumbedza lufuno, nahone ndi mbudziso ifhio ya ndeme ine ra nga ḓivhudzisa yone?

 VHABEBI vha a takala musi vha tshi vhona ṅwana wavho a tshi ṅwethuwa. Kanzhi vha kwakwanya tshifhaṱuwo tshavho na tsha ṅwana, vha tamba-tamba nae vha tshi khou setshelela. Vha vha vho lavhelela u vhona arali na ene-vho a tshi ḓo setshelela. Nahone hu si kale hu itea zwe vha vha vho zwi lavhelela—marama a ṅwana a mbo ḓi bovhea, mulomo wa vulea nahone a ṅwethuwa. Honoho u ṅwethuwa hu sumbedza lufuno, ndi u thoma ha ṅwana u sumbedza lufuno nga ṅwambo wa lufuno lune a sumbedzwa nga vhabebi vhawe.

² U ṅwethuwa ha ṅwana hu ri humbudza tshiṅwe tshithu tsha ndeme nga ha nzulele ya vhathu. Nga ho ḓoweleaho, musi ri tshi funiwa na riṋe ri a funa. Yeneyo ndi nḓila ye ra sikiwa ngayo. (Psalme ya 22:9) Musi ri tshi aluwa, ri sumbedza u vhibva kha vhukoni hashu ha u sumbedza lufuno. Khamusi ni kha ḓi humbula nḓila ye vhabebi vhaṋu, mashaka, kana khonani vha vha vha tshi ni sumbedza ngayo lufuno musi ni tshee ṅwana. No thoma nga u vha na lufuno mbiluni yaṋu, nahone eneo maḓipfele a hula nahone na a sumbedza nga mishumo. Na inwi na mbo ḓi sumbedza vhaṅwe lufuno. Naa zwo tou ralo nga vhushaka haṋu na Yehova Mudzimu?

³ Bivhili i ri: “Riṋe Mudzimu ri a mu funa, ngauri ndi Ene o thomaho a ri funa.” (1 Yohane 4:19) Kha Zwipiḓa 1 u ya kha 3 zwa yeneyi bugu, no humbudzwa uri Yehova Mudzimu o shumisa maanḓa awe, khaṱulokwayo yawe, na vhuṱali hawe nga lufuno u itela u ni vhuyedza. Nahone kha Tshipiḓa 4, no zwi vhona uri o sumbedza vhathu nga ho livhaho uri u a vha funa—u katela na inwi. Fhedzi hu takuwa mbudziso. Ndi mbudziso ya ndeme vhukuma ine na nga ḓivhudzisa yone, ‘Ndi ḓo sumbedza hani uri ndi a ṱanganedza lufuno lwa Yehova?’

 4. Vhathu vha sumbedza nga nḓila-ḓe uri a vha ḓivhi zwine lufuno lwa Mudzimu lwa amba zwone?

⁴ Yehova, Tshisima tsha lufuno, u a zwi ḓivha uri lufuno lu na maanḓa mahulwane ane a nga ita uri vhaṅwe vhathu vha sumbedze pfaneleo dzavhuḓi. Naho vhaṅwe vhathu vha sa fulufhedzei vha tshi farelela kha nḓila dzavho dza vhushandukwa, o dzula e na fulufhelo ḽa uri vhaṅwe vhathu vha ḓo ṱanganedza lufuno lwawe. Nahone vha dzimilioni vho ita nga u ralo. Naho zwo ralo, zwi ṱungufhadzaho ndi uri vhurereli ha ḽino shango ḽo tshinyalaho ho ḓaḓisa vhathu, vha sa tsha ḓivha uri u funa Mudzimu zwi amba mini. Vhathu vhanzhi-vhanzhi vha amba uri vha funa Mudzimu, fhedzi zwi vhonala vha tshi humbula uri lufuno lwo raloho lu nga sumbedzwa nga maipfi zwao. U funa Mudzimu zwi nga thoma nga yeneyo nḓila, samusi ṅwana a tshi nga thoma nga u ṅwethuwa musi a tshi sumbedza uri u funa vhabebi vhawe. Naho zwo ralo, kha vhathu vho vhibvaho, lufuno lu sumbedzwa nga nḓila nnzhi.

 5. Bivhili i ṱalusa hani u funa Mudzimu, nahone ndi ngani yeneyo ṱhaluso i tshi fanela u ri takadza?

⁵ Yehova u ṱalusa zwine u mu funa zwa amba zwone. Ipfi ḽawe ḽi ri: “U funa Mudzimu ndi u ita zwe a ri laya.” Nga zwenezwo, ri fanela u sumbedza nga mishumo uri ri funa Mudzimu. Ndi ngoho uri vhathu vhanzhi a vha zwi funi u thetshelesa. Fhedzi yeneyo ndimana i a engedza: “Nahone milayo [ya Mudzimu] a i konḓi.” (1 Yohane 5:3) Milayo na maitele a Yehova zwo itelwa u ri vhuyedza, hu si u ri tsikeledza. (Yesaya 48:17, 18) Ipfi ḽa Mudzimu ḽi na maitele manzhi ane a nga ri thusa uri ri sendele tsini-tsini nae. Hani? Kha ri vusuluse masia mararu a vhushaka hashu na Mudzimu. A katela u davhidzana nae, u mu gwadamela, na u mu edzisa.

6-8. (a) Ri nga thetshelesa Yehova nga u ita mini? (b) Ri nga zwi ita hani uri Maṅwalo a tshile musi ri tshi a vhala?

⁶ Ndima ya 1 yo thoma nga maipfi ane a ri, “Edzani u humbula ni tshi khou amba na Mudzimu!” Ro zwi vhona uri zwenezwo  zwi nga konadzea. Zwi re zwone ndi uri Mushe o kona u vha na vhudavhidzano ho raloho. Hu pfi mini nga riṋe? Zwino a si tshifhinga tsha uri Yehova a rumele vharuṅwa uri vha ambedzane na vhathu. Fhedzi Yehova u na nḓila yavhuḓi vhukuma ine a nga amba na riṋe ngayo ṋamusi. Ri nga thetshelesa hani Yehova?

⁷ Nga ṅwambo wa uri ‘Maṅwalo oṱhe ndi mahevhedzwa nga Mudzimu,’ ri thetshelesa Yehova nga u vhala Ipfi ḽawe, Bivhili. (2 Timotheo 3:16) Nga zwenezwo, mupsalme o ṱuṱuwedza vhashumeli vha Yehova uri vha ḽi vhale “masiari na vhusiku.” (Psalme ya 1:1, 2) Zwenezwo zwi ṱoḓa uri ri ḓidine vhukuma. Fhedzi vhuḓidini ho raloho a si ha fhedzi. Samusi ro zwi vhona kha Ndima ya 18, Bivhili i fana na vhurifhi ho khetheaho he ra ṋewa nga Khotsi ashu wa ṱaḓulu. Nga zwenezwo, u i vhala a zwo ngo fanela u vha mushumo u netisaho. Musi ri tshi vhala Maṅwalo ri fanela u a ita uri a tshile. Ri nga zwi ita hani zwenezwo?

⁸ Ivhani na bono ḽa muhumbulo nga ha mafhungo ane na khou a vhala Bivhilini. Lingedzani u vhona vhathu vhane na khou vhala ngavho Bivhilini nga maṱo a muhumbulo. Lingedzani u pfesesa vhubvo havho, zwiimo zwavho, na zwiṱuṱuwedzi zwavho. Nga zwenezwo, ni humbule vhukuma nga ha zwine na zwi vhala, ni ḓivhudzise mbudziso dzi ngaho: ‘Aya mafhungo a mpfunza mini nga ha Yehova? Ndi dzifhio dziṅwe pfaneleo dzawe dzine nda dzi vhona? Ndi maitele afhio ane Yehova a ṱoḓa uri ndi a gude, nahone ndi nga a shumisa hani vhutshiloni hanga?’ Vhalani, elekanyani, nahone ni shumise zwine na zwi vhala—musi ni tshi ita nga u ralo, Ipfi ḽa Mudzimu ḽi ḓo tshila kha inwi.—Psalme ya 77:12; Yakobo 1:23-25.

 9. “Mukoma a fulufhedzeaho na wa vhuṱali” ndi nnyi, nahone ndi ngani zwi zwa ndeme uri ri thetshelese nga vhuronwane onoyo “mukoma”?

⁹ Yehova u dovha a amba na riṋe nga “mukoma a fulufhedzeaho na wa vhuṱali.” Samusi Yesu o dzula o amba, ho vhewa tshigwada tsha Vhakriste vho ḓodzwaho uri tshi avhe “zwiḽiwa nga tshikhathi tshazwo” kha ano maḓuvha a vhufhelo a re na khakhathi. (Mateo 24:45-47) Musi ri tshi vhala khandiso dzo lugiselelwaho u itela u ri thusa uri ri wane nḓivho yo teaho ya Bivhili  na musi ri tshi ya miṱanganoni na mabuthanoni a Vhukriste, ri vha ri tshi khou kanzwiwa muyani nga tshigwada tsha onoyo mukoma. Nga ṅwambo wa uri ndi mukoma wa Kristo, nga vhuṱali ri ita zwe Yesu a zwi amba: “Thetshelesani uri ni pfese.” (Luka 8:18, maḽeḓeretsendama ndi ashu.) Ri thetshelesa nga vhuronwane ngauri ri a zwi ḓivha uri Yehova u shumisa onoyo mukoma sa iṅwe nḓila ya u davhidzana na riṋe.

10-12. (a) Ndi ngani thabelo i tshifhiwa tshavhuḓi tshi bvaho ha Yehova? (b) Ri nga rabela hani nga nḓila i takadzaho Yehova, nahone ndi ngani ri tshi nga vha na fulufhelo ḽa uri u a takalela thabelo dzashu?

¹⁰ Hu pfi mini nga u davhidzana na Mudzimu? Naa ri nga amba na Yehova? Zwi a ofhisa vhukuma u humbula nga hazwo. Arali na nga lingedza u amba na muvhusi muhulwane u itela u mu vhudza nga ha mbilaelo dzaṋu, naa o vha a tshi nga ni ṋea tshibuli tsha u ita zwenezwo? Nga zwiṅwe zwifhinga, u ita zwenezwo zwo vha zwi tshi nga vha na khombo! Misini ya Esitere na Maradokai, muthu o vha a tshi nga vhulahwa arali a ya kha khosi ya Peresia i songo mu vhidza. (Esitere 4:10, 11) Zwino edzani u humbula nga ha u ya phanḓa ha Murena Muvhusahoṱhe, ane musi vhavhusi vha maanḓa vhukuma vha tshi vhambedzwa nae vha nga “dzinzie.” (Yesaya 40:22) Naa ri fanela u ofha u amba nae? Na kathihi!

¹¹ Yehova o ri lugiselela nḓila nthihi i leluwaho ya u amba nae—thabelo. Na ṅwana muṱuku a nga rabela Yehova nga lutendo, a tshi shumisa dzina ḽa Yesu. (Yohane 14:6; Vha-Heberu 11:6) Fhedzi thabelo i dovha ya ri ita uri ri bule mihumbulo na maḓipfele ashu o serekanaho, a re ngomu-ngomu mbiluni—na mafhungo ane a ri pfisa vhuṱungu, ane zwa ri konḓela uri ri a ṱaluse. (Vha-Roma 8:26) A zwi vhuyedzi tshithu u lingedza u takadza Yehova nga thabelo ndapfu-ndapfu dzo khavhiswaho, dzi re na maipfi manzhi-manzhi. (Mateo 6:7, 8) Kha ḽiṅwe sia, Yehova ha ri vhetsheli vhulapfu ha tshifhinga tshine ra nga amba nae ngatsho. Ipfi ḽawe ḽi dovha ḽa ri vhudza uri ri songo “litshedza u rabela!”—1 Vha-Thesalonika 5:17.

¹² Humbulani uri ndi Yehova e eṱhe ane a vhidzwa “Mupfi wa dzithabelo,” nahone a tshi thetshelesa u sumbedza u pfela  vhuṱungu ha vhukuma. (Psalme ya 65:2) Naa u sokou konḓelela thabelo dza vhashumeli vhawe vha fulufhedzeaho? Hai, u a takalela u pfa thabelo dzavho. Ipfi ḽawe ḽi vhambedza thabelo dzo raloho na zwioro, zwine musi zwi tshi fhiswa zwa bvisa vhutsi vhu nukhelelaho, vhu dubelaho nṱha. (Psalme ya 141:2; Ndzumbululo 5:8; 8:4) Naa a zwi khuthadzi u humbula uri thabelo dzashu dzi bvaho mbiluni dzi gonyela ṱaḓulu nahone dzi takadza Murena Muvhusahoṱhe? Nga zwenezwo, arali ni tshi ṱoḓa u sendela tsini na Yehova, dzulani ni tshi mu rabela nga u ḓiṱukufhadza, ḓuvha ḽiṅwe na ḽiṅwe. Mu vhudzeni zwoṱhe zwi re mbiluni yaṋu; ni songo siedza. (Psalme ya 62:8) Mu vhudzeni nga zwine zwa ni dina, zwine zwa ni takadza, zwine na zwi livhuha, nahone ni rende Khotsi aṋu wa ṱaḓulu. Musi ni tshi ita zwenezwo, vhushaka haṋu nae vhu ḓo bvela phanḓa vhu tshi khwaṱha.

13, 14. U gwadamela Yehova zwi amba mini, nahone ndi ngani zwo tea uri ri ite nga u ralo?

¹³ Musi ri tshi davhidzana na Yehova Mudzimu, a ri sokou mu thetshelesa na u amba nae u fana na musi ri na khonani kana shaka. Zwi re zwone ndi uri ri vha ri tshi khou gwadamela Yehova, ri mu hulisa nga nḓila yo fanelaho. Vhutshilo hashu hoṱhe vhu langiwa nga vhurabeli ha ngoho. Ndi nḓila ine ra sumbedza ngayo Yehova uri ri mu funa nga mbilu yoṱhe nahone ro ḓikumedza khae, nahone i ṱanganya zwivhumbiwa zwoṱhe zwi fulufhedzeaho zwa Yehova, zwi re ṱaḓulu kana kha ḽifhasi. Kha bono, muapostola Yohane o pfa muruṅwa a tshi ḓivhadza ndaela i tevhelaho: “Gwadamelani o sikaho ḽiṱaḓulu na ḽifhasi na lwanzhe na zwisima zwa maḓi.”—Ndzumbululo 14:7.

¹⁴ Ndi ngani ri tshi fanela u gwadamela Yehova? Humbulani nga ha pfaneleo dze ra dzi haseledza, dzi ngaho vhukhethwa, maanḓa, u ḓifara, khaṱulokwayo, tshivhindi, tshilidzi, vhuṱali, u ḓiṱukufhadza, lufuno, u khathutshela, u fulufhedzea, na vhuḓi. Ro zwi vhona uri Yehova ndi ene tshisima tsha pfaneleo dzoṱhe dza ndeme. Musi ri tshi lingedza u pfesesa pfaneleo dzawe dzoṱhe, ri a zwi vhona uri ha sokou vha Muthu muhulwane fhedzi  ane ra nga mu dzhiela nṱha. Ndi mukhethwa vhukuma, nahone vhuhulwane hawe a vhu na mikano. (Yesaya 55:9) Nga hu sa timatimisi, Yehova ndi Muvhusahoṱhe washu o lugaho, nahone zwo tea uri ri mu gwadamele. Naho zwo ralo, ri fanela u gwadamela hani Yehova?

15. Ri nga gwadamela hani Yehova “muyani na nga mafhungo-ngoho,” nahone miṱangano ya Vhukriste i ri ṋea tshibuli tsha u ita mini?

¹⁵ Yesu o ri: “Mudzimu ndi muya; huno vha mu rabelaho nga vha mu rabele muyani na nga mafhungo-ngoho.” (Yohane 4:24) Zwenezwo zwi amba u gwadamela Yehova nga mbilu yo ḓalaho lutendo na lufuno, ri tshi livhiswa nga muya wawe. Zwi dovha zwa amba u mu gwadamela u tendelana na mafhungo-ngoho, nḓivho yo teaho i wanalaho Ipfini ḽa Mudzimu. Ri na tshibuli tsho khetheaho tsha u gwadamela Yehova “muyani na nga mafhungo-ngoho” tshifhinga tshoṱhe musi ri tshi kuvhangana na vhagwadameli nga riṋe. (Vha-Heberu 10:24, 25) Musi ri tshi imbela Yehova thendo, ri tshi rabela roṱhe khae, nahone  ri tshi thetshelesa na u ṱanganela kha khaseledzo dza Ipfi ḽawe, ri sumbedza uri ri a mu funa nga u mu gwadamela vhurabelini ho kunaho.

16. Ndi ifhio iṅwe ndaela khulwanesa yo ṋewaho Vhakriste vha ngoho, nahone ndi ngani ri tshi ḓipfa ri tshi vhofhea u i thetshelesa?

¹⁶ Ri dovha ra gwadamela Yehova musi ri tshi amba nga hae kha vhaṅwe, ri tshi mu renda khagala. (Vha-Heberu 13:15) Vhukuma, u huwelela mafhungo maḓifha a Muvhuso wa Yehova ndi iṅwe ya ndaela khulwane vhukuma dze dza ṋewa Vhakriste vha ngoho. (Mateo 24:14) Ri thetshelesa nga mbilu yoṱhe ngauri ri funa Yehova. Musi ri tshi humbula nga nḓila ye Sathane Diabolo, “mudzimu wa tshino tshifhinga a swingisa mihumbulo ya vha sá tendiho,” a tshi zwifhela Yehova nga mazwifhi madala-dala, naa a ri takaleli u vha Ṱhanzi dza Mudzimu washu u itela u hanedza eneo mazwifhi? (2 Vha-Korinta 4:4; Yesaya 43:10-12) Nahone musi ri tshi humbula nga ha pfaneleo dza Yehova dzi mangadzaho, naa a ri tami u vhudza vhaṅwe nga hae? Vhukuma, a hu na ndugelo ine ya fhira u thusa vhaṅwe uri vha ḓivhe nahone vha fune Khotsi ashu wa ṱaḓulu nga nḓila ine ra mu funa ngayo.

17. U gwadamela hashu Yehova hu katela na mini, nahone ndi ngani ri tshi fanela u gwadamela nga u fulufhedzea?

¹⁷ U gwadamela hashu Yehova hu katela zwithu zwinzhi. Hu kwama masia oṱhe a vhutshilo hashu. (Vha-Kolosa 3:23) Arali ngangoho ra ṱanganedza Yehova sa Murena Muvhusahoṱhe washu, ri ḓo ṱoḓa u ita zwine a zwi funa kha zwoṱhe—vhutshilo hashu ha muṱani, mushumo washu wa u ḓitshidza, kha u tshilisana hashu na vhaṅwe, na musi ri tshi khou ḓimvumvusa. Ri ḓo ṱoḓa u shumela Yehova nga u fulufhedzea “nga mbilu-mbuya.” (1 Koronika 28:9) Vhurabeli ho raloho vhu ḓo ita uri ri sa vhe na mbilu mbili nahone ri sa tshile vhutshilo vhu re kavhili—ra vhonala ri tshi nga ri khou shumela Yehova ngeno ri tshi khou ita zwivhi zwihulwane tshiphirini. U fulufhedzea hu ita uri ri sa tshile vhutshilo ha muhoyo; lufuno lu ḓo ita uri ri nengwe matshilele o raloho. U ofha Mudzimu na zwone zwi ḓo ri thusa. Bivhili i ṱumanya nyofho yo raloho na u bvela hashu phanḓa ri na vhushaka vhuhulwane na Yehova.—Psalme ya 25:14.

18, 19. Ndi ngani zwi tshi nga konadzea uri vhathu zwavho vha songo fhelelaho vha edzise Yehova Mudzimu?

¹⁸ Tshipiḓa tshiṅwe na tshiṅwe tsha yeneyi bugu tsho phetha nga ndima ine ya sumbedza nḓila ine ra nga vha “vha-edzisa-Mudzimu sa vhana vha funwaho.” (Vha-Efesa 5:1) Ndi zwa ndeme u humbula uri naho ri songo fhelela, ri nga edzisa nga ho fhelelaho nḓila ine Yehova a shumisa ngayo maanḓa, khaṱulokwayo, vhuṱali, na u sumbedza lufuno. Ri zwi ḓivha hani uri vhukuma zwi a konadzea u edzisa Ramaanḓaoṱhe? Humbulani uri zwine dzina ḽa Yehova ḽa amba zwone zwi ri gudisa uri u ḓiita uri a vhe tshiṅwe na tshiṅwe u itela u ḓadzisa nḓivho dzawe. Vhukoni hawe vhu a mangadza vhukuma, fhedzi naa a zwi konadzei uri ri mu edzise? Zwi a konadzea.

¹⁹ Ro itwa nga tshifanyiso tsha Mudzimu. (Genesi 1:26) Nga zwenezwo, vhathu a vha fani na zwivhumbiwa naho zwifhio zwi re kha ḽifhasi. A ri langwi nga nḓowelo yashu ya nzulele, tsiki, kana zwithu zwa mupo. Yehova o ri ṋea tshifhiwa tsha ndeme—mbofholowo ya u ḓikhethela. Hu sa londwi vhushayanungo hashu na u sa fhelela, ri nga ḓikhethela zwine ra ṱoḓa u vha zwone. Naa ni ṱoḓa u vha muthu a re na lufuno, vhuṱali, o lugaho, ane a shumisa maanḓa nga nḓila yo teaho? Muya wa Yehova u nga ni thusa uri ni vhe muthu o raloho! Edzani u humbula nga ha zwithu zwavhuḓi zwine na ḓo kona u zwi khunyeledza.

20. Ndi zwifhio zwithu zwavhuḓi zwine ra zwi khunyeledza musi ri tshi edzisa Yehova?

²⁰ Ni ḓo takadza Khotsi aṋu wa ṱaḓulu, na ita uri mbilu yawe i fhululedze. (Mirero 27:11) Ni nga kona u “takadza nga ho fhelelaho” Yehova, ngauri u a pfesesa vhushayanungo haṋu. (Vha-Kolosa 1:9, 10, vhambedzani NW.) Nahone musi ni tshi bvela phanḓa u ṱahulela pfaneleo dzavhuḓi ni tshi edzisa Khotsi aṋu a funwaho, ni ḓo wana ndugelo khulwane. Kha ḽino shango ḽi re swiswini ḽo fhambanywaho na Mudzimu, ni ḓo vha muvhonetsheli. (Mateo 5:1, 2, 14) Ni ḓo shela mulenzhe kha u phaḓaladza vhumuthu ha Yehova ha vhugala ḽifhasini ḽoṱhe. Ndi ndugelo yavhuḓi lungafhani yeneyo!

21, 22. Ndi lufhio lwendo lu sa gumi lwo farwaho nga vhoṱhe vhane vha funa Yehova?

²¹ Ṱhuṱhuwedzo yo ṅwalwaho kha Yakobo 4:8 a i sokou vha tshipikwa zwatsho. Ndi lwendo. Arali ra dzula ri tshi fulufhedzea kha Yehova, lwonolwo lwendo lu nga si vhuye lwa guma. Ri nga si vhuye ra litsha u sendela tsini-tsini na Yehova. Ri ḓo dzula ri tshi khou guda nga hae. Ri songo humbula uri heyi bugu yo ri gudisa zwoṱhe zwine ra fanela u zwi ḓivha nga ha Yehova. Ro sokou ṱumbula zwine Bivhili ya zwi amba nga ha Mudzimu washu! Na Bivhili a i ri vhudzi zwoṱhe zwine ra nga zwi guda nga ha Yehova. Muapostola Yohane o amba uri arali zwoṱhe zwe Yesu a zwi ita tshifhingani tsha vhuḓinḓa hawe kha ḽifhasi zwa ṅwalwa fhasi, “shango ḽi nga si ṱanganye maṅwalo ane a ḓo ṅwalwa.” (Yohane 21:25) Arali ha ambiwa zwenezwo nga ha Murwa, hu pfi mini nga Khotsi!

²² Na vhutshilo vhu sa fheli vhu nga si ri ite uri ri gude zwoṱhe nga ha Yehova. (Muhuweleli 3:11) Nga zwenezwo-ha, ndi zwinzhi zwine ra kha ḓi ḓo zwi guda. Musi ro no tshila miṅwaha ya  maḓana, zwigidi, dzimilioni, naho i ya zwigidi zwa dzimilioni, ri ḓo vha ri tshi vho ḓivha zwinzhi nga ha Yehova Mudzimu u fhira zwine ra zwi ḓivha zwino. Fhedzi ri ḓo vhona uri hu kha ḓi vha na zwithu zwinzhi zwi mangadzaho zwine ra fanela u zwi guda. Ri ḓo fhisetshela u guda zwinzhi, ngauri misi yoṱhe ri ḓo vha na tshiitisi tsha u ḓipfa u fana na mupsalme, we a imba a ri: “Ndi ḓifhelwa nga u vha tsini na Mudzimu.” (Psalme ya 73:28) Vhutshilo vhu sa fheli vhu ḓo takadza vhukuma nahone hu ḓo itwa zwithu zwo fhamba-fhambanaho—nahone tshithu tshine misi yoṱhe tsha ḓo takadza u fhira zwoṱhe ndi u sendela tsini-tsini na Yehova.

23. Ni ṱuṱuwedzwa uri ni ite mini?

²³ U nga ri roṱhe ri nga ṱanganedza lufuno lwa Yehova zwino, nga u mu funa nga mbilu yashu yoṱhe, muya-tshivhili washu, muhumbulo washu, na nungo dzashu. (Marko 12:29, 30) U nga ri ni nga vha na lufuno lu fulufhedzeaho na lwo khwaṱhaho. U nga ri phetho dzoṱhe dzine na dzi ita ḓuvha ḽiṅwe na ḽiṅwe, ṱhukhu na khulwane, dzi nga langiwa nga maitele a tevhelaho—uri misi yoṱhe ni khetha nḓila ine ya ni ita uri ni vhe na vhushaka ho khwaṱhaho na Khotsi aṋu wa ṱaḓulu. Nahone zwi fhiraho zwenezwo, u nga ri ni nga sendela tsini-tsini na Yehova, nahone u nga ri na ene a nga sendela tsini-tsini na inwi—nga hu sa fheli!