1, 2. Ndi u xelelwa hufhio hune ha tsikeledza vhathu ṋamusi, nahone zwenezwi zwi ri kwama nga nḓila-ḓe?

ṄWANA u xedza kana u pwasha tshitambiswa tshine a tshi funesa nahone a thoma u lila lu ṱungufhadzaho. Tshililo tshawe tshi ṱhukhula mbilu! Naho zwo ralo, naa no no vhuya na vhona nḓila ine ṅwana a takala ngayo musi mubebi a tshi lugisa kana u mu wanela tshitambiswa tshe tsha vha tsho xela? Kha mubebi, zwi nga kha ḓi leluwa u wana tshiṅwe tshitambiswa kana u tshi lugisa. Fhedzi ṅwana u takala na zwikunwe nahone a mangala vhukuma. Tshitambiswa tshe tsha vha tsho xela kana tsho tshinyala, tsho lugiswa!

² Yehova, ane a vha Mubebi muhulwane, u na maanḓa a u vusulusa zwine vhana vhawe vha re kha ḽifhasi vha nga zwi dzhia zwo tshinyala tshoṱhe. Vhukuma, a ri khou sokou ambela kha zwitambiswa. Kha zwino “zwifhinga zwi lemelaho,” ri kombetshedzea u sedzana na tshinyalelo khulwane vhukuma. (2 Timotheo 3:1-5) Vhunzhi ha zwithu zwine vhathu vha zwi dzhia zwi zwa ndeme zwi vhonala zwi khomboni vhukuma—haya, thundu, mushumo, na mutakalo. Ri nga dovha ra pfa ro tsikeledzea musi ri tshi humbula nga ha u tshinyadzwa ha vhupo, hune ha fhelisa mifuda minzhi ya zwithu zwi tshilaho. Naho zwo ralo, a hu na zwine zwa ri vhaisa vhukuma u fana na lufu lwa muthu ane ra mu funa. U ḓivha uri no felwa zwi nga ni kula nungo.—2 Samuele 18:33.

3. Ndi tshilavhelelwa tshifhio tshi khuthadzaho tsho ṱaluswaho kha Mishumo 3:21, nahone Yehova u ḓo tshi ḓadzisa nga nḓila-ḓe?

³ Nga zwenezwo, zwi khuthadza lungafhani u guda nga ha maanḓa a Yehova a u vusulusa! Samusi ri tshi ḓo zwi vhona, hu na zwithu zwinzhi zwine Mudzimu a nga kona u zwi vusulusa nahone zwine a ḓo zwi vusulusela vhana vhawe vha re kha ḽifhasi. Zwi re zwone ndi uri Bivhili i sumbedza uri Yehova o livha u ‘vhuyedzedza zwoṱhe.’ (Mishumo 3:21 maḽeḓeretsendama ndi ashu.) U itela u khunyeledza zwenezwi, Yehova u ḓo shumisa Muvhuso wa Vhumessia, u vhuswaho nga Murwa wawe, Yesu Kristo. Vhuṱanzi vhu sumbedza uri wonoyu Muvhuso wo thoma u vhusa ṱaḓulu nga  1914. * (Mateo 24:3-14) Ndi mini zwine zwa ḓo vusuluswa? Kha ri ṱhogomele miṅwe ya mishumo ya Yehova i mangadzaho ya u vusulusa. Miṅwe ya yeneyi mishumo ro no ḓi i vhona na u i tshenzhela. Miṅwe i ḓo vhonala nga vhuḓalo tshifhingani tshi ḓaho.

4, 5. Ho itea mini kha vhathu vha Mudzimu nga 607 B.C.E., nahone Yehova o vha fulufhedzisa mini?

⁴ Tshiṅwe tshe Yehova a tshi vusulusa ndi vhurabeli ho kunaho. U itela u pfesesa zwine zwenezwi zwa amba zwone, kha ri ṱolisise nga u tou pfufhifhadza ḓivhazwakale ya muvhuso wa Yuda. U ita nga u rali zwi ḓo ita uri ri vhone nḓila ye Yehova a vha a tshi shumisa ngayo maanḓa awe a u vusulusa.—Vha-Roma 15:4.

⁵ Edzani u humbula nḓila ye Vhayuda vha fulufhedzeaho vha ḓipfa ngayo nga 607 B.C.E. musi muḓi wa Yerusalema u tshi lozwiwa. Muḓi une vha u funa wo lozwiwa, mitsheṱo yawo ya pwashiwa. Zwi fhiraho zwenezwo ndi uri thembele ya vhugala ye Salomo a i fhaṱa, ye ya vha i tshisima tsha vhurabeli ho kunaho ha Yehova kha ḽifhasi ḽoṱhe, yo sala i shubi. (Psalme ya 79:1) Vho ponyokaho vho iswa vhuthubwani ngei Babele, vha sia shangohaya ḽavho ḽi soga ḽine ḽa dzula zwipuka zwa ḓaka. (Yeremia 9:11) U ya nga mavhonele a vhathu, ho vhonala hu si tsheena fulufhelo. (Psalme ya 137:1) Fhedzi Yehova, we a vha o dzula o amba nga ha yeneyi ndozwo hu tshee ho sala tshifhinga tshilapfu, o ṋea fulufhelo ḽa uri ḽeneḽi shango ḽi ḓo dovha ḽa vusuluswa.

6-8. (a) Ndi afhio mafhungo ane a bvelela lunzhi-lunzhi kha maṅwalo a vhaporofita vha Vhaheberu, nahone honoho vhuporofita ho ḓadzea hani lwa u thoma? (b) Musalauno, vhuporofita ha u vusulusa ho ḓadzea hani kha vhathu vha Mudzimu?

⁶ Zwi re zwone ndi uri maṅwalo a vhaporofita vha Vhaheberu a  amba lunzhi-lunzhi nga ha u vusuluswa. * Ngavho, Yehova o fulufhedzisa shango ḽo vusuluswaho ḽine ḽa ḓo dovha ḽa dzulwa nga vhathu, ḽo nonaho, ḽi si na zwivhanda nahone ḽine khaḽo vha sa ḓo vutshelwa nga maswina. O ṱalusa shango ḽavho ḽo vusuluswaho sa paradiso ya vhukuma! (Yesaya 65:25; Hesekiele 34:25; 36:35) Zwa ndeme vhukuma ndi uri ho vha hu tshi ḓo dovha ha vha na vhurabeli ho kunaho nahone thembele ya fhaṱululwa. (Mixa 4:1-5) Honovhu vhuporofita ho ṋea Vhayuda vha re vhuthubwani fulufhelo, ha vha thusa u konḓelela miṅwaha yavho ya 70 vhe vhuthubwani ngei Babele.

⁷ Tshifhinga tsha u vusuluswa tsha fheleledza tsho swika. Musi vho no vhofhololwa Babele, Vhayuda vho vhuyelela Yerusalema nahone vha fhaṱulula thembele ya Yehova henefho. (Esera 1:1, 2) Tenda vha farelela kha vhurabeli ho kunaho, Yehova o vha fhaṱutshedza nahone a ita uri shango ḽavho ḽi vhe ḽo nonaho na ḽi bveledzaho. O vha tsireledza kha maswina na kha zwivhanda zwe zwa fhedza mahumi a miṅwaha zwi tshi dzula shangoni ḽavho. Vha fanela u vha vho takalela lungafhani maanḓa a Yehova a u vusulusa! Fhedzi zwenezwo zwiitea zwo vha zwi tshi sokou vha mathomo a u ḓadzea huṱuku ha vhuporofita ha u vusulusa. U ḓadzea huhulwane ho vha hu tshi kha ḓi ḓo ḓa “vhufheloni ha maḓuvha,” tshifhingani tshashu, musi Muḽaifa wa Khosi Davida o fulufhedziswaho tshifhinga tshilapfu a tshi ḓo vhewa khuluṋonini.—Yesaya 2:2-4; 9:5, 6.

⁸ Musi Yesu a tshi kha ḓi tou bva u vhewa khuluṋonini Muvhusoni wa ṱaḓulu nga 1914, o livhisa ṱhogomelo kha ṱhoḓea dza muya dza vhathu vha Mudzimu vha fulufhedzeaho vha re kha ḽifhasi. Samusi Korese mukundi wa Muperesia o vhofholola masalela a Vhayuda Babele nga 537 B.C.E., Yesu o vhofholola masalela a Vhayuda a muya—vhatevheli vhawe—kha ṱhuṱhuwedzo ya Babele ḽa musalauno, vhurereli ha mazwifhi ha shango ḽoṱhe. (Vha-Roma 2:29; Ndzumbululo 18:1-5) U bva nga 1919 u ya phanḓa, vhurabeli ho kunaho ho vhuyedzedzwa kha vhuimo haho ho teaho vhutshiloni ha Vhakriste vha vhukuma. (Maleaxi 3:1-5) U bva tsheetsho, vhathu vha Yehova vho mu gwadamela thembeleni yawe ya muya—ine ya vha ndugiselelo ya Mudzimu ya vhurabeli ho kunaho. Ndi ngani zwenezwi zwi zwa ndeme kha riṋe ṋamusi?

9. Musi tshifhinga tsha vhaapostola tsho no fhira, kereke dza ḽa Vhudzhagane dzo ita mini kha vhurabeli ha Mudzimu, fhedzi Yehova o ita mini misini yashu?

⁹ Ṱhogomelani mavhonele a kale. Vhakriste vha ḓana ḽa kale ḽa u thoma ḽa miṅwaha vho ḓiphina nga phaṱutshedzo nnzhi dza muya. Fhedzi Yesu na vhaapostola vho dzula vho amba uri vhurabeli ha ngoho vhu ḓo tshinywa nahone vhu si tsha vha hone. (Mateo 13:24-30; Mishumo 20:29, 30) Musi tshifhinga tsha vhaapostola tsho no fhira, ho bvelela ḽa Vhudzhagane. Vhafunzi vhaḽo vho shumisa pfunzo na maitele a vhuhedeni. Vho dovha vha itela Mudzimu samba, nga u mu ṱalusa sa Vhuraruthihi vhu sa pfesesei na u funza vhathu u ḓibula kha vhafunzi na u rabela Maria na “vhakhethwa” vho fhamba-fhambanaho nṱhani ha Yehova. Zwino, nga murahu ha miṅwaha ya maḓana ya u tshinyala honoho, ndi mini zwe Yehova a zwi ita? Vhukati ha shango ḽa ṋamusi—shango ḽo ḓalaho nga vhurereli ha mazwifhi na u tshikafhadzwa nga maitele a u sa ofha Mudzimu—o dzhenelela nahone a vusulusa vhurabeli ho kunaho! Ri sa kaludzi, ri nga amba uri honohu u vusuluswa ndi zwiṅwe zwa zwithu zwa ndeme vhukuma kha zwiitea zwa musalauno.

10, 11. (a) Ndi masia afhio mavhili ane a katelwa kha paradiso ya muya, nahone ni kwamea nga nḓila-ḓe? (b) Ndi vhathu vha mufuda-ḓe vhe Yehova a vha kuvhanganyela paradisoni ya muya, nahone vha ḓo vha na ndugelo ya u vhona mini?

¹⁰ Ngauralo Vhakriste vha ngoho ṋamusi vha ḓiphina nga paradiso ya muya. Yeneyi paradiso i katela na mini? Zwihuluhulu i katela masia mavhili. Ḽa u thoma ndi vhurabeli ho kunaho ha Mudzimu wa ngoho, Yehova. O ri fhaṱutshedza nga nḓila ya vhurabeli vhu si na mazwifhi. O ri fhaṱutshedza nga zwiḽiwa zwa muya. Zwenezwi zwi ita uri ri kone u guda nga ha Khotsi ashu wa ṱaḓulu, u mu takadza, na u sendela tsini nae. (Yohane 4:24) Sia ḽa vhuvhili ḽa paradiso ya muya ḽi katela vhathu. Samusi Yesaya o dzula o amba, “vhufheloni ha maḓuvha,” Yehova o funza vhagwadameli vhawe nḓila dza mulalo. O fhelisa nndwa vhukati hashu. Hu sa londwi u sa fhelela hashu, u ri thusa u ‘ambara muthu muswa.’ U fhaṱutshedza vhuḓidini hashu nga uri ṋea muya wawe mukhethwa, une wa bveledza zwiaṋwiwa zwavhuḓi kha riṋe. (Vha-Efesa 4:22-24; Vha-Galata 5:22, 23) Musi ni tshi  shuma u tendelana na muya wa Mudzimu, ngangoho ni vha ni tshipiḓa tsha paradiso ya muya.

¹¹ Yehova o kuvhanganya mufuda wa vhathu vhane a vha funa kha yeneyi paradiso ya muya—vhane vha mu funa, vhane vha funa mulalo, na “vhaheḓana muyani.” (Mateo 5:3) Vhenevho ndi vhathu vhane vha ḓo vha na ndugelo ya u vhona u vusuluswa hu mangadzaho—ha vhathu na ha ḽifhasi ḽoṱhe.

12, 13. (a) Ndi ngani vhuporofita ha u vusulusa vhu tshi kha ḓi fanela u ḓadzea? (b) Ndi ifhio ndivho ya Yehova nga ha ḽifhasi samusi zwo bulwa ngei Edeni, nahone ndi ngani zwenezwi zwi tshi ri ṋea fulufhelo nga ha vhumatshelo?

¹² Vhunzhi ha vhuporofita ha u vusulusa a vhu ambeli kha u vusuluswa ha muya fhedzi. Sa tsumbo, Yesaya o ṅwala nga ha tshifhinga tshine vhalwadze, vhaholefhali, vha sa vhoni, na vho dzingaho nḓevhe vha ḓo fhodzwa nahone lufu lwa fheliswa tshoṱhe. (Yesaya 25:8; 35:1-7) Eneo mafulufhedziso ho ngo ḓadzea nga nḓila ya vhukuma kha Isiraele ḽa kale. Naho misini yashu ro vhona u ḓadzea ha lwa muya ha enea mafulufhedziso, hu na tshiitisi tshi pfalaho tsha u tenda uri tshifhingani tshi ḓaho, enea mafulufhedziso a ḓo ḓadzea nga vhuḓalo zwa vhukuma. Ri zwi ḓivha hani zwenezwo?

¹³ Murahu ngei Edeni, Yehova o bvisela khagala ndivho yawe nga ha ḽifhasi: Ḽo vha ḽi tshi tea u dzulwa nga vhathu vho takalaho, vha re na mutakalo wavhuḓi, muṱa wa vhathu u re na vhuthihi. Munna na musadzi vho vha vha tshi fanela u ṱhogomela ḽifhasi na zwivhumbwa zwaḽo zwoṱhe, vha shandule ḽifhasi ḽoṱhe ḽi vhe paradiso. (Genesi 1:28) Zwenezwo zwo fhambana tshoṱhe na nḓila ine zwithu zwa vha ngayo zwino. Naho zwo ralo, ri nga vha na vhungoho ha uri ndivho dza Yehova a dzi nga vhuyi dza thithiswa. (Yesaya 55:10, 11) Yesu, ane a vha Khosi ya Vhumessia yo vhewaho nga Yehova, u ḓo ita uri ḽifhasi ḽoṱhe ḽi vhe Paradiso.—Luka 23:43.

14, 15. (a) Yehova u ḓo ita ‘zwoṱhe zwiswa’ nga nḓila-ḓe? (b) Vhutshilo vhu ḓo vha nga nḓila-ḓe Paradisoni, nahone ndi mini tshine tsha ni takadza vhukuma ngayo?

¹⁴ Edzani u humbula ḽifhasi ḽoṱhe ḽo no shandulwa ḽa vha  Paradiso! A tshi ambela kha tshenetsho tshifhinga, Yehova u ri: “Asizwo, zwoṱhe ndi zwi ita zwiswa.” (Ndzumbululo 21:5) Ṱhogomelani uri zwenezwo zwi ḓo amba mini. Musi Yehova o no fhedza u shumisa maanḓa awe a u lozwa ano maitele mavhi a kale, hu ḓo sala “maṱaḓulu maswa na ḽifhasi ḽiswa.” Hezwi zwi amba uri muvhuso muswa u ḓo vhusa u ṱaḓulu, wa vhusa ḽifhasi ḽiswa ḽa vhathu vhane vha funa Yehova na vhane vha ita zwine a zwi funa. (2 Petro 3:13) Sathane, kathihi na madimoni awe, vha ḓo fhelelwa nga mushumo. (Ndzumbululo 20:3) Lwa u tou thoma nga murahu ha zwigidi zwa miṅwaha, vhathu vha ḓo vhofhololwa kha ṱhuṱhuwedzo yo raloho yo tshinyalaho, ya vengo, i tshinyadzaho. A zwi timatimisi uri vhathu vha ḓo takalela vhukuma yeneyo mbofholowo.

¹⁵ Mafheleloni, ri ḓo kona u ṱhogomela yeneyi pulanete ya u naka samusi zwo vha zwo tea u vha zwo tou ralo u thomani. Ḽifhasi ḽi na maanḓa a mupo a u ḓivusulusa. Maisha na milambo yo tshikafhadzwaho zwi nga ḓikunakisa arali zwine zwa i tshikafhadza zwo no fheliswa; fhethu ho tshinyadzwaho nga nndwa hu nga dovha ha vhuyelela ngonani arali nndwa dza fhela. Zwi ḓo takadza lungafhani u shumisana na milayo ya ḽifhasi, ra thusa u shandula ḽifhasi ḽa vha tsimu i ngaho phakha, khunguluni yoṱhe ya vha Edeni i re na mifuda ya zwithu zwo fhamba-fhambanaho zwi tshilaho! Nṱhani ha u fhelisa nga khole mifuda ya phukha na zwimela, muthu u ḓo vha na mulalo na zwivhumbiwa zwoṱhe zwi re kha ḽifhasi. Na vhana vha nga si tsha ḓo ofha phukha.—Yesaya 9:5, 6; 11:1-9.

16. Paradisoni, ndi u vusuluswa hufhio hune ha ḓo kwama muthu muṅwe na muṅwe a fulufhedzeaho?

¹⁶ Ri ḓo dovha ra vusuluswa ṋamani. Nga murahu ha Haramagedo, vhaponyoki vha ḓo vhona u fhodzwa ha lwa vhuṱolo khunguluni yoṱhe. Samusi o zwi ita musi a tshi kha ḓivha kha ḽifhasi, Yesu u ḓo shumisa maanḓa awe e a ṋewa nga Mudzimu u itela uri vho pofulaho vha vhone, uri vho dzingaho nḓevhe vha pfe, a fhodza vhaholefhali na vhane vha lwala. (Mateo 15:30) Mulala u ḓo takalela u vhuyelela kha u vha na nungo dza vhuswa, a vha na mutakalo wavhuḓi na mafulufulu. (Yobo 33:25) Maonyeonye a ḓo fhela, miraḓo i ḓo onyolowa, misipha i ḓo khwaṱha. Vhathu vhoṱhe vha fulufhedzeaho vha ḓo vhona uri mvelelo dza tshivhi  na u sa fhelela zwi khou fhungudzea nga zwiṱuku nga zwiṱuku zwa si tsha vha hone. Ri ḓo livhuha Yehova Mudzimu nga maanḓa awe a mangadzaho a u vusulusa! Zwino kha ri ṱhogomele zwihuluhulu ḽiṅwe sia ḽi takadzaho ḽa tshenetshi tshifhinga tshi takadzaho tsha u vusulusa.

17, 18. (a) Ndi ngani Yesu o kaidza Vhasadukei? (b) Ndi zwiitea zwifhio zwo itaho uri Elia a humbele Yehova uri a vuse mutukana?

¹⁷ Kha ḓana ḽa u thoma ḽa miṅwaha C.E. vhaṅwe vharangaphanḓa vha vhurereli, vha vhidzwaho Vhasadukei, vho vha vha sa tendi kha mvuwo. Yesu o vha kaidza nga haya maipfi: “Ni khou xela; a ni ḓivhi maṅwalo, na maanḓa a Mudzimu a ni a ḓivhi.” (Mateo 22:29) Ee, Maṅwalo a dzumbulula uri Yehova u na maanḓa eneo a u vusulusa. Nga nḓila-ḓe?

¹⁸ Humbulani zwo iteaho misini ya Elia. Iṅwe tshilikadzi yo vha yo kuvhatedza tshitumbu tsha ṅwana wayo muthihi fhedzi. Onoyo ṅwana wayo wa mutukana o vha o fa. Muporofita Elia, we a vha o dalela yeneyo tshilikadzi lwa tshifhinganyana, u fanela u vha o vha o mangala. Mathomoni, o thusa onoyu mutukana uri a si sike nga nḓala. Khamusi Elia o vha o no ḓowelana na kwonokwo kutukana. Mme akwo o vha o khathuwa mbilu. Onoyu mutukana o vha a tshi mu fhumudza uri a sa tsha lilela munna wawe o faho. A nga vha o vha o fulufhela uri murwa wawe u ḓo mu ṱhogomela musi a tshi kegula. Yo dinalea, yeneyo tshilikadzi yo humbula uri i nga vha i tshi khou ṱarafelwa vhuṅwe vhukhakhi ha tshifhingani tsho fhiraho. Nga zwenezwo Elia ho ngo kona u konḓelela honovhu vhuṱungu he ha vha vhu tshi khou ṋaṋa. O dzhia tshitumbu tshe tsha vha tsho kuvhatedzwa nga mme, a tshi hwala a tshi isa kamarani yawe, nahone a humbela Yehova Mudzimu uri a vhuyedzedze muya-tshivhili kana vhutshilo ha onoyo ṅwana.—1 Dzikhosi 17:8-21.

19, 20. (a) Abrahamu o sumbedza uri u na lutendo kha maanḓa a Yehova a u vusulusa nga nḓila-ḓe, nahone lutendo lwo raloho lwo vha lwo thewa kha mini? (b) Yehova o lambedza lutendo lwa Elia nga nḓila-ḓe?

¹⁹ Elia o vha e si muthu wa u thoma u tenda kha mvuwo. Maḓanani a miṅwaha nga phanḓa, Abrahamu o tenda uri Yehova u  na maanḓa a u vusulusa—nahone o vha e na tshiitisi tshi pfalaho tsha u tenda zwenezwo. Musi Abrahamu e na miṅwaha ya 100 nahone Sara e na ya 90, Yehova o vusulusa maanḓa avho a u beba, nga lwa vhuṱolo a ita uri Sara a bebe murwa. (Genesi 17:17; 21:2, 3) Nga murahu, musi mutukana o no vhina, Yehova o humbela Abrahamu uri a ite tshiṱhavhelo nga murwa wawe. Abrahamu o sumbedza lutendo, a tshi humbula uri Yehova a nga vusulusa vhutshilo kha Isaka ane a mu funa. (Vha-Heberu 11:17-19) Lwonolwo lutendo lwo khwaṱhaho lu sumbedza zwavhuḓi uri ndi ngani Abrahamu, musi a sa athu u gonya thavhani u itela u ṋekedza murwa wawe, o khwaṱhisedza vhalanda vhawe uri ene na Isaka vha ḓo vhuya vhoṱhe.—Genesi 22:5.

²⁰ Yehova o ita uri Isaka a sa vhulahwe, nga u ralo zwo vha zwi sa ṱoḓei uri a vuswe nga tshenetsho tshifhinga. Naho zwo ralo, kha mafhungo a Elia, murwa wa tshilikadzi o vha o no ḓi fa—fhedzi hu si tshifhinga tshilapfu. Yehova o lambedza lutendo lwa muporofita nga u vusa onoyo ṅwana! Nga zwenezwo Elia a dzhia mutukana a mu ṋekedza mme awe, a amba maipfi a tevhelaho a sa hangwei: “Lavhelesa, ṅwana wau u a tshila”!—1 Dzikhosi 17:22-24.

21, 22. (a) Yo vha i ifhio ndivho ya mafhungo a mvuwo o ṅwalwaho Maṅwaloni? (b) Paradisoni mvuwo i ḓo vha khulwane nga nḓila-ḓe, nahone ndi vhafhio vhane vha ḓo vuswa?

²¹ Nga zwenezwo, lwa u tou thoma kha mafhungo a Bivhili, ri vhona Yehova a tshi khou shumisa maanḓa awe a vusulusa vhutshilo ha muthu. Nga murahu, Yehova o dovha a ṋea Elisa, Yesu, Paulo, na Petro maanḓa a u vusa vhafu. Vhukuma, mafheleloni vhenevho vho vuswaho vho dovha vha fa. Naho zwo ralo, eneo mafhungo a Bivhili a ri vhudza nga zwithu zwi mangadzaho zwa tshifhingani tshi ḓaho.

²² Paradisoni, Yesu u ḓo ḓadzisa mushumo wawe sa ‘ane a vusa na u ṋea vhutshilo.’ (Yohane 11:25) U ḓo vusa vhathu vhanzhi-vhanzhi, a vha ṋea tshibuli tsha u tshila nga hu sa fheli Paradisoni kha ḽifhasi. (Yohane 5:28, 29) Edzani u humbula nga ha u ṱangana ha dzikhonani na mashaka vhane vha funana, vhe vha vha vho fhambanyiswa nga lufu tshifhinga tshilapfu, vha tshi  kuvhatedzana vho takala! Vhathu vhoṱhe vha ḓo renda Yehova nga ṅwambo wa maanḓa awe a u vusulusa.

23. Ndi ufhio musumbedzo muhulwane kha yoṱhe wa maanḓa a Yehova, nahone zwenezwi zwi khwaṱhisedza fulufhelo ḽashu ḽa vhumatshelo nga nḓila-ḓe?

²³ Yehova o ṋea khwaṱhisedzo ya uri zwe a zwi fulufhedzisa zwi ḓo itea. O ṋea musumbedzo muhulwanesa wa maanḓa awe nga u vusa Murwa wawe, Yesu, a vha tshivhumbiwa tshihulwane tsha muya, a mu ita uri a vhe ene fhedzi wa vhuvhili kha Yehova. Yesu o vuswaho o vhoniwa nga vhathu vhanzhi. (1 Vha-Korinta 15:5, 6) Na kha vhatimatimi, vhuṱanzi ho raloho vhu fanela u pfala. Yehova u na maanḓa a u vusulusa vhutshilo.

24. Ndi ngani ri tshi nga vha na fulufhelo ḽa uri Yehova u ḓo vusa vhafu, nahone ndi fulufhelo ḽifhio ḽine roṱhe nga muthihi nga muthihi ra nga ḽi takalela?

²⁴ Yehova ha na maanḓa a u vusa vhafu fhedzi, fhedzi u dovha a vha na dzangalelo ḽa u ita nga u ralo. Yobo munna a fulufhedzeaho o hevhedzwa uri a ambe uri Yehova u ṱulutshela u vusa vhafu. (Yobo 14:15) Naa a ni sendedzwi tsini na Mudzimu washu, ane a swela u shumisa maanḓa awe a u vusulusa nga nḓila ya lufuno? Naho zwo ralo, humbulani uri mvuwo ndi muṅwe wa mishumo mihulwane ya u vusulusa ine ya ḓo itwa nga Yehova tshifhingani tshi ḓaho. Musi ni tshi sendela tsini-tsini nae, misi yoṱhe ni humbule uri ni nga vhona Yehova a ‘tshi ita zwoṱhe zwiswa.’—Ndzumbululo 21:5.