NDIMA YA 20
“Ndi Wa Mbilu Ya Vhuṱali”—Fhedzi U A Ḓiṱukufhadza
1-3. Ndi ngani ri tshi nga vha na vhungoho ha uri Yehova u a ḓiṱukufhadza?
KHOTSI u ṱoḓa u gudisa ṅwana wawe muṱuku ngudo ya ndeme. U fhisetshela u swikelela mbilu yawe. U fanela u amba nae nga nḓila-ḓe? Naa u fanela u ima nga nḓila ine ya ḓo mu tshuwisa nahone a amba nae nga vhuhali? Kana u fanela u ḓivhea vhuimoni ha ṅwana nahone a amba nga nḓila yavhuḓi na i kwengweledzaho? Vhukuma, khotsi o ṱalifhaho, a ḓiṱukufhadzaho u ḓo khetha u amba nae nga nḓila yavhuḓi.
2 Yehova ndi Khotsi wa mufuda-ḓe—a ḓikukumusaho kana a ḓiṱukufhadzaho, wa vhuhali kana vhuthu? Yehova u a ḓivha zwoṱhe nahone o ṱalifha vhukuma. Naho zwo ralo, naa no no zwi ṱhogomela uri nḓivho na vhuṱali a si kanzhi zwi tshi ita uri vhathu vha ḓiṱukufhadze? Samusi Bivhili i tshi amba, “nḓivho i ro hudulusa.” (1 Vha-Korinta 3:19; 8:1) Fhedzi Yehova, ane a vha na “mbilu ya vhuṱali,” u a ḓiṱukufhadza. (Yobo 9:4) Hezwi a zwi ambi uri ndi wa vhuimo ha fhasi kana ha na vhugala, fhedzi zwi amba uri ha ḓikukumusi. Ndi ngani zwo tou ralo?
3 Yehova ndi mukhethwa. Ngauralo ha ḓikukumisi, ngauri yeneyo pfaneleo i a tshinya. (Marko 7:20-22) Zwiṅwe hafhu, ṱhogomelani zwe muporofita Yeremia a zwi amba kha Yehova: ‘Ndi zwine mbilu yau [Yehova] ya ḓi elekanya zwone, yo guguvhala ngazwo.’ * (Zwililo 3:20) Edzani u humbula zwenezwo! Yehova, Murena Muvhusahoṱhe, o vha o ḓiimisela u “guguvhala,” kana u ḓivhea vhuimoni ha Yeremia u itela uri a thetshelese zwavhuḓi onoyo muthu a songo fhelelaho. (Psalme ya 113:7) Ee, Yehova u a ḓiṱukufhadza. Fhedzi u ḓiṱukufhadza ha Yehova hu katela na mini? Hu tshimbidzana hani na vhuṱali? Nahone ndi ngani hu ha ndeme kha riṋe?
Nḓila Ye Yehova A Sumbedza Ngayo U Ḓiṱukufhadza
4, 5. (a) U ḓiṱukufhadza ndi mini, hu vhonala nga nḓila-ḓe, nahone ndi ngani hu songo fanela u ṱanganywa na vhushayanungo kana u sa ḓifulufhela? (b) Yehova o sumbedza hani u ḓiṱukufhadza musi a tshi thusa Davida, nahone u ḓiṱukufhadza ha Yehova ndi ha ndeme lungafhani kha riṋe?
4 U ḓiṱukufhadza ndi u ḓivhea fhasi, u sa ḓiḓivha na u sa ḓikukumusa. U ḓiṱukufhadza ndi pfaneleo ya nga ngomu mbiluni nahone i vhonala nga muya wa u vuḓa, u sa fhela mbilu, na u humbulela. (Vha-Galata 5:22, 23) Naho zwo ralo, a ro ngo fanela u dzhia dzenedzi pfaneleo dza Mudzimu sa vhushayanungo kana u sa ḓifulufhela. Dzi tshimbidzana na u sinyuwa ha Yehova ho lugaho kana u shumisa hawe maanḓa a u lozwa. Nṱhani ha zwenezwo, nga u ḓiṱukufhadza na u vuḓa hawe, Yehova u sumbedza nungo dzawe khulwane, maanḓa awe a u ḓilanga nga ho fhelelaho. (Yesaya 42:14) U ḓiṱukufhadza hu tshimbidzana hani na vhuṱali? Iṅwe bugu ine ya amba nga Bivhili i ri: “U ḓiṱukufhadza zwi ṱaluswa . . . sa u sa vha na tseḓa nahone ndi mutheo wa ndeme wa vhuṱali hoṱhe.” Nga zwenezwo, ni nga si vhe na vhuṱali ha vhukuma arali ni sa ḓiṱukufhadzi. U ḓiṱukufhadza ha Yehova hu ri vhuyedza nga nḓila-ḓe?
Khotsi o ṱalifhaho u shumisana na ṅwana wawe nga u ḓiṱukufhadza na u vuḓa
5 Khosi Davida o imbela Yehova a ri: “U mpfarisa tshiṱangu tshau tshi tshidzaho. Tshanḓa tshau tshi dzula tshó ntika; U nkhulisa nga [“u ḓiṱukufhadza,” NW] hau.” (Psalme ya 18:35) Zwi re zwone ndi uri Yehova o ḓivhea vhuimoni ha fhasi u itela u thusa onoyu muthu zwawe a songo fhelelaho, u mu tsireledza na u mu khwaṱhisa ḓuvha ḽiṅwe na ḽiṅwe. Davida o ṱhogomela uri arali a tshi ṱoḓa u tshidzwa—na u fheleledza o vha na maanḓa mahulwane sa khosi—zwo vha zwi tshi nga konadzea fhedzi arali Yehova a ḓiimisele u ḓiṱukufhadza nga yeneyi nḓila. Vhukuma, ndi nnyi kha riṋe we a vha a tshi nga vha na fulufhelo ḽa u tshidzwa arali Yehova a vhe a sa ḓiṱukufhadzi, a songo ḓiimisela u ḓivhea kha vhuimo ha fhasi u itela u shumisana na riṋe sa Khotsi o vuḓaho wa lufuno?
6, 7. (a) Ndi ngani Bivhili i sa vhuyi ya amba uri Yehova u a ḓifhima? (b) U vuḓa na vhuṱali zwi tshimbidzana hani, nahone ndi nnyi we a vhea tsumbo khulwane malugana na zwenezwi?
6 Ri fanela u ṱhogomela uri hu na phambano vhukati ha u ḓiṱukufhadza na u ḓifhima. U ḓifhima ndi pfaneleo i swayeaho ine vhathu vha fulufhedzeaho vha fanela u i ṱahulela. U fana na u ḓiṱukufhadza, u ḓifhima hu tshimbidzana na vhuṱali. Sa tsumbo, Mirero 11:2 i ri: “Vhuṱali vhu kha vha [“ḓifhimaho,” NW].” Naho zwo ralo, Bivhili a i vhuyi ya amba uri Yehova u a ḓifhima. Ndi ngani zwo ralo? U ḓifhima, nga nḓila ye ha shumiswa ngayo Maṅwaloni, zwi amba uri muthu u ṱhogomela uri hu na zwiṅwe zwithu zwine a sa kone u zwi ita. Ramaanḓaoṱhe ha kundwi nga tshithu nga nnḓa ha zwithu zwine a litsha u zwi ita nga ṅwambo wa zwilinganyo zwawe zwo lugaho. (Marko 10:27; Tito 1:2) Zwiṅwe hafhu, samusi e Wa-Ṱaḓulu-ṱaḓulu, ha fhasi ha muthu naho e ufhio. Ngauralo pfaneleo ya u ḓifhima a i shumi kha Yehova.
7 Naho zwo ralo, Yehova u a ḓiṱukufhadza nahone o vuḓa. U funza vhashumeli vhawe uri arali vha tshi ṱoḓa u vha na vhuṱali ha ngoho vha fanela u vuḓa. Ipfi ḽawe ḽi amba nga “u vuḓiswa nga hone vhuṱali.” * (Yakobo 3:13) Ṱhogomelani tsumbo ya Yehova malugana na zwenezwi.
Nga U Ḓiṱukufhadza, Yehova U Ṋea Vhaṅwe Vhuḓifhinduleli Nahone U A Thetshelesa
8-10. (a) Ndi ngani zwi tshi swayea uri Yehova u sumbedza u ḓiimisela u ṋea na u thetshelesa? (b) Ramaanḓaoṱhe o shumisana hani na vharuṅwa vhawe nga u ḓiṱukufhadza?
8 U ḓiimisela ha Yehova u ṋea vhaṅwe vhuḓifhinduleli na u thetshelesa ndi vhuṱanzi vhu kwamaho maḓipfele ha uri u a ḓiṱukufhadza. Zwi a mangadza vhukuma uri u a ita zwenezwo; Yehova ha ṱoḓi thuso kana nyeletshedzo. (Yesaya 40:13, 14; Vha-Roma 11:34, 35) Naho zwo ralo, Bivhili i ri sumbedza lunzhi-lunzhi uri Yehova u a ḓivhea vhuimoni ha fhasi uri a ite zwenezwi.
9 Sa tsumbo, ṱhogomelani tshiitea tshi swayeaho tsho iteaho kha Abrahamu. Abrahamu o vha o dalelwa nga vhaeni vhararu, we muṅwe wavho a mu vhidza “Yehova.” Vhukuma vhenevho vhaeni vho vha vhe vharuṅwa, fhedzi muṅwe wavho o ḓa nga dzina ḽa Yehova nahone a ḓivhidza nga dzina Ḽawe. Musi onoyo muruṅwa a tshi amba na musi a tshi ita zwithu, zwi re zwone ndi uri ndi Yehova we a vha a tshi khou amba na u ita zwenezwo zwithu. Nga yeneyi nḓila, Yehova o vhudza Abrahamu uri o pfa ‘bvumo ḽihulu ḽa zwa Sodoma na Gomora.’ Yehova o ri: “Zwino ndi ḓo tsa nda yo’ vhona arali vhó ita zwenezwo zwoṱhe zwe bvumo ḽazwo ḽa swika phanḓa hanga; kana vhá songó zwi ita ndi zwi ḓivhe.” (Genesi 18:3, 20, 21) Vhukuma, mafhungo a Yehova ha ambi uri Ramaanḓaoṱhe o vha tshi “ḓo tsa” nga tshavhukoma. Nṱhani hazwo, o dovha a ruma vharuṅwa uri a mu imele. (Genesi 19:1) Ndi ngani? Naa Yehova a konaho u vhona fhethu hoṱhe o vha a nga si “ḓivhe” vhuimo ha vhukuma ha ḽeneḽo dzingu nga dzawe? Vhukuma, o vha a tshi nga ḽi ḓivha. Fhedzi nṱhani hazwo, nga u ḓiṱukufhadza Yehova o ṋea vhenevho vharuṅwa mushumo wa u ṱolisisa honoho vhuimo na u dalela Loto na muṱa wawe ngei Sodoma.
10 Zwiṅwe hafhu, Yehova u a thetshelesa. O vhuya a humbela vharuṅwa vhawe uri vha ambe nḓila dzo fhamba-fhambanaho dza u lozwa Ahaba Khosi mmbi. Yehova o vha a sa ṱoḓi yeneyo thuso. Naho zwo ralo, o ṱanganedza nyeletshedzo ya muṅwe muruṅwa nahone a mu ruma uri a ite nga u ralo. (1 Dzikhosi 22:19-22) Naa zwenezwo zwo vha zwi si u ḓiṱukufhadza?
11, 12. Abrahamu o vhona hani u ḓiṱukufhadza ha Yehova?
11 Yehova o ḓiimisela u thetshelesa vhathu vha songo fhelelaho vhane vha ṱoḓa u bula mbilaelo dzavho. Sa tsumbo, u thomani musi Yehova a tshi vhudza Abrahamu nga ha ndivho Yawe ya u fhelisa Sodoma na Gomora, onoyo munna a fulufhedzeaho ho ngo zwi pfesesa. Abrahamu o ri: “Zwi kule na Iwe,” a dovha a engedza a ri: “Muhaṱuli wa mashango oṱhe naa ha nga iti zwo lugaho naa?” O vhudzisa Yehova arali a tshi ḓo fhelisa yeneyo miḓi arali ha nga wanala vhathu vha 50 vha fulufhedzeaho khayo. Yehova a mu khwaṱhisedza uri o vha A sa ḓo i fhelisa. Fhedzi Abrahamu a dovha a vhudzisa, a tsitsa tshivhalo tsha vha 45, nga murahu a ri 40, nahone a dovha nga u ralo nga u ralo. Hu sa londwi khwaṱhisedzo ya Yehova, Abrahamu o bvela phanḓa a tshi vhudzisa u swika tshivhalo tshi tshi guma kha fumi. Khamusi Abrahamu o vha a sa athu pfesesa uri Yehova u na khathutshelo khulwane lungafhani. Hu sa londwi u vhudzisa honoho, Yehova ho ngo fhela mbilu nahone o ḓiṱukufhadza, a tendelana na khonani yawe Abrahamu, ane a vha mushumeli wawe uri a bule mbilaelo dzawe nga yeneyi nḓila.—Genesi 18:23-33.
12 Ndi vhathu vhangana vho ṱalifhaho, vho funzeaho vhane vha nga thetshelesa nga u ralo vha sa fheli mbilu muthu zwawe a re na vhuṱali vhuṱuku? * Ho tou ralo u ḓiṱukufhadza ha Mudzimu washu. Kha yeneyo nyambedzano, Abrahamu o dovha a vhona uri Yehova ha ‘fheli mbilu.’ (Ekisodo 34:6) Khamusi a tshi ṱhogomela uri ha na ndugelo ya u vhudzisa mishumo ya Wa-Ṱaḓulu-ṱaḓulu, Abrahamu o humbela luvhili a ri: “Muṋe wanga a songo sinyuwa ndí tshi ḓi dovha nda amba.” (Genesi 18:30, 32) Vhukuma, Yehova ho ngo sinyuwa. I ngoho, “u vuḓiswa nga hone vhuṱali.”
Yehova U A Humbulela
13. Ipfi ḽine ḽa ri “humbulela” ḽi amba mini u ya nga nḓila ye ḽa shumiswa ngayo Bivhilini, nahone ndi ngani ḽeneḽi ipfi ḽi tshi ṱalusa Yehova nga ho teaho?
13 U ḓiṱukufhadza ha Yehova hu vhonala kha iṅwe pfaneleo yavhuḓi—u humbulela. Zwi ṱungufhadzaho ndi uri vhathu vha songo fhelelaho a vha na heyi pfaneleo. A si uri Yehova u thetshelesa zwivhumbiwa zwawe zwo ṱalifhaho fhedzi, fhedzi u dovha a ḓiimisela u tendelana na zwiimo musi zwi sa lwisani na maitele o lugaho. Samusi ḽo shumiswa Bivhilini, ipfi u “humbulela” nga lwa thevhedzaipfi ḽi amba “u tendelana na zwiimo.” Na yeneyi pfaneleo i sumbedza vhuṱali ha Mudzimu. Yakobo 3:17, (NW) i ri: “Vhuṱali vhu bvaho ṱaḓulu vhu a . . . humbulela.” Yehova o ṱalifhaho u humbulela nga nḓila-ḓe? Tsha u thoma, u tendelana na zwiimo. Humbulani uri dzina ḽawe ḽi ri funza uri Yehova u ita zwine a ṱoḓa u itela u ḓadzisa ndivho dzawe. (Ekisodo 3:14) Naa zwenezwo a zwi sumbedzi muya wa u tendelana na zwiimo na u humbulela?
14, 15. Bono ḽa Hesekiele ḽa goloi ya Yehova ya ṱaḓulu ḽi ri funza mini nga ha ndangulo ya Yehova ya ṱaḓulu, nahone yo fhambana hani na madzangano shango?
14 Hu na mafhungo a Bivhili a swayeaho ane a ri thusa u pfesesa uri Yehova u tendelana na zwiimo. Muporofita Hesekiele o sumbedzwa bono ḽa ndangulo ya Yehova ya ṱaḓulu ya zwivhumbiwa zwa muya. O vhona goloi khulwane i ofhisaho, “goloi” ya Yehova ine ya langiwa Ngae tshifhinga tshoṱhe. Matshimbilele ayo o vha a tshi takadza vhukuma. Milinga mihulwane yo vha i thungo nṋa nahone yo ḓala maṱo uri a vhone huṅwe na huṅwe nahone yo vha i tshi nga shandula buḓo nga u ṱavhanya, i songo vhuya ya ima kana u khona. Nahone heyi goloi khulwane yo vha i sa tshimbili nga u tou swenda u fana na goloi dzo itwaho nga vhathu. Yo vha i tshi tshimbila nga luvhilo lwa lupenyo, nahone ya khona ya tou tswititi! (Hesekiele 1:1, 14-28) Ee, ndangulo ya Yehova, u fana na Muvhusahoṱhe ane a vha mulangi wayo, i tendelana na vhuimo nga nḓila i mangadzaho, i aravha zwiimo zwi shandu-shandukaho na ṱhoḓea dzine dza vha hone.
15 Vhathu vha nga sokou lingedza u edzisa vhukoni ho raloho ho fhelelaho, ha u tendelana na zwiimo. Naho zwo ralo, kanzhi vhathu na madzangano avho a vha shanduki, vha konḓisa zwithu nṱhani ha u tendelana na zwiimo. Sa tsumbo: Tshikepe tshihulwanesa tsha mathannga kana tshidimela tshihulwane tsha u hwala thundu, vhuhulwane hazwo vhu a mangadza nahone zwi na maanḓa. Fhedzi naa zwenezwi zwithu zwivhili zwi nga kona u ima na u khona nga u ṱavhanya? Arali tshidimela tshihulwane tsha u hwala thundu tshi tshi khou tshimbila, ha mbo ḓi wela tshithu tshiporoni, tshi nga si kone u khona. A zwi leluwi uri tshi ime nga u ṱavhanya. Tshidimela tshihulwane tsha u hwala thundu tshi nga tshimbila khilomithara dzi ṱoḓaho u vha mbili tshi sa athu ima nga murahu ha musi biriki dzo no kandwa! Zwi fanaho na zwenezwo, tshikepe tshihulwane tsha mathannga tshi nga kha ḓi bvela phanḓa u tshimbila khilomithara dza malo musi nzhini dzo no dzimiwa. Naho tsha dzheniswa kha gere ya u humela murahu, tshi nga kha ḓi tshimbila khilomithara tharu! Zwo tou ralo na nga madzangano a vhathu ane dza konḓisa zwithu, a sa humbuleli. Nga ṅwambo wa u ḓihudza, kanzhi vhathu vha hana u shanduka uri vha tendelane na ṱhoḓea na zwiimo. Honoho u sa shanduka ho ita uri khamphani khulwane dzi vale nahone zwa wisa mivhuso. (Mirero 16:18) Ri takala lungafhani uri Yehova kana ndangulo yawe yo fhambana tshoṱhe na eneo madzangano a vhathu!
Nḓila Ine Yehova A Sumbedza Ngayo U Humbulela
16. Yehova o sumbedza hani u humbulela musi a tshi shumisana na Loto a sa athu lozwa Sodoma na Gomora?
16 Dovhani ni ṱhogomele u lozwiwa ha Sodoma na Gomora. Loto na muṱa wawe vho ṋewa ndaela dzi pfalaho nga muruṅwa wa Yehova: “Shavhela dzithavhani.” Naho zwo ralo, Loto o vha a sa ṱoḓi u ya thavhani. O humbela a ri: “Yawee, Muṋe wanga!” A tshi humbula uri u ḓo fa arali a shavhela dzithavhani, Loto o humbela uri ene na muṱa wawe vha tendelwe u shavhela muḓini wa tsini une wa pfi Tsowari. Humbulani uri Yehova o vha o livha u lozwa wonoyo muḓi. Zwiṅwe hafhu, ho vha hu si na tshiitisi tsha uri Loto a ofhe. I ngoho, Yehova o vha a tshi ḓo tsireledza Loto dzithavhani! Naho zwo ralo, Yehova o tendelana na khumbelo ya Loto nahone a si fhelise Tsowari. Muruṅwa o vhudza Loto uri: “Ndi zwone, na ḽeneḽo ndo ḽi tenda.” (Genesi 19:17-22) Naa Yehova ho ngo sumbedza u humbulela nga u ita zwenezwo?
17, 18. Kha zwe zwa itea Ninive, Yehova o sumbedza hani uri u a humbulela?
17 Hafhu, Yehova u a ṱanganedza u rembuluwa hu bvaho mbiluni, misi yoṱhe u sumbedza khathutshelo na u luga. Ṱhogomelani zwe zwa itea musi muporofita Yona o rumiwa muḓini u re na vhuvhi na vhuvemu wa Ninive. Yona o tshimbila zwiṱaraṱani zwa Ninive, a ḓivhadza mulaedza wo hevhedzwaho u leluwaho vhukuma: Ho sala maḓuvha a 40 uri wonoyu muḓi muhulwane u fheliswe. Naho zwo ralo, vhuimo ho mbo ḓi shanduka nga ṱavhanya. Vhaninive vha rembuluwa!—Yona, ndima ya 3.
18 Ri guda zwinzhi musi ri tshi vhambedza nḓila ye Yehova na Yona vha aravha ngayo musi honovhu vhuimo vhu tshi shanduka. Kha heḽi sia Yehova o tendelana na zwiimo, a vha Muhangweli wa zwivhi nṱhani ha u vha “Muhali ndwani.” * (Ekisodo 15:3) Kha ḽiṅwe sia, Yona ho ngo tendelana na zwiimo nahone o vha e si na tshilidzi. Nṱhani ha u edzisa u humbulela ha Yehova, o fana na tshidimela tshihulwane tsha u hwala thundu kana tshikepe tshihulwane tsha mathannga tsho bulwaho u thomani. O vha o ḓivhadza uri wonoyo muḓi u fheliswe, nga zwenezwo wo vha wo fanela u fheliswa! Naho zwo ralo, nga u sa fhela mbilu, Yehova o funza muporofita wawe a fhelaho mbilu ngudo ya ndeme ya u humbulela na tshilidzi.—Yona, ndima ya 4.
Yehova u a humbulela nahone u a pfesesa vhushayanungo hashu
19. (a) Ndi ngani ri tshi nga vha na vhungoho ha uri Yehova u a humbulela malugana na zwine a zwi lavhelela kha riṋe? (b) Mirero 19:17 i sumbedza hani uri Yehova ndi Muṋe “wa vhuḓi na a humbulelaho” nahone u a ḓiṱukufhadza vhukuma?
19 Tsha u fhedza, Yehova u a humbulela malugana na zwine a zwi lavhelela kha riṋe. Khosi Davida o ri: “Ngauri ndi Ene a ḓivhaho zwiné ra vha zwone, ha hangwi zwauri ri luruli.” (Psalme ya 103:14) Yehova u a pfesesa vhushayanungo hashu na u sa fhelela hashu u fhira nḓila ine riṋe ra pfesesa ngayo. Ha lavheleli zwinzhi kha riṋe u fhira zwine ra nga zwi ita. Bivhili i sumbedza phambano vhukati ha vhaṋe vha vhathu vha “vhuḓi na vha humbulelaho” (NW) na vhaṋe vhane vha ‘dzula vho sinyalala.’ (1 Petro 2:18) Yehova ndi Muṋe wa mufuda-ḓe? Ṱhogomelani zwine Mirero 19:17 ya zwi amba, i ri: “Mu-tonda-vhaṱoma o adzima Yehova; u ḓo mu fha zwe a ṋea vhaḽa.” Zwi khagala uri ndi muṋe wavhuḓi na a humbulelaho ane a ḓo ṱhogomela mishumo yoṱhe ya vhuthu i itelwaho vhaṱoma. Zwiṅwe hafhu, holu luṅwalo lu amba uri Musiki wa fhethu hoṱhe, u ḓidzhia a tshi koloda vhathu zwavho vhane vha ita yeneyo mishumo ya tshilidzi! Zwenezwi ndi u ḓiṱukufhadza huhulwane.
20. Ndi khwaṱhisedzo ifhio i re hone ya uri Yehova u a pfa thabelo dzashu nahone u a dzi fhindula?
20 Na ṋamusi Yehova u sumbedza u vuḓa na u humbulela musi a tshi shumisana na vhashumeli vhawe. Musi ri tshi rabela nga lutendo, u a thetshelesa. Naho a sa rumeli vhaḓinḓa vhawe vha vharuṅwa uri vha ambe na riṋe, ri songo humbula uri ha fhinduli thabelo dzashu. Humbulani uri musi muapostola Paulo a tshi humbela vhatendi ngae uri vha ‘rabele’ uri a vhofhololwe dzhele, o engedza a ri: “Uri ndi ṱavhanye u vhuyelela ha inwi.” (Vha-Heberu 13:18, 19) Ngauralo thabelo dzashu dzi nga sudzulusela Yehova uri a ite zwe a vha a sa ḓo zwi ita!—Yakobo 5:16.
21. Ndi mini zwine ra sa vhuye ra fanela u zwi humbula nga ha u ḓiṱukufhadza ha Yehova, fhedzi nṱhani hazwo, ndi mini zwine ra tea u zwi ṱhogomela nga hae?
21 Vhukuma, u ḓiṱukufhadza ha Yehova nga dzenedzi nḓila—u vuḓa hawe, u ḓiimisela hawe u thetshelesa, u sa fhela hawe mbilu, u humbulela hawe—a zwi ambi uri Yehova u landula maitele awe o lugaho. Vhafunzi vha ḽa Vhudzhagane vha nga humbula uri vha a humbulela musi vha tshi ṱhoṱhonisa nḓevhe dza masambi avho nga u dzhiela fhasi zwilinganyo zwa Yehova zwa matshilele. (2 Timotheo 4:3) Fhedzi nḓowelo ya vhathu ya u litshelela zwithu a i tshimbidzani na u humbulela ha Mudzimu. Yehova ndi mukhethwa; a nga si vhuye a tshinya zwilinganyo zwawe zwo lugaho. (Levitiko 11:44) Nga zwenezwo, kha ri fune u humbulela ha Yehova nga ṅwambo wa uri hu sumbedza uri u a ḓiṱukufhadza. Naa a ni takali musi ni tshi humbula uri Yehova Mudzimu, Muthu o ṱalifhaho u fhira vhoṱhe ḽifhasini ḽoṱhe, u a ḓiṱukufhadza nga nḓila i mangadzaho? Edzani u vhona uri zwi takadza lungafhani u sendela tsini na onoyu Mudzimu a ofhisaho, fhedzi o vuḓaho, a sa fheli mbilu, a humbulelaho!
^ phar. 3 Vhamaṅwalo vha kale, kana Vhasoferimi, vho shandula yeneyi ndimana vha ri ndi Yeremia o guguvhalaho, a si Yehova. Zwi vhonala uri vho vhona zwi songo tea u amba uri Mudzimu u a ḓiṱukufhadza. Nga ṅwambo wa zwenezwo, ṱhalutshedzelo nnzhi a dzi bviseli khagala mbuno yavhuḓi ya yeneyi ndimana. Naho zwo ralo, The New English Bible i amba nga ho teaho musi i tshi ri Yeremia o amba nga ha Mudzimu a ri: “Elekanya, elekanya, nahone u kotamele kha nṋe.”
^ phar. 7 Dziṅwe nzudzanyo dzi ri “u ḓiṱukufhadza hu bva kha vhuṱali” nahone “u vuḓa zwi sumbedza vhuṱali.”
^ phar. 12 Zwi takadzaho ndi uri Bivhili i fhambanya u sa fhela mbilu na u ḓikukumusa. (Muhuweleli 7:8) U sa fhela mbilu ha Yehova ndi vhuṅwe vhuṱanzi ha uri u a ḓiṱukufhadza.—2 Petro 3:9.
^ phar. 18 Kha Psalme ya 86:5, (NW) hu ambiwa uri Yehova “ndi wavhuḓi nahone o ḓiimisela u hangwela.” Musi yeneyo psalme i tshi ṱalutshedzelwa kha Lugerika, maipfi ane a ri “o ḓiimisela u hangwela” o ṱalutshedzelwa nga uri e·pi·ei·kes kana “humbulela.”
