Adamu na Eva vho vha vhe na vhana, nahone vhathu vha mbo ḓi thoma u anda kha ḽifhasi. Nga u ya ha tshifhinga, vhaṅwe vharuṅwa vha ṱanganela na Sathane kha vhushandukwa.

Vho ḓa kha ḽifhasi nahone vha ḓishandula vha vha na mivhili ya vhanna u itela uri vha kone u dzea vhasadzi. Vhenevho vhasadzi vho beba vhana vhe vha vha vha songo ḓowelea vha re na tshiṱuhu na maanḓa.

Shango ḽo mbo ḓi ḓala vhathu vhane vha ita zwithu zwivhi. Bivhili i ri: “Vhuvhi ha vhathu hó anda fhano shangoni, zwoṱhe zwiito na mihumbulo yavho zwí zwivhi fhedzi misi yoṱhe.”

Noaxe o vha e munna o lugaho. Yehova o vhudza Noaxe uri u ḓo fhelisa vhathu vhavhi nga maḓi mahulu.

Mudzimu o dovha a vhudza Noaxe uri a ite tshikepe tshihulwane, tshine tsha vhidzwa gungwa, nahone a dzhene ngomu na muṱa wawe na zwipuka zwa mifuda yoṱhe.

Noaxe o vhudza vhathu nga ha u ḓa ha Maḓi Mahulu, fhedzi a vho ngo thetshelesa. Vhaṅwe vho mu sea; vhaṅwe vho mu vhenga.

Musi gungwa ḽi tshi fhela, Noaxe o dzhenisa zwipuka nga ngomu.