1, 2. U rumiwa ha Baranaba na Saulo ho fhambana hani na ha vhaṅwe vharumiwa, nahone mushumo wavho wo vha u tshi ḓo thusa hani uri hu itee zwi re kha Mishumo 1:8?

 NDI ḓuvha ḽi takadzaho vhukuma kha tshivhidzo tsha Antiokia. Kha vhaporofita vhoṱhe na vhathu vhane vha funza mafhungo maḓifha, muya mukhethwa wo nanga Baranaba na Saulo uri vha ye u huwelela mafhungo maḓifha fhethu hu re kule. a (Mish. 13:1, 2) Ndi ngoho uri ho vha ho no ḓi rumiwa vhanna vha faneleaho uri vha ye u huwelela mafhungo maḓifha henefho fhethu. Fhedzi kanzhi vho vha vha tshi rumelwa fhethu he ha vha ho no vha na Vhakriste. (Mish. 8:14; 11:22) Fhedzi zwa zwino, Baranaba na Saulo, khathihi na muthusi wavho Yohane ane a pfi Marko, vha khou rumelwa mashangoni ane vhathu vhanzhi a vha athu u pfa mafhungo maḓifha.

² Miṅwahani i ṱoḓaho u vha 14 yo fhiraho, Yesu o vha o vhudza vhatevheli vhawe uri: “Ni ḓo vha ṱhanzi dzanga Yerusalema na kha ḽoṱhe ḽa Yudea na Samaria, u swika magumoni a ḽifhasi.” (Mish. 1:8) U rumiwa ha Baranaba na Saulo kha eneo mashango zwo vha zwi tshi ḓo thusa uri hu itee zwe Yesu a dzula o zwi amba. b

3. Ndi mini zwe zwa vha zwi tshi ita uri zwi konḓe u fara lwendo ḓanani ḽa u thoma ḽa miṅwaha?

³ Musalauno, vhathu vha a kona u fara lwendo lulapfu nga tshifhinga tshiṱuku ngauri hu na dzigoloi na mabufho. Fhedzi zwo vha zwi songo ralo ḓanani ḽa u thoma ḽa miṅwaha. Vhathu vho vha vha tshi tou tshimbila nga milenzhe nahone kanzhi bada dza hone dzo vha  dzi si dzavhuḓi. Zwo vha zwi tshi vha dzhiela ḓuvha ḽoṱhe u tshimbila khiḽomithara dza 30. Zwo vha zwi tshi netisa vhukuma. c Naho Baranaba na Saulo vho vha vho ḓiimisela u fara lwonolwo lwendo, vho vha vha tshi zwi ḓivha uri zwi ḓo ṱoḓa vhuḓidini na uri nga zwiṅwe zwifhinga zwo vha zwi sa ḓo leluwa na luthihi.​—Mat. 16:24.

4. (a) Ndi mini tsho livhisaho uri hu nangwe Baranaba na Saulo, nahone vhahavho vho ita mini? (b) Ri nga tikedza hani vhane vha ṋewa mishumo ndanguloni?

⁴ Ndi ngani muya mukhethwa wo nanga Baranaba na Saulo “uri vha ite mushumo”? (Mish. 13:2) Bivhili a i ri vhudzi. Zwine ra ḓivha ndi uri wo livhisa uri hu nangwe vhenevho vhanna. Vhaporofita na vhathu vhane vha funza ipfi ḽa Mudzimu vho ita zwoṱhe zwine vha nga kona u itela u tikedza vhenevho vhanna uri vha ite mushumo wavho. Humbulani nḓila ye Baranaba na Saulo vha nga vha vho ḓipfa ngayo musi vhahavho vha tshi ḓidzima zwiḽiwa, vha rabela, “vha vha vhea zwanḓa, vha vha litsha vha ṱuwa,” nṱhani ha u vha itela vivho. (Mish. 13:3) Na riṋe ri tea u tikedza vhane vha ṋewa mishumo ndanguloni, u katela na vhanna vho vhewaho sa vhahulwane zwivhidzoni. Nṱhani ha u vha itela vivho, ri tea uri ri “vha fune na u vha hulisa nga maanḓa nga nṱhani ha mushumo wavho.”​—1 Vhathes. 5:13.

5. Ṱalutshedzani uri zwo vha zwi hani u huwelela tshiṱangadzimeni tsha Kipiro.

⁵ Musi Baranaba na Saulo vha tshi swika Seleukia, vhuimazwikepe vhu re tsini na Antiokia, vho mbo ḓi ṋamela tshikepe vha ya Kipiro, hune ha vha lwendo lwa khiḽomithara dzi ṱoḓaho u vha 200. d Samusi Baranaba o vha a tshi bva Kipiro, a nga vha o takala nga maanḓa u vhudza vhathu vha henefho ipfi ḽa Mudzimu. Musi vhenevho vhanna vha tshi swika Salami, ḓoroboni i re vhubvaḓuvha ha tshenetsho tshiṱangadzime, a vho ngo lenga-lenga. Vho thoma u “ḓivhadza ipfi ḽa Mudzimu sinagogoni dza Vhayuda.” e (Mish. 13:5) Baranaba na Saulo vho tshimbila na ḽoṱhe ḽa Kipiro, khamusi vha tshi khou huwelela kha ḓorobo khulwane dza henefho. Vhenevho vharumiwa vha nga vha vho tshimbila khiḽomithara dzi ṱoḓaho u vha 220, zwi tshi ya nga nḓila dze vha dzi shumisa.

6, 7. (a) Seregio Paulosi o vha e nnyi, nahone ndi ngani Bara-Yesu o lingedza u mu thivhela uri a si thetshelese mafhungo maḓifha? (b) Saulo o ita mini uri a thivhele Bara-Yesu?

⁶ Ḓanani ḽa u thoma ḽa miṅwaha, vhathu vha Kipiro vho vha vha tshi gwadamela midzimu ya mazwifhi. Musi Baranaba na Saulo vha tshi swika Phafo, vhukovhela ha tshenetsho tshiṱangadzime, vho zwi ṱhogomela uri vhuimo ho vhifha lungafhani. Musi vhe henefho vho ṱangana na  “Bara-Yesu, we a vha e muloi, e muporofita wa mazwifhi.” Onoyo munna “o vha e na muvhusi wa vundu o ṱalifhaho ane a pfi Seregio Paulosi.” f Nga tshenetsho tshifhinga, Vharoma u katela na vhathu vho “ṱalifhaho” vha ngaho Seregio Paulosi, kanzhi vho vha vha tshi ya kha vhaloi kana vhaḓivhi vha dziṋaledzi uri vha thuswe u ita phetho dza ndeme. Naho zwo ralo, Seregio Paulosi o vha e na dzangalelo kha mafhungo maḓifha a Muvhuso nahone “o vha o ḓiimisela u pfa ipfi ḽa Mudzimu.” Zwenezwo a zwo ngo takadza Bara-Yesu, we a vha a tshi ḓivhiwa sa Elimasi, zwine zwa amba “muloi.”​—Mish. 13:6-8.

⁷ Bara-Yesu o vha a tshi pikisa mafhungo a Muvhuso wa Mudzimu. Nga nṱhani ha uri o vha a tshi ṱoḓa u bvela phanḓa a tshi langa Seregio Paulosi, o lingedza “u thivhela muvhusi wa vundu uri a si tende.” (Mish. 13:8) Fhedzi Saulo o vha a sa ḓo tendela Bara-Yesu wa muloi a tshi tshutshudza Seregio Paulosi. Zwino Saulo a ita mini? Bivhili i ri: “Saulo, ane a pfi Paulo, a ḓala muya mukhethwa a mu lavhelesa [Bara-Yesu] a ri: ‘Iwe munna wo ḓalaho vhukwila na vhuvhi hoṱhe, u murwa wa Diabolo, iwe swina ḽa zwithu zwoṱhe zwo lugaho, naa a u litshi u kombamisa nḓila dzo lugaho dza Yehova? Zwino tshanḓa tsha Yehova tshi ḓo lwa na iwe, u ḓo pofula, wa si tsha vhona tshedza tsha ḓuvha lwa tshifhinga tshilapfu.’  Nga u ṱavhanya a vhona khuli khulu na swiswi, a phuphuledza a tshi ṱoḓa ane a nga mu tshimbidza.” g Seregio Paulosi o ita mini musi a tshi vhona honovhu vhuṱolo? “Musi muvhusi wa vundu a tshi vhona zwe zwa itea, a tenda, nge a mangadzwa nga zwe a zwi guda nga ha Yehova.”​—Mish. 13:9-12.

8. Ri nga edzisa hani nḓila ye Paulo a sumbedza ngayo tshivhindi?

⁸ Paulo ho ngo tshuwiswa nga Bara-Yesu. Nga hu fanaho, musi vhapikisi vha tshi lingedza u tshutshudza muthu ane a takalela mafhungo maḓifha, ri tea u vha na tshivhindi ra imelela ngoho. Fhedzi, zwoṱhe zwine ra zwi amba ‘tshifhinga tshoṱhe ri zwi ambe nga vhuthu, zwi nge zwo shelwa muṋo.’ (Vhakol. 4:6) Ri tea u ita zwoṱhe zwine ra nga kona u itela u thusa muthu ane a takalela uri a bvele phanḓa a tshi guda nga ha Yehova naho zwi tshi nga sinyusa vhaṅwe vhathu. U fana na Bara-Yesu, vhurereli ha mazwifhi vhu lingedza “u kombamisa nḓila dzo lugaho dza Yehova.” Ndi ngazwo ri songo tea u ofha u amba zwithu zwi si zwavhuḓi zwine vha zwi amba na u zwi ita. (Mish. 13:10) Ri nga edzisa Paulo nga u amba ngoho nga tshivhindi ra thusa vhane vha ṱoḓa u guda zwo engedzeaho. Naho Mudzimu  a sa ri fhi maanḓa a u ita vhuṱolo u fana na Paulo, ri na vhungoho ha uri u shumisa muya wawe mukhethwa u thusa vha faneleaho uri vha ḓivhe ngoho.​—Yoh. 6:44.

9. Paulo na Baranaba vho vhetshela hani tsumbo yavhuḓi vhane vha vha na vhuḓifhinduleli tshivhidzoni ṋamusi?

⁹ Paulo, Baranaba na Marko vha bva Phafo vha tshimbila khiḽomithara dzi ṱoḓaho u vha 250 nga tshikepe vha ya Perege, hune ha vha khunzikhunzini ya Asia Minor. Nga murahu ha zwenezwi, muṅwali u shandula nḓila ine a ṱalusa ngayo vhenevha vhanna. Mishumo 13:13 i amba nga ha “Paulo na vhe a vha e navho.” Zwenezwi zwi nga amba uri Paulo o thoma u ranga phanḓa vhenevha vhanna. Fhedzi a hu na tshithu Bivhilini tshi sumbedzaho uri Baranaba o itela Paulo vivho. Paulo na Baranaba vho bvela phanḓa vha tshi shuma vhoṱhe u ita zwi funwaho nga Mudzimu. Vhenevha vhanna vho vhetshela tsumbo yavhuḓi vhanna vha re na vhuḓifhinduleli tshivhidzoni ṋamusi. A ri ṱoḓi u ḓiita vha ndeme u fhira vhaṅwe ngauri ri humbula maipfi a Yesu ane a ri: “Inwi noṱhe ni vharathu na vhakomana.” O dovha a ri: “Ane a ḓihudza u ḓo ṱukufhadzwa, ane a ḓiṱukufhadza u ḓo huliswa.”​—Mat. 23:8, 12.

10. Ṱalutshedzani uri lwendo lwa u bva Perege u ya Antiokia ngei Pisidia lwo vha lu hani.

¹⁰ Musi vha tshi swika Perege, Yohane ane a pfi Marko o ṱutshela Paulo na Baranaba a vhuyelela Yerusalema. Bivhili a i ambi uri ndi ngani o vha ṱutshela. Paulo na Baranaba vho bvela phanḓa na lwendo lwavho, vha bva Perege vha ya Antiokia ngei Pisidia, muḓi u re vunduni ḽa Galatia. Holu lwo vha lu lwendo lu konḓaho, sa izwi Antiokia ngei Pisidia ho vha hu mithara dza 1 100 nṱha ha lwanzhe. U swika henefho zwo vha zwi na khombo ngauri vho vha vha tshi tea u pfuka nga dzithavhani nahone ho vha hu tshi anzela u vha na dzimbava dzine dza ṱhasela vhathu. U engedza kha zwenezwo, zwi vhonala u nga Paulo o vha a tshi vho lwala. h

11, 12. Musi Paulo a tshi khou amba e sinagogoni Antiokia ngei Pisidia, o zwi itisa hani uri vhathetshelesi vhawe vha vhe na dzangalelo?

 ¹¹ Nga Savhatha, Paulo na Baranaba vho dzhena sinagogoni Antiokia ngei Pisidia. Bivhili i ri: “Musi vhahulwane vha sinagogo vho no vhala Mulayo na bugu dza Vhaporofita, vha rumela muthu uri a ambe navho a ri: ‘Vhahashu, arali hu na zwine na nga ri ṱuṱuwedza ngazwo, zwi ambeni.’” (Mish. 13:15) Paulo a takuwa a amba.

¹² Paulo o thoma nga u amba haya maipfi: “Inwi vhanna, Vhaisiraele na inwi ni ofhaho Mudzimu.” (Mish. 13:16) O vha a tshi khou amba na Vhayuda na vhathu vho rembulutshelaho kha vhurereli ha Tshiyuda. Vhathu vhe a vha a tshi khou amba navho vho vha vha sa athu u ṱanganedza Yesu sa Messia. Zwino, Paulo o zwi itisa hani uri vha vhe na dzangalelo? Paulo o thoma nga u amba nga ha zwe Yehova a zwi itela lushaka lwa Vhaisiraele. A ṱalutshedza nḓila ye Yehova “a vha hulisa musi vhe vhatsinda shangoni ḽa Egipita” na uri musi vho no vhofhololwa a “konḓelela zwiito zwavho ngei sogani” lwa miṅwaha ya 40. Paulo o dovha a amba nga ha nḓila ye Vhaisiraele vha dzhia ngayo Shango ḽo Fhulufhedziswaho na nḓila ye Yehova “a vha ṋea shango ḽa dzenedzo tshaka uri ḽi vhe ifa ḽavho.” (Mish. 13:17-19) Vhaṅwe vha amba uri Paulo o vha a tshi khou amba zwithu zwe vhathu vha zwi pfa musi hu tshi khou vhalwa Maṅwalo nga ḽeneḽo ḓuvha ḽa Savhatha. Arali zwenezwo zwi ngoho, zwi sumbedza uri Paulo o vha a tshi kona u “vha zwithu zwoṱhe kha vhathu vhoṱhe.”​—1 Vhakor. 9:22.

13. Ri nga ita hani uri vhathetshelesi vha takalele zwine ra zwi amba?

¹³ U fana na Paulo, na riṋe ri tea u amba nga nḓila ine ya ḓo ita uri vhathu  vha takalele zwine ra khou zwi amba. Sa tsumbo, arali ri tshi ḓivha zwine muthu a zwi tenda, ri nga amba nga ha zwine zwa vha zwa ndeme khae. Ri nga dovha ra vhala vese dzine a dzi ḓivha. Nga zwiṅwe zwifhinga, ndi zwavhuḓi u humbela onoyo muthu uri a vhale dzivese kha Bivhili yawe. Ri tea u humbula nḓila dzine ra nga ṱuṱuwedza ngadzo vhathetshelesi uri vha ṱoḓe u guda nga ha Yehova.

14. (a) Paulo o ita mini uri vhathu vha takalele mafhungo maḓifha nga ha Yesu, nahone o vha sevha a ri mini? (b) Vhathu vho ita mini musi Paulo a tshi fhedza u amba?

¹⁴ Musi Paulo a tshi bvela phanḓa, o ṱalutshedza uri mahosi a Isiraele ndi vhomakhulukuku vha Yesu. A ṱalutshedza na nḓila ye Yohane Mulovhedzi a lugisela ngayo vhathu uri vha ṱanganedze “mutshidzi, ane a vha Yesu.” O dovha a ṱalutshedza nḓila ye Yesu a vhulawa ngayo na nḓila ye a vuswa ngayo. (Mish. 13:20-37) Paulo o ri: “Vhahashu, ḓivhani uri ni khou ḓivhadzwa ḽa u hangwelwa zwivhi nga onoyu.  . . Vhoṱhe vhane vha tenda vha dzhiiwa vhe si na mulandu nga nṱhani hawe.” Muapostola o sevha vhathetshelesi vhawe a ri: “Ni ṱhogomele uri zwe zwa ambiwa buguni dza Vhaporofita zwi si itee kha inwi: ‘Inwi vhagoḓi, vhonani mushumo une nda khou ita misini yaṋu. Ni nga si vhuye na tenda uri ndo ita wonoyu mushumo naho muṅwe muthu a ni ṱalutshedza nga vhuḓalo. Fhedzi ni ḓo tou mangala na lovha.’” Paulo o vha a songo lavhelela zwe vhathu vha zwi ita musi a tshi fhedza u amba. Bivhili i ri: “Vhathu vha vha humbela uri vha ambe nga ha enea mafhungo nga Savhatha i tevhelaho.” Musi vhathu vho no balangana sinagogoni, “Vhayuda vhanzhi na vhathu vho rembulutshelaho kha vhurereli ha Tshiyuda vha gwadamelaho Mudzimu vha tevhela Paulo na Baranaba.”​—Mish. 13:38-43.

15. Ho itea mini sinagogoni nga Savhatha i tevhelaho?

¹⁵ Nga Savhatha i tevhelaho, “ha kuvhangana vhathu vhanzhi vha wonoyo muḓi” uri vha thetshelese Paulo. Zwenezwo a zwo ngo takadza vhaṅwe Vhayuda. Vho “sema Mudzimu nga u hanedza zwe zwa vha zwi tshi khou ambiwa nga Paulo.” Paulo na Baranaba vho amba navho nga tshivhindi vha ri: “Zwo vha zwo tea uri ipfi ḽa Mudzimu ḽi vhudzwe inwi u thoma. Fhedzi no ḽi landula, na vhona ni sa fanelei u wana vhutshilo vhu sa fheli. Ndi ngazwo ri tshi khou ya u huwelela kha dziṅwe tshaka. Ngauri Yehova o ri laya a ri: ‘Ndo u nanga uri u vhe tshedza tsha dzitshaka, uri u ḓivhadze u swika magumoni a ḽifhasi nga ha nḓila ine nda ḓo tshidza ngayo vhathu.’”​—Mish. 13:44-47; Yes. 49:6.

16. Vhayuda vho ita mini musi vha tshi pfa zwe Paulo na Baranaba vha zwi amba, nahone vha ita mini musi Vhayuda vha tshi vha posela nnḓa ha muḓi?

¹⁶ Vhathu vha dziṅwe tshaka vho takalela zwe vha zwi pfa nahone “vhoṱhe vho ḓiimiselaho u wana vhutshilo vhu sa fheli vha tenda.” (Mish. 13:48) Ipfi ḽa Yehova ḽa ṱavhanya ḽa phaḓalala kha ḽeneḽo shango. Vhayuda vhone a vho ngo vhuya vha zwi takalela na luthihi. Paulo na Baranaba vho vhudza vhenevho Vhayuda uri naho ipfi ḽa Mudzimu ḽo thoma u vhudzwa vhone, vho landula Messia nahone ndi ngazwo Mudzimu a tshi ḓo vha haṱula. Vhayuda vha susumedza vhafumakadzi vha vhuimo ha nṱha na vharangaphanḓa vha wonoyo muḓi uri “vha tovhole Paulo na Baranaba na u vha posela nnḓa ha muḓi.” Zwino, Paulo na Baranaba vha ita mini? Vho “fhufhura buse ḽi re milenzheni yavho uri zwi vhe vhuṱanzi khavho, vha ya Ikonio.” Naa zwenezwo zwo vha zwi tshi amba uri a ho ngo tsha vha na Vhakriste Antiokia ngei Pisidia? Hai! Vhafunziwa vho salaho henefho vho “bvela phanḓa vho takala vho ḓala muya mukhethwa.”​—Mish. 13:50-52.

17-19. Ri nga edzisa hani tsumbo yavhuḓi ya Paulo na Baranaba nahone zwi nga ita hani uri ri dzule ro takala?

¹⁷ Ri nga guda zwithu zwa ndeme kha tsumbo ya vhenevha vhafunziwa vhe vha bvela phanḓa vho takala naho vha tshi khou tovholwa. A ri litshi u huwelela naho vharangaphanḓa vha ḽino shango vha tshi lingedza u ri thivhela u amba nga ha Muvhuso wa Mudzimu. Ṱhogomelani uri Paulo na Baranaba vho “fhufhura buse ḽi re milenzheni yavho” musi vhathu vha Antiokia vha tshi hana u ṱanganedza mulaedza wavho. Zwenezwo zwo vha zwi sa ambi uri vho vha vho sinyutshela vhenevho vhadzulapo. Nṱhani hazwo, vho vha vha tshi khou sumbedza uri a vha nga hwali vhuḓifhinduleli ha zwine zwa ḓo itea kha vhenevho vhathu. Vho zwi ṱhogomela uri vha nga si kombetshedze vhathu u tenda Yesu. Zwe vha vha vha tshi nga zwi ita ndi u bvela phanḓa vha tshi huwelela. Ndi ngazwo vho ṱuwa vha ya Ikonio vha bvela phanḓa vha tshi huwelela.

¹⁸ Hu pfi mini nga vhafunziwa vho salaho ngei Antiokia? Naho vho vha vha tshi khou dzula vhukati ha vhathu vhane vha khou vha tovhola, u takala havho zwo vha zwi songo ḓitika nga uri ndi vhathu vhangana vhane vha ḓo ṱanganedza mulaedza. Yesu o ri: “Hu takala vhane vha pfa ipfi ḽa Mudzimu, vha tevhedza zwine ḽa amba!” (Luka 11:28) Zwenezwo ndi zwe vhafunziwa vha Antiokia ngei Pisidia vha vha vho ḓiimisela u zwi ita.

¹⁹ U fana na Paulo na Baranaba, ri tea u dzula ri tshi humbula uri vhuḓifhinduleli hashu ndi u huwelela mafhungo maḓifha. Vhathu vhone vhaṋe vha ḓo tou ḓikhethela u thetshelesa kana u sa thetshelesa. Arali vhane ra huwelela khavho vha sa ṱanganedzi mulaedza, ri nga edzisa tsumbo ya Vhakriste vha ḓanani ḽa u thoma ḽa miṅwaha. Arali ra humbula nḓila ine mafhungo maḓifha a vha a ndeme ngayo, ra tendela Mudzimu a tshi ri livhisa nga muya wawe, na riṋe ri nga takala naho ri tshi khou tovholwa.​—Vhagal. 5:18, 22.