1-3. (a) Ndi mini tshe tsha ṱoḓa u thithisa vhuthihi ha tshivhidzo tsha Vhakriste vha u thoma? (b) Ri nga vhuyelwa hani nga u guda enea mafhungo a re kha bugu ya Mishumo?

 PAULO na Baranaba vho takala. Vha kha ḓi tou bva u vhuya Siria ngei Antiokia kha lwendo lwavho lwa u thoma lwa vhurumiwa. Vho takala ngauri “Yehova o thusa dzitshaka uri dzi mu tende.” (Mish. 14:26, 27) Mafhungo maḓifha o huwelelwa kha ḽoṱhe ḽa Antiokia nahone “vhathu vhanzhi” vha dzitshaka vho no vha Vhakriste.​—Mish. 11:20-26.

² Mafhungo a uri hu na vhathu vhane vha kha ḓi tou bva u lovhedzwa a swika nḓevheni dza vhathu vha re Yudea. Fhedzi vhaṅwe a vho ngo takadzwa nga eneo mafhungo. Vhaṅwe vha na mavhonele a uri Vhakriste vhoṱhe vha tea u fumba, ngeno vhaṅwe vha sa tendelani nao. Vhakriste vha Vhayuda na Vhakriste vha dzitshaka vho vha vha tshi ḓo farana hani? Naa ndi khombe-khombe uri Vhakriste vha dzitshaka vha tevhedze Mulayo wa Mushe? Ḽeneḽi fhungo ḽi konḓaho ḽo ṱoḓou ita uri tshivhidzo tshi fhandekane. Zwino ḽo vha ḽi tshi ḓo lugiswa hani?

³ Musi ri tshi guda enea mafhungo a re kha bugu ya Mishumo, ri ḓo wana ngudo nnzhi dza ndeme. Dzenedzi ngudo dzi ḓo ri thusa uri ri bvele phanḓa ri na vhuthihi naho ha nga vha na vhuimo vhune ha ṱoḓa u thithisa vhuthihi hashu.

4. Vhaṅwe Vhakriste vha Vhayuda vho vha vha tshi humbula mini, nahone zwenezwo zwi ita uri ri ḓivhudzise mbudziso ifhio?

⁴ Mufunziwa Luka o ṅwala uri: “Ha ḓa vhaṅwe vhanna vha bvaho Yudea, vha funza vhahavho vha ri: ‘Arali na sa fumba u ya nga Mulayo wa Mushe, ni nga si tshidzwe.’” (Mish. 15:1) A ri ḓivhi arali vhenevho “vhanna vha bvaho Yudea” vho vha vhe Vhafarisei vha sa athu u vha Vhakriste. Fhedzi, hu sa londwi uri zwi re zwone ndi zwifhio, zwi vhonala u nga vhenevho vhanna vho vha vha tshi kha ḓi humbula u fana na Vhafarisei vhe vha vha vha tshi kaludza musi  zwi tshi ḓa kha u tevhedza Mulayo. Vha nga vha vho ita na u zwifha vha amba uri zwine vha khou zwi amba zwi khou bva kha vhaapostola na vhahulwane ngei Yerusalema. (Mish. 15:23, 24) Zwine zwa si pfale ndi uri ndi ngani vhenevho Vhakriste vha Vhayuda vho vha vha tshi kha ḓi humbula uri u fumba ndi zwa ndeme ngeno ho vha ho no fhela miṅwaha i ṱoḓaho u vha 13 Mudzimu o zwi bvisela khagala kha Petro uri vhathu vha dziṅwe tshaka na vhone vho ṱanganedzwa tshivhidzoni tsha Vhukriste. a​—Mish. 10:24-29, 44-48.

5, 6.(a) Ndi mini zwine zwa nga vha zwo ita uri vhaṅwe Vhakriste vha Vhayuda vha tende uri u fumba zwi kha ḓi vha zwa ndeme? (b) Naa mulanga wa u fumba wo vha u tshipiḓa tsha mulanga wa Abrahamu? Ṱalutshedzani. (Vhalani ṱhaluso i re magumoni a siaṱari.)

⁵ Hu nga vha ho vha na zwiitisi zwo vhalaho. Tshiṅwe tshazwo ndi uri ndi Yehova we a vhudza vhathu uri vha fumbe nahone u fumba zwo vha zwi tshi amba uri muthu u na vhushaka ho khetheaho na Yehova. O vhudza Abrahamu na vhanna vhe a vha a tshi dzula navho uri vha tea u fumbiswa nahone nga murahu a vhudza na Vhaisiraele uri vha ite zwi fanaho. b (Lev. 12:2, 3) Mulayo wa Mushe wo vha u tshi amba uri na vhatsinda vha tea u fumbiswa vha sa athu u wana dziṅwe ndugelo dzi ngaho u ḽa Paseka. (Ek. 12:43, 44, 48, 49) Vhayuda vho vha vha tshi dzhia munna a songo fumbaho sa a re na tshika, a sa fanelei u shumela Mudzimu.​—Yes. 52:1.

⁶ Vhayuda vhe vha vha Vhakriste vho vha vha tshi tea u vha na lutendo na u ḓiṱukufhadza uri vha shandule nḓila ine vha humbula ngayo uri i fane na ya Yehova. Mulanga wa Mulayo wo mbo ḓi dzhielwa vhudzulo nga mulanga muswa, zwe zwa vha zwi tshi amba uri u bebwa ha muthu e Muyuda a zwi ambi uri u mushumeli wa Mudzimu. Vhakriste vhanzhi vha Vhayuda vho vha vha kha ḓi dzula na Vhayuda. Ndi ngazwo zwo vha zwi tshi ṱoḓea uri vha vhe na tshivhindi uri vha tevhele Kristo na uri vha gwadamele Mudzimu na vha dziṅwe tshaka vhe vha vha vha songo fumbiswa.​—Yer. 31:31-33; Luka 22:20.

7. “Vhanna vha bvaho Yudea” vho kundelwa u pfesesa mini?

⁷ Ri a zwi ḓivha uri Mudzimu ho ngo shanduka ngauri zwiṅwe zwa zwithu zwine zwa wanala kha Mulayo wa Mushe zwi a wanala na kha mulanga muswa. (Mat. 22:36-40) Sa tsumbo, Paulo o ṅwala zwi tevhelaho nga ha u fumba: “Ndi ane a vha Muyuda nga ngomu, u fumba hawe ndi ha mbiluni, a ho ngo ṅwaliwa mulayoni.” (Vharoma 2:29; Dot. 10:16) “Vhanna vha bvaho  Yudea” vho vha vha sa zwi pfesesi. Vho vha vha tshee vho farelela kha ḽa uri Yehova u kha ḓi ṱoḓa vhathu vhawe vha tshi fumba. Naa vho vha vha tshi ḓo tenda u shandula nḓila ine vha humbula ngayo?

8. Ndi ngani mafhungo a u fumba o iswa kha tshigwada tshi langaho ngei Yerusalema?

⁸ Luka o dovha a ri: “Paulo na Baranaba vha hanedzana na u ṱaṱa khani navho [vhanna “vha bvaho Yudea”], ha dzudzanywa uri Paulo na Baranaba na vhaṅwe vha ye Yerusalema kha vhaapostola na vhahulwane uri vha ye u amba nga ha eneo mafhungo.” c (Mish. 15:2) Vho “hanedzana na u ṱaṱa khani” ngauri vho vha vha tshi pfa u nga zwine vha khou amba ndi zwone. Tshivhidzo tsha Antiokia tsho kundelwa u lugisa enea mafhungo. Tshivhidzo tsha zwi ṱalifhela tsha vhona uri, u itela uri hu vhe na mulalo na vhuthihi, ndi khwine vha tshi isa ḽeneḽi fhungo “Yerusalema kha vhaapostola na vhahulwane” vhe vha vha vhe tshigwada tshi langaho. Ri nga guda mini kha vhahulwane vha Antiokia?

9, 10. Vhakriste vha ngei Antiokia, u katela na Paulo na Baranaba, vho ri vhetshela hani tsumbo yavhuḓi ṋamusi?

⁹ Ri guda ngudo ya ndeme ya uri ri tea u fhulufhela ndangulo ya Mudzimu. Humbulani hezwi: Vhakriste vha ngei Antiokia vho vha vha tshi zwi ḓivha uri tshigwada tshi langaho tsha tshifhinga tshenetsho tsho vha tsho vhumbwa nga Vhakriste vha Vhayuda. Fhedzi vho fhulufhela uri tshenetsho tshigwada tsho vha tshi tshi ḓo lugisa mafhungo a u fumba u tendelana na Maṅwalo. Ndi ngani? Tshivhidzo tsho vha tshi tshi fhulufhela uri Yehova u ḓo dzudzanya mafhungo a tshi shumisa muya wawe mukhethwa na Yesu Kristo ane a vha Ṱhoho ya tshivhidzo tsha Vhukriste. (Mat. 28:18, 20; Vhaef. 1:22, 23) Nga hu fanaho ṋamusi, musi hu tshi vha na mafhungo a konḓaho, kha ri edzise tsumbo yavhuḓi ya Vhakriste vha Antiokia nga u fhulufhela ndangulo ya Mudzimu na Tshigwada tshi Langaho tsha Vhakriste vho ḓodzwaho.

¹⁰ Ri dovha ra guda uri ndi zwa ndeme u ḓiṱukufhadza na u sa fhela mbilu. Paulo na Baranaba vho vha vho nangiwa nga muya mukhethwa uri vha ye kha dzitshaka, fhedzi a vho ngo humbula uri zwo vha ṋea maanḓa a u ita phetho kha mafhungo a u fumba vhe ngei Antiokia. (Mish. 13:2, 3) Zwiṅwe hafhu, u sumbedza uri Paulo o vha a tshi livhiswa nga muya mukhethwa, o dovha a ṅwala uri: “Ndo vhuyelela henefho [Yerusalema] ngauri ndo vha ndo dzumbululelwa.” (Vhagal. 2:2) Na vhahulwane ṋamusi vha a ḓiṱukufhadza na u sa fhela mbilu musi hu tshi vha na zwithu zwine zwa nga thithisa vhuthihi na mulalo tshivhidzoni. Nṱhani ha u ṱaṱa khani,  vha ṱoḓa u ḓivha nḓila ine Yehova a dzhia ngayo zwithu nga u sedza Maṅwalo na u ṱoḓa vhulivhisi vhu bvaho kha mulanda a fhulufhedzeaho.​—Vhafil. 2:2, 3.

11, 12. Ndi ngani zwi zwa ndeme u lindela Yehova ri sa fheli mbilu?

¹¹ Nga zwiṅwe zwifhinga, ri tea u lindela Yehova uri a ri thuse u pfesesa khwine maṅwe mafhungo. Sa tsumbo, u bva tshifhinga tshee Koronelio a ḓodzwa, zwo dzhia miṅwaha ya 13 uri Yehova a zwi bvisele khagala kha vhathu vhoṱhe uri vhathu vha dzitshaka a vho ngo tea u fumbiswa. Ndi ngani zwo dzhia tshifhinga tshilapfu ngaurali? Khamusi Mudzimu o vha a tshi khou ṱoḓa u ṋea Vhakriste vha Vhayuda tshifhinga tsho eḓanaho uri vha shandule nḓila ine vha humbula ngayo i tendelane na yawe. Vho vha vha tshi tea u ita tshanduko khulwane nga maanḓa ngauri mulanga wa u fumbiswa we Yehova a u ita na Abrahamu we vha vha vha tshi mu funa na u mu ṱhonifha nga maanḓa, wo vha wo no fhedza miṅwaha ya 1 900 u hone.​—Yoh. 16:12.

¹² Ndi ndugelo yavhuḓi lungafhani uri Yehova u khou ri gudisa a sa fheli mbilu uri ri humbule na u dzhia zwithu nga nḓila ine a zwi dzhia ngayo. Zwine a ri gudisa zwi vhuyedza riṋe tshifhinga tshoṱhe. (Yes. 48:17, 18; 64:8) A ro ngo tea u ḓihudza ra humbula uri nḓila ine ra humbula ngayo ndi yone ya khwine. Ri tea u dovha ra iledza u sasaladza ndangulo musi i tshi ita tshanduko kana i tshi khwinisa nḓila ine ra pfesesa ngayo zwiṅwe zwithu. (Muh. 7:8) Arali na thoma u ḓipfa nga yeneyo nḓila, ni nga elekanya nga ngudo dzi re kha Mishumo ndima 15 nahone na humbela Yehova uri a ni thuse u shumisa dzenedzo ngudo. d

13. Ri nga edzisa hani u sa fhela mbilu ha Yehova musi ri vhuḓinḓani?

 ¹³ Ri tea u edzisa u sa fhela mbilu ha Yehova musi vhagudiswa vhashu vha Bivhili vha tshi wana zwi tshi vha konḓela u shandula zwiṅwe zwine vha zwi tenda zwo khakheaho kana u litsha miṅwe mikhuvha ya vhurereli. Ri bvela phanḓa ri tshi vha thusa ri sa fheli mbilu, ro lindela u vhona arali vha tshi ḓo tendela muya wa Mudzimu u tshi vha thusa u ita tshanduko dzi ṱoḓeaho. (1 Vhakor. 3:6, 7) Ri nga tea u dovha ra rabelela vhagudiswa vhashu. Yehova u ḓo fhedzisela o bvisela khagala nḓila ya khwine ine ra nga vha thusa ngayo.​—1 Yoh. 5:14.

14, 15. Tshivhidzo tsha Antiokia tsho hulisa hani Paulo, Baranaba na vhe vha vha vha tshi khou tshimbila navho, nahone u vha hone havho zwo ṱuṱuwedza hani Vhakriste ngavho?

¹⁴ Luka o dovha a ri: “Musi vho no fhelekedzwa nga tshivhidzo, vhenevho vhanna vha pfuka nga Fenikia na Samaria, vha tshi ṱalutshedza nga vhuḓalo uri vhathu vha dzitshaka vha khou gwadamela Mudzimu, zwenezwo zwa takadza vhahavho vhoṱhe.” (Mish. 15:3) Tshivhidzo tsho fhelekedza Paulo, Baranaba na vhe vha vha vha tshi khou tshimbila navho. Zwenezwi zwo sumbedza uri vha a vha funa na u vha hulisa nahone zwa dovha zwa sumbedza uri vho vha vha tshi khou ṱoḓa uri vha wane phaṱhutshedzo dzi bvaho kha Mudzimu. Yeneyi ndi tsumbo yavhuḓi ye Vhakriste vha Antiokia vha ri vhetshela yone. Naa ni a hulisa vhahaṋu vha Vhakriste “zwihuluhulu [vhahulwane] vhane vha shuma nga maanḓa kha u amba na u funza”?—1 Tim. 5:17.

¹⁵ Musi vhe nḓilani ya u ya Yerusalema, Paulo na vhe a vha a tshi khou tshimbila navho vho ṱuṱuwedza Vhakriste vha ngei Fenikia na Samaria nga u vha ṱalutshedza “nga vhuḓalo,” nga ha vhaṅwe vhathu vhanzhi vha dziṅwe tshaka vhe vha vha vha tshi khou vha Vhakriste. Kha vhe vha vha vho thetshelesa, hu nga vha ho vha hu na Vhakriste vha Vhayuda vhe vha shavhela henefho nga murahu ha u vhulawa ha Stefano. Nga hu fanaho ṋamusi, zwi a ri ṱuṱuwedza musi ri tshi pfa nga ha nḓila ine Yehova a khou fhaṱutshedza ngayo mushumo wa u ita vhafunziwa, zwihuluhulu musi ri tshi khou ṱangana na milingo. Ngauralo, itani zwoṱhe zwine na nga kona uri ni si xelelwe nga dzenedzi tshenzhelo dzi ṱuṱuwedzaho nga u vha hone miṱanganoni, maguvhanganoni na mabuthanoni na nga u vhala nganeavhutshilo dzi re kha khandiso dzashu kana kha jw.org.

16. Ndi mini zwe zwa sumbedza uri fhungo ḽa u fumba ḽo vha ḽo no vha thaidzo khulwane?

¹⁶ Musi vho no tshimbila khilomithara dzi ṱoḓaho u vha 550, Vhakriste vha bvaho ngei Antiokia vho fhedzisela vho swika he vha vha vha tshi khou ya hone. Luka o ṅwala uri: “Vha tshi swika Yerusalema vha ṱanganedzwa  zwavhuḓi nga tshivhidzo, nga vhaapostola na nga vhahulwane, vha vha vhudza zwithu zwinzhi zwe Mudzimu a vha thusa uri vha zwi ite.” (Mish. 15:4) Fhedzi musi vha tshi fhindula, “vhaṅwe vha tshigwada tsha Vhafarisei vho tendaho, vha takuwa vha ri: ‘Zwo tea uri vha fumbiswe na u vhudzwa uri vha tevhedze Mulayo wa Mushe.’” (Mish. 15:5) Zwenezwi zwo vha zwi tshi khou sumbedza uri fhungo ḽa u fumbiswa ha Vhakriste vha dziṅwe tshaka ḽo vha ḽi tshi kha ḓi gogona nahone ḽi tshi tea u lugiswa.

17. Ndi vhonnyi vhe vha vha vhe kha tshigwada tshi langaho ngei Yerusalema, nahone ndi ngani “vhahulwane” vho vha vhe tshipiḓa tshatsho?

¹⁷ Mirero 13:10 i ri: “Vhuṱali ndi ha vhane vha ṱoḓa nyeletshedzo.” U tendelana na eneo maipfi, “vhaapostola na vhahulwane vha kuvhangana u itela u dzudzanya eneo mafhungo [a u fumba].” (Mish. 15:6) U fana na zwine zwa itwa nga Tshigwada Tshi Langaho ṋamusi, “vhaapostola na vhahulwane,” vho dzhia phetho dzine dza kwama zwivhidzo zwoṱhe. Ndi ngani “vhahulwane” vho vha vha tshi khou shumisana na vhaapostola? Ni songo hangwa uri muapostola Yakobo o vha o no vhulawa nahone lwa tshifhinganyana muapostola Petro o vha o valelwa dzhele. Naa zwithu zwi fanaho zwo vha zwi tshi nga itea kha vhaṅwe vhaapostola? U vha hone ha vhenevha vhanna vho ḓodzwaho vhane vha fanelea, zwo vha zwi tshi ḓo thusa uri vha kone u bvela phanḓa vha tshi khou livhisa mushumo wa u huwelela.

18, 19. Ndi zwifhio zwe Petro a zwi amba, nahone zwi nga vha zwo ita uri vhe vha mu thetshelesa vha swikelele phetho ifhio?

¹⁸ Musi Luka a tshi bvela phanḓa o ri: “Musi vho no haseledza lwa tshifhinga tshilapfu, Petro a takuwa a ri: ‘Vhahashu, ni a zwi ḓivha zwavhuḓi uri ndi kale Mudzimu o nnanga vhukati haṋu uri ndi vhudze dzitshaka mafhungo maḓifha uri dzi tende. Mudzimu ane a ḓivha mbilu, o sumbedza uri o vha ṱanganedza nga u vha ṋea muya mukhethwa u fana na riṋe. O sumbedza uri u vhona riṋe na vhane vha si vhe Vhayuda nga nḓila i fanaho nga u vha ṱanzwa mbilu ngauri vha na lutendo.’” (Mish. 15:7-9) U ya nga  iṅwe bugu, ipfi ḽa Tshigerika ḽo ṱalutshedzelwaho ngauri “haseledza” ḽi re kha vese 7 ḽi sumbedza uri vhahulwane vho vhudzisana mbudziso nahone vha ṱolisisa ḽeneḽo fhungo nga vhuronwane. Naho vho vha vha sa pfesesi zwithu nga nḓila i fanaho, vho vha vho ḓiimisela u amba nga ḽeneḽi fhungo na u ṱahisa vhupfiwa havho vho vhofholowa.

¹⁹ Petro o humbudza vhe vha vha vho mu thetshelesa uri o vha e hone musi vhathu vha u thoma vha dzitshaka vha songo fumbiswaho, vhane vha vha Koronelio na muṱa wawe vha tshi ḓodzwa nga muya mukhethwa nga ṅwaha wa 36 C.E. Arali Yehova a tshi dzhia muthu a re Muyuda na ane a si vhe Muyuda vha tshi fana, ndi ngani vhathu vha tshi nga vha dzhia nga nḓila i sa fani na yeneyo? Zwiṅwe hafhu, Yehova u dzhia muthu o luga ngauri a vha na lutendo kha Kristo hu si nga u tevhedza Mulayo wa Mushe.​—Vhagal. 2:16.

20. Vhe vha vha vha tshi khou ṱoḓa vhathu vha tshi fumbiswa vho vha vha tshi khou “linga Mudzimu” nga nḓila-ḓe?

²⁰ U tendelana na zwe Mudzimu a zwi amba na nḓila ye a vha a tshi khou shumisa ngayo muya wawe mukhethwa, Petro o phetha nga u ri: “Zwino ndi ngani ni tshi linga Mudzimu nga u hwesa vhafunziwa dzhogo kha mitsinga ye riṋe na vhomakhulukuku washu ri si kone u i hwala? Samusi ri tshi ḓo tshidzwa, ri tenda uri navho vha ḓo tshidzwa nga nṱhani ha vhuthu vhuhulu ha Murena Yesu.” (Mish. 15:10, 11) Vhe vha vha vha tshi khou ṱoḓa uri vhathu vha fumbiswe, zwi tou nga vho vha vha tshi khou “linga Mudzimu” kana u linga u sa fhela hawe mbilu. Vho vha vha tshi khou kombetshedza vha dziṅwe tshaka uri vha tevhedze Mulayo ngeno vhone vhane vho kundelwa u u tevhedza nga vhuḓalo, zwa ita uri vha semiwe. (Vhagal. 3:10) Nṱhani hazwo, vhenevho Vhayuda vhe vha vha vho thetshelesa musi Petro a tshi amba vho vha vho tea u livhuwa vhuthu vhuhulu he Yehova a vha sumbedza a tshi shumisa Yesu.

21. Ndi zwifhio zwe Paulo na Baranaba vha zwi amba zwe zwa thusa vhenevho Vhakriste uri vha ite phetho yavhuḓi?

²¹ Zwi tou pfala uri zwe Petro a amba zwo kwama mbilu dza vhenevho vhathu ngauri ‘vhathu vhoṱhe vho fhumula.’ Nga murahu ha zwenezwo Baranaba na Paulo vho vha vhudza “zwithu zwi mangadzaho na vhuṱolo vhunzhi he Mudzimu a vhu ita kha dzitshaka a tshi shumisa vhone.” (Mish. 15:12) Zwino vhaapostola na vhahulwane vho vha vhe kha vhuimo havhuḓi ha u ṱolisisa vhuṱanzi hoṱhe na u ita phetho i tshimbidzanaho na nḓila ine Mudzimu a dzhia ngayo zwithu zwi tshi ḓa kha mafhungo a u fumba.

22-24. (a) Tshigwada Tshi Langaho ṋamusi tshi edzisa hani tsumbo ya tshigwada tshi langaho tsha ḓanani ḽa u thoma? (b) Vhahulwane vha sumbedza hani uri vha dzudzanya zwithu nga nḓila ine Yehova a ṱoḓa?

²² Nga hu fanaho ṋamusi, musi miraḓo ya Tshigwada Tshi Langaho i tshi ṱangana, vha ṱolisisa Ipfi ḽa Mudzimu u itela u wana vhulivhisi nahone vha rabela zwi tshi bva mbiluni vha tshi humbela muya mukhethwa. (Ps. 119:105; Mat. 7:7-11) U itela uri vha ite phetho dzine dza tshimbidzana na nḓila ine Mudzimu a dzhia ngayo zwithu, muraḓo muṅwe na muṅwe wa Tshigwada Tshi Langaho u rumelwa hu tshee nga phanḓa zwine zwa ḓo haseledzwa muṱanganoni u itela uri a kone u humbulisisa na u rabela nga zwine zwa ḓo ambiwa. (Mir. 15:28) Musi vhenevha vhahashu vho dodzwaho vho fara wonoyo muṱangano vha amba vho vhofholowa na nga ṱhonifho. Hu shumisiwa Bivhili nga maanḓa kha yeneyo miṱangano.

²³ Vhahulwane vha tshivhidzo navho vha tea u edzisa yeneyi tsumbo. Arali nga murahu ha u amba fhungo ḽa ndeme vha sa ḓivhi uri vha nga ḽi dzudzanya hani, vha nga ṱoḓa vhulivhisi ofisini ya davhi kana kha vhaimeleli vhayo vha ngaho vhalavhelesi vha ḽiisela. Ofisi ya davhi i nga ṅwalela Tshigwada Tshi Langaho arali zwi tshi ṱoḓea.

²⁴ Yehova u fhaṱutshedza vhoṱhe vhane vha tevhedza vhulivhisi vhu bvaho ndanguloni yawe na tshivhidzoni. U dovha a fhaṱutshedza vhoṱhe vhane vha ḓiṱukufhadza, u fhulufhedzea na u sa fhela mbilu. Samusi ri tshi ḓo zwi vhona kha ndima i tevhelaho, arali ra ita zwenezwo, Yehova u ḓo ri ṋea mulalo na vhuthihi a ita uri tshivhidzo tshi aluwe.