1-3. (a) Stefano u kha vhuimo vhufhio vhu ofhisaho, fhedzi u ita mini? (b) Ri ḓo fhindula mbudziso dzifhio?

 STEFANO o ima phanḓa ha khothe. Vhanna vha 71 vho kuvhangana holoni khulwane ine khamusi ya vha tsini na thembele ya Yerusalema. Yeneyi khothe ya Sanihedrini yo kuvhangana ṋamusi u itela u haṱula Stefano. Vhenevha vhahaṱuli a si vhathu zwavho, fhedzi ndi vhanna vha re na maanḓa nahone vhunzhi havho a vha ṱhonifhi onoyu mufunziwa wa Yesu. Vhenevho vhanna vho kuvhanganywa nga Tshifhe Muhulu, Kayafa, we a vha o ranga phanḓa yeneyo khothe ya Sanihedrini musi Yesu Kristo a tshi haṱulelwa lufu miṅwedzini yo fhiraho. Naa Stefano o tshuwa?

² Tshifhaṱuwo tsha Stefano tshi nga iṅwe nḓila i songo ḓoweleaho. Musi vhahaṱuli vha tshi mu lavhelesa, vho vhona tshifhaṱuwo tshawe tshi “tshi nga tsha muruṅwa.” (Mish. 6:15) Vharuṅwa vha ḓivhadza mulaedza u bvaho kha Yehova Mudzimu. Ndi ngazwo vhe na tshivhindi nahone vho dzika. Zwo tou ralo na nga Stefano, na vhenevho vhahaṱuli vhane vha mu vhenga nga maanḓa, vha khou zwi vhona. Zwi ḓa hani uri a dzike nga u rali?

³ Vhakriste ṋamusi vha nga guda zwinzhi kha phindulo ya yeneyo mbudziso. Na riṋe ri a ṱoḓa u ḓivha uri zwo ḓa hani uri Stefano a ḓiwane e kha honoho vhuimo. O imelela hani zwe a vha a tshi zwi tenda tshifhingani tsho fhiraho? Ri nga mu edzisa hani?

4, 5. (a) Ndi ngani Stefano o vha e wa ndeme tshivhidzoni? (b) Stefano o vha a tshi “takalelwa vhukuma nga Mudzimu [nahone] e na maanḓa” nga nḓila-ḓe?

⁴ Ro no ḓi guda uri Stefano o vha e mufunziwa wa ndeme kha tshenetsho tshivhidzo tsha Vhakriste tshe tsha vha tshi kha ḓi tou bva u  thoma. Kha ndima yo fhiraho ya ino bugu, ro zwi vhona uri Stefano o vha e muṅwe wa vhanna vha sumbe vha ḓiṱukufhadzaho vho ḓiimiselaho u thusa vhaapostola. Zwi a ri mangadza u vhona nḓila ine a ḓiṱukufhadza ngayo. Nga mannda-mannḓa musi ri tshi humbula uri Mudzimu o vha o mu fhaṱutshedza nga zwifhiwa zwinzhi. Kha Mishumo 6:8, ri vhala uri o vha a tshi kona u ita “zwithu zwihulu zwi mangadzaho na vhuṱolo,” u fana na vhaṅwe vhaapostola. Ri dovha ra vhudzwa uri o vha a tshi “takalelwa vhukuma nga Mudzimu, e na maanḓa.” Zwenezwo zwo vha zwi tshi amba mini?

⁵ Ipfi ḽa Tshigerika ḽine ḽa ri u “takalelwa vhukuma nga Mudzimu,” ḽi nga dovha ḽa ṱalutshedzelwa nga uri “vhuthu vhuhulu”. Zwi tou pfala uri Stefano o vha e na vhuthu nahone o vuḓa. Ndi ngazwo vhathu vho vha vha tshi mu takalela. O vha a tshi amba nga nḓila ye ya vha i tshi ita uri vhathu vhanzhi vho mu thetshelesaho vha zwi vhone uri u khou amba ngoho na uri zwine a khou vha funza zwi ḓo vha vhuyedza. O vha e na maanḓa ngauri o tendela muya mukhethwa wa Yehova u tshi mu livhisa. Naho o vha e na zwifhiwa na vhukoni, ho ngo ḓikukumusa, fhedzi o ita uri hu rendwe Yehova nahone a sumbedza uri u na ndavha na vhathu. Ndi ngazwo vhapikisi vhawe vho vha vha tshi mu vhona e khombo.

6-8. (a) Stefano o pomokwa zwithu zwifhio zwivhili, nahone ndi ngani? (b) Tsumbo ya Stefano i nga thusa hani Vhakriste ṋamusi?

⁶ Vhaṅwe vhanna vho mu pikisa, “fhedzi a vho ngo kona u hanedza Stefano ngauri o vha a tshi amba nga vhuṱali a tshi khou thuswa nga muya mukhethwa.” a Zwenezwo zwo vha dina lwe vha “ṱuṱuwedza vhaṅwe vhanna tshiphirini” uri vha zwifhele onoyo mutevheli wa Kristo a si na mulandu. Vho “ṱuṱuwedza na vhathu,” vhahulwane na vhamaṅwalo uri Stefano a farwe a iswe Sanihedrini. (Mish. 6:9-12) Vhapikisi vho amba uri o ita zwithu zwivhili zwo khakheaho. Vho mu pomoka uri o sema Mushe na Mudzimu. Nga nḓila-ḓe?

⁷ Vhenevho vhathu vho zwifhela Stefano nga u amba uri o sema Mudzimu nga u sema “fhethu hukhethwa,” hune ha vha thembele i re Yerusalema. (Mish. 6:13) Vho dovha vha mu pomoka uri o sema Mushe, vha amba uri o nyadza Mulayo wa Mushe, a shandula milayo ye Mushe a vha ṋea yone. Wonoyo wo vha u mulandu muhulwane ngauri nga tshenetsho tshifhinga, Vhayuda vho vha vha tshi dzhiela nṱha thembele. Vho vha vha tshi dovha vha dzhiela nṱha zwidodombedzwa zwi re kha Mulayo wa Mushe na masialala manzhi e vha a katela kha wonoyo Mulayo. Zwenezwo zwo vha zwi tshi amba uri Stefano o vha e muthu a re khombo, o tewaho nga u fa!

 ⁸ Zwi ṱungufhadzaho ndi uri zwo ḓowelea uri vhathu vha vhurereli vha shumise honoho vhukwila u itela u dzhenisa vhashumeli vha Mudzimu khakhathini. Na ṋamusi, nga zwiṅwe zwifhinga vhenevho vhathu vha vhurereli vhane vha ri pikisa, vha susumedza vhavhusi uri vha tovhole Ṱhanzi Dza Yehova. Ri fanela u ita mini musi ri tshi pomokwa kana ri tshi zwifhelwa? Ri nga guda zwinzhi kha Stefano.

9, 10. Vhapikisi vho ri mini nga zwe Stefano a zwi amba e phanḓa ha Sanihedrini, nahone ri fanela u humbula mini?

⁹ Samusi zwo sumbedzwa mathomoni a ino ndima, musi Stefano o thetshelesa vhathu vhane vha khou mu pomoka, tshifhaṱuwo tshawe tsho vha tshi tshi nga tsha muruṅwa. Kayafa o mbo ḓi vhudzisa Stefano a ri: “Naa zwenezwo ndi ngoho?” (Mish. 7:1) Zwino tsho vha tshi tshifhinga tsha uri Stefano a pose ḽawe. O ita nga u ralo.

¹⁰ Vhaṅwe vhathu vha sasaladza zwe Stefano a zwi amba. Vha amba uri naho o amba zwithu zwinzhi, ho ngo fhindula nga ho livhaho zwe a pomokwa zwone. Ngoho ndi ya uri Stefano o ri vhetshela tsumbo yavhuḓisa ya nḓila ine ra nga “fhindula” ngayo musi ri tshi imelela mafhungo maḓifha. (1 Pet. 3:15) Ni songo hangwa uri Stefano o pomokwa uri o sema Mudzimu nga u amba zwithu zwine zwa sumbedza u nyadza thembele. O dovha a pomokwa uri o sema Mushe nga u nyadza Mulayo. Musi Stefano a tshi fhindula, o amba nga ha zwipiḓa zwiraru zwa ḓivhazwakale ya Vhaisiraele, a ombedzela dziṅwe mbuno nga vhuronwane. Kha ri ambe nga ha tshipiḓa tshiṅwe na tshiṅwe tsha yeneyo ḓivhazwakale.

11, 12. (a) Stefano o shumisa hani tsumbo ya Abrahamu? (b) Ndi ngani Stefano o amba nga ha Yosefa?

¹¹ Tshifhingani tsha vhathomi vha lushaka. (Mish. 7:1-16) Stefano o thoma nga u amba nga ha Abrahamu, we Vhayuda vha vha vha tshi mu ṱhonifha nga nṱhani ha lutendo lwawe. Musi a tshi khou amba nga ha enea mafhungo a ndeme ane vha tendelana khao, Stefano o ombedzela uri Yehova “Mudzimu wa vhugala,” o thoma u ḓivhonadza kha Abrahamu ngei Mesopotamia. (Mish. 7:2) Abrahamu o vha e mutsinda Shangoni ḽo Fhulufhedziswaho. O vha a si na thembele kana Mulayo wa Mushe. Zwi ḓa hani uri vhathu vha ambe uri u fhulufhedzea kha Mudzimu zwi tea u ḓitika nga thembele kana milayo yo vhewaho?

¹² Yosefa muḓuhulu wa Abrahamu na ene o vha a tshi dzhielwa nṱha vhukuma nga vhathetshelesi vha Stefano. Fhedzi Stefano o vha humbudza uri vhakomana vha Yosefa, vhane vha vha vhokhotsi vha tshaka dza Isiraele, vho tovhola onoyo munna o lugaho vha mu rengisela vhupulini. Naho zwo ralo, Mudzimu o mu shumisa uri a tshidze Vhaisiraele nga tshifhinga tsha nḓala. A zwi timatimisi uri Stefano o vhona zwithu zwe Yosefa na Yesu  Kristo vha vha vha tshi fana ngazwo. Fhedzi ho ngo amba nga hazwo ngauri o vha a tshi ṱoḓa uri vhathu vha bvele phanḓa vha tshi mu thetshelesa.

13. Zwe Stefano a zwi amba nga ha Mushe zwo fhindula hani zwe a vha a tshi khou pomokwa zwone, nahone zwenezwo zwo ita uri a ombedzele fhungo ḽifhio ḽa ndeme?

¹³ Tshifhingani tsha Mushe. (Mish. 7:17-43) Stefano o amba mafhungo manzhi nga ha Mushe. O zwi amba nga vhuṱali a tshi ḓivha uri miraḓo minzhi ya Sanihedrini ndi Vhasadukei. Vho vha vha sa ṱanganedzi dziṅwe bugu dzoṱhe dza Bivhili, nga nnḓa ha dzo ṅwaliwaho nga Mushe. Ri songo hangwa uri Stefano o vha a tshi khou pomokwa uri o sema Mushe. Stefano o fhindula nga ho livhaho zwe a pomokwa zwone. Zwe a zwi amba zwo sumbedza uri u ṱhonifha Mushe na Mulayo nga ho dzikaho. (Mish. 7:38) O zwi bvisela khagala uri na Mushe o landulwa nga vhathu vhe a vha a tshi khou lingedza u vha thusa. Vho mu landula e na miṅwaha ya 40. Nga murahu ha miṅwaha i fhiraho 40, vho mu konḓisela musi a tshi khou ranga phanḓa kha zwiitea zwo vhalaho. b Nga zwenezwo, Stefano o ombedzela nga zwiṱuku nga zwiṱuku heḽi fhungo ḽa ndeme, ḽa uri: Vhathu vha Mudzimu vho landula lunzhi-lunzhi vhathu vhe Yehova a vha vhea uri vha vha range phanḓa.

14. Stefano o ombedzela mbuno ifhio a tshi shumisa tsumbo ya Mushe?

¹⁴ Stefano o humbudza vhathu vhe vha vha vho mu thetshelesa uri Mushe o dzula o amba uri kha Vhaisiraele ho vha hu tshi ḓo vuswa muporofita ane a nga ene. Onoyo muporofita o vha a tshi ḓo vha nnyi nahone vhathu vho vha vha tshi ḓo mu ṱanganedza hani? Stefano ho ngo fhindula dzenedzo mbudziso u swika a tshi fhedza zwe a vha a tshi khou amba. O dovha a ombedzela iṅwe mbuno ya ndeme. O amba uri Mushe o guda uri fhethu huṅwe na huṅwe hu nga itwa uri hu vhe hukhethwa, u fana na fhethu he Yehova a amba nae e hone tshiṱakani  tsha mipfa tshi dugaho. Naa vhathu vho vha vha tshi tea u gwadamela Yehova fhedzi musi vhe thembeleni Yerusalema? Kha ri vhone.

15, 16. (a) Ndi ngani dennde ḽikhethwa ḽo vha ḽi ḽa ndeme kha zwe Stefano a vha a tshi khou amba nga hazwo? (b) Stefano o amba mini nga ha thembele ya Salomo?

¹⁵ Dennde ḽikhethwa na thembele. (Mish. 7:44-50) Stefano o humbudza khothe uri musi hu sa athu vha na thembele Yerusalema, Mudzimu o vhudza Mushe uri a ite dennde ḽikhethwa. Vhathu vho vha vha tshi shumisa ḽeneḽo dennde u itela u gwadamela Mudzimu, nahone vho vha vha tshi kona u ya naḽo huṅwe na huṅwe. Samusi Mushe o vha a tshi gwadamela Yehova denndeni ḽikhethwa, a hu na we a vha a tshi nga amba uri thembele ndi ya ndeme u fhira dennde ḽikhethwa.

¹⁶ Nga murahu, musi Salomo a tshi fhaṱa thembele ngei Yerusalema, o hevhedzwa uri a ṅwale zwithu zwa ndeme kha thabelo yawe. Samusi Stefano o zwi amba, “Wa-Ṱaḓulu-ṱaḓulu ha dzuli nḓuni dzo fhaṱwaho nga zwanḓa zwa vhathu.” (Mish. 7:48; 2 Koron. 6:18) Yehova a nga shumisa thembele u swikelela zwipikwa zwawe, fhedzi a zwi ambi uri u shumisa yone fhedzi. Zwino ndi ngani vhashumeli vha Mudzimu vha tshi humbula uri u mu gwadamela nga nḓila yo kunaho zwi ḓitika nga tshifhaṱo tsho itwaho nga zwanḓa zwa vhathu? Stefano o phetha mafhungo awe nga u amba zwi re kha bugu ya Yesaya. O ri: “Ḽiṱaḓulu ndi khuluṋoni yanga, ḽifhasi ndi fhethu hune nda kanda hone. Ni nga mphaṱela nnḓu ya mufuda-ḓe, hune nda nga awela hone ndi ngafhi? Hezwi zwithu zwoṱhe zwo itwa nga nṋe.”​—Mish. 7:49, 50; Yes. 66:1, 2.

17. Zwe Stefano a zwi amba (a) zwo bvukulula hani mavhonele a vhe vha vha vho mu thetshelesa, nahone (b) zwo fhindula hani zwe a vha a tshi khou pomokwa zwone?

¹⁷ U swika zwino, musi ni tshi sedza zwe Stefano a zwi vhudza Sanihedrini, naa ni a kona u zwi vhona uri o zwi bvisela khagala uri vhane vha khou mu pomoka vho vha vhe na mavhonele a si avhuḓi? O sumbedza uri Yehova u dzula a tshi swikelela zwipikwa zwawe nahone a zwi ḓitiki nga masialala a vhathu. Vhane vha dzhiela nṱha tshifhaṱo tsha Yerusalema, masialala na mikhuvha zwi re kha Mulayo wa Mushe, vho vha vha sa pfesesi tshipikwa tshihulwane tsha Mulayo na thembele. Zwe Stefano a zwi amba zwi ita uri hu vhudziswe heyi mbudziso ya ndeme: Naa a no ngo tea u sumbedza uri ni hulisa Mulayo na thembele nga u thetshelesa Yehova? Zwi tou pfala uri Stefano o kona u imelela zwe a zwi ita ngauri o vha o ita zwine a nga kona uri a thetshelese Yehova.

18. Ri nga edzisa hani Stefano?

¹⁸ Ri nga guda mini kha zwe Stefano a zwi amba? O vha a tshi ḓivha zwavhuḓi Maṅwalo. Arali na riṋe ri tshi ṱoḓa “u ṱalutshedza ipfi ḽa ngoho nga nḓila yo teaho,” ri tea u fhisetshela u guda Ipfi ḽa Mudzimu. (2 Tim. 2:15) Tsumbo ya Stefano i nga dovha ya ri gudisa u vha na vhuthu na u humbulela. Vhe vha vha vho mu thetshelesa vho vha vho halifha vhukuma! Fhedzi  ene o amba navho nga ṱhonifho, a vha vhidza “vhokhotsi.” Stefano o ambesa nga ha zwithu zwe vhenevho vhanna vha vha vha tshi zwi dzhiela nṱha, a tshi khou itela uri vha kone u wana mbuno. (Mish. 7:2) Na riṋe musi ri tshi amba na vhathu nga ha Ipfi ḽa Mudzimu, ri tea u amba navho ro “vuḓa na nga ṱhonifho khulwane.”​—1 Pet. 3:15.

19. Stefano o ḓivhadza hani khaṱhulo ya Yehova nga tshivhindi kha Sanihedrini?

¹⁹ A ri litshi u amba nga ha Ipfi ḽa Mudzimu ri tshi khou shavha u khukhulisa vhathu kana u shavha u amba nga ha khaṱulo ya Yehova nga ho livhaho. Stefano o ri vhetshela tsumbo yavhuḓi. O ṱhogomela uri vhuṱanzi hoṱhe he a vhu ṋea a ho ngo swikelela vhenevho vhahaṱuli vha mbilu dzo rindilaho. A tshi ṱuṱuwedzwa nga muya mukhethwa, o phetha mafhungo awe nga tshivhindi. O sumbedza uri vhenevho vhathu vha fana na vhomakhulukuku wavho vhe vha landula Yosefa, Mushe na vhaporofita vhoṱhe. (Mish. 7:51-53) Zwavhuḓi-vhuḓi, o sumbedza uri vhenevho vhahaṱuli vha Sanihedrini vho vhulaya Messia we Mushe na vhaporofita vhoṱhe vha amba hu tshee nga phanḓa uri u ḓo ḓa. Vho nyadza Mulayo wa Mushe nga nḓila khulwane.

20, 21. Vha Sanihedrini vho ita mini musi vha tshi pfa zwe Stefano a amba, nahone Yehova o mu khwaṱhisa hani?

²⁰ Ngoho ye Stefano a i amba yo sinyusa vhenevho vhahaṱuli. Vho ita zwithu nga nḓila i si na tshirunzi, vha sinyutshela onoyo munna, vha shenganya maṋo nga mbiti. Onoyo munna a fhulufhedzeaho a nga vha o zwi vhona uri u ḓo haṱulwa nga nḓila ya tshiṱuhu u fana na zwe zwa itwa kha Yesu, Muṋe wawe.

²¹ Zwo vha zwi tshi ṱoḓea uri Stefano a vhe na tshivhindi uri a konḓelele zwe zwa vha zwi tshi khou ḓa. A zwi timatimisi uri bono ḽe Yehova a mu sumbedza ḽone ḽo mu ṱuṱuwedza. Stefano o vhona vhugala ha Mudzimu na Yesu o ima thungo ya tshanḓa tsha u ḽa tsha Yehova. Musi Stefano a tshi vha vhudza zwe a zwi vhona, vhenevho vhahaṱuli vho vala nḓevhe nga zwanḓa zwavho. Ndi ngani vho ita nga u ralo? Miṅwedzi i si gathi yo fhiraho, Yesu o vha o vhudza yeneyi khothe uri ndi ene Messia na uri hu si kale o vha a tshi ḓo ya a dzula kha tshanḓa tsha u ḽa tsha Khotsi awe. (Marko 14:62) Zwe Stefano a zwi vhona kha bono zwo sumbedza uri Yesu o vha a tshi khou amba ngoho. Zwenezwo zwo vha zwi tshi khou sumbedza uri vha Sanihedrini vho fheṱa Messia, vha mu vhulaya. Nga khathihi fhedzi, vhoṱhe vha gidimela Stefano vha mu kanḓa nga matombo u swika a tshi lovha. c

22, 23. Nḓila ye Stefano a vhulawa ngayo i fana hani na ya Muṋe wawe, nahone ndi ngani Vhakriste ṋamusi vha tshi nga vha na fhulufhelo u fana na Stefano?

²² Stefano o lovha nga nḓila i fanaho na ya Muṋe wawe Yesu. O lovha mbilu yawe yo rula, a tshi fhulufhela Yehova nga ho fhelelaho nahone o hangwela vhe vha mu vhulaya. O ri: “Murena Yesu, vhutshilo hanga ndi vhu kumedzela zwanḓani zwau.” Khamusi o amba zwenezwo ngauri o vha a tshi kha ḓi vhona Murwa muthu e na Yehova kha bono. Zwi tou pfala uri Stefano o vha a tshi ḓivha maipfi a Yesu a khuthadzaho ane a ri: “U vuwa na vhutshilo ndi nṋe.” (Yoh. 11:25) Mafheleloni, Stefano o rabela kha Mudzimu nga ipfi ḽi pfalaho a ri: “Yehova, u songo vha lifhedza tshenetshi tshivhi.” Musi a tshi tou fhedza u amba zwenezwo, a mbo ḓi lovha.​—Mish. 7:59, 60.

²³ Kha vhatevheli vha Kristo, Stefano o vha ene muthu wa u thoma we a vhulayelwa lutendo. (Vhalani bogini “ Stefano O Vhulawa Ngauri O Vha E Mutevheli Wa Yesu’?” kha siaṱari 54.) Zwi ṱungufhadzaho ndi uri a si ene wa u fhedza. Na ṋamusi, vhaṅwe vhashumeli vha Yehova vha fhulufhedzeaho vho no ḓi vhulawa nga vhathu vhane vha fhisetshela vhurereli, vha politiki na vhaṅwe vhapikisi vha re na tshiṱuhu. Naho zwo ralo, ri na fhulufhelo ḽo khwaṱhaho u fana na Stefano. Zwa zwino Yesu u khou vhusa sa Khosi nahone u khou shumisa maanḓa mahulu e Khotsi awe a mu ṋea one. A hu na tshine tsha nga mu thivhela uri a vuse vhatevheli vhawe vha fhulufhedzeaho.​—Yoh. 5:28, 29.

24. Saulo o shela hani mulenzhe kha u vhulawa ha Stefano, nahone ndi dzifhio mvelelo dzavhuḓi dze dza vha hone nga u vhulawa hawe?

²⁴ Muṅwe muṱhannga ane a pfi Saulo o vhona zwenezwi zwoṱhe zwi tshi itea. Saulo o takalela u vhulawa ha Stefano. O ita na u linda zwiambaro zwa vhe vha vha vha tshi khou mu vhulaya. Nga murahunyana ha zwenezwo, o mbo ḓi thoma u ranga phanḓa u tovholwa na u tambudzwa ha Vhakriste. Fhedzi u vhulawa ha Stefano zwo vha zwi tshi ḓo ita uri hu vhe na mvelelo dzavhuḓi. Tsumbo yawe yo vha i tshi ḓo khwaṱhisa vhaṅwe Vhakriste uri vha dzule vha tshi fhulufhedzea na u kunda u fana nae. Zwiṅwe hafhu, Saulo we miṅwahani i tevhelaho a vho vhidzwa Paulo, o vha a tshi ḓo ḓisola nge a shela mulenzhe kha u vhulawa ha Stefano. (Mish. 22:20) Naho o thusa kha u vhulawa ha Stefano, nga murahu o mbo ḓi zwi ṱhogomela uri: “Ndo vha ndi tshi semana, ndi mutovholi, ndi na vhuhali.” (1 Tim. 1:13) Zwi tou pfala uri Paulo ho ngo vuwa o hangwa zwe Stefano a zwi amba nga ḽeneḽo ḓuvha. Musi Paulo a tshi amba na u ṅwala zwiṅwe zwithu, o katela na zwe Stefano a zwi amba. (Mish. 7:48; 17:24; Vhahev. 9:24) Nga u ya ha tshifhinga, Paulo o guda u vha na tshivhindi na lutendo u fana na Stefano, munna “we a vha a tshi takalelwa vhukuma nga Mudzimu e na maanḓa.” Mbudziso ndi ya uri, Naa na riṋe ri ḓo mu edzisa?