1-3. Petro o vhona mini kha bono, nahone ndi ngani zwi zwa ndeme u pfesesa zwine ḽa amba zwone?

 NDI ṅwaha wa 36 C.E. Ho vha hu nga tshifhefho, Petro a tshi khou rabela e nṱha ha ṱhanga ya nnḓu i re tsini na vhuimazwikepe ha Yope. Ho no fhela maḓuvha o vhalaho e mueni henefho muḓini. U dzula hawe kha wonoyo muḓi zwi sumbedza uri ha na luvhengelambiluni. Simoni, we a vha e musuki wa mikumba, o vha e muṋe wa wonoyo muḓi. Vhaṅwe Vhayuda vho vha vha sa ḓo takalela u dzula na muthu ane a ita mushumo wo raloho. a Fhedzi Petro o vha a tshi ḓo guda zwithu zwa ndeme nga ha uri Yehova ha ṱaluli.

² Musi Petro a tshi khou rabela, a vhona bono. Zwe a zwi vhona kha bono zwo vha zwi tshi nga tshuwisa Muyuda muṅwe na muṅwe. O vhona hu tshi tsa tshithu tshi ngaho labi tshi tshi bva ṱaḓulu, tshi na zwipuka zwine zwa dzhiiwa zwi songo kuna u ya nga Mulayo. Musi Petro a tshi vhudzwa uri a zwi ṱhavhe a ḽe, o fhindula a ri: “Na khathihi Murena, ngauri a thi athu u ḽa tshithu tshi songo kunaho kana tshi re na tshika.” O vhudzwa luraru lwoṱhe uri: “Litsha uri zwithu zwo kunakiswaho nga Mudzimu zwi na tshika.” (Mish. 10:14-16) Ḽeneḽo bono ḽo mu ḓaḓisa lwa tshifhinganyana.

³ Zwe Petro a zwi vhona kha bono zwi amba mini? Ndi zwa ndeme uri ri pfesese ḽeneḽi bono ngauri ḽi sumbedza nḓila ine Yehova a dzhia ngayo vhathu. Samusi ri Vhakriste vha ngoho, ri  nga si kone u huwelela nga vhuḓalo nga ha Muvhuso wa Mudzimu arali ri sa dzhii vhathu nga nḓila ine Mudzimu a vha dzhia ngayo. U itela u pfesesa zwine bono ḽa Petro ḽa amba zwone, kha ri thome ri ṱolisise zwe zwa itea.

4, 5. Koronelio o vha e nnyi, nahone ho itea mini musi a tshi khou rabela?

⁴ Petro o vha a sa zwi ḓivhi uri nga ḽa mulovha, munna ane a pfi Koronelio, na ene o vhona bono e Kesarea, kule na he Petro a vha e hone nga khilomithara dza 50. Koronelio, we a vha e muhulwane wa maswole a Roma, “o vha a tshi gwadamela Mudzimu.” b O vha a tshi dovha a vha tsumbo yavhuḓi ya u ṱhogomela muṱa ngauri “o vha a tshi gwadamela Mudzimu na vha muṱa wawe woṱhe.” Koronelio o vha a si muthu o rembulutshelaho kha vhurereli ha Tshiyuda, fhedzi o vha e muthu wa dzitshaka a songo fumbaho. O vha a tshi pfela vhuṱungu Vhayuda vhane vha shaya nahone a tshi vha thusa. Onoyo munna wa mbilu yavhuḓi o vha a tshi “rabela Mudzimu tshifhinga tshoṱhe.”​—Mish. 10:2.

⁵ Hu ṱoḓaho u vha nga vho 3:00 nga masiari musi Koronelio a tshi khou rabela, o vhona muruṅwa kha bono, we a ri khae: “Mudzimu o pfa thabelo dzau, o vhona na nḓila ine wa thusa ngayo vhashai.” (Mish. 10:4) Koronelio o ita zwe muruṅwa a amba, a ruma vhanna uri vha ye u vhidza  muapostola Petro. Samusi Koronelio o vha e muthu wa dzitshaka a songo fumbaho, o vha a tshi ḓo pfa zwithu zwiswa. O vha a tshi ḓo pfa mafhungo maḓifha.

6, 7. (a) Anetshelani tshenzhelo ine ya sumbedza uri Mudzimu u fhindula thabelo dza vhathu vha mbilu dzavhuḓi vhane vha ṱoḓa u guda ngoho nga hae. (b) Dzenedzo tshenzhelo dzi ri gudisa mini?

⁶ Naa Mudzimu u a fhindula thabelo dza vhathu vha mbilu dzavhuḓi ṋamusi, vhane vha ṱoḓa u ḓivha ngoho nga hae? Ṱhogomelani zwe zwa itea kha muṅwe mufumakadzi wa ngei Albania. O ṋewa Tshiingamo tshe tsha vha tshi na thero ine ya khou amba nga ha u alusa vhana. c O vhudza Ṱhanzi ye ya mu dalela uri: “Ni a ḓivha uri ndo vha ndi tshi khou rabela uri Yehova a nthuse ndi aluse vhananga zwavhuḓi? Ngoho o tou ni ruma kha nṋe! No mpha zwone-zwone zwe nda vha ndi tshi khou zwi ṱoḓa.” Onoyo mufumakadzi na vhana vhawe vho mbo ḓi thoma u guda Bivhili nahone nga murahu na munna wawe a thoma u guda.

⁷ Naa zwo itea kha onoyo mufumakadzi fhedzi? Na luthihi. A zwo ngo sokou itea vho, zwo no itea lunzhi kha vhathu u mona na ḽifhasi. Zwino, ri nga phetha nga uri mini? Tsha u thoma, Yehova u fhindula thabelo dza vhathu vha mbilu dzavhuḓi vhane vha ṱoḓa u mu ḓivha. (1 Dzikh. 8:41-43; Ps. 65:2) Tsha vhuvhili, vharuṅwa vha khou ri tikedza musi ri tshi ita mushumo wa u huwelela.​—Nzumb. 14:6, 7.

8, 9. Mudzimu o vhudza mini Petro a tshi shumisa muya wawe mukhethwa, nahone Petro o ita mini?

⁸ Musi Petro a tshi kha ḓi vha kha ṱhanga, “a tshee o mangala” uri bono ḽe a ḽi vhona ḽi amba mini, ho mbo ḓi swika vhanna vho rumiwaho nga Koronelio. (Mish. 10:17) Naa Petro we a amba luraru uri a nga si ḽe zwithu zwi songo kunaho nga lwa Mulayo, o vha a tshi ḓo tenda u ṱuwa na vhenevho vhanna a dzhena muḓini wa muthu wa luṅwe lushaka? Mudzimu a tshi shumisa muya wawe mukhethwa, o bvisela khagala zwe a vha a tshi zwi ṱoḓa. Petro o vhudzwa uri: “Hu na vhanna vhararu vhane vha khou u ṱoḓa. Takuwa, u tsele kamarani ya fhasi u ṱuwe navho, u songo timatima ngauri ndi nṋe ndo vha rumaho.” (Mish. 10:19, 20) Zwi tou pfala uri bono ḽe Petro a ḽi vhona ḽa tshithu tshi nga ho labi, ḽi nga vha ḽo mu thusa uri a ḓiimisele u thetshelesa zwine Yehova a zwi amba.

 ⁹ Musi Petro a tshi vho ḓivha uri Koronelio o rumiwa nga Mudzimu uri a mu vhidze, o vhidza vhenevho vhanna uri vha “dzhene nḓuni vha vhe vhaeni vhawe.” (Mish 10:23a) Musi onoyo muapostola a thetshelesaho o no guda zwinzhi nga zwine Mudzimu a zwi ṱoḓa, o thoma u khwinisa nḓila ine a dzhia ngayo zwithu.

10. Yehova u livhisa hani vhathu vhawe, nahone ndi mbudziso dzifhio dzine ra tea u ḓivhudzisa dzone?

¹⁰ Na ṋamusi, Yehova u kha ḓi livhisa vhathu vhawe. (Mir. 4:18) U livhisa “mulanda a fhulufhedzeaho na wa vhuṱali” a tshi shumisa muya wawe mukhethwa. (Mat. 24:45) Nga zwiṅwe zwifhinga, hu nga khwiniswa nḓila ine ra pfesesa ngayo Ipfi ḽa Mudzimu kana ha vha na tshanduko kha nḓila ine ndangulo ya ita ngayo zwithu. Ri tea u ḓivhudzisa uri: ‘Ndi ita mini musi hu tshi vha na dzenedzo tshanduko? Naa ndi a tenda muya mukhethwa u tshi nndivhisa?’

11, 12. Petro o ita mini musi a tshi swika Kesarea, nahone o guda mini?

¹¹ Nga ḓuvha ḽi tevhelaho musi Petro o no vhona bono, ene na vhanna vhararu vhe vha rumiwa nga Koronelio na “vhahashu [vha vha Yuda] vha rathi” vha bvaho Yope vha ya Kesarea. (Mish. 11:12) Samusi Koronelio o vha o lavhelela Petro, “o kuvhanganya mashaka awe na khonani dzawe dza tsini.” Zwi vhonala uri vhoṱhe vho vha vhe vha dzitshaka. (Mish. 10:24) Musi Petro a tshi swika, o ita zwithu zwe a vha a sa humbuli uri a nga vhuya a zwi ita. O dzhena muḓini wa muthu wa dzitshaka a songo fumbaho. Petro o ri: “Ni a zwi ḓivha uri a zwo ngo tendelwa uri Muyuda a konane kana u amba na muthu wa luṅwe lushaka. Naho zwo ralo, Mudzimu o ntsumbedza uri a tho ngo fanela u amba uri muṅwe muthu ho ngo kuna kana u na tshika.” (Mish. 10:28) Zwino Petro o vha a tshi vho pfesesa uri bono ḽo vha ḽi sa khou ambela fhedzi kha zwiḽiwa zwine muthu a tea u zwi ḽa. O vha a songo “fanela u amba uri muṅwe muthu [naho e wa dzitshaka] ho ngo kuna.”

¹² Vhoṱhe vho vha vho lavhelela nga maṱo matswuku u pfa zwine Petro a ḓo zwi amba. Koronelio a ri: “Roṱhe ro kuvhangana phanḓa ha Mudzimu uri ri pfe zwoṱhe zwe wa vhudzwa nga Yehova.” (Mish. 10:33) Humbulani nḓila ye na vha ni tshi ḓo ḓipfa ngayo arali no pfa eneo maipfi kha muthu ane a ṱoḓa u guda nga ha Yehova! Petro a thoma u amba haya maipfi a ndeme: “Zwino ndi a zwi pfesesa ngangoho uri Mudzimu ha ṱaluli, kha tshaka dzoṱhe ane a mu ofha, a ita zwo lugaho  u a mu ṱanganedza.” (Mish. 10:34, 35) Petro o guda uri nḓila ine Yehova a dzhia vhathu ngayo a i ḓitiki nga muvhala wa lukanda, lushaka kana zwiṅwe zwithu. Petro o vha gudisa zwe Yesu a zwi ita musi e kha ḽifhasi, lufu lwawe na u vuswa hawe.

13, 14. (a) Ndi mini zwo khetheaho nga u lovhedzwa ha Koronelio na vhaṅwe vha dzitshaka nga 36 C.E.? (b) Ndi ngani ri songo tea u haṱula vhathu nga mbonalo yavho?

¹³ Ho itea zwithu zwe zwa vha zwi sa athu u vhuya zwa itea. “Musi Petro a tshi kha ḓi amba, . . . vhathu vha dziṅwe tshaka” vha shululelwa muya mukhethwa. (Mish. 10:44, 45) Tshenetsho ndi tshone tshiitea tshithihi fhedzi Maṅwaloni he ha ambiwa uri vhathu vho shululelwa muya mukhethwa vha sa athu u lovhedzwa. Musi Petro a tshi vhona uri tshenetshi ndi tshiga tshine tsha sumbedza uri Mudzimu u a vha ṱanganedza, o “amba navho [vha dziṅwe tshaka] uri vha lovhedzwe.” (Mish. 10:48) Tshifhinga tsha uri Vhayuda vha farwe sa vhathu vho khetheaho tsho fhela nga 36 C.E. musi vhathu vha dziṅwe tshaka vha tshi lovhedzwa. (Dan. 9:24-27) Nga u ranga phanḓa kha tshenetsho tshiitea, Petro o shumisa khii ya vhuraru ya u fhedzisela kha “khii dza Muvhuso.” (Mat. 16:19) Yeneyo khii yo ṋea vhathu vha dziṅwe tshaka vha songo fumbaho tshibuli tsha u vha Vhakriste vho ḓodzwaho.

¹⁴ Sa vhahuweleli vha Muvhuso vha ṋamusi, ri a zwi ḓivha uri “Mudzimu ha ṱaluli.” (Vharoma 2:11) U  ṱoḓa “vhathu vhoṱhe vha tshi tshidzwa.” (1 Tim. 2:4) Nga zwenezwo, a ro ngo tea u haṱula vhathu nga mbonalo yavho. Mushumo washu ndi u huwelela nga ha Muvhuso, zwine zwa katela u huwelela kha vhathu vhoṱhe, hu sa londwi muvhala wa lukanda lwavho, lushaka, mbonalo kana vhurereli havho.

15, 16. Ndi ngani vhaṅwe Vhakriste vha Vhayuda vho sasaladza Petro, nahone o vha fhindula hani?

¹⁵ Zwi tou pfala uri Petro o vha o ḓiimisela vhukuma u humela Yerusalema u amba zwoṱhe zwe zwa itea. Fhedzi zwi vhonala u nga mafhungo a uri vhathu vha dziṅwe tshaka vha songo fumbaho “vho ṱanganedza ipfi ḽa Mudzimu,” o vha a tshi vho ḓivhiwa Yerusalema. Musi Petro a tshi swika, “vhane vha tikedza zwa u fumba vha mu sasaladza,” nge a ya ‘nḓuni ya vhanna vha songo fumbaho a ḽa navho.’ (Mish. 11:1-3) Thaidzo yo vha i si ya uri vha dziṅwe tshaka vha nga vha vhatevheli vha Kristo, fhedzi yo vha i ya uri Vhayuda vho vha vha tshi khou ṱoḓa uri vhathu vha dziṅwe tshaka vha tevhedze Mulayo, u katela na u fumba, uri vha kone u gwadamela Yehova nga nḓila ine a i ṱanganedza. Zwi khagala uri zwo vha zwi tshi khou konḓela na vhaṅwe vhafunziwa vha Vhayuda u litsha u tevhedza Mulayo wa Mushe.

¹⁶ Petro o fhindula hani? U ya nga Mishumo 11:4-16, Petro o amba nga zwithu zwiṋa zwe zwa sumbedza uri Yehova o vha a tshi khou mu livhisa: (1) bono ḽe a ḽi vhona (Vese 4-10); (2) u vhudziwa hawe nga muya mukhethwa (Vese 11, 12); (3) u dalelwa ha Koronelio nga muruṅwa (Vese 13, 14) na (4) u shululelwa ha vha dzitshaka muya mukhethwa. (Vese 15, 16) Petro o phetha nga u vha vhudzisa mbudziso ya ndeme a ri: “Arali Mudzimu o vha ṋea [vhathu vha dziṅwe tshaka] tshifhiwa [tsha muya mukhethwa] tshi fanaho na tshe a ṋea riṋe [Vhayuda] musi ri tshi tenda Murena Yesu Kristo, nṋe ndi nnyi ane nda nga thivhela Mudzimu u ita zwine a funa?”​—Mish. 11:17.

17, 18. (a) Zwe Petro a zwi amba zwo kombetshedza Vhakriste vha Vhayuda uri vha dzhie phetho ifhio? (b) Ndi ngani zwi tshi nga konḓa uri tshivhidzoni hu dzule hu na vhuthihi, nahone ri fanela u ḓivhudzisa mbudziso dzifhio?

¹⁷ Zwe Petro a zwi amba zwo ita uri Vhakriste vha Vhayuda vha kombetshedzee u dzhia phetho. Naa vho vha vha tshi ḓo kunda luvhengelambiluni lwe vha vha vhe nalwo, vha dzhia vhathu vha dzitshaka vhe vha vha vha tshi kha ḓi bva u lovhedzwa sa vhahavho? Bivhili i ri: “Musi [vhaapostola na vhaṅwe Vhayuda vha Vhakriste] vha tshi pfa zwenezwo, vha si tsha hanedza Petro, vha renda Mudzimu vha ri: ‘Mudzimu o tendela vha dzitshaka uri vha rembuluwe uri vha wane vhutshilo.’” (Mish. 11:18) U vha na eneo mavhonele avhuḓi zwo ita uri tshivhidzo tshi dzule tshi na vhuthihi.

¹⁸ A zwo ngo leluwa u vha na vhuthihi ṋamusi ngauri vhashumeli vha Mudzimu vha ngoho vha bva kha “tshaka dzoṱhe na ndimi dzoṱhe.” (Nzumb. 7:9) Ndi ngazwo zwivhidzoni zwinzhi hu na vhathu vho fhambanaho vha vhubvo na mvelele dzi sa fani. Ndi zwavhuḓi u ḓivhudzisa uri: ‘Naa ndo tupula tshoṱhe luvhengelambiluni na midzi yalwo? Ḽino shango ḽo ḓala zwithu zwine zwa ita uri vhathu vha si vhe na vhuthihi zwi nga ho u fhisetshela lushaka, u ṱalula dziṅwe tshaka, u dzhia mvelele yau i ya ndeme u fhira dziṅwe na u khethulula nga lukanda. Naa ndo ḓiimisela u ita zwoṱhe zwine nda nga kona uri ndi si tendele zwenezwi zwithu zwi tshi ṱuṱuwedza nḓila ine nda fara ngayo vhahashu vha Vhakriste?’ Humbulani zwe zwa itea kha Petro (Kefa) nga murahu ha miṅwaha i si gathi musi vhathu vha dzitshaka vha u thoma vho no lovhedzwa. O thoma u vha na luvhengelambiluni lwe vhaṅwe vha vha vhe nalwo “a ḓifhambanya” na Vhakriste vha dziṅwe tshaka. Fhedzi Paulo o mu kaidza. (Vhagal. 2:11-14) Ri fanela u dzula ri tshi ḓilinda uri ri si fashwe nga tshikwekwe tsha u vha na luvhengelambiluni.

19. Vhakriste vha Vhayuda vha ngei Antiokia vho thoma u huwelela kha vhafhio nahone ha vha na mvelelo dzifhio?

¹⁹ Naa vhatevheli vha Yesu vho thoma u huwelela kha vha dzitshaka vha songo fumbaho? Ṱhogomelani zwe zwa itea nga murahu ngei Antiokia kha ḽa Siria.  d Ho vha hu na Vhayuda vhanzhi kha yeneyo ḓorobo, fhedzi vho vha vha tshi anḓana na vha dziṅwe tshaka. Ndi ngazwo zwo vha zwo leluwa uri vhathu vha Antiokia vha kone u huwelela kha vha dziṅwe tshaka. Ndi henefha he vhaṅwe vhafunziwa vha Vhayuda vha thoma u ḓivhadza mafhungo maḓifha “kha vhathu vha ambaho Tshigerika.” (Mish. 11:20) Vho huwelela kha Vhayuda vha ambaho Tshigerika na kha vhathu vha dziṅwe tshaka vha songo fumbaho. Yehova o fhaṱutshedza wonoyo mushumo “vhathu vhanzhi vha vha vhatendi.”​—Mish. 11:21.

20, 21. Baranaba o sumbedza hani u ḓiṱukufhadza, nahone ri nga mu edzisa hani musi ri tshi huwelela?

²⁰ Tshivhidzo tsha Yerusalema tsho rumela Baranaba ngei Antiokia uri a ye u huwelela kha vhenevho vhathu vho ḓiimiselaho u thetshelesa. Vhathu vhanzhi vho vha vhe na dzangalelo kha mafhungo maḓifha lwe muthu muthihi a vha a sa ḓo zwi kona e eṱhe. Saulo we a vha a tshi ḓo vha muapostola wa dzitshaka, ndi ene we a vha a tshi nga kona u thusa. (Mish. 9:15; Vharoma 1:5) Naa Baranaba o vha a tshi ḓo ṱaṱisana na Saulo? Na luthihi! Baranaba o sumbedza u ḓiṱukufhadza. O ya Tariso u ṱoḓa Saulo uri a ḓe a mu thuse ngei Antiokia. Vho fhedza ṅwaha woṱhe henefho vha tshi khou ṱuṱuwedza vhafunziwa vha tshenetsho tshivhidzo.​—Mish. 11:22-26a.

²¹ Ri nga sumbedza hani u ḓiṱukufhadza musi ri tshi khou ita mushumo washu wa u huwelela? U ḓiṱukufhadza zwi katela u tenda uri hu na zwiṅwe zwithu zwine ra si zwi kone. Roṱhe ri na vhukoni vhu sa fani. Sa tsumbo, vhaṅwe vha nga vha vha tshi kona u huwelela lu songo dzudzanywaho kana nnḓu nga nnḓu, fhedzi zwi tshi vha konḓela u ita nyendo dza u vhuyelela kana u thoma pfunzo dza Bivhili. Zwi nga vha zwavhuḓi uri ni humbele thuso arali ni tshi ṱoḓa u khwinisa nḓila ine na huwelela ngayo. Zwenezwo zwi nga ita uri ni kone u huwelela nga nḓila i bvelelaho na u ita uri ni vhe na dakalo ḽo engedzeaho kha honohu mushumo.​—1 Vhakor. 9:26.

22, 23. Vhahashu vha Antiokia vho sumbedza hani uri vha funa vhahavho, nahone vhathu vha Mudzimu ṋamusi vha vha edzisa hani?

²² Ndi henefho Antiokia he “Mudzimu a [thoma u] livhisa vhafunziwa uri vha vhidzwe Vhakriste.” (Mish. 11:26b) Zwo tea vhukuma uri vhafunziwa vha Kristo vha vhidzwe nga ḽeneḽo dzina. Musi vhathu vha dziṅwe tshaka vha tshi vha Vhakriste, naa Vhayuda vho vha na vhushaka ho khwaṱhaho na  vhatendi ngavho vha dziṅwe tshaka? Ṱhogomelani zwe zwa itea musi hu tshi vha na nḓala khulu hu ṱoḓaho u vha nga 46 C.E. e Zwifhingani zwa kale, nḓala yo vha i tshi ḓiṋea maanḓa kha vhashai, vhe vha vha vha si na tshelede na zwiḽiwa zwe vha vhulunga. Nga tshenetsho tshifhinga tsha nḓala, Vhakriste vha Vhayuda vha dzulaho Yudea, vhe vhunzhi havho vha vha vhe vhashayi, vho vha vha tshi ṱoḓa u thuswa nga zwiḽiwa na zwiṅwe zwithu. Musi vhahashu vha Antiokia, u katela na Vhakriste vha dziṅwe tshaka vha tshi zwi pfa, vha “thusa vhatendi . . . nga zwine vha vha nazwo.” (Mish. 11:29) Zwenezwo zwo sumbedza uri vha funa vhahavho zwi tshi bva mbiluni.

²³ Na vhathu vha Mudzimu ṋamusi vha edzisa Vhakriste vha u thoma. Musi ri tshi pfa uri vhahashu kha ḽiṅwe shango kana vha hune ra dzula hone vha khou shaya, ri ṱoḓa nḓila dza u vha thusa nga u ḓifunela. Musi vhahashu vha tshi welwa nga khombo dza mupo dzi nga ho maḓumbu, midzinginyo na tsunami, Komiti dza Madavhi dzi ṱavhanya dza vhumba Komiti Dza U Thusa Vho Welwaho Nga Khombo uri vha thuse vhahashu. Musi ri tshi ita zwenezwi zwithu zwoṱhe, ri vha ri tshi khou sumbedza uri ri funa vhahashu zwi tshi bva mbiluni.​—Yoh. 13:34, 35; 1 Yoh. 3:17.

24. Ri nga sumbedza hani uri ri a pfesesa zwine bono ḽa Petro ḽa amba zwone?

²⁴ Bono ḽe Petro a ḽi vhona e nṱha ha ṱhanga ya nnḓu ngei Yope, o ḽi vhona ḓanani ḽa u thoma ḽa miṅwaha. Sa Vhakriste vha ngoho ri a pfesesa nḓila ine zwa vha zwa ndeme ngayo u ḓivha zwine ḽeneḽo bono ḽa amba zwone. Ri gwadamela Mudzimu a sa ṱaluli. U ṱoḓa uri ri huwelele mafhungo maḓifha nga ha Muvhuso wawe, zwine zwa katela u huwelela kha vhathu vhoṱhe, hu sa londwi muvhala wa lukanda lwavho, lushaka lwavho kana vhuimo havho. Kha ri finye dzi khwaṱhe, ri ḓiimisele u ṋea vhathu vhoṱhe tshibuli tsha uri vha pfe mafhungo maḓifha.​—Vharoma 10:11-13.