Kha Muhuweleli Wa Mafhungo Maḓifha A Funwaho:

Ḓivhoneni ni muṅwe wa vhaapostola no ima Thavhani Ya Miṱwari. Yesu a mbo ḓi bvelela. Musi a sa athu u takulelwa ṱaḓulu, a ri: “Ni ḓo wana maanḓa musi muya mukhethwa u tshi ḓa kha inwi, ni ḓo vha ṱhanzi dzanga Yerusalema na kha ḽoṱhe ḽa Yudea na Samaria, u swika magumoni a ḽifhasi.” (Mish. 1:8) No vha ni tshi ḓo ḓi pfa hani?

Khamusi ni nga pfa u nga zwine Yesu a khou ni vhudza zwone a zwi konadzei. Ni nga ḓivhudzisa uri, ‘Ri nga huwelela hani “u swika magumoni a ḽifhasi” ri vhaṱuku nga u tou rali?’ Khamusi ni nga humbula zwe Yesu a zwi amba musi a sa athu u fa: “Mulanda ha fhiri muṋe wawe. Arali vho ntovhola, na inwi vha ḓo ni tovhola, arali vho tevhedza zwe nda zwi amba, vha ḓo tevhedza na zwine na ḓo zwi amba. Fhedzi vha ḓo ni ita zwenezwi zwoṱhe nga nṱhani ha dzina ḽanga, ngauri a vha ḓivhi We a nthuma.” (Yoh. 15:20, 21) Musi ni tshi humbula nga ha enea maipfi, ni nga ḓivhudzisa uri, ‘Ndi nga huwelela hani nga vhuḓalo ngeno ndi tshi ḓo pikiswa na u tovholwa?’

Ṋamusi, ri ḓivhudzisa mbudziso dzi fanaho. Sa Ṱhanzi Dza Yehova, ro ṋewa mushumo u fanaho wa u huwelela nga vhuḓalo “u swika magumoni a ḽifhasi” kha “vhathu vha tshaka dzoṱhe.” (Mat. 28:19, 20) Ri nga ita hani wonoyu mushumo ngeno ri tshi khou tovholwa na u pikiswa?

Bugu ya Mishumo Ya Vhaapostola i ri vhudza zwithu zwi takadzaho nga ha nḓila ye Yehova a thusa vhaapostola na vhaṅwe Vhakriste vha tshenetsho tshifhinga u ita mushumo wa u huwelela. Kha heyi bugu, ni ḓo guda zwithu zwinzhi zwe zwa itea kha vhenevho Vhakriste na nḓila ye vha takala ngayo musi vha tshi vhona mushumo wa u huwelela u tshi phaḓalala. Ni ḓo mangala musi ni tshi guda zwithu zwinzhi zwine zwa fana vhukati ha vhenevha Vhakriste na riṋe ṋamusi. Ni ḓo ṱhogomela uri ri khou ita mushumo u fanaho na uri nḓila ye ra dzudzanywa ngayo uri ri u ite i a fana. Musi ni tshi humbula nga ha eneo mafhungo, zwi ḓo ita uri ni vhe na vhungoho ha uri Yehova Mudzimu u khou bvela phanḓa a tshi livhisa tshipiḓa tsha ndangulo yawe i re kha ḽifhasi.

Ri rabela na u fhulufhela uri u guda haṋu bugu ya Mishumo, zwi ḓo ita uri ni vhe na vhungoho ha uri Yehova u ḓo ni thusa na u ni ṋea maanḓa a u konḓelela a tshi shumisa muya wawe mukhethwa. Musi ni tshi shumisa zwine na ḓo zwi guda kha heyi bugu, zwi ḓo ni ṱuṱuwedza u bvela phanḓa ni tshi ‘huwelela nga vhuḓalo’ nga ha Muvhuso Wa Mudzimu na u thusa vhaṅwe uri vha ḓivhe Yehova na uri vha vhe na fhulufhelo ḽa u wana vhutshilo vhu sa fheli.​—Mish. 28:23; 1 Tim. 4:16.