BOGISI ḼA U FUNZA 19B
Maḓi Maṱuku A Engedzea A Vha Manzhi!
Hesekiele u vhona maḓi e a vha a tshi khou elela a tshi bva nḓuni khethwa ya Yehova. A thoma e maṱuku nahone nga murahu ha khiḽomithara mbili, a a engedzea a vha manzhi-manzhi! Kha philiphili dza mulambo, u vhona miri mihulu ya mitshelo i re na pfushi, ine ya fhodza. Zwi amba mini?
Mulambo U Ḓisa Phaṱhutshedzo
KALE: Musi vhathu vho thubiwaho vha tshi vhuyelela shangoni ḽa havho, vho fhaṱutshedzwa nge vha shela mulenzhe kha u vusulusa vhurabeli ho kunaho thembeleni
MUSALAUNO: Nga 1919, vhurabeli ho kunaho ho vusuluswa. Zwenezwo zwo ita uri vhashumeli vha Mudzimu vha fhulufhedzeaho vha fhaṱutshedzwe nga nḓila khulwane. Dzenedzo phaṱhutshedzo ndi ndugiselelo dzine dza ri vhuyedza ṋamusi u itela u ri thusa uri ri gwadamele Yehova nga nḓila ine a i ṱanganedza. Zwenezwo zwi ita uri ri lavhelele nga maṱo matswuku u wana vhutshilo vhu sa fheli
VHUMATSHELO: Nga murahu ha nndwa ya Haramagedo, Yehova u ḓo ri fhaṱutshedza nga nḓila nnzhi. U ḓo ri thusa uri ri si tsha vha na tshivhi na u ri funza zwithu zwiswa
Maḓi A Ṋeaho Vhutshilo
KALE: Yehova o fhaṱutshedza vhathu vhawe vha fhulufhedzeaho naho vha tshi khou engedzea. Zwenezwo zwo ita uri zwi konadzee uri vha vhe na vhushaka ha tsini-tsini nae
MUSALAUNO: Pharadisoni yashu ya pfanyisedzo, vhathu vhanzhi vha khou vhuyelwa nga ngoho i re Bivhilini, vho guda nga ha Yehova nahone vha ṱanganela na vhane vha gwadamela Yehova nga nḓila ine a i ṱanganedza
VHUMATSHELO: Yehova u ḓo fhaṱutshedza nga nḓila khulwane vhane vha ḓo ponyoka nndwa ya Haramagedo, u katela na vhathu vhanzhi-vhanzhi vhane vha ḓo vuswa
Miri Ya Zwiḽiwa Na Ine Ya Fhodza
KALE: Yehova o gudisa vhathu vhawe ngoho, a ita uri zwi konadzee uri vha mu gwadamele nga nḓila ine a i ṱanganedza musi vhe shangoni ḽavho ḽo vusuluswaho. O dovha a vha thusa uri vha litshe u gwadamela midzimu ya zwifanyiso na zwithu zwoṱhe zwi tshimbidzanaho na vhurabeli ha mazwifhi
MUSALAUNO: Vhathu vha Mudzimu vha khou thuswa uri vha pfesese ngoho i re Bivhilini. Zwenezwo zwi vha thusa uri vha dzule vha tshi fhulufhedzea khae, vha iledze u ita tshivhi tshihulwane na u hana u ṱuṱuwedzwa nga mavhonele a si avhuḓi a vhathu vha ḽino shango
VHUMATSHELO: Kristo na vha 144 000 vhane a ḓo vhusa navho, vha ḓo thusa vhathu vhoṱhe vha fhulufhedzeaho uri vha si tsha vha na tshivhi na uri vha ḓiphiṋe nga u vha na mutakalo wavhuḓi lwa tshoṱhe!
