BOGISI ḼA U FUNZA 1B
Manweledzo A Bugu Ya Hesekiele
Nga u tou angaredza, bugu ya Hesekiele i nga khethekanywa nga nḓila i tevhelaho:
NDIMA 1 U SWIKA KHA 3
Nga 613 B.C.E., musi Hesekiele a tshi khou dzula na Vhayuda vho thubiwaho Babele, Yehova o mu sumbedza mabono, a mu laedza uri a vhudze Vhayuda vha dzulaho tsini na mulambo wa Kebara.
NDIMA 4 U SWIKA KHA 24
Vhukati ha 613 na 609 B.C.E., Hesekiele o porofita nga ha milaedza i ambaho nga ha khaṱhulo dzo livhaho Yerusalema na vhathu vha mashandukwa vha dzulaho henefho, vhane vha gwadamela midzimu ya zwifanyiso.
NDIMA 25 U SWIKA KHA 32
U thoma nga 609 B.C.E., ṅwaha we muḓi wa Yerusalema wa vha wo tangiwa lwa u fhedza, mulaedza wa Hesekiele wa khaṱhulo wo bva Yerusalema wa ya kha tshaka dzi re maswina dzo tangaho Isiraele. Dzenedzo ndi tshaka dza Amoni, Edomo, Egipita, Moaba, Filisita, Sidoni na Tiro.
NDIMA 33 U SWIKA KHA 48
U thoma nga 606 B.C.E., musi muḓi wa Yerusalema na thembele yawo zwo tshinyadzwa, Hesekiele u ambesa nga ha mulaedza wa fhulufhelo, une wa vha mulaedza u takadzaho wa u vusuluswa ha vhurabeli ho kunaho ha Yehova Mudzimu.
Bugu ya Hesekiele yo dzudzanywa u ya nga tshifhinga tshee zwiitea zwa bvelela ngatsho na nga u tevhekana ha mafhungo. Ho thoma nga u ambiwa nga ha u fheliswa ha muḓi wa Yerusalema na thembele yawo, hu sa athu u porofitiwa nga ha u vusuluswa ha vhurabeli ho kunaho. Zwenezwo zwi a pfesesea ngauri vhuporofita vhu ambaho nga ha u vusuluswa ha vhurabeli ho kunaho, vhu sumbedza uri ho vha hu si tsheena vhurabeli ho kunaho thembeleni.
Zwiṅwe hafhu, Hesekiele o porofita nga ha tshaka dzi re maswina o tangaho Isiraele (ndima 25 u swika kha 32) musi o no porofita nga ha khaṱhulo ya Yerusalema. Zwenezwo o zwi ita a sa athu u porofita nga ha u vusuluswa ha vhurabeli ho kunaho. Muṅwe mugudi o amba uri zwo vha zwo tea uri hu ḓivhadzwe mulaedza wa khaṱhulo ya dziṅwe tshaka. Zwi sumbedza uri Yehova ho ngo tsha sinyutshela vhathu vhawe, fhedzi o vha khathutshela. O sumbedza uri o khathutshela vhathu vhawe nga u ṱarafa maswina avho.
