Kha Hesekiele ndima 23, vhathu vha Mudzimu vho sasaladzwa vhukuma nge vha si fhulufhedzee. Yeneyi ndima i tshimbidzana na ndima 16. Ndima 16 na 23 dzi amba nga ha vharengisi vha muvhili vha pfanyisedzo. Ho sumbedzwa uri Yerusalema ndi murathu wa Samaria. Dzenedzi ndima dzi sumbedza nḓila ye murathu a edzisa ngayo mukomana wawe nga u rengisa muvhili, fhedzi murathu o mbo ḓi ita vhuvhi na u ḓifara luvhi u fhira mukomana. Kha ndima 23, Yehova u rina madzina vhenevho murathu na mukomana: Mukomana ndi Ohala ane a vha Samaria musanda wa tshaka dza fumi dza Isiraele; murathu ndi Ohaliba ane a vha Yerusalema musanda wa Yuda. *—Hesek. 23:1-4.

Dzenedzi ndima mbili dzi dovha dza tshimbidzana nga iṅwe nḓila. Khamusi zwa ndeme vhukuma ndi hezwi: Mathomoni vhenevho vharengisi vha muvhili vho vha vha tshi tou nga vhafumakadzi vha Yehova, fhedzi a vho ngo tsha fhulufhedzea khae. Ho dovha ha fhulufhedziswa uri zwithu zwi ḓo vhuyelela ngonani. Ndima 23 a i ambi nga ho livhaho uri zwithu zwi ḓo vhuyelela ngonani, fhedzi i tshimbidzana na zwe Yehova a zwi amba kha ndima 16 musi a tshi ri: “Ndi ḓo fhelisa u ḓifara hau luvhi na u rengisa hau muvhili.”—Hesek. 16:16, 20, 21, 37, 38, 41, 42; 23:4, 11, 22, 23, 27, 37.

Tshifhingani tsho fhiraho, khandiso dzashu dzo vha dzi tshi amba uri murathu na mukomana Ohala na Ohaliba, vha fanyisela Vhurereli ha Mazwifhi. Honoho vhurereli ho fhandekana ha vha zwipiḓa zwivhili zwa kereke ya Katolika na ya Porotesitante. Fhedzi musi ri tshi ita ṱhoḓisiso na u rabela nga ha enea mafhungo, zwo ita uri hu vhe na dziṅwe mbudziso. Naa Vhurereli ha Mazwifhi ho vhuya ha vha mufumakadzi wa Yehova wa pfanyisedzo? Naa ho vhuya ha vhofha mulanga nae? Hai. Ho vha hu si na Vhurereli ha Mazwifhi musi Yesu a tshi vhofha “mulanga muswa” na Isiraele wa Mudzimu; nahone honoho vhurereli a ho ngo vhuya ha vha tshipiḓa tsha vhenevho Vhakriste vho ḓodzwaho. (Yer. 31:31; Luka 22:20) Vhurereli ha Mazwifhi ho thoma u vhonala musi vhaapostola vho no lovha. Ho thoma u vhonala ḓanani ḽa vhuṋa ḽa miṅwaha C.E. sa tshiimiswa tsha vhagunei tsho tshikafhalaho tshi imelaho “tsheṋe.” Vhenevho vhagunei vhane vha ḓiita Vhakriste, ndi vhe Yesu a amba nga havho kha vhuporofita hawe ha goroi na tsheṋe.—Mat. 13:24-30.

Iṅwe phambano khulwane ndi heyi: Yehova o fhulufhedzisa uri u ḓo hangwela Yerusalema na Samaria vha sa fhulufhedzei. (Hesek. 16:41, 42, 53-55) Naa Bivhilini hu fhulufhedziswa zwithu zwi fanaho nga ha vhurereli ha mazwifhi? Hai! Vhurereli hoṱhe ha Mazwifhi kana Babele Ḽihulu a vhu na fhulufhelo.

Nga zwenezwo, u ya nga vhuporofita, Ohala na Ohaliba a vha imeli miṅwe mifuda ya Vhurereli ha Mazwifhi. Fhedzi vha ri thusa u pfesesa zwithu zwa ndeme vhukuma: nḓila ine Yehova a ḓipfa ngayo nga vhane vha tshinya dzina ḽawe ḽikhethwa na milayo yawe ya vhurabeli ho kunaho. Vhurereli ha mazwifhi vhu na mulandu muhulu ngauri kereke dzaho nnzhi dzi amba uri dzi imela Mudzimu ane ha ambiwa nga hae Bivhilini. Zwi fhiraho zwenezwo, dzi dovha dza amba uri murangaphanḓa wadzo ndi Yesu Kristo ane a vha Murwa wa Yehova a funwaho. Fhedzi zwine vha zwi amba zwi a ḓihanedza ngauri vha amba uri Yesu ndi tshipiḓa tsha vhuraruthihi nahone a vha thetshelesi ndaela ya Yesu ya u sa vha “tshipiḓa tsha shango.” (Yoh. 15:19) Honoho Vhurereli ha Mazwifhi ho ḓisumbedza uri ndi tshipiḓa tsha “mufumakadzi ane a rengisa muvhili.” Ho zwi sumbedza nga u bvela phanḓa vhu tshi gwadamela midzimu ya zwifanyiso na u ḓidzhenisa kha zwa politiki. (Nzumb. 17:1) Zwi tou pfala uri na hone vhu ḓo fheliswa musi hu tshi fheliswa vhurereli ha mazwifhi ha shango ḽoṱhe!