A zwi timatimisi uri Hesekiele o vha o no vhona zwifanyiso zwihulu zwo vhaḓwaho zwa mboho na ndau zwi re na phapha na ṱhoho dza vhathu, zwo vhewa sa vhalindi phanḓa ha pfamo dza mahosi na dzithembele. Zwifanyiso zwo raloho zwo vha zwi tshi wanala kha ḽoṱhe ḽa Asuri na ḽa Babele. U fana na vhaṅwe vhe vha vhona zwenezwo zwifanyiso, na Hesekiele u tea u vha o mangala musi a tshi sedza zwenezwi zwifanyiso zwihulu, zwiṅwe zwo vha zwo lapfa mithara dzi ṱoḓaho u vha rathi. Naho zwenezwo zwivhumbiwa zwo vha zwi tshi vhonala zwi na maanḓa, zwo vha zwo vhaḓwa nga tombo zwi sa tshili.

Fhedzi zwivhumbiwa zwiṋa zwe Hesekiele a zwi vhona kha bono, zwo vha zwi “zwivhumbiwa zwi tshilaho.” Zwo vha zwo fhambana vhukuma! Zwe Hesekiele a zwi vhona, zwo mu kwama vhukuma lwe mathomoni a vhuporofita hawe a amba maipfi ane a ri, “zwivhumbiwa zwi tshilaho” lu fhiraho 9. (Hesek. 1:5-22) Bono ḽa zwivhumbiwa zwiṋa zwi tshilaho zwine zwa khou tshimbila nga vhuthihi fhasi ha khuluṋoni, ḽi fanela u vha ḽo khwaṱhisedza Hesekiele uri Yehova u langa tsiko yoṱhe nga ho fhelelaho. Ṋamusi, ḽeneḽo bono ḽi ri khwaṱhisedza uri Yehova ndi muhulwane, u na maanḓa na uri vhuvhusahoṱhe hawe a vhu vhambedzwi na tshithu.—1 Koron. 29:11.