Vhurabeli vhu nga ṱaluswa sa “u sumbedza u ṱhonifha mudzimu na u mu funa.” Bivhilini, u ya nga luambo lwa u thoma, ipfi “vhurabeli” ḽi nga ambela kha u sumbedza u ṱhonifha kana u gwadamela muthu kana tshivhumbiwa. (Mat. 28:9) Ḽeneḽo ipfi ḽi nga dovha ḽa ambela kha u gwadamela Mudzimu kana midzimu. (Yoh. 4:23, 24) Vhubvo ha mafhungo ndi hone vhune ha sumbedza nḓila ine ḽeneḽo ipfi ḽa tea u pfeseswa ngayo.

Ndi Yehova fhedzi ane a vha Musiki na Muvhusahoṱhe, o fanelwaho nga uri ri ḓikumedze tshoṱhe khae. (Nzumb. 4:10, 11) Ri gwadamela Yehova nga u ṱhonifha vhuvhusi hawe na nga u hulisa dzina ḽawe. (Ps. 86:9; Mat. 6:9, 10) Enea mafhungo a ambaho nga ha vhuvhusahoṱhe ha Yehova na dzina ḽawe, a bvelela nga maanḓa kha bugu ya Hesekiele. Kha bugu ya Hesekiele i yoṱhe, maipfi ane a ri “Yehova Murena Muvhusahoṱhe,” a bvelela lwa 217. Maipfi ane a ri “ḓivha uri ndi nṋe Yehova,” a bvelela lwa 55.—Hesek. 2:4; 6:7.

Vhurabeli ha vhukuma a vhu kateli fhedzi nḓila ine ra ḓipfa ngayo; vhu katela na zwine ra zwi ita. (Yak. 2:26) Musi ri tshi ḓiṋekedzela kha Yehova, ri a ana uri samusi e Muvhusahoṱhe washu, ri ḓo mu thetshelesa kha masia oṱhe a vhutshilo hashu na u ṱhonifha dzina ḽawe zwi tshi bva mbiluni. Ri songo hangwa uri musi Yesu a tshi fhindula kha mulingo wa vhuraru, o ṱumanya vhurabeli na ‘u shumela Mudzimu fhedzi.’ (Mat. 4:10) Samusi ri vhagwadameli vha Yehova, ri fhisetshela u mu shumela. * (Dot. 10:12) Ri shumela Mudzimu washu e eṱhe nga u shela mulenzhe kha mishumo i tshimbidzanaho na vhurabeli hashu nga ho livhaho na ine ya ṱoḓa uri ri ḓidzime zwiṅwe zwithu. Ndi mishumo ifhio?

Ri shumela Yehova nga nḓila nnzhi nahone u dzi dzhiela nṱha dzoṱhe. Ri vha ri tshi khou shumela Mudzimu musi ri tshi huwelela kha vhaṅwe, musi ri tshi shela mulenzhe miṱanganoni yashu ya tshivhidzo na musi ri tshi ṱhogomela na u fhaṱa fhethu hashu ha vhurabeli. Zwiṅwe hafhu, ri vha ri tshi khou shumela Mudzimu musi ri tshi ita vhurabeli ha muṱa, ri tshi tikedza mushumo wa u thusa vhatendi nga riṋe vho welwaho nga khombo, ri tshi shuma nga u ḓifunela mabuthanoni ashu kana ri tshi shuma Bethele. (Vhahev. 13:16; Yak. 1:27) Musi ri tshi dzhia vhurabeli ho kunaho vhu ha ndeme kha riṋe, ri ḓo “mu shumela masiari na vhusiku.” Ri takalela u shumela Yehova, Mudzimu washu!—Nzumb. 7:15.