BOGISI ḼA U FUNZA 20A
U Kovhekanya Shango
Nḓila ye ha vha hu tshi tea u itwa ngayo mikano i linganaho, yo khwaṱhisedza vhathu vho thubiwaho uri shango ḽavho ḽine vha ḽi funa ḽi ḓo vusuluswa zwa vhukuma. Ri nga guda mini ṋamusi kha ḽeneḽi bono? Kha ri haseledze nga ha zwithu zwivhili zwi re kha ḽeneḽi bono:
Fhethu ho tsireledzeaho na mushumo wa ndeme
Muṅwe na muṅwe kha vhathu vho vhuyaho vhuthubwani, o vha a tshi ḓo vha na ifa kha Shango ḽo Fhulufhedziswaho ḽe ḽa vusuluswa. Nga hu fanaho ṋamusi, vhashumeli vhoṱhe vha Yehova vha na vhudzulo pharadisoni ya pfanyisedzo. Naho mushumo washu ndanguloni ya Yehova u tshi nga vha u muṱuku lungafhani, ri na vhudzulo ho tsireledzeaho na mushumo wa ndeme shangoni ḽa pfanyisedzo. Kha Yehova, vhashumeli vhawe vhoṱhe vha a lingana nahone ndi vha ndeme khae.
U Wana Zwipiḓa Zwi Linganaho Zwa Shango
Kha bono ḽa Hesekiele, kha tshipiḓa tshiṅwe na tshiṅwe tsha Shango ḽo Fhulufhedziswaho ḽe ḽa vusuluswa, vhadzulapo vho vha vha tshi wana mukovhe u linganaho wa zwibveledzwa zwa shango. Na ṋamusi, Yehova u ita uri vhashumeli vhawe vhoṱhe vha wane phaṱhutshedzo dzi linganaho pharadisoni ya pfanyisedzo.
