Bivhilini, ḽiiti ḽa Tshihevheru ḽine ḽa ri na·vaʼʹ, ḽo ṱalutshedzelwaho nga uri “vhuporofita,” nga maanḓa ḽi amba u ḓivhadza mulaedza wo hevhedzwaho, khaṱhulo, pfunzo dzi ambaho nga vhuḓifari kana ndaela i bvaho ha Mudzimu. Ḽi nga dovha ḽa ambela kha mulaedza u bvaho kha Mudzimu wa zwithu zwine zwa khou ḓa. Vhuporofita ha Hesekiele vhu katela zwenezwo zwithu zwoṱhe zwo dzumbululwaho zwi bvaho ṱaḓulu.—Hesek. 3:10, 11; 11:4-8; 14:6, 7; 37:9, 10; 38:1-4.

• MABONO

• ZWIFANYISO

• MISUMBEDZO

Bugu ya Hesekiele i na mabono, zwifanyiso, nganea na misumbedzo ya zwine zwa khou porofitiwa.

Nga zwiṅwe zwifhinga, zwe Hesekiele a porofita nga hazwo zwo itea nga nḓila nnzhi. Sa tsumbo, zwiṅwe zwithu zwe zwa porofitiwa nga ha u vusuluswa ha vhurabeli ha ngoho, zwo itea musi vhathu vha Mudzimu vha tshi vhuyelela Shangoni ḽo Fhulufhedziswaho. Fhedzi vhunzhi ha honoho vhuporofita vhu ambaho nga ha u vusuluswa ha vhurabeli ha ngoho, vhu khou itea ṋamusi nahone vhu ḓo dovha ha itea na tshifhingani tshi ḓaho, samusi zwi tshi haseledzwa kha Ndima 9 ya yeneyi bugu.

Tshifhingani tsho fhiraho, ro dzhia vhunzhi ha zwiṅwe zwe Hesekiele a porofita nga hazwo zwi tshi fanyisela zwiṅwe zwithu zwine zwa khou itea kana zwine zwa ḓo itea. Fhedzi heyi bugu a i ambi uri muthu, tshithu, fhethu kana tshiitea zwi fanyisela zwiṅwe zwithu zwine zwa khou itea musalauno, nga nnḓa ha musi hu na tshiitisi tshi pfalaho tshi re Maṅwaloni tsha u ita nga u ralo. * Fhedzi i ḓo sumbedza nḓila ine vhuporofita ha Hesekiele ha ḓo itea ngayo nga nḓila khulwane. I ḓo dovha ya haseledza zwine ra nga zwi guda kha mulaedza wa Hesekiele, kha vhathu, fhethu na zwiitea zwe a amba nga hazwo.