BOGISI ḼA U FUNZA 14A
Zwine Ra Zwi Guda Kha Bono Ḽa Hesekiele Ḽa Thembele
Vhurabeli Ho Kunaho Ho Huliswa Na U Tsireledzwa
Thembele i re kha bono yo dzudzwa kha “thavha ndapfu” (1). Naa ri hulisa vhurabeli ho kunaho nga u ita uri vhu ḓe u thoma vhutshiloni hashu?
Luvhondo lwo tangaho (2), fhethu hune thembele ya vha hone ho vuleaho (3), lu ri humbudza uri ri songo vhuya ra tendela tshithu naho tshi tshifhio tshi tshi ita uri ri si tsha gwadamela Yehova nga nḓila yo teaho. Arali zwithu zwi ‘si zwikhethwa’ zwi songo fanela u ṱanganyiswa na vhurabeli ho kunaho, na mushumeli wa Yehova ṋamusi u fanela u iledza u ḓifara luvhi kana u ḓitshikafhadza!—Hesek. 42:20.
Phaṱhutshedzo Dzi Sa Fheli
Mulambo u elela u tshi bva nḓuni khethwa ya thembele, u aṱama wa vha mulambo muhulwane, wa ita uri zwithu zwi re kha ḽifhasi zwi tshile na u ita uri mavu a none (4). Ri ḓo haseledza nga ha dzenedzi phaṱhutshedzo kha Ndima 19 ya ino bugu.
Milayo I Fanaho Kha Vhathu Vhoṱhe
Khoro ndapfu dza nga nnḓa (5) na khoro dza nga ngomu (9) dzi ri humbudza uri Yehova o vhetshela vhoṱhe vha re kha vhurabeli ho kunaho milayo ya vhuḓifari ya vhuimo ha nṱha. Ṱhogomelani uri khoro dza nga nnḓa na dza nga ngomu dzi a lingana. Hezwo zwo tea ngauri milayo ya Yehova i a fana kha vhashumeli vhawe vhoṱhe, hu sa londwi vhuimo havho kana ndugelo dzine vha vha nadzo.
U Ḽa Ṱafulani Nthihi Na Yehova
Kamara dza u ḽela (8) dzi ri humbudza uri kale vhathu vho vha vha tshi ḽa vhoṱhe zwiṅwe zwiṱhavhelo zwe vha zwi ḓisa thembeleni, zwa tou nga vha khou ḽa na Yehova. Zwo fhambana na zwine zwa itwa thembeleni ya pfanyisedzo ine Vhakriste vha shumela Mudzimu khayo ṋamusi, ngauri ho no ḓi ṋekedzwa “tshiṱhavhelo luthihi.” (Vhahev. 10:12) Fhedzi ri a ṋekedza tshiṱhavhelo tsha u renda Mudzimu.—Vhahev. 13:15.
U Khwaṱhisedzwa Nga Mudzimu
Zwi nga ni konḓela u pfesesa zwidodombedzwa zwa mielo yoṱhe i re kha bono. Fhedzi ri guda zwithu zwa ndeme: Yeneyo mielo i ri khwaṱhisedza uri tshipikwa tsha Yehova tsha u vusulusa vhurabeli ho kunaho ndi tsha vhukuma nahone u ḓo tshi swikelela, a tshi nga shanduki, samusi na yeneyo mielo i sa shanduki. Naho Hesekiele a songo amba uri o vhona vhathu kha bono ḽawe, o ṅwala zwe Yehova a zwi amba musi a tshi kaidza vhotshifhe, vharangaphanḓa na vhathu. Vhashumeli vhoṱhe vha Mudzimu vha fanela u tshila u tendelana na milayo yawe.
