Manweledzo A Nḓila Ine Ra Vho Pfesesa Ngayo
Miṅwahani yo fhelaho, Tshiingamo tsho khwinisa nḓila ine ra pfesesa ngayo zwiṅwe zwithu zwi re kha vhuporofita ha Hesekiele. Kha ino bugu, hu na zwiṅwe zwithu zwo engedzeaho zwe ha itwa uri ri zwi pfesese khwine. Kha ri vhone arali ni tshi nga kona u fhindula mbudziso dzi tevhelaho.
Zwifhaṱuwo zwiṋa zwa zwivhumbiwa zwi tshilaho zwi imela mini?
Nḓila ye ra vha ri tshi pfesesa ngayo: Tshifhaṱuwo tshiṅwe na tshiṅwe tsha zwivhumbiwa zwiṋa zwi tshilaho kana vhakerube, tshi imela zwiṅwe zwa zwithu zwiṋa zwine Yehova a vha zwone.
Nḓila ine ra vho pfesesa ngayo: Naho tshifhaṱuwo tshiṅwe na tshiṅwe tsha zwivhumbiwa zwiṋa zwi tshilaho tshi tshi imela zwiṅwe zwa zwithu zwiṋa zwine Yehova a vha zwone, musi zwenezwo zwifhaṱuwo zwiṋa zwi tshi sedzwa khathihi, zwi katela zwithu zwoṱhe zwine Yehova a vha zwone. Zwifhaṱuwo zwiṋa zwi dovha zwa sumbedza vhuhulwane ha maanḓa a Yehova na vhugala hawe vhu sa vhambedzwi na tshithu.
Zwo itaho uri hu khwiniswe nḓila ine ra pfesesa ngayo: Bivhilini, nomboro 4 i anzela u shumiswa u itela u ambela kha tshithu tsho fhelelaho kana zwithu zwoṱhe. Ndi ngazwo musi zwifhaṱuwo zwiṋa zwi tshi sumbedzwa zwi fhethu huthihi, zwi sa ambeli kha zwithu zwiṋa fhedzi zwine Yehova a vha zwone, fhedzi zwi vha zwi tshi khou ambela kha zwithu zwoṱhe zwine Yehova a vha zwone. Zwiṅwe hafhu, tshifhaṱuwo tshiṅwe na tshiṅwe ndi tsha tshivhumbiwa tshine tsha sumbedza u vha na tshirunzi, nungo na maanḓa mahulu. Fhedzi zwenezwo zwivhumbiwa zwoṱhe zwiṋa zwi fhasi ha khuluṋoni ya Yehova. Tshenetsho tshifanyiso tshi ombedzela uri Yehova ndi Muvhusi Muhulwane wa zwithu zwoṱhe.
Munna we a vha o fara tshishumiswa tsha muṅwaleli tshine tsha fara inki na tsha u ṅwala u fanyisela nnyi?
Nḓila ye ra vha ri tshi pfesesa ngayo: Munna a re na tshishumiswa tshine tsha fara inki na tsha u ṅwala u fanyisela masalela a vho ḓodzwaho. Vhaḓodzwa vha khou swaya zwino nga lwa pfanyisedzo phanḓa dza vhane vha vha tshipiḓa tsha “gogo ḽihulu.” Zwenezwo vha zwi ita nga u huwelela na u ita vhathu vhafunziwa.—Nzumb. 7:9.
Nḓila ine ra vho pfesesa ngayo: Munna a re na tshishumiswa tshine tsha fara inki na tsha u ṅwala u fanyisela Yesu Kristo. U ḓo swaya vha gogo ḽihulu nga tshifhinga tsha “maṱungu mahulu,” musi vha tshi haṱulwa sa nngu.—Mat. 24:21.
Zwo itaho uri hu khwiniswe nḓila ine ra pfesesa ngayo: Yehova o ṋea Murwa wawe maanḓa a u haṱula. (Yoh. 5:22, 23) U ya nga Mateo 25:31-33, ndi Yesu ane a ḓo haṱula lwa u fhedza uri ndi vhafhio vhane vha vha “nngu” na vhane vha vha “mbudzi.”
Naa murathu na mukomana Ohala na Ohaliba, vha fanyisela Vhurereli ha mazwifhi ho fhandekanaho ha vha zwipiḓa zwivhili zwa kereke ya Katolika na ya Porotesitante?
Nḓila ye ra vha ri tshi pfesesa ngayo: Mukomana ndi Ohala ane a vha (Samaria musanda wa Isiraele), u fanyisela kereke ya Katolika; murathu ndi Ohaliba ane a vha (Yerusalema musanda wa Yuda), u fanyisela kereke ya Porotesitante.
Nḓila ine ra vho pfesesa ngayo: Vhenevha murathu na mukomana vha rengisaho muvhili, a vha fanyiseli miṅwe mifuda ya Vhurereli ha Mazwifhi. Fhedzi mafhungo avho a ri gudisa nḓila ine Yehova a ḓipfa ngayo musi vhathu vhane vha fhulufhedzea khae vha tshi mu ṱutshela vha ḓidzhenisa kha vhurereli ha mazwifhi. Ndi nḓila ine a ḓipfa ngayo nga vhurereli hoṱhe ha mazwifhi.
Zwo itaho uri hu khwiniswe nḓila ine ra pfesesa ngayo: Maṅwalo ha sumbedzi uri Ohala na Ohaliba vha fanyisela Vhurereli ha Mazwifhi. Ho vhuya ha vha na tshifhinga tshee Vhaisiraele na Vhayuda vha vha vha tshi nga vhafumakadzi vha fhulufhedzeaho vha Yehova, fhedzi Vhurereli ha Mazwifhi a ho ngo vhuya ha vha na vhushaka ho raloho na Yehova. Zwiṅwe hafhu, nḓila ye ha vhambedzwa ngayo vhathu vha Mudzimu vha sa fhulufhedzei na vhafumakadzi vha rengisaho muvhili vho ambiwaho kha ndima 16 na 23 ya Hesekiele, i ri ṋea fhulufhelo ḽa uri zwithu zwi ḓo vhuyelela ngonani, vha dovha vha vha na vhushaka havhuḓi na Yehova. Samusi Vhurereli ha Mazwifhi vhu tshipiḓa tsha Babele Ḽihulu, a vhu na fhulufhelo ḽo raloho.
Naa muḓi wa Yerusalema wo guneaho u fanyisela Vhurereli ha Mazwifhi?
Nḓila ye ra vha ri tshi pfesesa ngayo: Muḓi wa Yerusalema u sa fhulufhedzei u fanyisela Vhurereli ha Mazwifhi. Nga zwenezwo, u fheliswa ha muḓi wa Yerusalema zwo fanyisela u fheliswa ha Vhurereli ha Mazwifhi.
Nḓila ine ra vho pfesesa ngayo: Kha muḓi wa Yerusalema u sa fhulufhedzei, ho vha hu tshi gwadamelwa midzimu ya zwifanyiso nahone ho ḓala zwa tshanḓanguvhoni. Zwenezwo zwi ri humbudza zwine zwa khou itea kha Vhurereli ha Mazwifhi. Fhedzi zwino a ri tsha amba uri muḓi wa Yerusalema u fanyisela Vhurereli ha Mazwifhi.
Zwo itaho uri hu khwiniswe nḓila ine ra pfesesa ngayo: A hu na vhuṱanzi ho khwaṱhaho vhu bvaho Maṅwaloni vhu sumbedzaho uri muḓi wa Yerusalema u fanyisela Vhurereli ha Mazwifhi. U fhambana na muḓi wa Yerusalema, Vhurereli ha Mazwifhi a ho ngo vhuya ha thoma ha vha vhurabeli ho kunaho. Naho Yerusalema ho vhuya ha hangwelwa nga Yehova lwa tshifhinganyana, fhedzi a hu na fhulufhelo ḽa uri Vhurereli ha Mazwifhi vhu ḓo vhuya ha hangwelwa.
Zwi re kha bono ḽa govha ḽo ḓalaho marambo o omaho zwo itea hani?
Nḓila ye ra vha ri tshi pfesesa ngayo: Nga 1918, vhaḓodzwa vhe vha vha vha tshi khou tovholwa vho iswa vhuthubwani Babele Ḽihulu, zwa tou nga vho fa ngauri vho vha vha sa khou kona u ita mushumo wavho. Nga 1919, Yehova o vha vhofholola nahone a vha vusulusa sa vhahuweleli vha Muvhuso.
Nḓila ine ra vho pfesesa ngayo: Vhakriste vho ḓodzwaho vho fhedza tshifhinga tshilapfu vho thubiwa, zwa tou nga vho fa. Vho thubiwa hu sa athu u swika 1918. Vho thoma u thubiwa ḓanani ḽa vhuvhili ḽa miṅwaha C.E. u swika nga 1919 C.E. Zwenezwi zwi tshimbidzana na tshifhinga tshilapfu tshee Yesu a amba nga hatsho kha tshifanyiso tshawe tsha goroi na tsheṋe.
Zwo itaho uri hu khwiniswe nḓila ine ra pfesesa ngayo: U thubiwa ha Isiraele ho fhedza tshifhinga tshilapfu, u bva nga 740 B.C.E. u guma nga 537 B.C.E. Vhuporofita ha Hesekiele vhu amba uri eneo marambo o vha “o oma” vhukuma, zwine zwa sumbedza uri vhane vha fanyisela eneo marambo vho fhedza tshifhinga tshilapfu nga maanḓa vho fa. Ho dovha ha ambiwa uri u vusuluswa ha eneo marambo zwi ḓo dzhia tshifhinga tshilapfu, zwi ḓo itea nga zwiṱuku nga zwiṱuku.
U ṱanganywa ha thanda mbili zwi amba mini?
Nḓila ye ra vha ri tshi pfesesa ngayo: Tshifhingani tsha Nndwa ya Shango ya u Thoma, masalela a vho ḓodzwaho vho vha vha sa anḓani, fhedzi vho dovha vha vha na vhuthihi nga 1919.
Nḓila ine ra vho pfesesa ngayo: Honoho vhuporofita vhu sumbedza uri Yehova u ḓo ita uri vhagwadameli vhawe vha vhe na vhuthihi. Nga murahu ha 1919, vhathu vhanzhi vhane vha khou engedzea vha re na fhulufhelo ḽa u tshila kha ḽifhasi, vho thoma u ṱanganela na masalela a vho ḓodzwaho. Vhoṱhe vha khou gwadamela Yehova nga vhuthihi.
Zwo itaho uri hu khwiniswe nḓila ine ra pfesesa ngayo: Vhuporofita a vhu ambi uri ho vunḓiwa thanda nthihi ya vha zwipiḓa zwivhili, zwa dovha zwa ṱumiwa. Nga zwenezwo, honovhu vhuporofita a vhu ambi nga ha tshigwada tshithihi tshe tsha vha tshi tshi ḓo fhandekanywa, tsha dovha tsha vha na vhuthihi. Fhedzi vhu amba nga ha nḓila ye ha vha hu tshi ḓo ṱanganywa ngayo zwigwada zwivhili zwi sa fani.
Gogo wa Magogo ndi nnyi?
Nḓila ye ra vha ri tshi pfesesa ngayo: Gogo wa Magogo ndi dzina ḽe Saṱhane a vhidzwa ngaḽo musi o no pandelwa ṱaḓulu u ya nga vhuporofita.
Nḓila ine ra vho pfesesa ngayo: Gogo wa Magogo ndi tshaka dza kha ḽifhasi dzine dza ḓo ṱhasela vhagwadameli vha Yehova vha ngoho nga tshifhinga tsha maṱungu mahulu.
Zwo itaho uri hu khwiniswe nḓila ine ra pfesesa ngayo: Samusi vhuporofita vhu tshi amba uri Gogo u ḓo ḽiwa nga zwiṋoni nahone a vhulungwa kha ḽifhasi, zwi tou pfala uri a si tshivhumbiwa tsha muya. Zwiṅwe hafhu, u ṱhasela ha Gogo hu tshimbidzana na zwe zwa ambiwa kha bugu ya Daniele na kha Nzumbululo. Kha dzenedzo bugu, ho ambiwa nga ha uri vhathu vha Mudzimu vha ḓo ṱhaselwa nga tshaka dza kha ḽifhasi.—Dan. 11:40, 44, 45; Nzumb. 17:14; 19:19.
Naa Hesekiele o vhona thembele khulwane ya pfanyisedzo ye muapostola Paulo a amba nga hayo?
Nḓila ye ra vha ri tshi pfesesa ngayo: Thembele ye Hesekiele a i vhona kha bono i fana na thembele ya pfanyisedzo ye muapostola Paulo a amba nga hayo.
Nḓila ine ra vho pfesesa ngayo: Hesekiele ho ngo vhona thembele ya pfanyisedzo ye ya thoma u vha hone nga 29 C.E. O vhona bono ḽine ḽa sumbedza nḓila ye vhurabeli ho kunaho ha vha vhu tshi ḓo vusuluswa ngayo musi vhathu vho no vhuya vhuthubwani, samusi zwo sumbedzwa kha Mulayo we wa ṋewa Mushe. Musi Paulo a tshi amba nga ha thembele ya pfanyisedzo, o livhisa ṱhogomelo kha mushumo we wa itwa nga Yesu ane a vha Tshifhe Muhulu, u bva nga 29 u swika nga 33 C.E. Bono ḽa Hesekiele ḽa thembele a ḽi ambi nga ha tshifhe muhulu, fhedzi ḽi livhisa ṱhogomelo kha u vusuluswa ha vhurabeli he ha thoma nga 1919 C.E. Nga zwenezwo, a ri ṱalutshedzi kana u amba uri tshidodombedzwa tshiṅwe na tshiṅwe tshi re kha bono ḽa Hesekiele ḽa thembele tshi fanyisela zwiṅwe zwithu. Fhedzi ri fanela u livhisa ṱhogomelo kha zwine ra zwi guda kha bono ḽa Hesekiele nga ha nḓila ine Yehova a ṱoḓa ri tshi mu gwadamela ngayo kha vhurabeli ho kunaho.
Zwo itaho uri hu khwiniswe nḓila ine ra pfesesa ngayo: Thembele i re kha bono ḽa Hesekiele yo fhambana na thembele ya pfanyisedzo nga nḓila dza ndeme. Sa tsumbo, thembele ye Hesekiele a i vhona kha bono yo vha i na zwiṱhavhelo zwinzhi zwe zwa vha zwi tshi tea u ṋekedzwa. Fhedzi kha thembele khulwane ya pfanyisedzo hu ṋekedzwa tshiṱhavhelo tshithihi, “luthihi nahone lwa tshoṱhe.” (Vhahev. 9:11, 12) Musi Kristo a sa athu u ḓa kha ḽifhasi, ho vha hu sa athu u swika tshifhinga tsha uri Yehova a dzumbulule ngoho yo dzikaho nga ha thembele ya pfanyisedzo.
