1-3. (a) Hu ḓo itea mini musi Yehova a tshi ‘sinyuwa’? (Sedzani tshifanyiso tsha u thoma.) (b) Ri ḓo haseledza nga ha mini zwino?

VHANNA, vhafumakadzi na vhana vho ima fhethu huthihi, vha tshi khou imba luimbo lwa Muvhuso. Muhulwane u rabela zwi tshi bva mbiluni, a tshi humbela Yehova uri a vha tsireledze. Vhathu vha re henefho vha na vhungoho ha uri Yehova u ḓo vha ṱhogomela, fhedzi vha kha ḓi ṱoḓa u khuthadzwa na u khwaṱhisedzwa. Nnḓa hu khou pfala phosho khulu ya vhathu vhane vha khou lwa. Nndwa ya Haramagedo yo thoma!—Nzumb. 16:14, 16.

² Naho Yehova a tshi ḓo vha o “sinyuwa” vhukuma nga nndwa ya Haramagedo, u ḓo vha a tshi ḓivha vho tewaho nga u vhulawa. (Vhalani Hesekiele 38:18.) U ḓo vha a songo sinyutshela mmbi nthihi kana lushaka luthihi, fhedzi u ḓo sumbedza mbiti dzawe kha vhathu vhanzhi ḽifhasini ḽoṱhe. Nga ḽeneḽo ḓuvha, vho vhulawaho nga Yehova “vha ḓo ḓadza ḽifhasi ḽoṱhe.”—Yer. 25:29, 33.

³ Samusi Yehova e Mudzimu a re na lufuno, ane a “khathutshela na u pfela vhuṱungu” na “a sa ṱavhanyi u sinyuwa,” ndi ngani a tshi ḓo “sinyuwa” a dzhia vhukando nga u ṱavhanya? (Ek. 34:6; 1 Yoh. 4:16) Kha ri vhone nḓila ine phindulo ya yeneyo mbudziso  ya nga ri khuthadza ngayo, u ita uri ri vhe na tshivhindi na u ri ṱuṱuwedza kha mushumo washu wa u huwelela ṋamusi.

4, 5. Nḓila ine Yehova a sinyuwa ngayo yo fhambana hani na ya vhathu?

⁴ Tsha u thoma, ri fanela u ṱhogomela uri Yehova ha sinyuwi u fana na vhathu vha re na tshivhi. Musi muthu a tshi dzhia vhukando o sinyuwa e na mbiti, kanzhi hu vha na masiandoitwa a si avhuḓi, a sa langei. Sa tsumbo, Kaini murwa wa Adamu wa tanzhe, o “sinyuwa vhukuma” nga nṱhani ha uri Yehova o ṱanganedza tshifhiwa tsha Abele, fhedzi a si ṱanganedze tshawe. Ho itea mini? Kaini o mbo ḓi vhulaya murathu wawe o lugaho. (Gen. 4:3-8; Vhahev. 11:4) Kha ri dovhe ri humbule nga ha Davida, ane ha ambiwa uri ndi munna ane a takadza mbilu ya Yehova. (Mish. 13:22) Naho Davida o vha e munna o lugaho, o ṱoḓa u ita tshivhi tshihulwane musi ene na maswole awe vha tshi semiwa nga Nabali wa mupfumi. Davida na maswole awe vho duga nga mbiti, vha “kungela mabanga avho” vho ḓiimisela u vhulaya Nabali na vhanna vhoṱhe vha muṱani wawe. Zwi takadzaho ndi uri Abigaili mufumakadzi wa Nabali, o kona u luvheledza Davida na maswole awe uri vha si ḓilifhedzele. (1 Sam. 25:9-14, 32, 33) Ndi ngazwo Yehova o hevhedza Yakobo uri a ṅwale uri: “U sinyuwa a zwi iti uri muthu a ite zwo lugaho phanḓa ha Mudzimu.”—Yak. 1:20.

⁵ Yehova ha sinyuwi u fana na vhathu vha sa koni u langa mbiti dzavho. U a kona u langa mbiti dzawe nahone zwi a vhonala uri ndi ngani o sinyuwa. Yehova u ita zwithu nga nḓila yo teaho naho o halifha vhukuma. Musi a tshi lwa na maswina awe, ha fhelisi “vhavhuya khathihi na vhavhi.” (Gen. 18:22-25) Zwiṅwe hafhu, Yehova u sinyuwa e na zwiitisi zwi pfalaho. Kha ri vhone zwithu zwivhili zwine zwa ita uri a sinyuwe na zwine ra nga guda khazwo.

6. Yehova u ita mini musi dzina ḽawe ḽi tshi nyadziwa?

⁶ Tsha u thoma: Musi dzina ḽa Mudzimu ḽo nyadziwa. Vhane vha amba uri vha imela Yehova ngeno vha tshi ita zwithu zwivhi, vha mu tshinya dzina nahone zwi a mu sinyusa. (Hesek. 36:23) Samusi ro zwi haseledza kha ndima dzo fhiraho dza yeneyi bugu, lushaka lwa Isiraele lwo nyadzisa dzina ḽa Mudzimu. Zwi tou pfala uri Yehova o sinyuswa nga mavhonele a lwonolwo lushaka na zwiito zwalwo. Fhedzi o langa mbiti dzawe, a kaidza vhathu vhawe nga nḓila yo teaho, ho ngo kaludza zwithu. (Yer. 30:11) Musi Yehova o no kaidza vhathu vhawe, o litsha u sinyuwa.—Ps. 103:9.

7, 8. Ri guda mini kha zwe Yehova a zwi ita kha Vhaisiraele?

⁷ Zwine ra guda: Zwe Yehova a zwi ita kha Vhaisiraele, ndi tsevho ya ndeme kha riṋe. U fana na Vhaisiraele, ri na ndugelo ya u vhidzwa nga dzina ḽa Mudzimu. Ri Ṱhanzi dza Yehova. (Yes. 43:10) Zwine ra zwi amba na u zwi ita, zwi kwama nḓila ine vhathu vha dzhia ngayo Yehova. A ri ṱoḓi u ita tshivhi nga khole, ra semisa dzina ḽa Mudzimu. Arali ra vha na muhoyo, ra tshila nga yeneyo nḓila, zwi ḓo sinyusa Yehova nahone zwi ḓo ita uri a dzhie  vhukando u itela u tsireledza dzina ḽawe uri ḽi si nyadziwe.—Vhahev. 3:13, 15; 2 Pet. 2:1, 2.

⁸ Naa u ḓivha uri Yehova u a “sinyuwa” zwi fanela u ita uri ri si ṱoḓe u vha na vhushaka ha tsini nae? Hai. Ri a zwi ḓivha uri Yehova ha fheli mbilu nahone u a hangwela. (Yes. 55:7; Vharoma 2:4) Fhedzi ri dovha ra ḓivha uri Yehova ndi Mudzimu ane a kaidza musi zwo tea. Fhedzi ri a mu ṱhonifha nga nḓila yo teaho, ri tshi ḓivha uri u ḓo sinyutshela vhane vha ita tshivhi nga khole na uri ha nga vha tendeli vha tshi dzula vhe vhukati ha vhathu vhawe. (1 Vhakor. 5:11-13) Yehova o ri vhudza zwine zwa mu sinyusa. Ri tea u khetha riṋe vhaṋe u iledza u ita zwithu zwine zwa mu sinyusa.—Yoh. 3:36; Vharoma 1:26-32; Yak. 4:8.

9, 10. Yehova u ita mini musi vhathu vhawe vha fhulufhedzeaho vha tshi shushedzwa? Ṋeani tsumbo.

⁹ Tsha vhuvhili: Musi vhathu vha Yehova vha fhulufhedzeaho vha tshi shushedzwa. Yehova u a sinyuwa musi maswina a tshi ṱhasela vhathu vha fhulufhedzeaho vhane vha ṱoḓa u tsireledzwa ngae. Sa tsumbo, musi Vhaisiraele vho no ṱuwa Egipita, Farao na mmbi yawe i re na maanḓa vho vha pandamedza u swika Lwanzheni Lutswuku, he Vhaisiraele vha vha vha tshi vhonala vha sa koni u ḓilwela. Fhedzi musi yeneyo mmbi i re na maanḓa i tshi pandamedza Vhaisiraele vhukati ha lwanzhe lwo omaho, Yehova o ṱomola malinga a gariki dzavho dza nndwa, a ita uri vha kumbiwe lwanzheni. “A hu na na muthihi wavho we a tshila.” (Ek. 14:25-28) Yehova u funa vhathu vhawe nga ‘lufuno lu sa shanduki,’ ndi ngazwo o sinyutshela Vhaegipita.—Vhalani Ekisodo 15:9-13.

¹⁰ Nga nḓila i fanaho, Yehova o dzhia vhukando misini ya Khosi Hiskia nga nṱhani ha uri u funa vhathu vhawe. Mmbi ya Vhaasuri i re na maanḓa na tshiṱuhu, yo ḓa Yerusalema u itela u ṱhasela wonoyo muḓi. Vhaasuri vho shushedza vhashumeli vha Yehova vha fhulufhedzeaho nga u tanga wonoyo muḓi. Zwenezwo zwo vha zwi tshi ḓo ita uri vha fe nga nḓila i vhavhaho. (2 Dzikh. 18:27) Yehova o rumela muruṅwa muthihi fhedzi, we a vhulaya maswole a 185 000 nga vhusiku vhuthihi! (2 Dzikh. 19:34, 35) Edzani u humbula uri ho vha hu hani gammbani ya Vhaasuri nga ḓuvha ḽi tevhelaho! Mapfumo, zwiṱangu na mabanga zwo sokou balangana. Hu si na phalaphala dza u vha vusa. Hu si na ane a khou vhudza maswole zwine a tea u zwi ita. Ho vha ho sokou ṅoo! Zwitumbu zwo sokou balangana.

11. Tsumbo dzi re Maṅwaloni dza zwe Yehova a zwi ita musi vhathu vhawe vha tshi shushedzwa, dzi ri khuthadza hani na u ita uri ri vhe na tshivhindi?

¹¹ Zwine ra guda: Dzenedzo tsumbo dzi sumbedzaho vhukando he Yehova a vhu dzhia musi vhathu vhawe vha tshi shushedzwa, dzi ṋea maswina ashu tsevho i tevhelaho: “Zwi a ofhisa u wela zwanḓani zwa Mudzimu a tshilaho” musi o sinyuswa. (Vhahev. 10:31) Kha riṋe vhashumeli vha Mudzimu, dzenedzo tsumbo dzi a ri khuthadza na u ita uri ri vhe na tshivhindi. Zwi a ri khuthadza u ḓivha uri Saṱhane ane a vha swina ḽashu ḽihulwane, ha nga bveleli. Hu si kale, “tshifhinga” tshawe “tshiṱuku” tsha u vhusa tshi ḓo  fhela! (Nzumb. 12:12) Musi ro lindela tshenetsho tshifhinga tshi tshi fhela, ri nga shumela Yehova nga tshivhindi, ri tshi fhulufhela uri a hu na muthu, tshiimiswa kana muvhuso une wa nga ri thivhela u ita zwine Mudzimu a zwi funa. (Vhalani Phisalema ya 118:6-9.) Muapostola Paulo o sumbedza fhulufhelo ḽine ra vha naḽo nga u amba zwi tevhelaho, o ri: “Arali Mudzimu a tshi ima na riṋe, ndi nnyi ane a nga lwa na riṋe?”—Vharoma 8:31.

12. Nga maṱungu mahulu, ndi mini zwine zwa ḓo ita uri mbiti dza Yehova dzi duge?

¹² Nga maṱungu mahulu, Yehova u ḓo dzhia vhukando a ri tsireledza, u fana na nḓila ye a tsireledza ngayo Vhaisiraele musi vha tshi pandamedzwa nga Vhaegipita na musi a tshi tsireledza Vhayuda musi Vhaasuri vho tanga muḓi wa Yerusalema. Musi maswina ashu a tshi lingedza u ri fhelisa, Yehova u ḓo sinyuwa vhukuma ngauri u a ri funa nga maanḓa. Vhane vha ḓo ita zwa vhutsilu vha ri ṱhasela, zwi ḓo tou nga vha khou kwama ḽiṱo ḽa Yehova. U ḓo dzhia vhukando nga u bonya ha iṱo. (Sak. 2:8, 9) Hu ḓo vha na bulayo ḽi sa athu u vhonwa. Fhedzi maswina a Mudzimu ha nga mangali musi Yehova a tshi a sinyutshela. Ndi ngani?

13. Yehova o sevha vhathu uri mini?

¹³ Yehova ha “ṱavhanyi u sinyuwa” nahone o tsivhudza vhathu lunzhi uri u ḓo fhelisa vhoṱhe vhane vha mu hanedza na vhane vha shushedza vhathu vhawe. (Ek. 34:6, 7) Yehova o shumisa vhaporofita vha ngaho Yeremia, Hesekiele, Daniele na Yesu Kristo, u katela na vhaapostola vha ngaho Petro, Paulo na Yohane, u itela u sevha vhathu nga ha nndwa khulwane ya u fhedza.—Sedzani bogisi “Yehova U Tsivhudza Vhathu Nga Ha Nndwa Khulwane Ine Ya Khou Ḓa.”

14, 15. Yehova o ita mushumo ufhio nahone ndi ngani?

¹⁴ Yehova o ita uri dzenedzi tsevho dzi ṅwalwe Ipfini ḽawe. O dovha a ita vhungoho ha uri Bivhili i vhe bugu yo ṱalutshedzelwaho nga nyambo nnzhi na u phaḓaladzwa u fhira bugu dzoṱhe. Ḽifhasini ḽoṱhe, hu na vhathu vhanzhi vhane vha mu shumela nga u ḓifunela, vhane vha thusa vhaṅwe uri vha vhe na vhushaka havhuḓi na Mudzimu na u tsivhudza vhathu nga ha u ḓa ha “ḓuvha ḽihulu ḽa Yehova.” (Tsef. 1:14; Ps. 2:10-12; 110:3) O ṱuṱuwedza  vhathu vhawe uri vha ṱalutshedzele khandiso dzine dza thusa vhathu u guda Bivhili nga nyambo nnzhi. Vha dovha vha fhedza awara nnzhi ṅwaha muṅwe na muṅwe vha tshi khou vhudza vhathu nga ha zwe Mudzimu a zwi fhulufhedzisa na tsevho dzi re Ipfini ḽawe.

¹⁵ Yehova o ita uri wonoyo mushumo woṱhe u itwe “ngauri ha ṱoḓi na muthihi a tshi fheliswa, fhedzi u tama vhoṱhe vha tshi rembuluwa.” (2 Pet. 3:9) Ri na ndugelo khulwane ya u vhudza vhathu nga ha Mudzimu washu a re na lufuno, a sa fheli mbilu na u shela mulenzhe kha u phaḓaladza mulaedza wawe! Fhedzi hu si kale, vhane vha hana u thetshelesa dzenedzi tsevho vha ḓo kovhelelwa nga ḓuvha.

16, 17. Naa Yehova o vhea ḓuvha ḽa nndwa ya u fhedza? Ṱalutshedzani.

¹⁶ Yehova o vhea ḓuvha ḽa nndwa ya u fhedza. U a zwi ḓivha uri vhathu vhawe vha ḓo ṱhaselwa lini. (Mat. 24:36) Yehova u ḓivha hani tshifhinga tshine maswina awe a ḓo vha ṱhasela ngatsho?

¹⁷ Samusi ro zwi vhona kha ndima yo fhiraho ya yeneyi bugu,  Yehova u vhudza Gogo zwi tevhelaho: “Ndi ḓo . . . dzhenisa huka mulomoni wau.” Musi tshaka dzi tshi thoma u ṱhasela, zwi ḓo ita uri hu thome nndwa ya Haramagedo. (Hesek. 38:4) Hezwi a zwi ambi uri Yehova ndi ene ane a ḓo thoma yeneyi nndwa kana uri u ḓo tou kombetshedza vha mu pikisaho uri vha lwe. Fhedzi zwi sumbedza uri Yehova u a kona u vhona zwi re mbiluni nahone u a ḓivha zwine maswina awe a ḓo zwi ita nga tshenetsho tshifhinga.—Ps. 94:11; Yes. 46:9, 10; Yer. 17:10.

18. Ndi ngani vhathu vha tshi ḓo lwa na Ramaanḓaoṱhe?

¹⁸ Arali hu si Yehova ane a ḓo thoma nndwa kana u kombetshedza maswina awe uri a lwe, ndi ngani vhathu vha tshi ḓo ṱoḓa u lwa na Ramaanḓaoṱhe nga dzawe? Tshiṅwe tshiitisi ndi tsha uri nga tshenetsho tshifhinga, khamusi vha ḓo vha vho ḓivhudza uri a hu na Mudzimu kana uri ha nga dzheneleli kha zwine vhathu vha zwi ita. Khamusi vha ḓo humbula zwenezwo ngauri vha ḓo vha vha tshi kha ḓi bva u fhelisa zwiimiswa zwoṱhe zwa vhurereli ha mazwifhi kha ḽifhasi. Vha nga humbula uri arali Mudzimu e hone zwa vhukuma, o vha a tshi ḓo vha o lwela zwiimiswa zwine zwa amba uri zwi imela Mudzimu. A vha nga zwi ḓivhi uri ndi  Mudzimu o itaho uri vha humbule u fhelisa vhurereli he ha mu tshinya dzina.—Nzumb. 17:16, 17.

19. Hu nga kha ḓi itea mini musi vhurereli ha mazwifhi ho no fheliswa?

¹⁹ Musi vhurereli ha mazwifhi ho no fheliswa, Yehova a nga kha ḓi ita uri vhathu vhawe vha ḓivhadze mulaedza u sa takadzi. Kha bugu ya Nzumbululo, wonoyo mulaedza u fanyiswa na matombo a tshifhango ane ḽithihi ḽao ḽa lemela khilogramu dza 20. (Nzumb. 16:21, ṱms.) Wonoyu mulaedza une khamusi wa ḓo vha u tshi khou ḓivhadza uri hu ḓo fheliswa mivhuso ya politiki na zwa mabindu, u ḓo vhaisa vhathetshelesi lune vha ḓo sema Mudzimu. Zwi vhonala uri wonoyu mulaedza u ḓo sinyusa dzitshaka, dza lingedza u fhelisa vhathu vha Mudzimu lwa tshoṱhe uri vha si tsha dovha vha amba nga hawo. Dzi ḓo humbula uri a ri koni u ḓilwela na uri zwi a leluwa u ri fhelisa. Dzi ḓo vha dzo khakha nga maanḓa!

20, 21. Gogo ndi nnyi, nahone hu ḓo itea mini khae?

²⁰ Samusi ro zwi vhona kha Ndima 17 ya yeneyi bugu, musi Hesekiele a tshi amba nga ha tshaka dzine dza ḓo ṱhasela vhathu vha Mudzimu, o shumisa maipfi ane a ri, “Gogo wa ngei shangoni ḽa Magogo.” (Hesek. 38:2) Fhedzi dzenedzo tshaka dzi ḓo vha dzi si na vhuthihi. Naho dzenedzo tshaka dzi tshi ḓo vhonala u nga dzi khou shumisana, dzi ḓo bvela phanḓa dzi tshi ṱaṱisana, u ḓihudza na u vha na vhuhovheleli. Zwi ḓo lelutshela Yehova u ita uri muṅwe na muṅwe wavho a thome u “lwa na wahawe.” (Hesek. 38:21) Fhedzi dzenedzo tshaka a dzi nga fheliswi nga vhathu.

²¹ Musi maswina ashu a sa athu u fheliswa, a ḓo vhona tshiga tsha Murwa muthu. Khamusi a ḓo vhona maanḓa a songo ḓoweleaho a Yehova na Yesu. Vhapikisi vha ḓo vhona zwithu zwine zwa ḓo vha vhilaedzisa vhukuma. Samusi Yesu o zwi amba, “vhathu vha ḓo ṋoka nga nyofho na u lindela zwithu zwine zwa ḓo itea kha ḽifhasi.” (Luka 21:25-27) Vha ḓo tshuwa musi vha tshi ṱhogomela uri a vho ngo humbula zwavhuḓi musi vha tshi ṱhasela vhathu vha Yehova. Vha ḓo kombetshedzea u tenda uri Yehova ndi Musiki. Vha ḓo ḓivha na uri ndi Yehova wa mavhuthu ane a langa mmbi i re ṱaḓulu. (Ps. 46:6-11; Hesek. 38:23) Zwi tou pfala uri musi Yehova a tshi fhelisa maswina awe, u ḓo shumisa mmbi dza ṱaḓulu na mupo u tshinyadzaho. U ḓo zwi ita nga nḓila ine vhashumeli vhawe vha fhulufhedzeaho vha ḓo sala vho tsireledzea.—Vhalani 2 Petro 2:9.

22, 23. Ndi vhafhio vhane vha ḓo tsireledza vhathu vha Mudzimu, nahone vha ḓo ḓipfa hani nga mushumo wavho?

²² Humbulani nga ha nḓila ine Yesu a ḓo vha o ḓiimisela ngayo u ranga phanḓa kha u lwa na maswina a Mudzimu. U ḓo tsireledza vhane vha funa na u shumela Khotsi awe. Dovhani ni humbule nḓila ine vhaḓodzwa vha ḓo ḓipfa ngayo nga tshenetsho tshifhinga. Musi nndwa ya Haramagedo i sa athu u thoma, vhaḓodzwa vhane vha ḓo vha vha tshi kha ḓi vha kha ḽifhasi, vha ḓo iswa ṱaḓulu u itela uri vhoṱhe vha 144 000 vha vhe na Yesu nndwani.  (Nzumb. 17:12-14) A zwi timatimisi uri vhaḓodzwa vhanzhi vha ḓo vha vho no vha na vhukonani ha tsini-tsini na vha dziṅwe nngu, samusi vho shumisana navho maḓuvhani a vhufhelo. Nga tshenetsho tshifhinga, vhaḓodzwa vha ḓo vha vhe na maanḓa a u lwela vhe vha vha tikedza nga u fhulufhedzea musi vha tshi lingwa.—Mat. 25:31-40.

²³ Vharuṅwa na vhone vha ḓo vha tshipiḓa tsha mmbi ya Yesu ya ṱaḓulu. (2 Vhathes. 1:7; Nzumb. 19:14) Vho no ḓi mu thusa u pandela Saṱhane na madimoni awe ṱaḓulu. (Nzumb. 12:7-9) Vho dovha vha thusa u kuvhanganya vhane vha ṱoḓa u shumela Yehova kha ḽifhasi. (Nzumb. 14:6, 7) Zwi ḓo vha zwo tea vhukuma uri Yehova a tendele vharuṅwa vha tshi tsireledza vhenevho vhathu vha fhulufhedzeaho! Zwa ndeme vhukuma, vhoṱhe vha re kha mmbi ya Yehova vha ḓo ḓipfa vho huliswa nga u ita uri dzina ḽa Yehova ḽi vhe ḽikhethwa na u sumbedza uri ndi ene o tewaho nga u vhusa. Vha ḓo ita zwenezwo nga u thusa musi a tshi fhelisa maswina awe.—Mat. 6:9, 10.

24. Vha Gogo ḽihulu ḽa vha dziṅwe nngu vha ḓo ḓipfa hani?

²⁴ Hu ḓo vha hu si na ṱhoḓea ya uri vha gogo ḽihulu ḽa vha dziṅwe nngu vha tetemele nga nyofho, nga nṱhani ha uri vha ḓo tsireledzwa nga mmbi yo ḓiimiselaho i re na maanḓa. Vha ḓo “[vha] na maanḓa na tshivhindi ngauri u vhofhololwa [havho] hu tsini.” (Luka 21:28) Ndi zwa ndeme vhukuma uri musi ḓuvha ḽa Yehova ḽi sa athu swika, ri thuse vhanzhi nga hune zwa nga konadzea ngaho uri vha ḓivhe na u funa Khotsi ashu ane a khathutshela na u ri tsireledza!—Vhalani Tsefanya 2:2, 3.

25. Ri ḓo haseledza mini kha ndima i tevhelaho?

²⁵ Musi ho vha na nndwa, hu sala hu na pfudzungule nahone vhathu vho hanganea. Fhedzi nga murahu ha nndwa ya Haramagedo, zwithu zwi ḓo sala zwo dzudzanyea nahone vhathu vho takala. Zwithu zwi ḓo vha hani musi mbiti dza Yehova dzo no dzika, mabanga a mmbi yawe o no vhuyelela vhudzuloni hao, ho no dzika hu si tsha lwiwa? Ri ḓo guda nga ha honoho vhumatshelo kha ndima i tevhelaho.