1-3. Yehova o vha a tshi ṱoḓa uri Hesekiele a vhone mini thembeleni ya Yerusalema, nahone ndi ngani? (Sedzani marangaphanḓa a Tshipiḓa 2.)

MUPOROFITA Hesekiele o vha a tshi ḓivha zwavhuḓi Mulayo wa Mushe samusi e murwa wa tshifhe. O ḓowela thembele ya Yerusalema na vhurabeli ho kunaho he ha vha vhu hone henefho. (Hesek. 1:3; Maḽ. 2:7) Fhedzi zwino nga 612 B.C.E., zwine zwa khou itea thembeleni ya Yehova zwi nga ofhisa Muyuda muṅwe na muṅwe a fhulufhedzeaho, u katela na Hesekiele.

² Yehova u ṱoḓa uri Hesekiele a vhone zwenezwi zwithu zwi nengisaho zwine zwa khou itwa thembeleni. O vha a tshi dovha a ṱoḓa uri zwe a zwi vhona, a zwi vhudze “vhahulwane vha Yuda” na Vhayuda vhe a thubiwa navho vho kuvhanganaho nḓuni yawe. (Vhalani Hesekiele 8:1-4; Hesek. 11:24, 25; 20:1-3) Yehova o shumisa muya wawe mukhethwa, a ita uri Hesekiele a vhone (kha bono) zwine zwa khou itea Yerusalema e nḓuni yawe i re Thele-abibi tsini na mulambo wa Kebara, kha ḽa Babele. Nnḓu yawe yo vha i vhukovhela, kule nga maanḓa na Yerusalema. Yehova o vhea onoyu muporofita thembeleni, khoroni ya devhula ya muṱa wa nga ngomu. Musi e henefho, Yehova a thoma u mu sumbedza thembele yoṱhe kha bono.

³ Zwino Hesekiele u vhona zwiitea zwiṋa zwi ofhisaho zwi sumbedzaho  nḓila ye vhurabeli ho kunaho ha tshikafhadzwa ngayo kha lushaka. Ho vha ho itea mini kha vhurabeli ha Yehova ho kunaho? Ḽeneḽi bono ḽi ri kwama hani? Kha ri ḓivhone ri tshi khou sumbedzwa yeneyo thembele na Hesekiele. Fhedzi ri fanela u thoma ra ḓivha zwine Yehova a zwi lavhelela kha vhagwadameli vhawe.

4. Yehova u ṱoḓa mini kha vhagwadameli vhawe?

⁴ Maḓanani a miṅwaha i ṱoḓaho u vha 9 Hesekiele a sa athu u vha hone, Yehova o vha o amba zwa pfala uri u ṱoḓa mini kha vhagwadameli vhawe. Kha Mulayo wawe wa vhuvhili kha ya Fumi, o vhudza Vhaisiraele a ri: * “Nṋe Yehova Mudzimu wau ndi Mudzimu ane a ṱoḓa u tshi ḓikumedza tshoṱhe khae.” (Ek. 20:5) Musi Yehova a tshi amba nga ha u “ḓikumedza tshoṱhe khae,” o vha a tshi khou sumbedza uri a nga si vhuye a tenda hu tshi gwadamelwa miṅwe midzimu. Samusi ro zwi vhona kha Ndima 2 ya yeneyi bugu, tshithu tsha u thoma tshine tsha ṱoḓea kha vhurabeli ho kunaho ndi uri hu tea u vha Yehova fhedzi ane ra tea u ḓikumedza khae. Vhane vha mu gwadamela vha tea u mu dzhia e wa ndeme u fhira zwithu zwoṱhe vhutshiloni havho. (Ek. 20:3) Nga maṅwe maipfi, Yehova u lavhelela uri vhane vha mu gwadamela vha dzule vho kuna nga u sa ṱanganya vhurabeli ha ngoho na ha mazwifhi. Nga 1513 B.C.E., Vhaisiraele vho vhofha mulanga wa Mulayo nga u ḓifunela. Nga u ita zwenezwo, vho tenda u ḓikumedza kha Yehova e eṱhe. (Ek. 24:3-8) Yehova u a fhulufhedzea kha mulanga une a u vhofha na vhathu, u dovha a lavhelela uri vhane a vhofha navho mulanga na vhone vha fhulufhedzee.—Dot. 7:9, 10; 2 Sam. 22:26.

5, 6. Ndi ngani Vhaisiraele vho vha vha tshi tea u ḓikumedza tshoṱhe kha Yehova fhedzi?

⁵ Naa zwo vha zwi tshi pfala uri Yehova a ṱoḓe uri Vhaisiraele vha gwadamele ene fhedzi? Ee zwo vha zwi tshi pfala! Nga nṱhani ha uri ndi ene Mudzimu Ramaanḓaoṱhe, ndi Muvhusahoṱhe, ndi Tshisima tsha vhutshilo na Mutikedzi waho. (Ps. 36:9; Mish. 17:28) Yehova o vha a tshi dovha a vha Muvhofhololi wa Vhaisiraele. Musi a tshi vha ṋea Milayo ya Fumi, o vha humbudza uri: “Ndi nṋe Yehova Mudzimu wau, we a u bvisa shangoni ḽa Egipita, nḓuni ya vhupuli.” (Ek. 20:2) Zwi tou pfala uri zwo vha zwo tea uri Vhaisiraele vha gwadamele Yehova fhedzi.

⁶ Yehova ha shanduki. (Maḽ. 3:6) Ndi kale a tshi ṱoḓa uri vhathu vha ḓikumedze tshoṱhe khae. Edzani u humbula nḓila ye a ḓipfa ngayo nga zwiitea zwiṋa zwi nengisaho zwe a zwi sumbedza Hesekiele kha bono.

7. (a) Vhayuda vho guneaho vho vha vha tshi khou ita mini khoroni ya devhula ya thembele, nahone Yehova o ḓipfa hani? (Sedzani tshifanyiso tsha u thoma.) (b) Yehova o vha na vivho nga nḓila-ḓe? (Sedzani ṱhaluso i re magumoni a siaṱari 2.)

⁷ Vhalani Hesekiele 8:5, 6. Hesekiele u fanela u vha o mangala! Vhayuda vho guneaho vho vha vha tshi khou gwadamela mudzimu wa tshifanyiso khoroni ya devhula ha thembele. Khamusi yo vha i thanda khethwa i imelaho Ashera, mudzimukadzi we Vhakanana vha  mu dzhia e mufumakadzi wa Baali. Vhenevho Vhaisiraele vhe vha gwadamela mudzimu wa tshifanyiso, a vho ngo fhulufhedzea kha mulanga we vha u vhofha na Yehova. Nga nṱhani ha uri vho gwadamela mudzimu wa tshifanyiso nṱhani ha u gwadamela Yehova fhedzi, vho mu sinyusa; vha dzikusa mbiti dzawe. * (Dot. 32:16; Hesek. 5:13) Edzani u humbula: Yehova o vha e fhethu hukhethwa ha thembele miṅwaha i fhiraho 400. (1 Dzikh. 8:10-13) Fhedzi zwino, vhe vha ḓisa midzimu ya zwifanyiso thembeleni, vho ita zwithu zwe zwa ita uri Yehova ‘a ṱutshele nnḓu khethwa yawe.’

8. Bono ḽa Hesekiele ḽa tshifanyiso tshine tsha sinyusa Mudzimu ḽi ri kwama hani?

⁸ Bono ḽa Hesekiele ḽa tshifanyiso tshine tsha sinyusa Mudzimu ḽi ri kwama hani? Vhayuda vho guneaho vha ri humbudza Vhurereli ha Mazwifhi. Vha re kha Vhurereli ha Mazwifhi vha amba uri vha gwadamela Mudzimu, fhedzi Mudzimu ha ṱanganedzi nḓila ine vha mu gwadamela ngayo ngauri vha gwadamela midzimu ya zwifanyiso. Samusi Yehova a sa shanduki, ri nga vha na vhungoho ha uri Vhurereli ha Mazwifhi vhu dzikusa mbiti dzawe, samusi na Vhayuda vho guneaho vho mu sinyusa. (Yak. 1:17) Zwi tou vha khagala uri Yehova u kule vhukuma na Vhurereli ha Mazwifhi!

9, 10. Ri nga guda mini kha vhe vha gwadamela midzimu ya zwifanyiso thembeleni?

⁹ Ri nga guda mini kha vhe vha gwadamela midzimu ya zwifanyiso thembeleni? Arali ri tshi ṱoḓa u ḓikumedza kha Yehova e eṱhe, a ro ngo fanela u “rabela midzimu ya zwifanyiso.” (1 Vhakor. 10:14) Ri nga ḓivhudza uri, ‘Nṋe ndi nga si vhuye nda shumisa zwifanyiso kana zwiga musi ndi tshi gwadamela Yehova!’ Fhedzi u gwadamela midzimu ya zwifanyiso zwi nga itwa nga nḓila dzo fhambanaho, dziṅwe a dzi vhonali ngeno dziṅwe dzi khagala. Iṅwe bugu yo amba uri: “U dzhia tshiṅwe tshithu tshi tsha ndeme u fhira u gwadamela Mudzimu, zwi fana na u gwadamela midzimu ya zwifanyiso.” U gwadamela midzimu ya zwifanyiso zwi nga katela u funesa zwithu zwi vhonalaho, tshelede, zwa vhudzekani, u ḓimvumvusa kana tshiṅwe na tshiṅwe tshine tsha nga ita uri ri si tsha dzhia u ḓikumedza hashu kha Yehova zwi zwa ndeme. (Mat. 6:19-21, 24; Vhaef. 5:5; Vhakol. 3:5) Ri fanela u ḓilinda uri ri si gwadamele midzimu ya zwifanyiso nga nḓila naho i ifhio ngauri ndi Yehova e eṱhe o fanelwaho nga u gwadamelwa!—1 Yoh. 5:21.

¹⁰ Kha tshiitea tsha u thoma, Yehova o sumbedza Hesekiele “zwithu zwi ofhisaho na zwi nengisaho.” Fhedzi Yehova o vhudza onoyu muporofita a fhulufhedzeaho a ri: “U ḓo vhona zwithu zwi nengisaho zwine zwa ofhisa vhukuma.” Ndi zwifhio zwiṅwe zwi ofhisaho u fhira u gwadamela mudzimu wa tshifanyiso tshine tsha sinyusa Mudzimu thembeleni?

11. Hesekiele o vhona zwithu zwifhio zwi nengisaho musi o no dzhena muṱani wa nga ngomu u re tsini na aḽeṱare ya thembele?

¹¹ Vhalani Hesekiele 8:7-12. Hesekiele o phula buli kha luvhondo, a dzhena muṱani wa nga ngomu u re tsini na aḽeṱare. Musi e henefho, a vhona zwifanyiso zwo korwaho kha luvhondo zwi ofhisaho zwa “zwikokovhi na zwivhanda zwi nengisaho na midzimu yoṱhe ya  zwifanyiso i nengisaho.” * Zwenezwo zwifanyiso zwo korwaho kha luvhondo, zwo vha zwi tshi imela midzimu ya mazwifhi. Zwiṅwe zwi ofhisesaho zwe Hesekiele a zwi vhona ndi: “Vhahulwane vha 70 vha nnḓu ya Isiraele” vho ima “swiswini,” vha tshi khou dubisela midzimu ya mazwifhi zwioro. U ya nga Mulayo, u fhisa zwioro zwi nukhelelaho zwo vha zwi tshi imela thabelo dzi ṱanganedzwaho dza vhagwadameli vha Mudzimu vha fhulufhedzeaho. (Ps. 141:2) Fhedzi zwioro zwe vhenevho vhahulwane vha 70 vha vha vha tshi khou zwi ṋekedza kha midzimu ya mazwifhi, zwo vha zwi munukho u si wavhuḓi kha Yehova. Thabelo dzavho dzo vha dzi tshi nga munukho u sa takadzi. (Mir. 15:8) Vhenevho vhahulwane vho ḓifhura vha ḓivhudza uri: “Yehova ha ri vhoni.” Fhedzi Yehova o vha vhona, a sumbedza Hesekiele zwe vha vha vha tshi khou ita thembeleni Yawe!

12. Ndi ngani ri tshi fanela u dzula ri tshi fhulufhedzea naho ri sa vhonwi nga vhaṅwe, nahone ndi vhafhio vhane zwihuluhulu vha fanela u vhea tsumbo yavhuḓi?

¹² Ri nga guda mini kha mafhungo a Hesekiele a vhenevho vhahulwane vha 70 vha Vhaisiraele vho dubiselaho midzimu ya mazwifhi zwioro? U itela uri Mudzimu a pfe thabelo dzashu na uri vhurabeli hashu vhu dzule ho kuna phanḓa hawe, ri fanela u dzula ri tshi fhulufhedzea na musi ri “swiswini” kana ri sa vhonwi nga vhaṅwe. (Mir. 15:29) Ri songo hangwa uri Yehova u vhona zwoṱhe zwine ra zwi ita. Arali Yehova e wa vhukuma kha riṋe, a ri nga iti tshithu na tshithihi tshine tsha mu sinyusa naho ri sa vhonwi nga vhaṅwe.  (Vhahev. 4:13) Ndi zwa ndeme uri vhahulwane vha tshivhidzo vha vhe tsumbo yavhuḓi kha nḓila ine Mukriste a tea u tshila ngayo. (1 Pet. 5:2, 3) Zwi tou pfala uri tshivhidzo tshi lavhelela uri muhulwane wa tshivhidzo ane a tshi ranga phanḓa a tshile u tendelana na zwine zwa funzwa nga Bivhili. U tea u zwi ita naho e “swiswini” kana vhaṅwe vha sa mu vhoni.—Ps. 101:2, 3.

13. Hesekiele o vhona vhafumakadzi vho guneaho vha tshi khou ita mini kha iṅwe ya khoro dza thembele?

¹³ Vhalani Hesekiele 8:13, 14. Nga murahu ha zwiitea zwivhili zwi nengisaho zwa u thoma, Yehova o dovha a vhudza Hesekiele uri: “U ḓo vhona zwithu zwi nengisaho zwine zwa ofhisa vhukuma u fhira zwine vha khou zwi ita.” Hesekiele o dovha a vhona mini? “Kha muṋango wa khoro ya devhula ya nnḓu ya Yehova,” o vhona “vhafumakadzi vho dzula vha tshi khou lilela mudzimu ane a pfi Thamusi.” Thamusi ane a vha mudzimu wa Mesopotamia, u vhidzwa Dumusi kha maṅwalwa a Sumeria. Hu ambiwa uri ndi mudzimu we vha a tshi funa Ishtara ane a vha mudzimukadzi wa mbebo. * Zwi tou vha khagala uri u lila ha vhafumakadzi vha Vhaisiraele ho vha hu muṅwe mukhuvha u tshimbidzanaho na lufu lwa Thamusi. Nga u lilela Thamusi thembeleni ya Yehova, vhenevho vhafumakadzi vho vha vha tshi khou ita mukhuvha wa vhurereli fhethu ha vhurabeli ho kunaho. Fhedzi naho wonoyo mukhuvha wa vhurereli ha mazwifhi wo itelwa thembeleni ya Mudzimu, a zwi ambi uri Mudzimu o zwi ṱanganedza. Ndi ngani? Ndi ngauri kha Yehova, vhenevho vhafumakadzi vho guneaho vho vha vha tshi khou ita “zwithu zwi nengisaho”!

14. Ri nga guda mini kha nḓila ye Yehova a dzhia ngayo zwe vhenevho vhafumakadzi vho guneaho vha zwi ita?

¹⁴ Ri nga guda mini kha nḓila ye Yehova a dzhia ngayo zwe vhenevho vhafumakadzi vha zwi ita? U itela uri vhurabeli hashu vhu dzule ho kuna, a ro ngo tea u vhuya ra vhu ṱanganyisa na mikhuvha i songo kunaho ya vhurereli ha mazwifhi. Ndi ngazwo ri songo tea u pembelela zwithu zwo thomiwaho nga vhurereli ha mazwifhi. Naa zwi na ndavha uri zwo thoma ngafhi? Ee! Ṋamusi zwiṅwe zwithu zwine zwa itwa nga holodei dzi ngaho Khirisimusi na Easter, zwi nga vhonala zwi si na khombo. Fhedzi ri songo hangwa uri Yehova u a zwi ḓivha uri zwithu zwine vhathu vha zwi ita musi vha tshi pembelela dziholodei, ndi kale zwi hone nahone zwi bva kha vhurereli ha mazwifhi. Naho hu kale vhathu vha tshi ṱanganela kha yeneyi mikhuvha kana u i ṱanganyisa na vhurabeli ho kunaho, a zwi ambi uri Yehova u a zwi ṱanganedza.—2 Vhakor. 6:17; Nzumb. 18:2, 4.

15, 16. Vhanna vha 25 vho vha vha tshi khou ita mini muṱani wa nga ngomu thembeleni, nahone ndi ngani zwiito zwavho zwo sinyusa Yehova nga maanḓa?

¹⁵ Vhalani Hesekiele 8:15-18. Yehova o sumbedza Hesekiele tshiitea tsha vhuṋa tshine tsha vha tsha u fhedza nga u amba maipfi e zwino ra a ḓowela, o ri: “U ḓo vhona zwithu zwi nengisaho zwine zwa ofhisa vhukuma u fhira zwenezwi.” Khamusi onoyo muporofita  o ḓivhudzisa uri: ‘Ndi zwifhio zwithu zwi ofhisaho zwine zwa nga fhira zwe nda zwi vhona?’ Zwino Hesekiele o vha e muṱani wa nga ngomu thembeleni. Henefho muṋangoni wa thembele, a vhona vhanna vha 25 vha tshi khou gwadamela “ḓuvha vhe thungo ya vhubvaḓuvha.” Vhenevho vhanna vho sinyusa Yehova nga maanḓa. Nga nḓila-ḓe?

¹⁶ Vhonani zwenezwi nga maṱo a muhumbulo: Muṋango wa thembele ya Mudzimu wo vha wo sedza vhubvaḓuvha. Vhane vha dzhena thembeleni vha vha vho sedza vhukovhela, vho furalela ḓuvha ḽi re vhubvaḓuvha. Fhedzi vhanna vha 25 vha re kha bono, vho vha vho “furalela thembele” nga miṱana yavho vho sedza vhubvaḓuvha uri vha kone u gwadamela ḓuvha. Zwenezwo zwo vha zwi tshi sumbedza uri vho furalela Yehova ngauri yeneyo thembele yo vha i “nnḓu ya Yehova.” (1 Dzikh. 8:10-13) Vhenevho vhanna vha 25 vho vha vhe vhagunei. Vho nyadza Yehova, vha pfuka mulayo wo ṅwalwaho kha Dotoronomio 4:15-19. Vho sinyusa Mudzimu ane a vha ene fhedzi o tewaho nga u gwadamelwa!

17, 18. (a) Ri nga guda mini kha vhathu vho gwadamelaho ḓuvha thembeleni? (b) Ndi vhushaka vhufhio he Vhaisiraele vho guneaho vha vhu tshinya, nahone nga nḓila-ḓe?

¹⁷ Ri nga guda mini kha vhenevho vhathu vho gwadamelaho ḓuvha? U itela uri vhurabeli hashu vhu dzule ho kuna, ri fanela u ḓitika nga Yehova uri ri kone u pfesesa na u vha na vhuṱali. Ri songo hangwa uri, “Yehova Mudzimu ndi ene ḓuvha,” Ipfi ḽawe ndi “tshedza” tsha nḓila yashu. (Ps. 84:11; 119:105) Yehova u ri ṋea vhuṱali a tshi shumisa Ipfi ḽawe na khandiso dzine ra dzi wana ndanguloni. Zwenezwi zwi ḓo ri thusa uri ri dzhie phetho dza vhuṱali, uri ri tshile ro takala zwino na uri ri wane vhutshilo vhu sa fheli tshifhingani tshi ḓaho. Arali ra ṱoḓa uri nḓila ine ra tshila ngayo i vhonetshelwe nga ḽino shango, ri ḓo vha ri tshi khou furalela Yehova. Zwenezwo zwi nga mu sinyusa nga maanḓa, zwa mu vhaisa mbilu. A ri ṱoḓi u vhaisa Mudzimu washu nga yeneyo nḓila! Bono ḽa Hesekiele ḽi dovha ḽa ri tsivhudza uri ri iledze vhane vha furalela ngoho kana vhagunei.—Mir. 11:9.

¹⁸ Samusi ro zwi vhona u swika zwino, Hesekiele o vhona zwiitea zwiṋa zwi ofhisaho zwa vhathu vha tshi gwadamela midzimu ya zwifanyiso na vhurereli ha mazwifhi. Zwenezwo zwo dzumbulula nḓila ye vhurabeli ha Vhayuda vho guneaho ha vha ho tshikafhala ngayo. Nga nṱhani ha uri vhurabeli havho ho vha vhu songo kuna, vhenevho Vhaisiraele vho tshinya vhushaka havho na Mudzimu. Fhedzi u tshikafhala ha vhurabeli zwi tshimbidzana na vhuḓifari vhu songo kunaho. A zwi mangadzi uri Vhaisiraele vho guneaho vho ita vhuyaḓa hoṱhe ha u ḓifara luvhi he ha tshinya vhushaka havho na Yehova na vhushaka havho na vhaṅwe. Zwino kha ri vhone uri muporofita Hesekiele o ṱalusa hani nḓila ye Vhayuda vho guneaho vha vha vho tshikafhala ngayo nge vha ḓifara luvhi.

19. Hesekiele o ṱalutshedza hani nḓila ye vhathu vhe Yehova a vhofha navho mulanga vha ḓifara ngayo nga luvhi?

¹⁹ Vhalani Hesekiele 22:3-12. Vhathu vhoṱhe vho vha vho tshinyala u katela na vhavhusi vhavho. ‘Vharangaphanḓa’ vho shumisa  maanḓa avho u shulula malofha a si na mulandu. Zwi tou pfala uri vhathu vho tevhela vharangaphanḓa vhavho kha u nyadza Mulayo wa Mudzimu. Vhana vho vha vha tshi ‘nyadza’ vhabebi. Zwo vha zwi tshi dzhiiwa zwi zwithu zwo ḓoweleaho uri vhathu vha ite zwa vhudzekani na miraḓo ya miṱa yavho kana mashaka avho a tsini. Vhaisiraele vha mashandukwa vho vha vha tshi fhura mutsinda, vha tambudza ṅwana a si na khotsi na tshilikadzi. Vhanna vha Vhaisiraele vho vha vha tshi ita zwa vhudzekani na vhafumakadzi vha vhahura vhavho. Vhathu vho vha vhe na tseḓa i sa langei, vha tshi ita zwa tshanḓanguvhoni, vha tshi dzhiela vhathu tshelede na u kolodisa tshelede uri vha wane nzwalelo nnzhi. Zwi ḓo vha zwo vhaisa Yehova nga maanḓa musi a tshi vhona Vhaisiraele vha tshi nyadza Milayo yawe nga khole. Vho hangwa uri Yehova o vha ṋea yeneyo milayo ngauri u a vha funa. U ḓifara havho luvhi zwo vhaisa Yehova nga maanḓa. O ruma Hesekiele uri a vhudze vhenevho vhathu vhavhi uri: “Wo nkhangwa tshoṱhe.”

20. Ndi ngani zwe Hesekiele a zwi amba nga ha u ḓifara luvhi ha Vhayuda zwi tshi ri kwama ṋamusi?

²⁰ Ndi ngani zwe Hesekiele a zwi amba nga ha u ḓifara luvhi ha Vhayuda zwi tshi ri kwama ṋamusi? U ḓifara luvhi ha Vhayuda vho guneaho, zwi ri humbudza uri ṋamusi ri khou tshila shangoni ḽo ḓalaho vhathu vhane vha ḓifara luvhi. Vharangaphanḓa vha politiki vha shumisa maanḓa avho luvhi, vha tsikeledza vhathu zwavho. Vharangaphanḓa vha vhurereli, zwihuluhulu vhafunzi vha Vhurereli ha Mazwifhi, vho fhaṱutshedza nndwa dza tshaka dze dza vhulaya vhathu  vha dzimiḽioni. Vhafunzi vho tshinya milayo yo livhaho i re Bivhilini ya nḓila ine vhathu vha tea u ḓifara ngayo kha sia ḽa zwa vhudzekani. Nga zwenezwo, nḓila yo kunaho ine vhathu vha tea u ḓifara ngayo siani ḽa zwa vhudzekani i khou ṋaṋa i tshi tshinyala. Yehova u ḓo vhudza Vhurereli ha Mazwifhi zwe a zwi vhudza Vhayuda vho guneaho a ri: “Wo nkhangwa tshoṱhe.”

21. Ri nga guda mini kha nḓila ye Vhayuda vha tshifhingani tsha kale vha ḓifara ngayo luvhi?

²¹ Riṋe sa vhathu vha Yehova ri nga guda mini kha nḓila ye Vhayuda vha tshifhingani tsha kale vha ḓifara ngayo luvhi? U itela uri ri kone u gwadamela Yehova nga nḓila ine a i ṱanganedza, ri fanela u ḓifara nga nḓila yo kunaho kha masia oṱhe. Zwi a konḓa u ḓifara nga yeneyo nḓila ngauri shango ḽine ra khou tshila khaḽo ḽo ḓala vhathu vhane vha ḓifara luvhi. (2 Tim. 3:1-5) Fhedzi ri a zwi ḓivha uri Yehova u ḓipfa hani nga nḓila ine vhathu vha ḓifara ngayo luvhi. (1 Vhakor. 6:9, 10) Ri tevhedza milayo ya Yehova ya vhuḓifari ngauri ri a mu funa nahone ri funa na milayo yawe. (Ps. 119:97; 1 Yoh. 5:3) Arali ra ḓifara luvhi, zwi ḓo vha zwi tshi khou sumbedza uri a ri funi Mudzimu washu mukhethwa, o kunaho. A ri ṱoḓi u ita uri Yehova a ri vhudze uri: “Wo nkhangwa tshoṱhe.”

22. (a) No ḓiimisela u ita mini samusi no vusulusa zwe Yehova a zwi bvisela khagala nga ha vhathu vha Yuda? (b) Hu ḓo haseledzwa mini kha ndima i tevhelaho?

²² Ro guda zwithu zwa ndeme musi ri tshi vusulusa zwe Yehova a zwi bvisela khagala nga ha nḓila ye vhathu vha Yuda vha tshikafhadza ngayo vhurabeli ho kunaho nahone vha ḓifara luvhi. Zwi tou vha khagala uri zwenezwi zwi ita uri ri ḓiimisele tshoṱhe u ḓikumedza kha Yehova e eṱhe samusi o fanelwa nga zwenezwo. Zwenezwi zwi amba uri ri fanela u iledza nḓila dzoṱhe dza u gwadamela midzimu ya zwifanyiso na u iledza u ḓifara luvhi. Zwino Yehova o ita mini nga vhathu vhawe vha sa fhulufhedzei? Musi Yehova o no fhedza u sumbedza Hesekiele thembele yoṱhe, o mu vhudza uri: “Ndi ḓo vha sinyutshela.” (Hesek. 8:17, 18) Ri ṱoḓa u ḓivha zwe Yehova a zwi ita kha Vhayuda vha sa fhulufhedzei ngauri na ḽino shango ḽivhi ḽi ḓo haṱulwa nga nḓila i fanaho. Ndima i tevhelaho i ḓo haseledza nga ha nḓila ye Yehova a haṱula ngayo vhenevho Vhayuda vha sa fhulufhedzei.