1-3. Vhababele vho goḓa hani vhagwadameli vha Yehova, nahone ndi ngani?

ḒIVHONENI ni Muyuda a fhulufhedzeaho ane a dzula muḓini wa Babele. Ho no fhela miṅwaha ya 50 kana u fhira vhathu vhahaṋu vho thubiwa. Ndi Savhatha, ni khou ya u ṱangana na vhatendi nga inwi uri ni gwadamele Yehova samusi no ḓowela u ita nga u ralo. Musi ni tshi khou tshimbila zwiṱaraṱani ho ḓala, hu si na na vhupfelo ha mare, ni pfuka dzithembele na zwiḓu zwinzhi-zwinzhi zwa vhurabeli. Vhathu vhanzhi vha kuvhangana henefho fhethu u itela u ita zwiṱhavhelo na u imbela midzimu i ngaho Maruduki.

² Musi no no fhira vhenevho vhathu, ni ṱangana na tshigwada tshiṱuku tsha vhatendi nga inwi. * Na wana fhethu ho fhumulaho, khamusi tsini na muṅwe wa milambo i re tsini u itela u rabela, u imba dziphisalema na u elekanya nga ha Ipfi ḽa Mudzimu. Musi ni tshi khou rabela noṱhe, ni pfa muungo wa zwikepe zwo itwaho nga thanda khunzikhunzini dza mulambo. Ni pfa no vhofholowa ngauri no wana fhethu ho dzikaho. Ni tou tama vhathu vha henefho vha sa vhuyi vha ni wana, samusi vha tshi dzulela u ni thithisa musi no kuvhangana. Ndi ngani vha tshi ita zwithu zwo raloho?

³ Vhathu vha Babele vho no kunda kha nndwa nnzhi nahone vha  humbula u nga vha wana maanḓa kha midzimu yavho ya mazwifhi. Nga nṱhani ha uri muḓi wa Yerusalema wo fheliswa, vhathu vha Babele vha vhona u nga mudzimu wavho Maruduki u na maanḓa u fhira Yehova! Ndi ngazwo vha tshi goḓa Mudzimu waṋu na vhathu vhawe. Nga tshiṅwe tshifhinga vha a ni kolela vha ri: “Ri imbeleni luṅwe lwa nyimbo dza Tsioni”! (Ps. 137:3) Phisalema nnzhi dzi vha dzi tshi khou amba nga ha uri vhathu vha Tsioni vho kunda maswina a Yehova. Khamusi Vhababele vha takalela u vha goḓa nga dzenedzo phisalema. Fhedzi dziṅwe phisalema dzi amba nga ha Vhababele. Sa tsumbo, iṅwe i ri: “Dzo ita uri Yerusalema hu vhe mashubi. . . . Ri goḓiwa na u holedzwa nga vho ri tangaho.”—Ps. 79:1, 3, 4.

4, 5. Vhuporofita ha Hesekiele vhu ita uri hu vhe na fhulufhelo ḽifhio, nahone ri ḓo haseledza nga ha mini kha yeneyi ndima? (Sedzani tshifanyiso tsha u thoma.)

⁴ Hu dovha ha vha na Vhayuda vho guneaho, vhane vha ni goḓa nga nṱhani ha uri ni na lutendo kha Yehova na vhaporofita vhawe. Naho inwi na muṱa waṋu ni tshi goḓiwa nga u ralo, fhedzi u vha kha vhurabeli ho kunaho zwi a ni khuthadza. Zwi a ni homolosa musi ni tshi rabela na u imba noṱhe. Ni a khuthadzea musi ni tshi vhala Ipfi ḽa Mudzimu. (Ps. 94:19; Vharoma 15:4) Kha ri ri nga ḽeneḽi ḓuvha, muṅwe mutendi nga inwi o ḓa na tshifhiwa tsho khetheaho tshine tsha vha mupombo u ambaho nga ha zwe Hesekiele a zwi porofita. Zwi a ni takadza u ḓivha uri Yehova o fhulufhedzisa uri u ḓo humisela vhathu vhawe shangoni ḽa havho. Ni a takala musi ni tshi pfa hu tshi vhaliwa honoho vhuporofita, na vha na fhulufhelo ḽa uri nga ḽiṅwe ḽa maḓuvha ni ḓo vhuyelela hayani na muṱa waṋu. Na thusa nga tshenetsho tshifhinga tshi takadzaho tsha musi hu tshi khou vusuluswa vhurabeli ho kunaho!

⁵ Vhuporofita ha Hesekiele vhu ambesa nga ha u vusuluswa ha vhurabeli ho kunaho. Kha ri haseledze nga ha enea mafhungo ane a ita uri ri vhe na fhulufhelo. Vhathu vho thubiwaho vho vhona zwenezwo zwi tshi itea nga nḓila-ḓe? Honovhu vhuporofita vhu amba mini ṋamusi? Ri ḓo dovha ra guda nga ha zwiṅwe zwe zwa porofitiwa zwine zwa ḓo itea tshifhingani tshi ḓaho.

6. Mudzimu o tsivhudza hani lunzhi-lunzhi vhathu vhawe vhe vha mu shandukela?

⁶ Yehova o shumisa Hesekiele u vhudza vhathu vhawe nḓila ine a ḓo vha pfisa ngayo vhuṱungu nge vha mu shandukela. Yehova o ri: “Vha ḓo ya vhuthubwani.” (Hesek. 12:11) Samusi ro zwi vhona kha Ndima 6 ya yeneyi bugu, Hesekiele o sumbedza na nḓila ine vha ḓo haṱulwa ngayo. Fhedzi ho vha hu si lwa u thoma vha tshi tsivhudzwa. U bva tshifhingani tsha Mushe, khamusi miṅwahani i ṱoḓaho u vha 1 000 yo fhiraho, Yehova o tsivhudza vhathu vhawe uri vha ḓo thubiwa arali vha bvela phanḓa vha tshi mu shandukela. (Dot. 28:36, 37) Muporofita Yesaya na Yeremia na vhone vho vhudza vhathu tsivhudzo i fanaho.—Yes. 39:5-7; Yer. 20:3-6.

7. Yehova o ṱarafa hani vhathu vhawe?

⁷ Zwi ṱungufhadzaho ndi uri vhathu vhanzhi vho konyolela matanda nḓevheni. Zwenezwo zwo vhaisa Yehova nga maanḓa musi a tshi vhona vhathu vhawe vha tshi mu shandukela. Vho gwadamela midzimu ya zwifanyiso, vha si tsha fhulufhedzea nahone vha ḓitshikafhadza  vha tshi itiswa nga vhalisa vhavho vhavhi. O litsha vha tshi fa nga nḓala ye ya tshinyadza. Zwenezwo zwo vha shonisa ngauri u thomani shango ḽavho ḽo vha ḽi tshi ‘elela mafhi na mutoli.’ (Hesek. 20:6, 7) Yehova o ṱarafa vhathu vhawe vho mu shandukelaho nga u vha litsha vha tshi thubiwa, samusi o zwi amba u bva kale. Nga 607 B.C.E., Nebukadanetsara wa Babele o vha ṱhasela lwa u fhedza, a fhelisa muḓi wa Yerusalema na thembele yawo. Vhayuda vhanzhi vhe vha ponyoka, vho thubiwa vha iswa Babele. Musi vhe henengei vhuthubwani, vho goḓiwa na u pikiswa samusi zwo ṱaluswa mathomoni a yeneyi ndima.

8, 9. Mudzimu o tsivhudza hani tshivhidzo tsha Vhakriste nga ha vhagunei?

⁸ Naa tshivhidzoni tsha Vhakriste ho no vhuya ha itea zwe zwa itea kha vhe vha thubelwa Babele? Ee! U fana na Vhayuda vha zwifhingani zwa kale, na vhatevheli vha Kristo vho tsivhudzwa zwi sa athu u itea. Musi Yesu a tshi kha ḓi bva u thoma mushumo wawe wa u huwelela, o ri: “Thanyelani vhaporofita vha u zwifha vhane vha ḓa kha inwi vho ambara mikumba ya nngu, ngeno nga ngomu vhe maṱarelwa a re na nḓala.” (Mat. 7:15) Nga murahu ha miṅwaha yo vhalaho, muapostola Paulo o hevhedzwa uri a tsivhudze vhathu nga nḓila i fanaho. O ri: “Ndi a zwi ḓivha uri musi ndo no ṱuwa hu ḓo ḓa maṱarelwa a re na vhuhali ane a ḓo tambudza sambi, vhukati haṋu hu ḓo vha na vhanna vhane vha ḓo shanda ngoho u itela u kunga vhafunziwa uri vha vha tevhele.”—Mish. 20:29, 30.

⁹ Vhakriste vho vha vho funzwa nḓila ine vha nga kona u vhona ngayo vhenevho vhanna vha re na khombo na u vha iledza. Vhahulwane vha Vhakriste vho vha vho vhudzwa uri vha bvise vhagunei tshivhidzoni. (1 Tim. 1:19; 2 Tim. 2:16-19; 2 Pet. 2:1-3; 2 Yoh. 10) Fhedzi u fana na Vhayuda vha kale, Vhakriste vhanzhi a vho ngo tsha thetshelesa musi vha tshi tsivhudzwa. Musi ḓana ḽa u thoma ḽa miṅwaha ḽi tshi fhela, vhugunei ho vha ho no ḓiṋea maanḓa tshivhidzoni. Yohane ane a vha muapostola wa u fhedza, we a vha a tshi kha ḓi tshila mafheloni a ḓana ḽa u thoma ḽa miṅwaha C. E., o zwi vhona uri tshivhidzo tsho vha tsho no tshinyala na vhushandukwa ho no phaḓalalaho. Ho vha ho sala ene fhedzi we a vha a tshi nga thivhela yeneyo nḓowelo mmbi. (2 Vhathes. 2:6-8; 1 Yoh. 2:18) Ho itea mini musi Yohane o no lovha?

10, 11. Zwe Yesu a zwi amba kha tshifanyiso tshawe tsha goroi na tsheṋe zwo itea hani u bva ḓanani ḽa vhuvhili ḽa miṅwaha C.E. u ya phanḓa?

¹⁰ Musi Yohane o no lovha, ho mbo ḓi thoma u itea zwe Yesu a zwi amba kha tshifanyiso tsha goroi na tsheṋe. (Vhalani Mateo 13:24-30.) Samusi Yesu o dzula o zwi amba, Saṱhane o zwala “tsheṋe” kana vhathu vhane vha ḓiita Vhakriste tshivhidzoni. Tshivhidzo tsho mbo ḓi thoma u tshinyala nga u ṱavhanya. Tshivhidzoni tsha Vhakriste, vhathu vho mbo ḓi thoma u gwadamela midzimu ya zwifanyiso, vha pembelela holodei dza vhuhedeni na u ṱanganela kha mikhuvha ya hone, na pfunzo dza mazwifhi dza vhoramaṱali vha sa ofhi Mudzimu na vhurereli vhu ṱuṱuwedzwaho nga Saṱhane. Yehova o vhaisala nga maanḓa musi a tshi vhona zwenezwi zwi tshi khou itea kha tshivhidzo tshe tsha thomiwa nga Murwa wawe. Yehova o ita mini?  O litsha vhathu vhawe vha tshi iswa vhuthubwani, u fana na zwe a zwi ita Vhaisiraele vha sa fhulufhedzei. U bva ḓanani ḽa vhuvhili ḽa miṅwaha C.E. u ya phanḓa, zwo vha zwi tshi konḓa u wana vhathu vha ngaho goroi vhukati ha vhathu vhane vha ḓiita Vhakriste. Tshivhidzo tsha Vhakriste vha ngoho tsho vha tsho thubiwa Babele Ḽihulu, ḽine ḽa vha muvhuso wa vhurereli ha mazwifhi ngeno vhathu vhane vha ḓiita Vhakriste vho miliwa nga wonoyo muvhuso wo tshinyalaho. Musi vhathu vhane vha ḓiita Vhakriste vha tshi thoma u vha vhanzhi, ho mbo ḓi thoma u vha na Kereke dza Mazwifhi.

¹¹ Kha miṅwaha minzhi ye ha vha ho ḓala Kereke dza Mazwifhi, ho vha hu na Vhakriste vha ngoho vha si gathi vhane vha vha “goroi” ye Yesu a amba nga hayo kha tshifanyiso tshawe. Vho humbula Mudzimu wa ngoho, u fana na Vhayuda vhe vha vha vho thubiwa vhe ha ambiwa ngavho kha Hesekiele 6:9. Vhaṅwe vho vha na tshivhindi vha si tende u kumbuludzwa nga pfunzo dza Kereke dza Mazwifhi. Vho goḓiwa na u tovholwa. Naa Yehova o vha o ḓiimisela u furalela vhathu vhawe lwa tshoṱhe a vha litsha vhe kha vhurereli ha mazwifhi? Hai! Samusi zwo itea kha Vhaisiraele vha tshifhingani tsha kale, Yehova o sumbedza mbiti dzawe nga nḓila yo teaho na nga tshifhinga tsho linganelaho. (Yer. 46:28) Zwiṅwe hafhu, Yehova o ṋea vhathu vhawe fhulufhelo. Kha ri dovhe ri ambe nga ha Vhayuda vhe  vha vha vho thubelwa Babele ḽa kale, ri vhone uri Yehova o vha ṋea hani fhulufhelo ḽa uri vha ḓo bva vhuthubwani.

12, 13. Ndi ngani Yehova a tshi ḓo litsha u sinyutshela vhathu vhawe vhe vha vha vho thubiwa misini ya Hesekiele?

¹² Yehova ho ngo dzumbela vhathu vhawe uri o vha sinyutshela, fhedzi o dovha a vha khwaṱhisedza uri mbiti dzawe dzi ḓo dzika. Sa tsumbo, ṱhogomelani haya maipfi ane a ri: “Ndi hone ndi tshi ḓo litsha u sinyuwa, mbiti dzanga dza dzika, ndi ḓo fushea. Vha ḓo ḓivha uri nṋe Yehova ndo amba uri ndi ṱoḓa vha tshi ḓikumedza tshoṱhe kha nṋe, musi ndo no fhedza u vha shululela mbiti dzanga.” (Hesek. 5:13) Ndi ngani Yehova o vha a tshi ḓo litsha u sinyuwa?

¹³ Kha vhathu vhe vha vha vho thubiwa, ho vha hu na Vhayuda vha fhulufhedzeaho na vha sa fhulufhedzei. Zwiṅwe hafhu, Yehova o vha o dzula o amba a tshi shumisa Hesekiele uri vhaṅwe vhathu Vhawe vha ḓo rembuluwa musi vhe vhuthubwani. Vhenevho Vhayuda vho vha vha tshi ḓo ḓisola musi vha tshi humbula nga ha zwithu zwi shonisaho zwe vha zwi ita musi vha tshi shandukela Mudzimu wavho. Vho vha vha tshi ḓo humbela uri Yehova a vha hangwele na u vha khathutshela. (Hesek. 6:8-10; 12:16) Hesekiele o vha e muṅwe wa vhane vha fhulufhedzea, u fana na muporofita Daniele na khonani dzawe tharu. Daniele o tshila tshifhinga tshilapfu lwe a vhona  musi vhathu vha tshi thubiwa na musi vha tshi vhofhololwa vhuthubwani. Thabelo yawe i bvaho mbiluni ya u ḓisola nga nṱhani ha zwivhi zwa Vhaisiraele, yo ṅwalwa kha Daniele ndima 9. Zwi tou pfala uri zwe a zwi amba zwo vha zwi tshi imela nḓila ye vhunzhi ha vhe vha vha vho thubiwa vha ḓipfa ngayo, vha tshi ṱoḓa uri Yehova a vha hangwele na u vha fhaṱutshedza. Zwe Yehova a zwi fhulufhedzisa a tshi shumisa Hesekiele nga ha u vhofhololwa na u vusuluswa zwo vha zwi tshi takadza vhukuma!

14. Ndi ngani Yehova o vha a tshi ḓo vhuyedzedza vhathu vhawe shangoni ḽa havho?

¹⁴ Fhedzi ho vha hu na tshiṅwe tshithu tsha ndeme tsho itaho uri vhathu vha Yehova vha vhofhololwe na u vusuluswa. A vho ngo vhofhololwa vhuthubwani he ha fhedza tshifhinga tshilapfu nga nṱhani ha uri zwo vha zwo tea. Fhedzi vho vhofhololwa ngauri tsho vha tshi tshifhinga tsha uri Yehova a sumbedze tshaka dzoṱhe uri dzina ḽawe ndi ḽikhethwa. (Hesek. 36:22) Vhababele vho vha vha sa ḓo vhuya vha hangwa uri midzimu yavho ya madimoni, i ngaho Maruduki, yo vha i si tshithu musi i tshi vhambedzwa na Yehova Murena Muvhusahoṱhe! Kha ri ambe nga ha zwithu zwiṱanu zwe Yehova a zwi fhulufhedzisa, zwe a vhudza Hesekiele uri a zwi vhudze vhe a vha o thubiwa navho. Kha ri thome nga u haseledza uri zwenezwo zwithu zwe a zwi fhulufhedzisa zwo vha zwi tshi nga vha zwi tshi amba mini kha Vhaisiraele vha fhulufhedzeaho. Nga murahu ri ḓo haseledza uri zwe a zwi fhulufhedzisa zwo itea hani nga nḓila khulwane.

15. Hu ḓo vha na tshanduko ifhio kha vhurabeli ha vho vhuyaho vhuthubwani?

¹⁵ TSHA U THOMA. A hu tsha ḓo gwadamelwa midzimu ya zwifanyiso kana ha vha na miṅwe mikhuvha i nengisaho i tshimbidzanaho na vhurereli ha mazwifhi. (Vhalani Hesekiele 11:18; 12:24.) Samusi ro zwi haseledza kha Ndima 5 ya yeneyi bugu, muḓi wa Yerusalema na thembele yawo zwo vha zwo tshikafhadzwa nga mikhuvha ya vhurabeli ha mazwifhi i ngaho u gwadamela midzimu ya zwifanyiso. Vhathu vho vha vho tshikafhala, vho furalela Yehova. Yehova o amba a tshi shumisa Hesekiele uri vhathu vho thubiwaho vho vha vha tshi nga lavhelela tshifhinga tshine vha ḓo dovha vha vha kha vhurabeli ho kunaho. Dziṅwe phaṱhutshedzo dzoṱhe dzi tshimbidzanaho na u vusuluswa,  dzo vha dzi tshi ḓo ḓitika nga uri Mudzimu a vusuluse vhurabeli ho kunaho.

16. Yehova o fhulufhedzisa mini vhathu vhawe nga ha shango ḽa havho?

¹⁶ TSHA VHUVHILI. Vhathu vha Mudzimu vha ḓo vhuyelela shangoni ḽa havho. Yehova o vhudza vho thubiwaho a ri: “Ndi ḓo . . . ni ṋea shango ḽa Isiraele.” (Hesek. 11:17) Zwenezwi zwo vha zwo khethea ngauri Vhababele vhe vha kolela vhathu vha Mudzimu vho thubiwaho, vho ita uri vhathu vha Mudzimu vha si tsha vha na fhulufhelo ḽa uri vha ḓo dovha vha vhuyelela shangoni ḽa havho. (Yes. 14:4, 17) Zwiṅwe hafhu, arali Vhaisiraele vhe vha vhuyelela shangoni ḽa havho vha dzula vha tshi fhulufhedzea, shango ḽo vha ḽi tshi ḓo nona na u bveledza zwiḽiwa. Ḽa vha kanzwa nahone vha vha na mushumo une wa ita uri vha takale. Ho vha hu si tsha ḓo vha na nḓala ine ya ita uri vha nyadziwe na u hanganea.—Vhalani Hesekiele 36:30.

17. Yehova o vha a tshi ḓo ita mini nga zwiṱhavhelo zwe a vha a tshi ḓo ṋekedzwa?

¹⁷ TSHA VHURARU. Vha ḓo dovha vha ṋekedza zwifhiwa zwa u fhiswa kha aḽeṱare ya Yehova. Samusi ro zwi vhona kha Ndima 2 ya yeneyi bugu, u ya nga Mulayo, zwo vha zwi zwa ndeme u ṋekedza zwiṱhavhelo na zwifhiwa vhurabelini ho kunaho. Yehova o vha a tshi ḓo ṱanganedza zwifhiwa zwa vho vhuyaho vhuthubwani, arali fhedzi vha dzula vha tshi mu thetshelesa na u gwadamela Ene fhedzi. Vhathu vho vha vha tshi ḓo pfumelelwa zwivhi zwavho, vha dzula vhe na vhushaka ha tsini na Mudzimu wavho. Yehova o fhulufhedzisa a ri: “Ndi henefho hune vha nnḓu yoṱhe ya Isiraele, vhathu vhoṱhe, vha ḓo ntshumela hone. Ndi ḓo vha takalela vhe henefho, ndi ḓo ṱoḓa miṋeelo yaṋu na zwiranzhe zwa zwifhiwa, zwithu zwaṋu zwoṱhe zwikhethwa.” (Hesek. 20:40) Vhurabeli ho kunaho ho vha vhu tshi ḓo vusuluswa zwa vhukuma, zwa ita uri vhathu vha Mudzimu vha fhaṱutshedzwe.

18. Yehova o vha a tshi ḓo lisa hani vhathu vhawe?

¹⁸ TSHA VHUṊA. U pandelwa ha vhalisa vhavhi. Zwavhuḓi-vhuḓi vhathu vha Mudzimu vho tshinya nga nṱhani ha ṱhuṱhuwedzo ya vharangaphanḓa vhavhi. Yehova o fhulufhedzisa uri u ḓo zwi shandula. Yehova o amba zwi tevhelaho nga ha vhenevho vhalisa vhavhi, a ri: “Ndi ḓo . . . vha pandela uri vha si tsha dzi fulisa . . . Ndi ḓo tshidza  nngu dzanga khavho.” Fhedzi Yehova o khwaṱhisedza vhathu vhawe vha fhulufhedzeaho a ri: “Ndi ḓo ṱhogomela nngu dzanga.” (Hesek. 34:10, 12) O vha a tshi ḓo zwi itisa hani? O vha a tshi ḓo shumisa vhanna vha fhulufhedzeaho uri vha vhe vhalisa.

19. Yehova o fhulufhedzisa mini nga ha u vha na vhuthihi?

¹⁹ TSHA VHUṰANU. Vhagwadameli vha Yehova vha ḓo vha na vhuthihi. Humbulani nḓila ye vhagwadameli vha Mudzimu vha fhulufhedzeaho vha tsikeledzea ngayo musi vha tshi vhona hu si na vhuthihi vhukati ha vhathu vha Mudzimu musi vha sa athu u thubiwa. Vhaporofita vha u zwifha na vhalisa vhavhi, vho ṱuṱuwedza vhathu uri vha shandukele vhaporofita vha fhulufhedzeaho vho rumiwaho nga Yehova. Vho vhumba zwigwada zwine zwa pikisa vhenevho vhathu. Yehova o dovha a shumisa Hesekiele u itela u fhulufhedzisa zwiṅwe zwithu zwavhuḓi zwe zwa vha zwi tshi ḓo vusuluswa. O ri: “Ndi ḓo vha ṋea mbilu i re na vhuthihi na muhumbulo muswa.” (Hesek. 11:19) Arali Vhayuda vha bvaho vhuthubwani vha dzula vhe na vhuthihi na Yehova Mudzimu na nga tshavho, a hu na muthu na muthihi we a vha a tshi nga vha kunda. Vho vha vha tshi nga dovha vha rendisa Yehova vhoṱhe sa lushaka nṱhani ha u mu tshinya dzina na u mu nyadzisa.

20, 21. Zwe Mudzimu a zwi fhulufhedzisa vho vhuyaho vhuthubwani zwo itea hani?

 ²⁰ Naa zwenezwi zwithu zwiṱanu zwe Yehova a zwi fhulufhedzisa zwo fhedzisela zwo itea kha Vhayuda vho vhuyaho vhuthubwani? Ndi zwavhuḓi u humbula nga ha zwe Yoshua a zwi amba tshifhingani tsho fhiraho a ri: “A hu na na tshithu na tshithihi tshe tsha si itee kha zwithu zwoṱhe zwavhuḓi zwe Yehova Mudzimu waṋu a zwi fhulufhedzisa. Zwoṱhe zwo itea. A hu na na tshithu na tshithihi tshe tsha si itee.” (Yosh. 23:14) Samusi zwo itea tshifhingani tsha Yoshua; zwo vha zwi tshi ḓo tou ralo kha vhathu vho thubiwaho, vhe vha vhuyelela shangoni ḽa havho.

²¹ Vhayuda vho litsha u gwadamela midzimu ya zwifanyiso na miṅwe mikhuvha i nengisaho ya vhurereli ha mazwifhi ye ya vha sendedza kule na Yehova. Naho zwo vha zwi tshi vhonala u nga zwi nga si vhuye zwa itea, vho dovha vha vhuyelela shangoni ḽa havho, vha lima na u ḓiphiṋa nga vhutshilo havhuḓi henefho. Tshithu tsha u thoma tshe vha ita ho vha u vusulusa aḽeṱare ya Yehova Yerusalema na u ṋekedza zwiṱhavhelo henefho. (Esera 3:2-6) Yehova o vha fhaṱutshedza nga u vha ṋea vhalisa vhavhuḓi vhane vha mu funa. Ho vha hu vhanna vha ngaho Esera we a vha e tshifhe a fhulufhedzeaho na mukopololi. Ha dovha ha vha vhavhusi vha ngaho Nehemia,  Serubabele, Yoshua we a vha e Tshifhe Muhulu na vhaporofita vha re na tshivhindi vha ngaho Hagai, Sakaria na Maḽeaxi. Arali vhathu vha dzula vha tshi thetshelesa vhulivhisi vhu bvaho kha Yehova, vho vha vha tshi ḓo ḓiphiṋa nga u vha na vhuthihi he vha vha vhe si naho lwa tshifhinga tshilapfu.—Yes. 61:1-4; vhalani Yeremia 3:15.

22. Ri zwi ḓivha hani uri musi vhuporofita ha u vusuluswa vhu tshi itea lwa u thoma, zwo vha zwi tshi tou vha luvhonela lwa zwithu zwihulwane zwi ḓaho?

²² Zwi tou pfala uri zwo vha zwi tshi ṱuṱuwedza u vhona zwe Yehova a zwi fhulufhedzisa zwi tshi itea lwa u thoma! Fhedzi zwenezwo zwo vha zwi tshi tou vha mathomo a zwithu zwihulwane zwe zwa vha zwi tshi ḓo itea. Ri zwi ḓivha hani? Zwe Yehova a fhulufhedzisa, zwo vha zwi tshi ḓo itea fhedzi arali vhathu vha dzula vha tshi mu thetshelesa. Nga u ya ha tshifhinga, Vhayuda vho dovha vha shandukela Mudzimu, vha si tsha thetshelesa. Fhedzi zwine Yehova a amba zwi a itea tshifhinga tshoṱhe, samusi Yoshua o amba. Zwe Mudzimu a zwi fhulufhedzisa zwi ḓo itea nga nḓila khulwane nahone zwi ḓo vha hone lwa tshoṱhe. Kha ri vhone uri zwo itea hani.

23, 24. Tshifhinga tsha u “vusulusa ngatsho zwithu zwoṱhe” tsho thoma lini nahone hani?

²³ Samusi ri tshi guda Bivhili, ri a zwi ḓivha uri maḓuvha a vhufhelo ha ḽino shango ḽivhi o thoma nga 1914. Fhedzi zwenezwi a zwi iti uri vhathu vha Yehova vha ṱungufhale. Ngoho ndi ya uri Bivhili i sumbedza uri nga 1914, ho thoma tshifhinga tshi takadzaho tshine tsha vha tshifhinga tsha u “vusulusa ngatsho zwithu zwoṱhe.” (Mish. 3:21) Ri zwi ḓivha hani? Ho itea mini ṱaḓulu nga 1914? Yesu Kristo o vhewa kha khuluṋoni sa Messia ane a vha Khosi! Zwenezwo zwo vha zwi u vusuluswa nga nḓila-ḓe? Ri songo hangwa uri Yehova o vha o fhulufhedzisa Khosi Davida uri vhuhosi vhune ha ḓo bva kha mutevhe wa lushaka lwawe vhu ḓo vha ha tshoṱhe. (1 Koron. 17:11-14) Honoho vhuhosi ho thithisea nga 607 B.C.E. musi Vhababele vha tshi fhelisa Yerusalema, vha fhelisa vhuvhusi ha mahosi a bvaho kha lushaka lwa Davida.

²⁴ Samusi Yesu e “Murwa muthu,” o vha e ṅwana wa Davida, a vha muḽaifa a faneleaho wa vhuhosi ha Davida. (Mat. 1:1; 16:13-16;  Luka 1:32, 33) Nga 1914 ho mbo ḓi thoma tshifhinga tsha u “vusulusa ngatsho zwithu zwoṱhe,” musi Yehova a tshi vhea Yesu uri a vhuse sa khosi ṱaḓulu! Ho vha hu tshifhinga tsha uri Yehova a shumise yeneyo Khosi i si na tshivhi uri i ise phanḓa mushumo wa u vusulusa.

25, 26. (a) Tshifhinga tshilapfu tshee vhathu vha Mudzimu vha tshi fhedza vho thubiwa Babele Ḽihulu tsho guma lini, nahone ri zwi ḓivha hani? (Sedzani na bogisi “Ndi Ngani Ri Tshi Ri Nga 1919?”) (b) Ndi mini zwe zwa thoma u itea u bva nga 1919 u ya phanḓa?

²⁵ Musi Kristo a tshi vha Khosi, o thoma nga u shuma na Khotsi awe u sedzulusa nḓila ine vhurabeli ho kunaho ha vha ngayo kha ḽifhasi. (Maḽ. 3:1-5) Samusi Yesu o vha o amba kha tshifanyiso tshawe tsha goroi na tsheṋe, zwo vha zwi tshi vho konḓa u khethekanya goroi kha tsheṋe. Zwine zwa vha u khethekanya Vhakriste vha ngoho vho ḓodzwaho vhukati ha vhathu vhane vha ḓiita Vhakriste. * Fhedzi ho thoma u vhonala phambano musi tshifhinga tsha khaṋo tshi tshi swika nga 1914. Miṅwaha minzhi hu sa athu u swika 1914, Vhagudi vha Bivhili vha fhulufhedzeaho vho bvukulula vhutshinyi vhuhulu he ha itwa nga Kereke dza Mazwifhi. Vha thoma u ḓibvisa kha honoho vhurereli ha mazwifhi. Tsho vha tshi tshifhinga tsha uri Yehova a vha vusuluse nga vhuḓalo. Mathomoni a 1919, miṅwaha i si gathi musi “tshifhinga tsha khaṋo” tsho no thoma, vhathu vha Mudzimu vho vhofhololwa tshoṱhe vhuthubwani ha Babele Ḽihulu. (Mat. 13:30) U thubiwa ho vha ho fhela!

²⁶ Zwe Hesekiele a zwi porofita nga ha u vusulusa, zwo thoma u itea nga nḓila khulwane u fhira zwe vhathu vha Mudzimu vha zwifhingani zwa kale vha vhuya vha zwi vhona. Zwino kha ri vhone nḓila ye zwithu zwiṱanu zwe zwa fhulufhedziswa zwa itea ngayo nga nḓila khulwane.

27. Mudzimu o kunakisa hani vhathu vhawe uri vha si tsha gwadamela midzimu ya zwifanyiso?

²⁷ TSHA U THOMA. A hu tsha ḓo gwadamelwa midzimu ya zwifanyiso kana ha vha na miṅwe mikhuvha i nengisaho i tshimbidzanaho na vhurereli ha mazwifhi. Mafheloni a ḓana ḽa vhu 19 ḽa miṅwaha na mathomoni a ḓana ḽa vhu 20, Vhakriste vha fhulufhedzeaho vho vha vha tshi khou kuvhangana, vha tshi khou thoma u litsha mikhuvha ya vhurereli ha mazwifhi. U tenda kha pfunzo ya vhuraruthihi, u tenda kha uri muya wa muthu a u fi na pfunzo ya mulilo wa hele, zwoṱhe zwo dzhiiwa sa pfunzo dzi siho Bivhilini dzo thomaho kha  vhurereli ha mazwifhi. Ho bvukululwa na uri u gwadamela Mudzimu hu tshi shumiswa zwifanyiso, ndi u gwadamela midzimu ya zwifanyiso. Nga zwiṱuku nga zwiṱuku, vhathu vha Mudzimu vho zwi vhona na uri u shumisa tshifhambano kha vhurabeli ndi u gwadamela midzimu ya zwifanyiso.—Hesek. 14:6.

28. Vhathu vha Yehova vho vhuyedzedzwa shangoni ḽa havho nga nḓila-ḓe?

²⁸ TSHA VHUVHILI. Vhathu vha Mudzimu vha ḓo vhuyelela shangoni ḽa havho. Musi Vhakriste vha fhulufhedzeaho vha tshi ṱutshela Babele Ḽihulu, zwo ita uri vha ḓipfe vha tshi tou nga vha shangoni ḽa havho ḽa pfanyisedzo. Vho ḓipfa vho fhaṱutshedzwa kana vhe kha vhuimo vhune khaho vha si tsha ḓo tambula nga nḓala ya Ipfi ḽa Mudzimu. (Vhalani Hesekiele 34:13, 14.) Samusi ri tshi ḓo dovha ra zwi vhona kha Ndima 19 ya yeneyi bugu, Yehova o fhaṱutshedza ḽeneḽo shango nga u kanzwa vhenevho vhathu nga Ipfi ḽawe nga nḓila khulwane vhukuma.—Hesek. 11:17.

29. Mushumo wa u huwelela wo engedzea hani nga 1919?

 ²⁹ TSHA VHURARU. Vha ḓo dovha vha ṋekedza zwifhiwa zwa u fhiswa kha aḽeṱare ya Yehova. Ḓanani ḽa u thoma ḽa miṅwaha C.E., Vhakriste vho gudiswa uri vha fanela u ṋekedza Mudzimu zwiṱhavhelo, fhedzi hu si zwiṱhavhelo zwa zwifuwo. Vho vha vha tshi tea u ṋekedza zwifhiwa zwa ndeme vhukuma, zwine zwa vha u renda Yehova nga maipfi na u vhudza vhaṅwe nga hae. (Vhahev. 13:15) Maḓana a miṅwaha ye vha i fhedza vho thubiwa, vho vha vha sa koni u ṋekedza zwenezwi zwifhiwa zwa ndeme. Fhedzi musi vhathu vha Mudzimu vhe tsini na u vhofhololwa vhuthubwani, vho vha vha tshi vho kona u ṋekedza zwiṱhavhelo zwo raloho. Vho vha vho farekanea nga u huwelela nahone vha tshi kuvhangana u itela u renda Mudzimu wavho vho takala. U bva nga 1919 u ya phanḓa, “mulanda a fhulufhedzeaho na wa vhuṱali” o ombedzela nḓila ine u huwelela zwa vha zwa ndeme ngayo, a dzudzanya uri wonoyo mushumo u itwe nga vhuḓalo. (Mat. 24:45-47) Vhathu vhanzhi vho thoma u gwadamela Yehova na u ṱanziela nga hae!

30. Yesu o ita mini uri vhathu vhawe vha vhe na vhalisa vhavhuḓi?

³⁰ TSHA VHUṊA. U pandelwa ha vhalisa vhavhi. Kristo o vhofholola vhathu vha Mudzimu kha vhalisa vha sa fhulufhedzei vha Kereke dza Mazwifhi, vha re na tseḓa. Kha sambi ḽa Kristo, vhalisa vhe vha ḓifara u fana na vhalisa vha sa fhulufhedzei, vho bviswa kha vhuimo havho. (Hesek. 20:38) Samusi Yesu e Mulisa Wavhuḓi, o ita vhungoho ha uri nngu dzawe dzi ṱhogomelwe. Nga 1919, o vhea mulanda wawe a fhulufhedzeaho na wa vhuṱali. Tshenetsho tshigwada tshiṱuku tsha Vhakriste vho ḓodzwaho, tsho ṱhogomela vhathu vha Mudzimu nga u vha kanzwa nga Ipfi Ḽawe. Nga u ya ha tshifhinga, vhahulwane vha tshivhidzo vho gudiswa uri vha thuse kha u ṱhogomela “sambi ḽa Mudzimu.” (1 Pet. 5:1, 2) Kanzhi mafhungo a re kha Hesekiele 34:15, 16, a shumiswa u itela u humbudza vhalisa vha Vhakriste nḓila ine Yehova Mudzimu na Yesu Kristo vha ṱoḓa sambi ḽi tshi liswa ngayo.

31. Yehova o ita hani uri zwo porofitiwaho kha Hesekiele 11:19 zwi itee?

³¹ TSHA VHUṰANU. Vhagwadameli vha Yehova vha ḓo vha na vhuthihi. Maḓanani a miṅwaha o fhiraho, Vhurereli ha Mazwifhi ho fhandekana ha vha na zwigwada zwinzhi zwa vhurereli zwi si na vhuthihi. Fhedzi Yehova o itela vhathu vhawe vho vusuluswaho zwithu zwi mangadzaho. A tshi shumisa Hesekiele, Yehova o fhulufhedzisa uri: “Ndi ḓo vha ṋea mbilu i re na vhuthihi.” Zwenezwo zwithu zwo itea nga nḓila khulwane. (Hesek. 11:19) Kristo u na vhatevheli vha dzimiḽioni shangoni ḽoṱhe, vha vhubvo na vhuimo vhu sa fani, u katela na vhe vha bva kha vhuṅwe vhurereli. Fhedzi vhoṱhe vho funzwa ngoho i fanaho nahone vha ita mushumo u fanaho nga vhuthihi. Nga vhusiku hawe ha u fhedza e kha ḽifhasi, Yesu o rabela uri vhatevheli vhawe vha vhe na vhuthihi. (Vhalani Yohane 17:11, 20-23.) Yehova o fhindula yeneyo thabelo nga nḓila khulwane vhukuma misini yashu.

32. Ni ḓipfa hani nga u vhona hu tshi itea zwe zwa porofitiwa nga ha u vusuluswa? (Sedzani na bogisi “Vhuporofita Vhu Ambaho Nga Ha U Thubiwa Na U Vusuluswa.”)

³² Naa a zwi ni takadzi u tshila kha tshenetshi tshifhinga tshi takadzaho tsha u vusuluswa? Ṋamusi ri vhona zwe Hesekiele a zwi porofita zwi tshi khou itea kha masia oṱhe a vhurabeli hashu. Ri nga  fhulufhela uri zwino Yehova u takalela vhathu vhawe, samusi o zwi amba a tshi shumisa Hesekiele a ri: “Ndi ḓo takala.” (Hesek. 20:41) Naa ni a zwi ṱhogomela uri ni na ndugelo yavhuḓi lungafhani ya u vha muṅwe wa vhathu vha re na vhuthihi, vhane vha kanzwiwa nga Ipfi ḽa Mudzimu, vhane vha renda Yehova shangoni ḽoṱhe na vho vhofhololwaho vhuthubwani he ha fhedza miṅwaha minzhi? Fhedzi hu na zwiṅwe zwe Hesekiele a zwi porofita nga ha u vusuluswa zwine zwa kha ḓi ḓo itea nga nḓila khulwane.

33-35. (a) Vhuporofita vhu re kha Hesekiele 36:35 ho vha vhu tshi amba mini kha Vhayuda vho thubiwaho? (b) Honoho vhuporofita vhu amba mini kha vhathu vha Yehova ṋamusi? (Sedzani na bogisi “Tshifhinga Tsha U Vusuluswa Ha Zwithu Zwoṱhe.”)

³³ Samusi ro zwi vhona, tshifhinga tsha u “vusulusa ngatsho zwithu zwoṱhe” tsho thoma musi hu tshi vusuluswa khosi i bvaho kha mutevhe wa mahosi a lushaka lwa Davida. Zwo itea musi Yesu a tshi vhewa kha khuluṋoni nga 1914. (Hesek. 37:24) Yehova o dovha a ṋea Kristo maanḓa a uri a vusuluse vhurabeli ho kunaho kha vhathu Vhawe vhe vha fhedza miṅwaha minzhi vho thubiwa kana vha siho kha vhurabeli ho kunaho. Fhedzi naa mushumo wa Kristo wa u vusulusa u guma henefho? Hai! Wonoyo mushumo u kha ḓi ḓo bvela phanḓa nga nḓila i mangadzaho tshifhingani tshi ḓaho. Vhuporofita ha Hesekiele vhu dovha ha ri ṋea zwidodombedzwa zwi takadzaho.

³⁴ Sa tsumbo, ṱhogomelani maipfi ane a ri: “Vha ḓo ri: ‘Shango ḽe ḽa vha ḽi shubi ḽi vho fana na tsimu ya Edeni.’” (Hesek. 36:35) Zwenezwo zwo vha zwi tshi amba mini kha Hesekiele na vhe a vha o thubiwa navho? Vho vha vha songo lavhelela uri shango ḽavho ḽi ḓo vusuluswa zwa vhukuma, ḽa fana na tsimu ya Edeni kana Pharadiso ye ya limiwa nga Yehova! (Gen. 2:8) Fhedzi vho pfesesa uri Yehova o vha a tshi khou vha khwaṱhisedza uri shango ḽavho ḽo vusuluswaho ḽi ḓo vha ḽo naka nahone ḽi na zwiḽiwa zwinzhi.

³⁵ Zwenezwo zwi amba mini kha riṋe ṋamusi? A ro ngo lavhelela uri ḽino shango ḽivhi ḽi vhe Pharadiso zwino hu tshi kha ḓi vhusa Saṱhane Diabolo. Fhedzi ri a pfesesa uri zwe zwa fhulufhedziswa zwi khou itea nga lwa pfanyisedzo. Sa vhashumeli vha Yehova, ri dzula shangoni ḽa pfanyisedzo ḽo vusuluswaho. Ḽeneḽo shango ndi vhuimo kana fhethu hune ra shumela hone Yehova na u ita uri u mu shumela hashu zwi vhe zwone zwa ndeme u fhira zwithu zwoṱhe. Ḽeneḽi shango ḽa pfanyisedzo ḽo vusuluswaho, ḽi khou vha Pharadiso nga zwiṱuku nga zwiṱuku. Fhedzi hu pfi mini nga tshifhingani tshi ḓaho?

36, 37. Ho fhulufhedziswa mini zwine zwa ḓo itea Pharadisoni tshifhingani tshi ḓaho?

³⁶ Nga murahu ha nndwa khulu ya Haramagedo, Yesu u ḓo vusulusa na ḽifhasi ḽa vhukuma ḽi si ḽa pfanyisedzo. Musi a tshi Vhusa lwa Miṅwaha ya 1 000, u ḓo livhisa vhathu uri vha ite uri ḽifhasi ḽoṱhe ḽi vhe ngade ya Edeni kana pharadiso, samusi hu tshipikwa tsha Yehova u bva mathomoni! (Luka 23:43) Vhathu vhoṱhe vha ḓo tshilisana zwavhuḓi nahone ḽifhasi ḽi ḓo bveledza zwiḽiwa zwinzhi. Ri ḓo vha ri si tsha ofha tshithu na tshithihi. Humbulani nga ha tshifhinga tshine ha ḓo itea zwithu zwi tevhelaho zwe zwa fhulufhedziswa: “Ndi ḓo vhofha nadzo mulanga wa mulalo, nda fhelisa zwivhanda zwoṱhe zwi  re shangoni, uri dzi dzule dzo tsireledzea sogani na uri dzi eḓele ḓakani.”—Hesek. 34:25.

³⁷ Naa ni a zwi vhona nga maṱo a muhumbulo? Ni ḓo vha ni tshi kona u ya fhethu hoṱhe ni sa ofhi tshithu. A hu na phukha ine ya ḓo ni huvhadza. Ni ḓo vha ni na mulalo ni sa shushedzwi nga tshithu. Ni ḓo kona u tshimbila ni noṱhe vhukati ha ḓaka ḽihulu na ḓiphiṋa nga u vhona lunako lu akhamadzaho. Ni ḓo eḓela henefho no tsireledzea tshoṱhe, ni na vhuṱanzi ha uri ni ḓo vuwa no netuluwa nahone ni songo huvhala!

38. Ni ḓipfa hani nga u vhona hu tshi itea zwo fhulufhedziswaho kha Hesekiele 28:26?

³⁸ Ri ḓo vhona hu tshi itea zwithu zwi tevhelaho zwe zwa fhulufhedziswa: “Vha ḓo dzula khaḽo [shango] vho tsireledzea, vha ḓo fhaṱa dzinnḓu vha ṱavha minḓirivhe, vha dzula vho tsireledzea musi ndi tshi haṱula vhoṱhe vho vha tangaho vhane vha vha goḓa; vha ḓo ḓivha uri ndi nṋe Yehova Mudzimu wavho.” (Hesek. 28:26) Musi maswina a Yehova oṱhe a si tsheeho, ri ḓo ḓiphiṋa nga u vha na mulalo, ro tsireledzea ḽifhasini ḽoṱhe. Musi ri tshi khou ṱhogomela ḽifhasi, ri ḓo kona u ḓiṱhogomela na vhane ra vha funa, ra fhaṱa nnḓu dzavhuḓi ra dzula khadzo, ra lima na masimu a minḓirivhe.

39. Ndi ngani ni tshi nga vha na vhungoho ha uri zwe Hesekiele a zwi porofita nga ha Pharadiso zwi ḓo itea?

³⁹ Naa zwenezwi zwi vhonala zwi tshi sokou vha muḽoro zwawo kha inwi? Humbulani nga ha zwithu zwine no no zwi vhona zwi tshi khou itea kha tshino tshifhinga tsha u “vusulusa ngatsho zwithu zwoṱhe.” Naho Saṱhane a tshi ri pikisa o halifha vhukuma, Yesu o ṋewa maanḓa a u vusulusa vhurabeli ho kunaho kha tshino tshifhinga tshi konḓaho. Zwenezwi zwi ita uri ri vhe na vhuṱanzi ha uri zwoṱhe zwe Mudzimu a fhulufhedzisa a tshi shumisa Hesekiele zwi ḓo itea!