1. Ṱalutshedzani zwe zwa vha zwi tshi itwa nga vhaporofita vhe Yehova a vha vhea sa vhalindi na zwe zwa itea nga murahu.

MULINDI o ima kha mbondo dza muḓi wa Yerusalema, o tsireledza maṱo awe uri a si vhaisale nga ḓuvha. U sedza-sedza u itela u vhona zwi re kule. Nga u ṱavhanya, a dzhia phalaphala yawe a i lidza nga maanḓa awe oṱhe, a tshi khou tsivhudza vhathu uri mmbi ya Babele i khou ḓa! Fhedzi naho vhadzulapo vha henefho vhane vha dzhiela zwithu fhasi vho pfa yeneyo tsivhudzo, a hu tsheena tshifhinga tsha uri vha dzhie vhukando. Lwa miṅwahani minzhi, Yehova o shumisa vhalindi kana vhaporofita u itela u tsivhudza vhathu uri ḽeneḽi ḓuvha ḽi ḓo ḓa, fhedzi vhathu a vho ngo thetshelesa. Zwino mmbi ya Vhababele yo tanga muḓi. Musi maswole o no fhedza miṅwedzi minzhi o tanga wonoyo muḓi, o mbo ḓi kwasha mbondo, a dzhena a kwashekanya thembele, a vhulaya kana u thuba vhadzulapo vha Yerusalema vha si na lutendo, vha gwadamelaho midzimu ya zwifanyiso.

2, 3. (a) Vhathu vho sedzana na vhuimo vhufhio ṋamusi? (b) Ri ḓo fhindula mbudziso dzifhio?

² Ṋamusi mmbi ya Yehova i khou lugisela u lwa na vhathu vha si na lutendo. (Nzumb. 17:12-14) Yeneyo nndwa i ḓo vha magumo a maṱungu mahulu a sa athu u vhuya a vhonwa. (Mat. 24:21) Fhedzi hu kha ḓi vha na tshifhinga tsha uri vhathu vhanzhi vha  thetshelese musi vha tshi tsivhudzwa nga vhathu vhe Yehova a vha vhea sa vhalindi.

³ Ndi ngani Yehova o vhea vhalindi? Ndi mulaedza ufhio une mulindi a u ḓivhadza? Ndi vhafhio vhane vha shuma sa vhalindi? Riṋe ri shela hani mulenzhe? Kha ri wane phindulo dza dzenedzi mbudziso.

4. Ndi ngani Yehova o vhea vhalindi? (Sedzani tshifanyiso tsha u thoma.)

⁴ Vhalani Hesekiele 33:7. Zwifhingani zwa Bivhili, mulindi o vha a tshi anzela u ima kha mbondo dza muḓi u itela u tsireledza vhadzulapo. U vha hone ha mulindi zwo vha zwi tshi sumbedza uri khosi ya wonoyo muḓi i na ndavha na vhalanda vhayo. Naho phosho ya yeneyo phalaphala yo vha i tshi nga tshuwisa vhadzulapo vho eḓelaho, yo vha i tshi nga tshidza vhathu vhe vha dzhia vhukando. Nga hu fanaho, musi Yehova a tshi vhea vhalindi, o vha a sa khou itela u tshuwisa Vhaisiraele nga milaedza ya khaṱhulo. O zwi ita nga nṱhani ha uri u na ndavha na vhathu vhawe nahone o vha a tshi ṱoḓa u vha tshidza.

5, 6. Ri zwi ḓivha hani uri Yehova u haṱula nga nḓila yo teaho?

⁵ Yehova o dzumbulula zwine a vha zwone musi a tshi vhea Hesekiele uri a vhe mulindi. Zwe Yehova a zwi dzumbulula zwi a ri khwaṱhisa. Kha ri haseledze zwithu zwivhili zwine Yehova a vha zwone.

⁶ U haṱula nga nḓila yo teaho: Ri vhona uri Yehova u haṱula nga nḓila yo teaho ngauri ha ṱaluli musi a tshi shumisana na riṋe. Sa tsumbo, naho vhathu vhanzhi vho hana u thetshelesa mulaedza wa Hesekiele, Yehova ho ngo dzhia Vhaisiraele vhoṱhe vhe mashandukwa, fhedzi o vha a tshi ṱoḓa u vhona uri muṅwe na muṅwe wavho u ḓo ita mini. Musi a tshi amba u anzela uri, “iwe muvhi” na iwe “muvhuya.” Nga zwenezwo, Yehova u haṱula muthu o sedza zwine a zwi ita musi o pfa mulaedza.—Hesek. 33:8, 18-20.

7. Yehova u sedza mini musi a tshi haṱula vhathu?

⁷ Yehova u haṱula nga nḓila yo teaho. Zwenezwi zwi vhonala nga nḓila ine a haṱula ngayo vhathu. Yehova ha haṱuli vhathu o sedza zwe vha zwi ita kale, fhedzi u sedza zwine vhathu vha zwi ita musi vha tshi tsivhudzwa nga tshenetsho tshifhinga. Yehova o vhudza Hesekiele a ri: “Musi ndi tshi amba na muvhi nda ri: ‘U ḓo fa,’ ene a litsha vhuvhi hawe, a ita zwo lugaho na zwivhuya, . . . u ḓo tshila.” Yehova o dovha a amba haya maipfi a sa hangwei, a ri: “Ha nga ḓo vhonwa mulandu kha zwivhi zwoṱhe zwe a zwi ita.” (Hesek. 33:14-16) Fhedzi vhe vha ita zwivhuya tshifhingani tsho fhiraho, vha nga si ite zwo khakheaho vha tshi lavhelela uri vha nga si vhonwe mulandu nga nṱhani ha uri vho ita zwivhuya tshifhingani tsho fhiraho. Yehova o amba uri arali muthu “a fhulufhela u luga hawe, a ita zwo khakheaho, zwivhuya zwawe a zwi nga humbulwi, fhedzi u ḓo fela vhukhakhi he a vhu ita.”—Hesek. 33:13.

8. Zwe vhaporofita vha tsivhudza vhathu nga hazwo, zwi ri funza mini nga ha nḓila yo teaho ine Yehova a haṱula ngayo?

 ⁸ Ri dovha ra vhona uri Yehova u haṱula nga nḓila yo teaho ngauri musi a sa athu u dzhia vhukando, u thoma a tsivhudza vhathu hu tshee na tshifhinga. Hesekiele o thoma mushumo wawe hu tshee ho sala miṅwaha i ṱoḓaho u vha rathi mmbi ya Babele i sa athu u fhelisa muḓi wa Yerusalema. Fhedzi Hesekiele o vha e si wa u thoma u tsivhudza vhathu vha Mudzimu uri vha ḓo kaṋa zwe vha zwala. Lwa miṅwaha i fhiraho ḓana musi muḓi wa Yerusalema u sa athu u fheliswa, Yehova o rumela muporofita Hosea, Yesaya, Mika, Odede na Yeremia uri vha shume sa vhalindi. Yehova o vhudza Yeremia uri a humbudze Vhaisiraele uri: “Nd[o] vhea vhalindi vhe vha ri, ‘Thetshelesani luṋanga lu tshi lila!’” (Yer. 6:17) Musi Yehova a tshi shumisa Vhababele u itela u haṱula vhenevho vhathu nga u vha vhulaya, Yehova kana vhenevho vhalindi vho vha vha sa ḓo vhonwa mulandu.

9. Yehova o sumbedza hani lufuno lu sa shanduki?

⁹ Lufuno: Yehova o sumbedza lufuno lu sa shanduki nga u ruma vhalindi vhawe uri vha tsivhudze vho lugaho u katela na vhavhi vhe vha mu vhaisa mbilu na u mu tshinya dzina. Ri songo hangwa uri Vhaisiraele vho vha vhe vhathu vha Yehova, fhedzi vho mu furalela lunzhi-lunzhi vha gwadamela midzimu ya mazwifhi! Yehova o sumbedza nḓila ye a vha o vhaisala ngayo nge vhathu vhawe vha mu shandukela. O vha fanyisa na mufumakadzi wa phombwe. (Hesek. 16:32) Fhedzi Yehova ho ngo ṱavhanya a vha furalela. O ṱoḓa u pfumedzana navho, hu si u vha lifhedza. Tsha ndeme khae ho vha hu u vha ṋea tshibuli tsha uri vha shanduke, hu si u vha fhelisa. Ndi ngani? O vhudza Hesekiele uri: “A thi takaleli lufu lwa  muvhi, fhedzi ndi takalela uri muvhi a shandule nḓila dzawe, a bvele phanḓa a tshi khou tshila.” (Hesek. 33:11) Yehova o vha a tshi ḓipfa nga yeneyo nḓila. Na ṋamusi u kha ḓi ḓipfa nga nḓila i fanaho.—Maḽ. 3:6.

10, 11. Ri nga guda mini kha nḓila ye Yehova a shumisana ngayo na vhathu vhawe?

¹⁰ Ri nga guda mini kha nḓila ye Yehova a haṱula ngayo Vhaisiraele nga nḓila yo teaho na nḓila ye a vha sumbedza ngayo lufuno? Ri guda uri a ro ngo fanela u dzhia vhathu vhane ra huwelela khavho vha tshi fana. Ri ḓo vha ri tshi khou khakha nga maanḓa arali ri tshi litsha u huwelela kha muthu nga nṱhani ha nḓila ye a vha a tshi ḓifara ngayo kana nga nṱhani ha mvelele yawe, lushaka lwawe, vhuimo hawe ha zwa masheleni kana luambo lwawe! Yehova o gudisa muapostola Petro ngudo ine ya kha ḓi shuma na ṋamusi, ine ya ri: “Mudzimu ha ṱaluli, kha tshaka dzoṱhe ane a mu ofha, a ita zwo lugaho u a mu ṱanganedza.”—Mish. 10:34, 35.

¹¹ Zwiṅwe zwa ndeme zwine ra zwi guda ndi uri ri fanela u dzula ri tshi ḓisedzulusa. Zwithu zwavhuḓi zwe ra zwi ita tshifhingani tsho fhiraho, a zwi ri ṋei tshiitisi tsha uri ri ite zwithu zwo khakheaho. Ri songo hangwa uri na riṋe ri a khakha tshifhinga tshoṱhe u fana na vhathu vhane ra huwelela khavho. Nyeletshedzo ye muapostola Paulo a i ṋea tshivhidzo tsha Korinta i a shuma na kha riṋe. O ri: “Ane a humbula uri o ima a ṱhogomele uri a si we. A hu na mulingo une na khou sedzana nawo we vhaṅwe vha si sedzane nawo.” (1 Vhakor. 10:12, 13) A ri ṱoḓi u fana na muthu ane a “fhulufhela u luga hawe,” ra humbula uri ri nga ita zwithu zwo khakheaho, ha si vhe na masiandoitwa. (Hesek. 33:13) Naho hu  kale ri tshi khou shumela Yehova, ndi zwa ndeme uri ri dzule ri tshi ḓiṱukufhadza na u thetshelesa.

12. Ndi mini zwine ra fanela u zwi humbula arali ro vhuya ra ita zwivhi zwihulwane tshifhingani tsho fhiraho?

¹² Hu pfi mini arali ri tshi khou ḓisola nga nṱhani ha zwivhi zwihulwane zwe ra zwi ita tshifhingani tsho fhiraho? Kha mulaedza wa Hesekiele, ri guda uri Yehova u ḓo pfisa vhuṱungu vhaitazwivhi vha sa rembuluwi. Zwa ndeme vhukuma, ri dovha ra guda uri Yehova ndi Mudzimu wa lufuno, hu si wa u lifhedza. (1 Yoh. 4:8) Arali ra sumbedza nga zwine ra zwi ita uri ro rembuluwa, a ro ngo fanela u vhuya ra humbula uri zwivhi zwashu ndi zwihulwane lune Mudzimu a nga si ri khathutshele. (Yak. 5:14, 15) Yehova o vha o ḓiimisela u hangwela Vhaisiraele vhe vha ita vhupombwe ha pfanyisedzo. Na riṋe o ḓiimisela u ri hangwela.—Ps. 86:5.

13, 14. (a) Vhalindi vho vha vha tshi tea u ḓivhadza mulaedza ufhio? (b) Yesaya o ḓivhadza mulaedza ufhio?

¹³ Vhalani Hesekiele 33:2, 3. Vhalindi vhe Yehova a vha vhea, vho vha vha tshi fanela u ḓivhadza mulaedza ufhio? Mushumo wavho muhulwane ho vha hu u tsivhudza vhathu. Fhedzi vho ḓivhadza na mafhungo maḓifha. Ṱhogomelani dziṅwe tsumbo.

¹⁴ Yesaya o shuma hu ṱoḓaho u vha nga 778 u swika nga 732 B.C.E. O sevha uri Vhababele vha ḓo thuba muḓi wa Yerusalema nahone vha isa vhadzulapo vhawo vhuthubwani. (Yes. 39:5-7) O dovha a hevhedzwa u ṅwala uri: “Thetshelesa! Vhalindi vhau vha khou huwelela. Vha khou fhululedza khathihi, ngauri vha ḓo zwi vhona zwavhuḓi musi Yehova a tshi vhuisa Tsioni.” (Yes. 52:8) Yesaya o ḓivhadza mafhungo avhuḓisa a uri vhurabeli ha ngoho vhu ḓo vusuluswa!

15. Yeremia o ḓivhadza mulaedza ufhio?

¹⁵ Yeremia o shuma u bva nga 647 u swika nga 580 B.C.E. Kanzhi u ḓivhiwa sa muthu we a vha a tshi dzulela u amba nga ha khombo. Zwi tou pfala uri o ita mushumo wavhuḓi wa u sevha Vhaisiraele vhavhi nga ha khombo dze Yehova a vha a tshi ḓo vha ḓisela dzone. * Fhedzi o dovha a ḓivhadza na mafhungo maḓifha, o amba uri vhathu vha Mudzimu vha ḓo vhuyelela shangoni ḽa havho, vha vusulusa vhurabeli ho kunaho.—Yer. 29:10-14; 33:10, 11.

16. Vhathu vho thubiwaho Babele vho vhuyelwa hani nga mulaedza wa Hesekiele?

¹⁶ Hesekiele o vhewa uri a vhe mulindi nga 613 B.C.E., a ita wonoyo mushumo u swika nga 591 B.C.E. Samusi zwo haseledzwa kha Ndima 5 na 6 ya yeneyi bugu, Hesekiele o tsivhudza vhathu vha Isiraele uri vha ḓo fheliswa. Zwenezwo zwo ita uri a si vhe na mulandu wa malofha a vhane vha ḓo fheliswa. O tsivhudza vho thubiwaho uri Yehova u ḓo pfisa vhuṱungu vhagunei vha muḓi wa Yerusalema. O dovha a thusa vho thubelwaho Babele uri vha dzule vhe na vhushaka havhuḓi na Yehova. Zwenezwo zwo ita uri vha kone u ḓilugiselela mushumo we vha vha vha tshi ḓo u ita tshifhingani tshi ḓaho. Musi miṅwaha ya 70 ya u thubiwa i tshi fhela, Yehova o vha a tshi ḓo isa vhathu vha masalela shangoni ḽa Isiraele ḽo vusuluswaho. (Hesek. 36:7-11) Vhenevho vhathu vha masalela vho vha vha tshi ḓo vha vhe vhana na vhaḓuhulu vha vhe vha  thetshelesa Hesekiele. Samusi zwo sumbedzwa kha dziṅwe ndima dzi re kha Tshipiḓa 3 tsha yeneyi bugu, Hesekiele o vha vhudza mafhungo manzhi avhuḓi, a vha khwaṱhisedza uri vhurabeli ho kunaho vhu ḓo vusuluswa Yerusalema.

17. Yehova o vhea lini vhalindi?

¹⁷ Naa vhaporofita vhe vha amba na vhathu vha Mudzimu musi muḓi wa Yerusalema u tsini na u fheliswa nga 607 B.C.E., ndi vhone fhedzi vhe Yehova a vha shumisa sa vhalindi? Hai. Yehova o vhea vhalindi uri vha tsivhudze vhavhi na u ḓivhadza mafhungo maḓifha, musi hu tshi vha na tshiitea tsha ndeme tshine ha vha hu tshi khou itea zwine Yehova a zwi funa.

18. Yohane Mulovhedzi o ita mushumo ufhio?

¹⁸ Ḓanani ḽa u thoma ḽa miṅwaha C.E., Yohane Mulovhedzi o shuma sa mulindi. O tsivhudza vha nnḓu ya Isiraele uri vho vha vha tshi ḓo laṱiwa hu si kale. (Mat. 3:1, 2, 9-11) Fhedzi o ita zwi fhiraho zwenezwo. Yesu o amba uri Yohane o vha e “muḓinḓa” we ha ambiwa nga hae uri u ḓo lugisela Messia nḓila. (Maḽ. 3:1; Mat. 11:7-10) Wonoyo mushumo wo vha u tshi katela na u ḓivhadza vhathu uri Yesu ane a vha “Ngwana ya Mudzimu,” o swika nahone u ḓo fhelisa “zwivhi zwa shango.”—Yoh. 1:29, 30.

19, 20. Yesu na vhafunziwa vhawe vho shuma hani sa vhalindi?

¹⁹ Yesu o vha a tshi fhira vhalindi vhoṱhe. O vha o rumiwa nga Yehova kha “vha nnḓu ya Isiraele,” u fana na Hesekiele. (Hesek. 3:17; Mat. 15:24) Yesu o sevha lushaka lwa Isiraele uri lwo vha lu tshi ḓo laṱiwa hu si kale na uri muḓi wa Yerusalema u ḓo fheliswa. (Mat. 23:37, 38; 24:1, 2; Luka 21:20-24) Fhedzi mushumo wawe muhulwane wo vha u wa u ḓivhadza mafhungo maḓifha.—Luka 4:17-21.

²⁰ Musi Yesu e kha ḽifhasi, o vhudza vhafunziwa vhawe nga ho livhaho a ri: “Dzulani no fhaṱuwa.” (Mat. 24:42) Vho mu thetshelesa, vha shuma sa vhalindi, vha tshi tsivhudza vhathu uri Yehova o laṱa vha nnḓu ya Isiraele na muḓi wa Yerusalema. (Vharoma 9:6-8; Vhagal. 4:25, 26) Na vhone vho vha vha tshi tea u ḓivhadza mafhungo maḓifha, u fana na vhaṅwe vhe vha shuma sa vhalindi vha sa athu u vha hone. Vho ḓivhadza mafhungo a takadzaho a uri Vhannḓa vha ḓo katelwa kha Isiraele wa Mudzimu o ḓodzwaho, vha ḓo ḓiphiṋa nga ndugelo ya u thusa Kristo u vusulusa vhurabeli ho kunaho kha ḽifhasi.—Mish. 15:14; Vhagal. 6:15, 16; Nzumb. 5:9, 10.

21. Paulo o vhea tsumbo ifhio?

²¹ Kha vhalindi vha ḓanani ḽa u thoma ḽa miṅwaha, muapostola Paulo o vha tsumbo yavhuḓisa. O dzhiela nṱha vhuḓifhinduleli hawe. U fana na Hesekiele, o vha a tshi zwi ḓivha uri u ḓo vha na mulandu wa malofha arali a kundelwa u ita mushumo wawe. (Mish. 20:26, 27) Paulo o edzisa tsumbo ya vhaṅwe vhalindi nga u tsivhudza vhathu na nga u vha ḓivhadza mafhungo maḓifha. (Mish. 15:35; Vharoma 1:1-4) Musi Paulo a tshi livhiswa nga muya mukhethwa, o amba maipfi o ṅwalwaho nga muporofita Yesaya. O ri:  “Ndi yavhuḓi lungafhani milenzhe ya a re thavhani, ya ane a ḓisa mafhungo maḓifha.” O shumisa eneo maipfi a tshi ambela kha mushumo une wa itwa nga vhatevheli vha Kristo, wa u huwelela nga ha Muvhuso wa Mudzimu.—Yes. 52:7, 8; Vharoma 10:13-15.

22. Ho itea mini musi vhaapostola vho no lovha?

²² Musi vhaapostola vho no lovha, vhagunei vhe ha ambiwa nga havho vho mbo ḓi phaḓalala tshivhidzoni tsha Vhakriste. (Mish. 20:29, 30; 2 Vhathes. 2:3-8) Lwa miṅwaha minzhi, Vhakriste vha mazwifhi vha fanyiswaho na tsheṋe, vho engedzea vha vha vhanzhi u fhira vhatevheli vha Kristo vha fhulufhedzeaho vha fanyiswaho na goroi. Zwenezwo zwo ita uri mulaedza wa Muvhuso wa Mudzimu u tsirwe nga pfunzo dza mazwifhi. (Mat. 13:36-43) Musi tshifhinga tsha uri Yehova a dzhenelele tshi tshi swika, o dovha a sumbedza uri u na lufuno na u ri u haṱula nga nḓila yo teaho nga u vhea vhalindi uri vha tsivhudze vhathu na u vha ḓivhadza mafhungo maḓifha. Vhenevho vhalindi vho vha vhe vhonnyi?

23. Vho-C. T. Russell na vhashumisani navho vho ita mushumo ufhio?

²³ Musi ṅwaha wa 1914 u sa athu u swika, Vho-Charles Taze Russell na vhashumisani navho, vho shuma sa “muḓinḓa” we a ‘khura nḓila’ musi Muvhuso une Khosi yawo a vha Messia u sa athu u thoma u vhusa. * (Maḽ. 3:1) Tshenetsho tshigwada tsho ita mushumo we wa vha u tshi itwa nga mulindi. Tsho shumisa magazini une wa pfi Zion’s Watch Tower and Herald of Christ’s Presence, u itela  u sevha vhathu nga ha khaṱhulo ya Mudzimu na u phaḓaladza mafhungo maḓifha a Muvhuso wa Mudzimu.

24. (a) Mulanda a fhulufhedzeaho u shuma hani sa mulindi? (b) No guda mini kha tsumbo ya vhalindi vha tshifhingani tsho fhiraho? (Sedzani tshati “Vhalindi Vho Ri Vhetshelaho Tsumbo.”)

²⁴ Musi Muvhuso wa Mudzimu wo no thoma u vhusa, Yesu o vhea tshigwada tshiṱuku tsha vhanna uri vha shume sa mulanda a fhulufhedzeaho. (Mat. 24:45-47) U bva nga tshenetsho tshifhinga, mulanda a fhulufhedzeaho ane zwino a vhidzwa Tshigwada tshi Langaho, u ita mushumo une wa itwa nga mulindi. Tshigwada tshi Langaho tshi ranga phanḓa kha u sevha vhathu nga ha “ḓuvha ḽa ndifhedzo.” Tshi dovha tsha ḓivhadza nga ha “ṅwaha wa Yehova wa khathutshelo.”—Yes. 61:2; sedzani na 2 Vhakorinta 6:1, 2.

25, 26. (a) Vhatevheli vhoṱhe vha Kristo vha tea u ita mushumo ufhio, nahone u itiwa hani? (b) Ri ḓo haseledza nga ha mini kha ndima i tevhelaho?

²⁵ Naho mulanda a fhulufhedzeaho a tshi ranga phanḓa kha mushumo wa u linda, Yesu o vhudza vhatevheli vhawe “vhoṱhe” uri vha ‘dzule vho fhaṱuwa.’ (Marko 13:33-37) Ri sumbedza uri ri a thetshelesa nga u dzula ro fhaṱuwa ri na vhushaka havhuḓi na Yehova, ri tshi tikedza nga u fhulufhedzea mulindi wa musalauno. Ri sumbedza uri ro fhaṱuwa nga u hwala vhuḓifhinduleli hashu ha u huwelela. (2 Tim. 4:2) Ndi ngani ri tshi ita nga u ralo? Nga nṱhani ha uri ri ṱoḓa vhathu vha tshi tshidzwa. (1 Tim. 4:16) Hu si kale, vhathu vhanzhi vhane vha hana u thetshelesa musi vha tshi tsivhudzwa nga mulindi wa musalauno, vha ḓo fheliswa. (Hesek. 3:19) Fhedzi zwa ndeme vhukuma ndi uri ri tama u vhudza vhaṅwe mafhungo avhuḓisa a uri vhurabeli ho kunaho ho vusuluswa! Samusi zwino ri kha “ṅwaha wa Yehova wa khathutshelo,” ri khou ramba vhathu vhanzhi uri vha ṱanganele na riṋe kha u gwadamela Yehova Mudzimu washu a re na lufuno, ane a haṱula nga nḓila yo teaho. Hu si kale, vhoṱhe vha re kha ḽifhasi vhane vha ḓo ponyoka musi ḽino shango ḽivhi ḽi tshi fheliswa, vha ḓo vhuyelwa musi vha tshi vhuswa nga Murwa wa Mudzimu, Yesu Kristo ane a khathutshela. Ri nga si litshe u thusa mulindi wa musalauno u huwelela eneo mafhungo maḓifha!—Mat. 24:14.

²⁶ Naho ḽino shango ḽivhi ḽi sa athu u fheliswa, Yehova o ita uri vhathu vhawe vha vhe na vhuthihi nga nḓila i mangadzaho. Kha ndima i tevhelaho, ri ḓo haseledza nga ha vhuporofita vhu ambaho nga thanda mbili dzine dza fanyisela nḓila ye zwenezwi zwa itea ngayo.