1, 2. (a) Ndi phetho ifhio ine muṅwe na muṅwe a fanela u i dzhia? (b) Muruṅwa a fhulufhedzeaho o ri mini musi Yohane a tshi ṱoḓa u mu gwadamela?

MUṄWE na muṅwe washu u fanela u fhindula mbudziso ya ndeme ine ya ri: Ndi ḓo gwadamela nnyi? Vhathu vhanzhi vha nga amba uri yeneyi mbudziso i a konḓa nahone phindulo yayo i a ḓaḓisa. Fhedzi ngoho ndi ya uri phindulo i a leluwa. Ri nga gwadamela Yehova Mudzimu kana Saṱhane Diabolo.

² Saṱhane u a funa u gwadamelwa. Zwo vhonala zwavhuḓi musi a tshi linga Yesu. Samusi ro zwi guda kha Ndima 1 ya yeneyi bugu, Saṱhane o vha a tshi ṱoḓa u ṋea Yesu tshithu tsho khetheaho, tshine tsha vha maanḓa a u langa mivhuso yoṱhe ya shango. Saṱhane o vha a tshi ṱoḓa uri Yesu a ite mini? O vhudza Yesu a ri: ‘Gwadama u nthabele.’ (Mat. 4:9) Zwo fhambanaho na zwenezwo, muruṅwa we a sumbedza muapostola Yohane zwi re kha bugu ya Nzumbululo, o hana u gwadamelwa. (Vhalani Nzumbululo 22:8, 9.) Musi Yohane a tshi ṱoḓa u mu gwadamela, onoyo muruṅwa a ḓiṱukufhadzaho ane a vha murwa wa Mudzimu o ri: “U songo ita nga u ralo!” Nṱhani ha uri onoyo muruṅwa a vhudze Yohane uri a mu gwadamele, o mu vhudza uri a gwadamele “Mudzimu.”

3. (a) Tshipikwa tsha heyi bugu ndi tshifhio? (b) Ri ḓo guda nga ha mini zwino?

³ Tshipikwa tsha heyi bugu ndi u ri thusa uri ri ḓiimisele u ita zwe onoyo muruṅwa a amba. O amba uri ri tea u gwadamela Yehova  Mudzimu fhedzi. (Dot. 10:20; Mat. 4:10) Kha ri vusuluse zwe ra zwi guda nga ha vhurabeli ho kunaho kha vhuporofita ha Hesekiele na mabono e a a vhona. Nga murahu, Maṅwalo a ḓo ri thusa uri ri kone u ḓivha zwine zwa ḓo itea tshifhingani tshi ḓaho musi vhathu vhoṱhe vha re kha ḽifhasi vha tshi lingwa lwa u fhedzisela. Wonoyo mulingo u ḓo bvisela khagala uri ndi vhafhio vhane vha ḓo sala, vha vhona vhurabeli ha Yehova ho kunaho vhu tshi vusuluswa lwa tshoṱhe.

4. Ndi zwifhio zwithu zwiraru zwe zwa ombedzelwa kha bugu ya Hesekiele?

⁴ Bugu ya Hesekiele i ri gudisa uri u vha kha vhurabeli ho kunaho a si u sokou tevhedza mikhuvha yo ḓoweleaho ya vhurereli. Musi ri kha honoho vhurabeli ho kunaho, hu ṱoḓea uri ri (1) ḓikumedze tshoṱhe kha Yehova, (2) ri dzule ri na vhuthihi na (3) u sumbedza uri ri funa vhaṅwe. Kha ri haseledze nga ha nḓila ye vhuporofita na mabono a re kha yeneyi bugu zwa ombedzela ngayo zwenezwi zwithu zwiraru.

5-9. Ro guda mini nga ha u gwadamela Yehova fhedzi?

⁵ Ndima 3: * Bono ḽi akhamadzaho ḽi sumbedzaho Yehova o tangwa nga musengavhadzimu, o dzula nṱha ha zwivhumbiwa zwi re na maanḓa, ḽi ri khwaṱhisedza ngoho ya ndeme ya uri: Ndi Mudzimu Ramaanḓaoṱhe e eṱhe o tewaho nga uri ri mu gwadamele.—Hesek. 1:4, 15-28.

⁶ Ndima 5: Zwi nga vha zwo vha zwi tshi tshuwisa vhukuma u vhona bono ḽa musi thembele ya Yehova i tshi tshikafhadzwa! Ḽeneḽo bono ḽi sumbedza uri a hu na tsho dzumbamaho phanḓa ha Yehova. U a zwi vhona musi vhashumeli vhawe vha sa fhulufhedzei, vha tshi mu furalela vha gwadamela midzimu ya zwifanyiso naho vha sa vhonwi nga vhathu. Zwenezwo zwi a mu vhaisa nahone u a pfisa vhuṱungu vhane vha zwi ita.—Hesek. 8:1-18.

⁷ Ndima 7: Zwe Yehova a zwi amba musi a tshi haṱula tshaka dze dza “goḓa” Vhaisiraele, zwi sumbedza uri Yehova u vhona mulandu vhane vha fara vhathu vhawe nga nḓila i si yavhuḓi. (Hesek. 25:6) Fhedzi hu na zwiṅwe zwine ra zwi guda kha nḓila ye Vhaisiraele vha shumisana ngayo na dzenedzo tshaka. Ri fanela u fhulufhedzea kha Yehova u fhira zwiṅwe zwithu. Ri nga si vhuye ra litsha u tshila nga nḓila ine Yehova a i ṱanganedza ri tshi itela u takadza mashaka ashu a sa gwadameli Yehova. Zwiṅwe hafhu, ri nga si fhulufhele mivhuso ya ḽino shango kana ra vho dzhia sia nga u ṋea yeneyo mivhuso zwine ra tea u zwi ṋea Yehova fhedzi.

⁸ Ndima 13 na 14: Bono ḽa thembele i re kha thavha ndapfu, ḽi ri funza uri ri fanela u tshila u tendelana na milayo ya Yehova ya vhuimo ha nṱha, ri tshi ṱhogomela uri ndi ene wa ndeme u fhira miṅwe midzimu yoṱhe.—Hesek. 40:1–48:35.

 ⁹ Ndima 15: Nḓila ye ha ṱaluswa ngayo Isiraele na Yuda sa phombwe dza pfanyisedzo, i ri humbudza nḓila ine u sa fhulufhedzea zwa nengisa ngayo Yehova.—Hesek., ndim. 16, 23.

10-14. Ho ombedzelwa hani uri ndi zwa ndeme u vha na vhuthihi kha vhurabeli ho kunaho?

¹⁰ Ndima 8: Zwe zwa porofitiwa nga ha uri Yehova o vha a tshi ḓo vusa “mulisa muthihi” ane a ḓo ṱhogomela vhathu Vhawe, zwi ombedzela uri ndi zwa ndeme u vha na vhuthihi na mulalo musi ri tshi rangwa phanḓa nga Yesu.—Hesek. 34:23, 24; 37:24-28.

¹¹ Ndima 9: Zwe Hesekiele a zwi porofita nga ha u vhofhololwa ha vhathu vha Mudzimu vhuthubwani ha Babele na u vhuyedzedzwa shangoni ḽa havho, zwi gudisa vhane vha ṱoḓa u takadza Yehova ṋamusi. Vhagwadameli vha Yehova vho kunaho vha fanela u dzula vha tshi iledza zwithu zwoṱhe zwi tshikafhadzaho zwa vhurereli ha mazwifhi. Naho ro vha ri kha vhurereli vhunzhi vhu sa fani, vhuimo hashu ha masheleni vhu sa fani nahone ri tshi bva kha tshaka dzi sa fani, ri fanela u dzula ri na vhuthihi vhune ha sumbedza uri ri vhathu vha Mudzimu.—Hesek. 11:17, 18; 12:24; Yoh. 17:20-23.

¹² Ndima 10: Mafhungo a ambaho nga ha u vha na vhuthihi, o ombedzelwa kha bono ḽi ambaho nga ha marambo o omaho e a itwa uri a dovhe a tshile. Ri na ndugelo khulwane vhukuma ya u vha vhagwadameli vha Yehova vho vusuluswaho na vho kunakiswaho, vhane vha shuma vhoṱhe sa mmbi!—Hesek. 37:1-14.

¹³ Ndima 12: U vha na vhuthihi zwo ombedzelwa kha vhuporofita vhu ambaho nga ha thanda mbili dze dza vha thanda nthihi. Zwi a khwaṱhisa lutendo u vhona vho ḓodzwaho na vha dziṅwe nngu vha tshi ita zwe zwa porofitiwa! Naho ri tshi dzula shangoni ḽo fhandekanywaho nga vhurereli na politiki, ri dzula ri na vhuthihi nga nṱhani ha uri ri na lufuno nahone ri a fhulufhedzea.—Hesek. 37:15-23.

¹⁴ Ndima 16: Bono ḽa munna a re na tshishumiswa tshine tsha fara inki na tsha u ṅwala na vhanna vha re na zwiṱhavhane zwa u vhulaya, ḽi ri tsivhudza nga ha tshithu tsha ndeme. Ḽi ri tsivhudza uri vhane vha ḓo swaiwa uri vha ponyoke, ndi vhane vha ḓo vha vha tshi khou gwadamela Yehova musi “maṱungu mahulu” a tshi thoma.—Mat. 24:21; Hesek. 9:1-11.

15-18. Ndi ngani ri tshi fanela u bvela phanḓa ri tshi sumbedza uri ri na lufuno, nahone ri nga zwi itisa hani?

¹⁵ Ndima 4: Bono ḽi ambaho nga ha zwivhumbiwa zwiṋa zwi tshilaho, ḽo ri gudisa nga ha zwine Yehova a vha zwone, zwihuluhulu lufuno lune a vha na nalwo. Musi ri tshi sumbedza uri ri funa vhaṅwe nga zwine ra zwi amba na zwine ra zwi ita, ri vha ri tshi khou sumbedza uri Mudzimu washu ndi Yehova.—Hesek. 1:5-14; 1 Yoh. 4:8.

¹⁶ Ndima 6 na 11: Nga nṱhani ha uri Mudzimu u na lufuno, o vhea  vhalindi vha ngaho Hesekiele. Mudzimu ndi lufuno, ndi ngazwo a sa ṱoḓi muthu na muthihi a tshi fheliswa musi a tshi fhelisa muvhuso wa Saṱhane. (2 Pet. 3:9) Ri na ndugelo ya u sumbedza lufuno lune Mudzimu a vha nalwo, nga u hwala vhuḓifhinduleli hashu ha u tikedza mushumo wa mulindi wa musalauno.—Hesek. 33:1-9.

¹⁷ Ndima 17 na 18: Yehova u a zwi ḓivha uri vhathu vhanzhi a vha nga tendi a tshi vha khathutshela nahone vha ḓo lingedza u fhelisa vhagwadameli vhawe vha fhulufhedzeaho. Nga nṱhani ha uri Yehova u na lufuno, u ḓo lwela vhathu vhawe vha fhulufhedzeaho musi vha tshi ṱhaselwa nga “Gogo wa ngei shangoni ḽa Magogo.” U funa vhaṅwe zwi ri ṱuṱuwedza uri ri sevhe vhathu vhanzhi nga hune ra nga kona ngaho uri Yehova u ḓo fhelisa vhane vha tsikeledza vhathu vhawe.—Hesek. 38:1–39:20; 2 Vhathes. 1:6, 7.

¹⁸ Ndima 19, 20 na 21: Nḓila ine Yehova a funa ngayo vhathu vhawe, i vhonala zwavhuḓi kha mabono a sumbedzaho mulambo wa maḓi a ṋeaho vhutshilo na u kovhekanywa ha shango. Eneo mabono a amba nga ha nḓila khulwane ye Yehova a sumbedza ngayo uri u na lufuno. O zwi sumbedza nga u ṋekedza vhutshilo ha Murwa wawe u itela uri ri hangwelwe zwivhi na uri ri ḓiphiṋe nga vhutshilo ri si tsheena tshivhi sa miraḓo ya muṱa wa Yehova. Iṅwe nḓila yavhuḓisa ine ra nga sumbedza ngayo uri ri funa vhathu, ndi nga u vha vhudza nga ha vhumatshelo havhuḓi he Yehova a vhu lugisela vhane vha vha na lutendo kha Murwa wawe.—Hesek. 45:1-7; 47:1–48:35; Nzumb. 21:1-4; 22:17.

19. Yesu u ḓo ita mini musi a tshi Vhusa lwa Miṅwaha ya 1 000? (Sedzani bogisi “U Lingwa Lwa U Fhedza.”)

¹⁹ Musi Yesu a tshi Vhusa lwa Miṅwaha ya 1 000, u ḓo fhelisa vhuṱungu ho vhangwaho nga “swina” ḽashu ḽine ḽa vha “lufu.” Zwenezwo u ḓo zwi ita nga u vusa vhathu vhanzhi-vhanzhi. (1 Vhakor. 15:26; Marko 5:38-42; Mish. 24:15) U bva tshee Adamu na Eva vha ita tshivhi, vhathu a vha ḽi lu ḓifhaho. Fhedzi Yesu u ḓo vha vhofholola kha honoho vhuṱungu. U ḓo vusa vhafu, a ita uri vha vhe na tshibuli tsha u ḓiphiṋa nga u tshila kha ḽifhasi u fana na nḓila ye Adamu na Eva vha tshila ngayo vha sa athu u ita tshivhi. A tshi shumisa tshiṱhavhelo tshi rengululaho, u ḓo fhelisa vhuṱungu hoṱhe ho bveledzwaho nga malwadze, nndwa na nḓala. Zwa ndeme vhukuma, u ḓo ri thusa nga u fhelisa tshithu tshine tsha ita uri ri shengele. Tshenetsho tshithu ndi tshivhi tshe ra tshi wana kha Adamu. (Vharoma 5:18, 19) Yesu u ḓo fhelisa tshoṱhe “mishumo ya Diabolo.” (1 Yoh. 3:8) Hu ḓo itea mini nga murahu?

20. Yesu na vha 144 000 vha ḓo sumbedza hani u ḓiṱukufhadza nga nḓila yo khetheaho? Ṱalutshedzani. (Sedzani tshifanyiso tsha u thoma.)

²⁰ Vhalani 1 Vhakorinta 15:24-28. Musi vhathu vhoṱhe vha si tsheena tshivhi, ḽifhasi ḽo no vha Pharadiso ye Yehova a vha tshi ṱoḓa uri i vhe hone u bva mathomoni, Yesu na vha 144 000 vhane a ḓo vhusa navho, vha ḓo ḓiṱukufhadza nga nḓila khulwane nga u vhuyedzedza Muvhuso kha Yehova. Musi Miṅwaha ya 1 000 i tshi  fhela, a vha tsha ḓo shumisa maanḓa a u vhusa e vha vha vhe nao. Zwenezwo vha ḓo zwi ita nga u ḓifunela. Zwoṱhe zwine Muvhuso wa ḓo zwi ita zwi ḓo dzula zwi hone u ya nga hu sa fheli.

21, 22. (a) Shango ḽi ḓo vha ḽi hani mafheleloni a miṅwaha ya 1 000? (b) Ndi ngani Yehova a tshi ḓo vhofholola Saṱhane na madimoni awe?

²¹ Yehova u ḓo ita zwithu zwi songo ḓoweleaho, zwi sumbedzaho uri u fhulufhela vhashumeli vhawe vha kha ḽifhasi. U ḓo ita uri Saṱhane na madimoni awe vha bviswe mugodini une vha ḓo vha vho valelwa khawo lwa miṅwaha ya 1 000. (Vhalani Nzumbululo 20:1-3.) Zwine Saṱhane na madimoni awe vha ḓo zwi vhona kha vhathu na ḽifhasi, zwi ḓo vha zwo fhambana vhukuma na zwe vha vha vha tshi zwi ḓivha. Musi nndwa ya Haramagedo i sa athu u vha hone, vhathu vhanzhi vho vha vho xedzwa nga Saṱhane, vha si na vhuthihi nga nṱhani ha vengo na luvhengelambiluni. (Nzumb. 12:9) Fhedzi musi miṅwaha ya 1 000 yo no fhela, vhathu vhoṱhe vha ḓo vha vha tshi khou gwadamela Yehova, vhe muṱa muthihi u re na lufuno. Ḽifhasi ḽi ḓo vha ḽi Pharadiso i re na mulalo.

²² Ndi ngani Yehova a tshi ḓo vhofholola zwenezwi zwigevhenga  zwi ngaho Saṱhane na madimoni awe uri zwi ḓe fhethu ho kunaho nga u rali? Ndi ngauri vhathu vhanzhi vhane vha ḓo vha vha tshi khou tshila musi miṅwaha ya 1 000 yo no fhela, vha ḓo vha vha sa athu u vhuya vha lingwa musi vha tshi khou shumela Yehova. Vhunzhi havho vho lovha vha sa ḓivhi Yehova, fhedzi vha vuselwa Pharadisoni. Yehova ho ngo sokou vha ṋea vhutshilo, fhedzi o dovha a vha ṋea zwoṱhe zwine vha zwi ṱoḓa na u ita uri vha vhe na vhushaka havhuḓi nae. Vha ḓo vha vha songo ṱuṱuwedzwa nga vhathu vhavhi, fhedzi vha ḓo vha vho ṱuṱuwedzwa nga vhathu vho lugaho. Vha ḓo vha vhe vhukati ha vhathu vhane vha funa Yehova na u mu shumela. Saṱhane a nga pomoka vhenevho vhathu vho vuswaho u fana na zwe a zwi ita kha Yobo. A nga vha pomoka uri vha shumela Mudzimu fhedzi ngauri u a vha tsireledza na u vha fhaṱutshedza. (Yobo 1:9, 10) Ngauralo, musi Yehova a sa athu u ṅwala madzina ashu lwa tshoṱhe buguni ya vhutshilo, u ḓo ri ṋea tshibuli tsha uri ri sumbedze uri ri a fhulufhedzea khae sa Khotsi ashu na Muvhusi washu.—Nzumb. 20:12, 15.

23. Ndi mulingo ufhio une muṅwe na muṅwe a ḓo sedzana nawo?

 ²³ Saṱhane u ḓo tendelwa lwa tshifhinganyana uri a kunge vhathu uri vha litshe u shumela Mudzimu. U ḓo vha linga hani? A zwi timatimisi uri muṅwe na muṅwe u ḓo sedzana na mulingo u fanaho na we Adamu na Eva vha sedzana nawo. Ri ḓo tea u khetha u tshila u tendelana na milayo ya Mudzimu, u tikedza vhuvhusi hawe na u mu gwadamela kana u khetha u shandukela Mudzimu ra tikedza Saṱhane.

24. Ndi ngani vhane vha shandukela Mudzimu vha tshi vhidzwa Gogo na Magogo?

²⁴ Vhalani Nzumbululo 20:7-10. Vhane vha ḓo shandukela Mudzimu musi miṅwaha ya 1 000 yo no fhela, vha vhidzwa Gogo na Magogo. Zwine vha ḓo zwi ita zwi fana na zwe zwa itwa nga vhe vha shandukela Mudzimu, vhe Hesekiele a porofita nga havho uri vha ḓo ṱhasela vhathu vha Mudzimu nga tshifhinga tsha maṱungu mahulu. Tshenetsho tshigwada tsha u thoma tshine tsha vha “Gogo wa ngei shangoni ḽa Magogo,” tsho vha tshi tshaka dzo fhambanaho dze dza pikisa vhuvhusi ha Yehova. (Hesek. 38:2) Nga hu fanaho, vhane vha ḓo shandukela Mudzimu musi Miṅwaha ya 1 000 yo no fhela, na vhone vha vhidzwa ‘dzitshaka.’ U shumiswa ha ḽeneḽi ipfi zwi a mangadza. Ndi ngani? Nga nṱhani ha uri musi Yesu a tshi Vhusa lwa Miṅwaha ya 1 000, hu ḓo vha hu si tsheena tshaka dzo fhandekanaho, vhathu vhoṱhe vha ḓo vha vhe fhasi ha Muvhuso  muthihi wa Mudzimu. Roṱhe ri ḓo vha ri lushaka luthihi lu gwadamelaho Yehova. Musi vhuporofita vhu tshi amba uri vhenevha vhathu vhane vha shandukela Mudzimu ndi Gogo na Magogo na uri ndi ‘dzitshaka,’ zwenezwi zwi sumbedza uri Saṱhane u ḓo kona u ita uri vhaṅwe vha vhathu vha Mudzimu vha fhandekane. A hu na ane a ḓo kombetshedzwa u ima na Saṱhane. Muṅwe na muṅwe u ḓo tou ḓikhethela.

25, 26. Ndi vhangana vhane vha ḓo tevhela Saṱhane, nahone hu ḓo itea mini khavho?

²⁵ Ndi vhangana vhane vha ḓo tevhela Saṱhane? Tshivhalo tsha vhane vha ḓo shandukela Mudzimu tshi ḓo nga “muṱavha wa lwanzhe.” Eneo maipfi ha ambi uri vhathu vhanzhi vha ḓo shandukela Mudzimu. Ri zwi ḓivha hani? Ṱhogomelani zwe Abrahamu a fhulufhedziswa zwone. Yehova o amba uri vhana vha Abrahamu vho vha vha tshi ḓo nga “muṱavha wa khunzi-khunzini ya lwanzhe.” (Gen. 22:17, 18) Fhedzi tshivhalo tsha vhana vhawe tsho fhedzisela tshi 144 001. (Vhagal. 3:16, 29) Naho vhenevho vhana vhe vhanzhi, fhedzi ndi vhaṱuku musi ri tshi vha vhambedza na tshivhalo tsha vhathu vhoṱhe. Nga hu fanaho, vhane vha ḓo tevhela Saṱhane vha nga vhonala vhe vhanzhi, fhedzi a vha nga vhi vhanzhi lune zwa ḓo tou mangadza. Vhenevho vhathu vha mashandukwa vha nga si kone u fhelisa vhashumeli vha Yehova vha fhulufhedzeaho.

 ²⁶ Vhane vha ḓo tevhela Saṱhane vha ḓo fheliswa nga u bonya ha iṱo. Vhenevho vhathu vha ḓo fheliswa lwa tshoṱhe khathihi na Saṱhane na madimoni awe. A vha tsha ḓo dovha vha tshila. Zwine zwa ḓo sala zwi tshi humbulwa ndi phetho dzavho dzi si dzavhuḓi na masiandoitwa a dzenedzo phetho.—Nzumb. 20:10.

27-29. Vhane vha ḓo kunda musi vha tshi lingwa lwa u fhedza vha ḓo wana mini?

²⁷ Kha ḽiṅwe sia, vhane vha ḓo kunda musi vha tshi lingwa lwa u fhedza, madzina avho a ḓo ṅwalwa lwa tshoṱhe “buguni ya vhutshilo.” (Nzumb. 20:15) Nga tshenetsho tshifhinga, vhoṱhe vhane vha vha vharwa na vhananyana vha Yehova vha fhulufhedzeaho, vha ḓo mu gwadamela nga vhuthihi sa muṱa, samusi o tewa nga u gwadamelwa.

²⁸ Humbulani nga ha honoho vhumatshelo. Ni ḓo ita mushumo u vhuyedzaho na vha na khonani dzavhuḓi. Inwi na vhane na vha funa, a ni tsha ḓo dovha na shengela. Ri ḓo kona u shumela Yehova sa vhathu vho lugaho, ri si tsha ṱoḓa tshirengululi, samusi ri tshi ḓo vha ri si tsheena tshivhi. Muṅwe na muṅwe u ḓo vha khonani ya Yehova hu si na tshi mu thivhelaho. Tsha ndeme u fhira zwoṱhe ndi uri Yehova u ḓo dzula a tshi gwadamelwa nga vhuḓalo kha vhurabeli ho kunaho, ṱaḓulu na kha ḽifhasi. Vhurabeli ho kunaho vhu ḓo vha ho vusuluswa lwa u fhedza!

²⁹ Naa ni ḓo vha ni hone uri ni vhone ḽeneḽi ḓuvha ḽihulu? Ni nga vha hone arali na bvela phanḓa ni tshi ita zwithu zwiraru zwa ndeme  zwe ra zwi guda kha bugu ya Hesekiele: U ḓikumedza tshoṱhe kha Yehova, u dzula ni na vhuthihi kha vhurabeli ho kunaho na u sumbedza uri ni funa vhaṅwe. Vhuporofita ha Hesekiele vhu dovha ha ri gudisa tshithu tshithihi tsha u fhedza tsha ndeme. Ndi tshifhio?

30, 31. Maipfi ane a ri “vha ḓo ḓivha uri ndi nṋe Yehova” a ḓo amba mini (a) kha maswina a Mudzimu? (b) kha vhathu vha Mudzimu?

³⁰ Kha bugu yoṱhe ya Hesekiele, maipfi ane a ri “vha ḓo ḓivha uri ndi nṋe Yehova” a dovhololwa lunzhi-lunzhi. (Hesek. 6:10; 39:28) Zwenezwo zwi ḓo amba nndwa na lufu kha maswina a Mudzimu. Vha ḓo kombetshedzea u ita zwi fhiraho u sokou tenda uri Mudzimu u hone. Vha ḓo guda nga nḓila i vhavhaho zwine dzina ḽawe ḽihulwane ḽa amba zwone. Ḽi amba uri “U Ita Uri Zwi Vhe Hone.” “Yehova wa mavhuthu” ane a ḓo lwa navho, u ḓo vha “muhali wa maanḓa.” (1 Sam. 17:45; Ek. 15:3) Vha ḓo vha vho no lenga musi vha tshi sala vha tshi pfesesa ngoho nga ha Yehova. Ngoho ine ya ri: A hu na tshine tsha nga mu thivhela u ita zwe a ḓiimisela zwone.

³¹ Kha vhathu vha Mudzimu, maipfi ane a ri “vha ḓo ḓivha uri ndi nṋe Yehova,” a ḓo amba mulalo na vhutshilo. Yehova u ḓo ita uri ri tshile nga nḓila ye a vha a tshi ṱoḓa ri tshi tshila ngayo u bva mathomoni. Ri ḓo vha vharwa na vhananyana vhane vha sumbedza zwine a vha zwone nga ho fhelelaho. (Gen. 1:26) Yehova o no ḓi vha Khotsi ane a ri funa na Mulisa ane a ri tsireledza. Hu si kale u ḓo vha Khosi yashu i kundaho. Musi ḽeneḽo ḓuvha ḽi sa athu u swika, kha ri dzule ri tshi humbula mulaedza wa Hesekiele. Kha ri dzule ri tshi sumbedza ḓuvha ḽiṅwe na ḽiṅwe uri ri a ḓivha Yehova na zwine a imela zwone. Ri zwi sumbedze nga zwine ra zwi amba na zwine ra zwi ita. Zwenezwo zwi ḓo ita uri ri si ofhe musi maṱungu mahulu a tshi thoma. Fhedzi ri ḓo vha na tshivhindi ngauri ri ḓo zwi ḓivha uri u vhofhololwa hashu hu tsini. (Luka 21:28) Musi ri tshee ro lindela tshenetsho tshifhinga, u nga ri ri nga thusa vhathu vhoṱhe uri vha ḓivhe na u funa Mudzimu muthihi fhedzi o fanelwaho nga u gwadamelwa. Onoyo ndi Mudzimu ane a vha na dzina ḽi fhiraho madzina oṱhe, ḽine ḽa vha Yehova.—Hesek. 28:26.