Kha Vhoṱhe Vha Funaho Yehova:

Ho vha hu ṅwaha wa 1971. Vho yaho Guvhanganoni ḽa Tshiṱiriki nga wonoyo ṅwaha ḽi re na tshiṱoho tshine tsha ri “Divine Name,” vho takalela u ṱanganedza khandiso ntswa dzo vhalaho. Vhe vha wana dzenedzo khandiso vho amba uri “vho vha vha songo dzi lavhelela.” Muṅwe wahashu o amba zwi tevhelaho nga ha iṅwe ya dzenedzo khandiso, o ri: “A ri athu u vhuya ra vha na khandiso ine ya ri vhudza nga ha zwithu zwi takadzaho zwine zwa khou ḓa!” O vha a tshi khou amba nga ha khandiso ifhio? Ndi bugu ine ya pfi “The Nations Shall Know That I Am Jehovah”—How? Ndi ngani vhathu vho takalela yeneyo bugu nga u rali? Ndi ngauri yo vha i tshi ṱalutshedza khwine vhuporofita vhu wanalaho kha bugu ya Hesekiele, vhune ha vha vhuporofita vhu kwamaho vhumatshelo ha vhathu vhoṱhe.

U bva tshee ha vha na bugu i re na tshiṱoho tshine tsha ri ‘Know Jehovah,’ vhathu vha Mudzimu vho engedzea. Vho thoma vhe miḽioni dzi ṱoḓaho u vha 1,5, vha engedzea vha vha miḽioni dzi fhiraho 8. (Yes. 60:22) Vhenevha vhashumeli vha Yehova vha dzimiḽioni, vha amba nyambo dzi fhiraho 1 000. (Sak. 8:23) Vhanzhi a vho ngo wana tshibuli tsha u vhala bugu i ṱalutshedzaho nga vhuḓalo vhuporofita ho ṅwalwaho nga muporofita Hesekiele.

Zwiṅwe hafhu, u bva nga 1971, ro thoma u pfesesa khwine mafhungo manzhi a re Bivhilini musi tshedza tshi tshi khou ḓi bvela phanḓa tshi tshi vhonetshela. (Mir. 4:18) Nga 1985, ro thoma u zwi pfesesa zwavhuḓi uri ndi ngani vha “dziṅwe nngu” vha tshi vhidzwa uri vho luga sa khonani dza Mudzimu. (Yoh. 10:16; Vharoma 5:18; Yak. 2:23) Nga 1995, ro pfesesa lwa u tou thoma uri vhathu vha ḓo haṱulwa lwa u fhedza sa “nngu” na “mbudzi” tshifhingani tsha “maṱungu mahulu.” (Mat. 24:21; 25:31, 32) Dzenedzi tshanduko dzoṱhe dzo kwama nḓila ine ra pfesesa ngayo bugu ya Hesekiele.

Kha miṅwaha ya zwenezwino, tshedza tsho bvela phanḓa tshi tshi vhonetshela. Ṱhogomelani zwe ra zwi guda kha zwifanyiso zwa Yesu. Ri vho pfesesa khwine vhunzhi ha zwithu zwe ra zwi guda. Vhunzhi ha zwenezwo zwifanyiso, zwi ri vhudza nga ha zwithu zwine zwa ḓo itea nga maṱungu mahulu ane a ḓo vha hone hu si kale. Nga hu fanaho, ho khwiniswa nḓila ine ra pfesesa ngayo vhuṅwe vhuporofita vhu re kha bugu ya Hesekiele. Vhuṅwe ha honoho vhuporofita ndi vhune ha amba nga ha Gogo wa Magogo (ndima 38 na 39), mushumo wa muṅwaleli a re na tshishumiswa tsha u fara inki na tsha u ṅwala (ndima 9), govha ḽa marambo o omaho na u ṱanganywa ha thanda mbili nga lwa pfanyisedzo (ndima 37). Zwenezwi zwithu zwoṱhe zwo khwinisa zwe zwa ṅwalwa miṅwahani minzhi yo fhelaho kha bugu ine ya pfi ‘Know Jehovah.’

Ndi ngazwo vhunzhi ha vhathu vha Yehova vho ḓivhudzisa uri, “Ri ḓo wana lini bugu ine ya ṱalutshedza khwine vhuporofita ha Hesekiele?” Bugu ine ya ri Yehova O Vusulusa Vhurabeli Ho Kunaho! ndi yone ine ya zwi ṱalutshedza khwine. Musi ni tshi vhala yeneyi bugu i re na ndima dza 22 na u elekanya nga zwifanyiso zwi re khayo, ni ḓo mangadzwa vhukuma nga ṱhoḓisiso ye ya itwa musi hu tshi khou lugiselelwa yeneyi bugu. Ro rabela vhukuma u itela u ḓivha uri ndi ngani Yehova o ri ṋea yeneyi bugu ya Hesekiele i takadzaho. Ro humbulisisa nga vhuronwane mbudziso dzi fanaho na hedzi: Riṋe na vhe vha tshila misini ya Hesekiele, ri guda mini kha bugu ya Hesekiele? Ndi vhuporofita vhufhio vhu ambaho nga zwithu zwine zwa ḓo itea tshifhingani tshi ḓaho? Naa hu na zwiṅwe  zwithu zwi re kha vhuporofita ha Hesekiele zwine zwa imela zwiṅwe zwithu ṋamusi? Phindulo dza dzenedzi mbudziso dzi ita uri ri pfesese khwine yeneyi bugu ya Bivhili ine ra takalela u i vhala.

Musi ni tshi vhala bugu ya Hesekiele u bva mathomoni u swika magumoni, zwi ḓo ita uri ni takalele tshipiḓa tsha ṱaḓulu tsha ndangulo ya Yehova. A zwi timatimisi uri ni ḓo takadzwa na nga milayo ya Yehova ya vhuimo ha nṱha ye a i vhetshela vha re ṱaḓulu na vha re kha ḽifhasi vhane vha ṱoḓa u mu gwadamela nga nḓila ine a i ṱanganedza. Yeneyi bugu ine ya ri Vhurabeli Ho Kunaho i ḓo ita uri ni dzhiele nṱha nga ho engedzeaho zwe Yehova a zwi itela vhathu vhawe na zwine a ḓo vha itela zwone hu si kale. Ni ḓo ṱhogomela uri yeneyi bugu i ombedzela mbuno mbili lunzhi-lunzhi. Mbuno ya u thoma ndi ya uri, u itela u takadza Yehova, ri fanela u mu ḓivha na u ṱanganedza uri ndi ene Muvhusahoṱhe. Ya vhuvhili ndi ya uri, ri fanela u gwadamela Yehova nga nḓila ine a i ṱanganedza na u tshila u tendelana na milayo yawe ya vhuimo ha nṱha.

Ri tama nga mbilu yoṱhe uri yeneyi bugu i ni thuse uri ni ḓiimisele vhukuma u gwadamela Yehova nga nḓila ine ya hulisa dzina ḽawe ḽihulwane ḽine ḽa vha ḽikhethwa. U nga ri i nga dovha ya ni ṱuṱuwedza uri ni dzule no lavhelela tshifhinga tshine tshaka dzoṱhe dza ḓo ḓivha uri ndi ene Yehova.—Hesek. 36:23; 38:23.

U nga ri Yehova ane a vha Khotsi ashu wa lufuno, a nga fhaṱutshedza vhuḓidini haṋu ha u pfesesa bugu ye a hevhedza Hesekiele uri a i ṅwale.