YEHOVA u dzula a tshi ḓifanyisa na mulisa o raloho. Ipfini ḽawe, u ri khwaṱhisedza uri: “Nṋe muṋe nngu dzanga ndi ḓo dzi ṱoḓa nda dzi londota.”—Hesekiele 34:11, 12.

Ndi vhafhio vhane vha vha nngu dza Yehova? Nngu dza Yehova ndi vhathu vhane vha mu funa na u mu gwadamela. Bivhili i ri: “Kha ri dzhene ri khothe, ri loshe, ri gwadame ró livha Yehova we a ri sika. Mudzimu washu ndi Ene; riṋe ri vhathu vha pfulo yawe, ri sambi ḽa tshanḓa tshawe.” (Psalme ya 95:6, 7) U fana na nngu dza vhukuma dzi tshi khou tevhela mulisa, vhagwadameli vha Yehova vha fhisetshela u tevhela Mulisa wavho. Naa vho fhelela? Na khathihi. Nga zwiṅwe zwifhinga, vhashumeli vha Mudzimu vho vha ‘nngu dzo fhaḓiwaho,’ na “nngu dzo xelaho.” (Hesekiele 34:12; Mateo 15:24; 1 Petro 2:25) Naho zwo ralo, musi muthu a tshi pambuwa, Yehova u dzula a tshi fulufhela uri u ḓo vhuya.

Naa ni vhona u nga Yehova u kha ḓi vha Mulisa waṋu? Yehova u sumbedza hani uri ndi Mulisa ṋamusi? Ṱhogomelani nḓila tharu:

 U ri kanzwa nga lwa muya. Yehova u ri: “Ndi ḓo dzi fulisa pfuloni dzavhuḓi, hune dza ḓo lala mirangani yavhuḓi, dza fula pfulo ya mapfura.” (Hesekiele 34:14) Yehova ha athu u vhuya a kundwa u ri kanzwa nga zwiḽiwa zwa muya zwi homolosaho zwo fhamba-fhambanaho nga tshifhinga tshazwo. Naa hu na thero, nyambo kana vidio ine na i humbula ye ya fhindula thabelo yaṋu musi ni tshi ṱoḓa thuso? Naa zwenezwo a zwo ngo ni khwaṱhisedza uri Yehova u a ni ṱhogomela?

U a ri tsireledza na u ri tikedza. Yehova u a fulufhedzisa: “Dzo fhaḓiwaho ndi ḓo dzi humisa; dzo huvhalaho ndi ḓo dzi lukela; dzi lwalaho ndi ḓo dzi ilafha.” (Hesekiele 34:16) Yehova u khwaṱhisa vho kuleaho nungo kana u tsikeledzwa nga mbilaelo. U banditsha nngu dzawe a dzi thusa uri dzi fhole arali dzo vhaisala—khamusi dzo vhaiswa na nga vhatendi ngadzo. U vhuyedzedza vho pambuwaho na vhane vha nga vha vha tshi khou lwisana na maḓipfele a si avhuḓi.

U ḓipfa e na vhuḓifhinduleli kha riṋe. Yehova u ri: “Ndi ḓo ralo ndi tshi londota nngu dzanga, nda dzi lamulela thungo dzoṱhe he dza balanganela hone. Dzo xelaho ndi ḓo dzi ṱoḓa.” (Hesekiele 34:12, 16) Yehova ha dzhii nngu yo xelaho sa muthu ane a sa ḓo shanduka. U a zwi ḓivha musi nngu yo xela, u a i ṱoḓa nahone u a takala musi a tshi i wana. (Mateo 18:12-14) Hafhu u vhidza vhagwadameli vhawe vha ngoho “sambi ḽanga; . . . sambi ḽa u liswa nga Nṋe.” (Hesekiele 34:31) Ni muṅwe wa dzenedzo nngu.

Ndi ngani Yehova a tshi ni ṱoḓa na u ni ramba uri ni vhuyelele khae? Ndi ngauri u ṱoḓa ni tshi takala. U fulufhedzisa uri nngu dzawe dzi “ḓo tou vha mibvumbi ya phaṱhutshedzo.” (Hesekiele 34:26) Ḽeneḽo fulufhedziso ḽi ḓo ḓadzea. No no ḓi vhona mafulufhedziso awe a tshi ḓadzea.

Humbulani nga ha tshenzhelo dzaṋu musi ni tshi thoma u ḓivha Yehova. Sa tsumbo, no ḓipfa hani musi ni tshi thoma u guda ngoho i takadzaho nga ha dzina ḽa Mudzimu na nga ha ndivho yawe nga ha vhathu? Naa ni kha ḓi humbula uri zwo vha zwi tshi homolosa lungafhani u vha na vhuthihi na Vhakriste nga inwi maguvhanganoni na mabuthanoni? Musi ni tshi kona u vhudza muthu we a sumbedza dzangalelo ḽa vhukuma mafhungo maḓifha, naa no vha ni sa humeli hayani no takala nahone no fushea vhukuma?

Ni nga dovha na takala nga yeneyo nḓila. Vhashumeli vha Mudzimu vha tshifhingani tsho fhiraho vho rabela vha ri: “Yehova, ri humise ri vhuyelele ha Iwe; dovha u vuse aḽa maḓuvha e ra a vhona zwiḽa kale.” (Zwililo zwa Yeremia 5:21) Yehova o fhindula yeneyo thabelo nahone vhathu vhawe vha dovha vha mu shumela vho takala. (Nehemia 8:17) Yehova u ḓo ita zwi fanaho na kha inwi.

Naho zwo ralo, zwi a leluwa u amba uri ri vhuyelele kha Yehova, fhedzi u zwi ita zwi a konḓa. Ṱhogomelani dziṅwe khaedu dza u vhuyelela na nḓila ine na nga kona ngayo u dzi kunda.