MUTHU muṅwe na muṅwe u na mbilaelo—u katela na vhathu vha Mudzimu. Mupsalme o ṅwala a ri: ‘Mbilaelo nnzhi dzo ndzhena.’ (Psalme ya 94:19) Na Yesu o amba uri tshifhingani tsha vhufhelo, “mbilaelo dza vhutshilo” dzi ḓo ita uri zwi konḓe vhukuma u shumela Yehova. (Luka 21:34) Hu pfi mini nga inwi? Naa ni a lemelwa nga thaidzo dza zwa dzitshelede, dza muṱa kana mbilaelo dza mutakalo? Yehova a nga ni thusa hani uri ni konḓelele?

Ri nga si kone u sedzana na mbilaelo nga roṱhe. Muapostola Paulo o ṅwala a ri: “Ri a tsikeledzea nga nḓila dzoṱhe. Ro hanganea . . . ; ri a poselwa fhasi.” Fhedzi o dovha a amba uri a ri “vhuimoni vhune ri si kone u bva khaho . . . hu si uri a ri na tshibuli tshine ra nga bva ngatsho” nahone “a ri lozwiwi.” Ndi mini zwine zwa ri thusa u konḓelela? Ndi “maanḓa a fhiraho o ḓoweleaho”—maanḓa ane a bva ha Yehova, Mudzimu washu ramaanḓaoṱhe.—2 Vhakorinta 4:7-9.

Elekanyani nga ha nḓila ye na wana ngayo “maanḓa a fhiraho o ḓoweleaho” tshifhingani tsho fhiraho. Naa ni kha ḓi humbula nḓila ye nyambo i ṱuṱuwedzaho ya khwaṱhisa ngayo nḓila ine na dzhiela ngayo nṱha lufuno lwa Yehova? Naa lutendo lwaṋu kha mafulufhedziso a Yehova lwo khwaṱha musi ni tshi funza vhaṅwe nga ha fulufhelo ḽa Paradiso? Musi ri tshi ya miṱanganoni ya Vhukriste na u vhudza vhaṅwe nga ha lutendo lwashu, ri wana nungo dza u lwisana na mbilaelo dza vhutshilo nahone ri vha na mulalo wa ngelelo une wa ita uri ri shumele Yehova ro takala.

Ngoho ndi ya uri ni nga vhona u nga hu na zwithu zwinzhi zwine na fanela u zwi ita nga tshifhinga tshithihi. Sa tsumbo, Yehova u ri humbela uri ri ṱoḓe Muvhuso u thoma na u dzula ro farakanea kha mishumo ya lwa muya. (Mateo 6:33; Luka 13:24) Naho zwo ralo, ni nga ita mini arali u pikiswa, mutakalo u si wavhuḓi kana thaidzo dza muṱa zwo ni kula nungo? Kana ni nga ita mini arali mushumo wa u ḓitshidza u tshi ni dzhiela tshifhinga na nungo zwine na fanela u zwi fhedza tshivhidzoni? Musi no sedzana na zwenezwi zwithu zwinzhi-zwinzhi—nahone ni si na tshifhinga na nungo dza u zwi ita zwoṱhe—ni nga ḓipfa no hanganea. Khamusi no no ita na u ḓivhudzisa arali Yehova o lavhelela zwinzhi kha inwi.

Yehova u a pfesesa. Ha lavheleli zwinzhi kha riṋe u fhira zwine ra nga mu ṋea. U a pfesesa uri zwi dzhia tshifhinga u dovha wa ima arali wo vha wo tsikeledzea ṋamani na maḓipfeleni.—Psalme ya 103:13, 14.

Sa tsumbo, ṱhogomelani nḓila ye Yehova a ṱhogomela ngayo muporofita Elia. Musi Elia a tshi kulea nungo nahone a dzhenwa nga nyofho lwe a shavhela sogani, naa Yehova o mu halifhela nahone a mu vhudza uri a humele tshumeloni yawe? Hai. Luvhili lwoṱhe, Yehova o rumela muruṅwa uri a ye a vuse Elia nga vhulenda nahone a mu ṋee zwiḽiwa. Naho zwo ralo, nga murahu ha maḓuvha a 40, Elia o vha a tshee na mbilaelo na nyofho. Ndi zwifhio zwiṅwe zwe Yehova a zwi ita u itela u mu thusa? Tsha u thoma, Yehova o sumbedza uri a nga mu tsireledza. Tsha vhuvhili, Yehova o khuthadza Elia nga “mubvumo  wa muya wa vhulenda.” Mafheleloni, Yehova a dzumbulula uri ho vha hu na vhathu vhanzhi vhe vha vha vha tshi khou gwadamela Mudzimu nga u fulufhedzea. Hu si kale, Elia a dovha a vha muporofita a fhiseaho. (1 Dzikhosi 19:1-19) Ndi mini zwine ra zwi guda? Musi Elia a tshi vhilaela, Yehova ho ngo mu fhelela mbilu nahone o mu pfela vhuṱungu. Yehova ho ngo shanduka. U a ri ṱhogomela nga nḓila i fanaho.

Musi ni tshi humbula nga ha zwine na nga zwi ṋea Yehova, ni songo ḓivhetshela zwipikwa zwine na sa ḓo kona u zwi swikelela. Ni songo vhambedza zwine na kona u zwi ita ṋamusi na zwe na vha ni tshi zwi ita. Sa tsumbo: Mugidimi we a litsha u gidima lwa miṅwedzi kana miṅwaha yo vhalaho, a nga si nambe a kona u gidima nga nḓila ye a vha a tshi gidima ngayo u thomani. Nṱhani hazwo, u thoma nga u ḓivhetshela zwipikwa zwiṱuku zwine zwa ita uri a vhe na nungo na u konḓelela. Vhakriste vha fana na vhagidimi. Vha ita nḓowe-nḓowe vho ḓivhetshela tshipikwa. (1 Vhakorinta 9:24-27) Zwi nga vha zwavhuḓi arali na ḓivhetshela tshipikwa tshithihi tsha lwa muya tshine tsha vhonala tshi tshi swikelelea zwino. Sa tsumbo, ni nga ḓivhetshela tshipikwa tsha u ya muṱanganoni wa tshivhidzo. Humbelani Yehova uri a ni thuse u swikelela tshipikwa tshaṋu. Musi ni tshi dovha na vha na nungo dza lwa muya nga zwiṱuku nga zwiṱuku, ni ḓo ‘thetshela na vhona vhuthu ha Yehova uri ndi vhungafhani.’ (Psalme ya 34:8) Humbulani uri naho tshi tshini tshine na tshi ita u sumbedza uri ni funa Yehova—hu sa londwi uri tshi vhonala tshi tshiṱuku lungafhani—ndi tsha ndeme khae.—Luka 21:1-4.

Yehova o ṋea hani June nungo dza uri a vhuyelele khae? June u a ri vhudza: “Ndo dzula ndi tshi rabela Yehova ndi tshi humbela uri a nthuse. Ndi izwi-ha mazwale wanga a tshi mmbudza nga ha guvhangano ḽe ḽa vha ḽi tshi ḓo farelwa ḓoroboni yashu. Nda phetha nga ḽa uri ndi ḓo ya ḓuvha ḽithihi fhedzi. Zwo vha zwi zwavhuḓi lungafhani u dovha nda vha na vhathu vha Yehova! Ḽeneḽo guvhangano ḽo vha ṱhuṱhuwedzo ye nda vha ndo i lindela. Zwino ndi vho dovha nda shumela Yehova ndo takala. Vhutshilo hanga vhu na ndivho. Zwino ndi a zwi ḓivha uri ndi ṱoḓa vhahashu vha tshinnani na vha tshisadzini nahone ndi fanela u ṱanganedza thuso yavho. Ndi a livhuha uri ho vha hu tshi kha ḓi vha na tshifhinga tsha uri ndi vhuyelele.”