TSHIPIḒA 4
U Ḓivhona Mulandu—“U Bvise Vhutshinyi Hanga Kha Nṋe”
“Mushumo wanga muswa wo khwinisa matshilele a muṱa washu, fhedzi wo dovha wa ita uri ndi ite zwithu zwi songo fanelaho Vhakriste. Ndo thoma u pembelela dziholodei, u ḓidzhenisa kha zwa dzipolitiki na u ya kerekeni. Ndo vha ndi Ṱhanzi ya Yehova yo fholaho lwa miṅwaha ya 40. Musi tshifhinga tshi tshi khou ḓi ṱanḓulukana, ndo vhona u nga Yehova a nga si tsha nkhangwela. Ndo vhona uri ndi nga si tsha ḓihangwela. Hafhu ndo vha ndi tshi ḓivha ngoho musi ndi sa athu u pambutshela kha nḓila yo khakheaho.”—Martha.
U ḒIVHONA mulandu zwi nga vha muhwalo u tsikeledzaho. Khosi Davida o ṅwala uri: “Milandu yanga yo wela kha ṱhóho yanga, i mvunḓa vhunga muhwalo u lemelaho.” (Psalme ya 38:4) Vhaṅwe Vhakriste vho tsikeledzwa nga u ṱungufhala lwo kalulaho, vha tshi vhona u nga Yehova a nga si vhuye a vha hangwela. (2 Vhakorinta 2:7) Naa zwenezwo ndi ngoho? Naho arali no ita zwivhi zwihulwane vhukuma, naa ni kule na Yehova lune a nga si vhuye a ni hangwela? Na khathihi!
“Iḓani-Ha Ri Rovhedzane!”
Yehova ha ṱutsheli vhaitazwivhi vho rembuluwaho. Zwi re zwone ndi uri u ṱoḓa u vha thusa! Kha tshifanyiso tsha murwa wa ḽihwarahwara, Yesu u fanyisa Yehova na khotsi a re na lufuno we murwa wawe a ṱutshela muṱa wa hawe nahone a thoma u tshila nga nḓila ya vhuhwarahwara. Nga u ya ha tshifhinga, onoyo murwa a dzhia phetho ya u humela hayani. “Musi khotsi awe a tshi mu vhona a tshi kha ḓi vha kule, a mu pfela vhuṱungu, a mu gidimela a mu kuvhatedza nahone a mu khisa.” (Luka 15:11-20) Naa ni a ṱoḓa u sendela tsini na Yehova, fhedzi na vhona u nga ni “kule” nae? Yehova u a ni pfela vhuṱungu u fana na khotsi o bulwaho kha tshifanyiso tsha Yesu. O ḓiimisela u ni ṱanganedza.
Fhedzi ni nga ita mini arali ni tshi vhona u nga zwivhi zwaṋu ndi zwihulwane kana ndi zwinzhi lune Yehova a nga si ni hangwele? Ri humbela uri ni ṱhogomele khumbelo ya Yehova yo ṅwalwaho kha Yesaya 1:18 ine ya ri: “Iḓani-ha ri rovhedzane! U ralo Yehova. Naho zwivhi zwaṋu zwó tswuka sa muridili, zwi ḓo tshena zwa nga mahaḓa.” Vhukuma, na zwivhi zwo dondofhalaho sa muridili kha tshiambaro tshitshena, Yehova u ḓo zwi hangwela.
Yehova ha ṱoḓi uri ni dzule ni tshi dinwa nga luvalo lune lwa ḓivhona mulandu. Nga zwenezwo-ha, ni nga tshenzhela hani mbofholowo i ḓiswaho nga u hangwelwa nga Mudzimu na u vha na luvalo lwo kunaho? Ṱhogomelani vhukando vhuvhili he Khosi Davida a vhu dzhia. O thoma nga u ri: “Ndi ḓo vhudza Yehova zwe nda tshinya!” (Psalme ya 32:5) Humbulani uri Yehova o no ḓi dzula o ni humbela uri ni ambe nae nga thabelo na u ‘rovhedzana’ nae. Ṱanganedzani yeneyo khumbelo. Bulelani Yehova zwivhi zwaṋu nahone ni mu vhudze maḓipfele aṋu. Zwe Davida a zwi tshenzhela zwo mu ita uri a rabele e na fulufhelo a ri: “U bvise vhutshinyi hanga kha nṋe . . . mbilu yo ṱhavhiwaho, yo paḓukanaho Iwe Mudzimu a U nga i nyadzi.”—Psalme ya 51:2, 17.
Tsha vhuvhili, Davida o wana thuso kha muporofita Nathani ane a vha muimeleli o vhewaho nga Mudzimu. (2 Samuele 12:13) Ṋamusi, Yehova o vhea vhahulwane vha tshivhidzo vhe vha gudiswa u itela u thusa vhaitazwivhi vho rembuluwaho uri vha dovhe vha vhe na vhukonani na Yehova. Musi ni tshi amba na vhahulwane, vha ḓo shumisa Maṅwalo nahone vha rabela zwi tshi bva mbiluni u itela u rindidza mbilu yaṋu, vha ita uri ni si tsha vha na mahumbulele o khakheaho na u ni thusa uri ni fhisee nga lwa muya.—Yakobo 5:14-16.
Yehova u ṱoḓa ni tshi tshenzhela mbofholowo ine ya ḓiswa nga u vha na luvalo lwo kunaho
“Wa Mashudu Ndi Uyo We A Hangwelwa Zwivhi”
Vhukuma, ni nga vhona u nga u bulela Yehova Mudzimu zwivhi zwaṋu na u amba na vhahulwane zwi nga vha zwithu zwi konḓaho vhukuma. Na Davida o ḓipfa nga yeneyo nḓila. Ho ngo ‘bula’ zwivhi zwawe lwa tshifhinganyana. (Psalme ya 32:3) Naho zwo ralo, nga murahu o livhuha mbuyelo dze a dzi wana nga u bula zwivhi zwawe na u khakhulula buḓo ḽawe.
Davida o vhuyelwa vhukuma nga u ita zwenezwo, zwo ita uri a dovhe a takale. O ṅwala uri: “Wa mashudu ndi uyo we a hangwelwa zwivhi, we vhutshinyi hawe ha fukedzwa.” (Psalme ya 32:1) O dovha a rabela a ri: “Muṋe wanga! vula mulomo wanga, uri ndi pfadze thendo dzau.” (Psalme ya 51:15) Nge Davida a rulwa muhwalo wa u ḓivhona mulandu nahone a tshi livhuha u hangwelwa nga Mudzimu, o mbo ḓi ṱuṱuwedzea u vhudza vhaṅwe nga ha Yehova.
Yehova u ṱoḓa ni tshi vha na mbofholowo ine ya ḓiswa nga u vha na luvalo lwo kunaho. U ṱoḓa ni tshi vhudza vhaṅwe nga hae na nga ndivho dzawe, hu si nga u ḓipfa ni na mulandu, fhedzi zwi tshi bva mbiluni nahone no takala vhukuma. (Psalme ya 65:1-4) Humbulani nga ha khumbelo yawe ya u ‘shandula matshilele aṋu uri ni hangwelwe zwivhi, uri Yehova a ni homolose.’—Mishumo 3:19.
Zwenezwo ndi zwe zwa itea kha Martha. U ri: “Murwa wanga o bvela phanḓa a tshi nthumela magazini dza Tshiingamo na Awake! Nga zwiṱuku nga zwiṱuku, ndo dovha nda ḓipfa ndi tsini na Yehova. Zwithu zwe zwa konḓa vhukuma musi ndi tshi vhuya ho vha hu u humbela pfarelo kha zwivhi zwoṱhe zwe nda zwi ita. Fhedzi mafheleloni ndo amba na Yehova nga thabelo ndi tshi humbela uri a nkhangwele. Zwi mangadzaho ndi uri ndo vhuyelela kha Yehova nga murahu ha miṅwaha ya 40. Tshenzhelo yanga i ṋea vhuṱanzi ha uri na nga murahu ha miṅwaha minzhi, muthu a nga ṋewa tshiṅwe tshibuli tsha u shumela Mudzimu nahone a dovha a funwa ngae.”
You May Also Like
TSHIINGAMO—TSHI GUDWAHO
U Hangwelwa Nga Yehova Zwi Amba Mini Kha Inwi?
Nḓila ye Yehova a shumisa ngayo na vhaitazwivhi tshifhingani tsho fhiraho i nga ri funza zwinzhi nga ha u ḓiimisela hawe u hangwela.
SENDELANI TSINI NA YEHOVA
Mudzimu O “Ḓiimisela U Hangwela”
Arali Mudzimu a tshi humbula zwithu zwoṱhe, a nga kona hani u hangwela na u hangwa?
VIDIO
Ḽihwarahwara Ḽi A Vhuya
Zwi ṱungufhadzaho ndi uri vhaswa vha nga ṱuṱuwedzwa uri vha ṱutshele nḓila ya Vhukriste ye vha aluswa ngayo. Vhonani khombo dza vhukuma dzine vhaswa vha sedzana nadzo ṋamusi.
